1 ดอ ตัห กาฌูะ เฆ ดูอี อีซาเรลัะ ดี มืง มีฌาพา ตึอน, เฆ บอ ดืง ต็อห, “กาแต เอ นี อึณ ตู มึห อาเซ คอ อู วี อี แตห ฆอน ดีบยา อัน คัด ดึห ดูอี อาเบนยาม.”

2 ปาย ตี แคะ กอย เฆ ดูอี อีซาเรลัะ บอกาเฆลียด บอ ฮาว ดี มืง เบดาเอน บอ กอย นา อาต เฌาพรา บอ ยาม ตาง กาเซา บอ หงูน ต็อห, 3 “อึย แม เฌาพรา อี มูห เฌาพรา ปี กรึบ เย ดูอี อีซาเรลัะ, เหมา อึณ ปาย ปี แบน ปาย นี ดี เย? อาตึร นี, ดูอี กานัร เย ดูอี อีซาเรลัะ แฮะ โบยห แฮะ หราย อาดา อู ครึร.”

4 อึณ บอ วี ฌัม ปัน แคหณา ซีณ ซีณวัห ว็อง, เฆ ดูอี อีซาเรลัะ บอ ยีต โบง กาโช็ง, แตห เฆ ปึอน ดี หลู ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม.

5 ปาย ตี เฆ ดูอี อีซาเรลัะ บอ วี ลาย ดีหมอด กานัร เฆ ต็อห, “อึณ ซี มึห อาเซ แคง ครึร ดูอี อีซาเรลัะ อี ตู ตัห กาฌูะ ดี อาต เฌาพรา ดี นี?” โคว, เฆ แฮะ ฮอต ดืง แฮะ ฮอต กาแซณ ต็อห, “อาเซ ตู ตัห กาฌูะ ดี อาต เฌาพรา ดี มืง มีฌาพา อาตึร นี, อึณ กาอาบ เย ดี ง็อห แวน อัน.”

6 แฮะ ฮอต ปาย ตี เฆ ดูอี อีซาเรลัะ บอ วี โหลห วา เฆ อี มูห ดูอี ครึร อาเบนยาม. เฆ บอ วี ลาย ต็อห, “อาตึร นี, ดูอี อีซาเรลัะ แฮะ ฮอต ชึม อาดา อู ครึร.

7 เหมา เอ ดี ปาย ดี วี เหรต อีบึณ, วี ดัว ดี เฆ ดูอี อาเบนยาม อี ซี ฆีด อี ซี อีม เฆ ตึอน. โคว, เอ แฮะ ฮอต ดืง, แฮะ ฮอต กาแซณ ดี อาต เฌาพรา ต็อห, ‘เอ ตู แตห ฆอน ดีบยา เอ คัด ดึห เฆ.’” 8 เฆ ปี วี ลาย ดีหมอด ต็อห, “แคง ครึร เอ ดูอี อีซาเรลัะ, อาเซ ตู ตัห กาฌูะ กรึบ เฌาพรา ดี มืง มีฌาพา นี?” แฮะ ฮอต, เฆ บอ วี นับ ดูอี อี กอย แคง มืง ยาเบดฆีเลอาด ตู ตัห กาฌูะ คอ อู วี โดบ พึง เฆ ดูอี กืน. 9 โคว, ดอ ตีห เฆ ดูอี บอกาเฆลียด, เฆ ดูอี แคง มืง ยาเบดฆีเลอาด อาว มึห คอ อู วี.

10 ปาย ตี เฆ ดูอี กืน บอ จัร ดา ซึก เฆ อี ยัะ กาโฆห อู หมึณ ดี อา แหรณ วี บอ กาลาง ดี เฆ ต็อห, “แตห เบ ฮาว กาโฆห, ฮาว ง็อห แวน ดูอี แคง มืง ยาเบดฆีเลอาด บอ อีบึณ บอ อีมาย บอ ฆอน. 11 เบ โลว ง็อห ยัม โตต อีมาย. บอ อีบึณ อี ตู มูห ดีบยา เบ โลว ง็อห แวน โตต ดอน อี.” 12 แคง มืง ยาเบดฆีเลอาด ตึอน, เฆ บอ ยึร ฆอน อีบึณ อี มูห ดีบยา แฌด อาดา พวน มาย็อห วี. เฆ บอ วี ดึห ตัห เฆ ตี ดี มืง ซีโลว อี กอย แคง กาดาย มืง กานัณ ตึอน.

13 แฮะ ฮอต, เฆ บอ วี จัร ดูอี ฮาว โดง กอย เฆ ดูอี อาเบนยาม อี กอย ดี ดาอาง มาว รีมโมน ตึอน. เฆ บอ วี กาลาง แตห เฆ นับ, ดา ซึก อี ลาย กาโฆห แฮะ ฮอต เยน. 14 ดูอี อาเบนยาม เฆ ตี บอ วี ตัห. เฆ ดูอี อีซาเรลัะ บอ วี ดึห ดีบยา ปี ตู ง็อห ยัม เฆ แคง มืง ยาเบดฆีเลอาด ตึอน, วี อาบ แตห อึณ แบน อีบึณ เฆ ดูอี อาเบนยาม ตี. มาแล, ดีบยา เฆ ตี ยี ตู โฆรว ตู ฆลึม อาดา เฆ ดอน อี.

15 เฆ ดูอี กืน บอ วี กาเว ดูอี อาเบนยาม เฆ ตี. โคว, เฌาพรา แฮะ โบง แตห ครึร ดูอี อีซาเรลัะ หราย อาดา อู ครึร. 16 เฆ อี มูห ดา ตาง อี อึบ เฆ ดูอี อีซาเรลัะ, เฆ บอ วี ลาย กามวน ต็อห, “โกบ แฮะ ฮอต ยัม โตต อีบึณ ดูอี ครึร อาเบนยาม, เหมา เอ ดี ปาย ดี วี เหรต อีบึณ, ดัว ดี เฆ อี ซี อีม นี? 17 เฆ ดูอี อาเบนยาม โลว มึห ฆอน อี ดี วี ปลูะ เฆ. แกวะ แตห ดูอี อาโมยว อีซาเรลัะ ฆึร ดี อา ครึร ตึอน มึห ครึร อี หราย อี โบยห. 18 เอ ยี ตู ปึอน ดึห ฆอน ดีบยา เอ, ดัว ดี เฆ. โคว, เอ ดูอี อีซาเรลัะ แฮะ ฮอต ดืง, แฮะ ฮอต กาแซณ ต็อห, ‘อาเซ ฮี ดัว ฆอน ดีบยา อัน ดี ดูอี ครึร อาเบนยาม, อัน ดี โลว คัม กาซัม ดืง.’” 19 เฆ วี เฌณฌา ต็อห, “ยอด, ดอน ซีนัม เอ บอ ดึอม โบง บลอย หลู ดี เฌาพรา ดี มืง ซีโลว. ซีแง บลอย มืร แฮะ ฮอต กาตัด ดี ฌัม.” มืง ซีโลว ตี, อึณ บอ กอย นา กัว มืง เบดาเอน บอ นา เตต มืง เลปอนา บอ กอย นา เลห ซีแง อึณเตณ อี ตัห ดี มืง เบดาเอน, วี ฮาว ดี มืง เซเคม ตึอน.

20 เฆ บอ วี กาลาง ดี ดูอี ครึร อาเบนยาม ต็อห, “แตห เบ ฮาว บัร แคง มาน มางูน. 21 เซ ฆอน ดีบยา แคง มืง ซีโลว ฮี ตัห ฆา แคง บลอย ตี, แตห เบ ตัห เหมต เฆ แบน อีบึณ เบ. แตห เบ วี ดึห เวณ เฆ แคง มืง เบ, แตห เฆ แบน อีบึณ เบ วี เหมา วี อัน. 22 เซ ฆูณ เฆ บอ อีกัด วา เฆ บอ วี ตัห กาลาง ลอง ปี ตู อึง เฆ, เย ดี วี กาลาง ดี เฆ ต็อห, ‘หมาณ, แตห เบ จอย เฆ. ดอ ลาย กาโฆห เย ตึอน, เย ตู มึห ดี ดัว อีบึณ ดี เฆ ดอน อี. เบ มืร ตู มึห ดี ดัว ฆอน ดีบยา เบ ดี เฆ. ปาย ตี เบ ตู มึห ดี โบง หมาบ อี หลึร แปะ แฮะ กาแซณ เบ.’”

23 เฆ ดูอี อาเบนยาม ตึอน มืร โบง โดบ ปี กาลาง เฆ ตี. เฆ มืร เหมต ฆอน ดีบยา ดอ ตัห ฆา เฆ แคง บลอย ดี มืง ซีโลว ตึอน, แตห เฆ แบน อีบึณ เฆ, วี เหมา วี อัน. แฮะ ฮอต, เฆ บอ วี เวณ โดง กอย เฆ อี มูห คาฆูน เฆ. เฆ บอ วี อึณปราย มาน มืง เฆ ตี, วี กอย ดี ตี.

24 เฆ ดูอี อีซาเรลัะ มืร บอ วี เลห ดี ตี, วี เวณ โดง กอย เฆ อี มูห คาฆูน เฆ ครึร เหมา ครึร อัน, กาง อาเซ กาง อัน.

25 อาคราว ดอ อัน ตี เฆ ดูอี อีซาเรลัะ ตู มึห คูนดีคัม. ดอน อี มืร โบง แคะ ล็อะ น็อห อัน.