1 วาย อัน ตี แคะ กอย ดูอี อีซาเรลัะ บอกาเฆลียด, จูห ดี มืง ดาน กอ วี ฌัม ดี มืง บีราเซบา บอ ดูอี แคง กาดาย มืง ฆีเลอาด, เฆ บอ ตัห กาฌูะ ดี อาต เฌาพรา แคง มืง มีฌาพา, แบน อู พึง. 2 เฆ อี มูห ดา ตาง แคง พึง ดูอี อีซาเรลัะ ดอน ครึร, เฆ มืร ตัห กาฌูะ โดบ เฆ ดูอี ปี อึบ เฌาพรา บอกาเฆลียด. อึณ บอ มึห ดา ซึก อี ฮาว ดี เปลา อาดา พวน แซณ วี. เฆ ดอน อี โฆ็ง มาปัวะ ลาง เฆ. 3 ดอ อัน ตี เฆ ดูอี ครึร อาเบนยาม บอ วี ยึร ลอง เฆ ดูอี อีซาเรลัะ แฮะ ตัห กาฌูะ ดี มืง มีฌาพา ตี. เฆ ดูอี อีซาเรลัะ บอ ดีหมอด ดูอี อาเลวี ต็อห, “แตห แม กาลาง ดี เย, เหมา อึณ ปาย ปี นับ ดี โบว แบน อามู อี ฮาย กาเซา ตี?”

4 ดูอี อาเลวี อี มูห อีมาย อีบึณ อี แฮะ ยัม ตึอน, อัน บอ กาลาง ต็อห, “บอ โอว, บอ อีบึณ เตียะ โอว แฮะ ตัห ฌัม ดี มืง ฆีบียา แคง กาดาย ดูอี ครึร อาเบนยาม. เย บอ ต็อห ดี ว็อะ ตัม ดี ตี คอ อู หมึร. 5 แคง หมึร ตี, เฆ อีมาย แคง มืง ตี บอ ตัห ต็อห ดี ง็อห ยัม โอว. เฆ แฮะ ตัห โรบ กาง ตี. เฆ บอ วี โบง นา ตู หมึอม ดี อีบึณ เตียะ โอว, แตห อัน กอ ยัม. 6 โอว บอ ดึห โดว ยัม อีบึณ เตียะ โอว ตี, วี กาแดบ แบน ปอด แบน ปอด, วี ตึย ฮาว ดี โดง กอย ดูอี อีซาเรลัะ ดอน นา ดอน โปละ, แตห ดอน อี นับ, เฆ แฮะ โบง นา ฮาย นา มืก, โบง อี หมึอม กาอีห แคง กาดาย มืง อีซาเรลัะ อี มูห คาฆูน ปี ดัว เฌาพรา ดี เอ. 7 ปาย ตี เบ อี มูห ดูอี อีซาเรลัะ บอกาเฆลียด, แตห เบ ลาย ซังคยาง บอ ซูงพยาด อามู ตี ดอ ตี นี.”

8 แคะ กอย ดูอี บอกาเฆลียด, เฆ ดอน อี บอ ต็อห, “แคะ กอย พึง เอ อาว ฮู โลว วี เวณ ดี กาง เอ, อาว โลว วี เวณ ดี กาง เอ คอ อู วี. 9 เอ ดี โบง ปาย นี. เอ กาตาม บอ โบง โดบ แคะ เลห ปี กาตาม เอ ตี ดอ ฮาว เอ กาโฆห ดี ดูอี แคง มืง ฆีบียา ตี. 10 กานัร ดูอี อีซาเรลัะ บอกาเฆลียด, เซ อึณ มึห อู มาย็อห วี, โลว แดะ ฆึร วี. เซ อึณ มึห อู แหรณ วี, โลว แดะ อู มาย็อห วี. เซ อึณ มึห อู หมึณ วี, โลว แดะ อู แหรณ วี, แตห เฆ แบน อี ตึย ปี ดี โฮม ดา ซึก. เซ เฆ ดา ซึก ฮี ฌัม ดี มืง ฆีบา อี มูห กาดาย ครึร อาเบนยาม, เฆ โลว โบง เวียะ อี ฮาย อี มืก แปะ แฮะ โบง เฆ แคง มืง เอ ดูอี อีซาเรลัะ.” 11 ปาย ตี แคะ กอย ดูอี อีซาเรลัะ บอกาเฆลียด แฮะ แบน อู น็อห อู พึอม บอ ตัห กาฌูะ, แตห เฆ ปึอน ดี ฮาว ตึก มืง ฆีบียา ตึอน.

12 ดูอี อีซาเรลัะ ดอน ครึร บอ จัร ดูอี เฆ ฮาว กาลาง ดี ดูอี อาเบนยาม ดอน นา ดอน โปละ, แตห เฆ กาลาง ต็อห, “แฮะ หมาน อาคาคัร อามู แปะ แฮะ โบง เบ แฮะ หมึอม กาอีห กาดซา. 13 ดอ ตี นี, แตห เบ ดึห ดูอี แคง มืง ฆีบียา อี แฮะ โบง นา ตู หมึอม ตี, อาบ ดัว ดี เย, แตห เย ปึอน ดี ง็อห แวน เฆ, แตห เย ดึห แวน หมาบ อี แฮ กาเซา แคง อาโมยว ดูอี อีซาเรลัะ.” มาแล, เฆ ดูอี อาเบนยาม ตู ณึงราง ยึร โฆรห ปี กาลาง บีนอง เฆ อี มูห ดูอี อีซาเรลัะ ตี.

14 ปาย ตี แคะ กอย ดูอี อาเบนยาม บอกาเฆลียด แคง มืง ดอน มืง บอ ตัห กาฌูะ ดี มืง ฆีบียา, แตห เฆ ปึอน ดี กาโฆห ดี ดูอี อีซาเรลัะ. 15 ซีแง ตี, เฆ ดูอี อาเบนยาม อี ตัห ดอน เรา ดอน มืง, เฆ บอ ตีห แคะ กอย ดา ซึก เฆ อี แฮะ โฆ็ง มาปัวะ ลาง. เฆ กอย อา หมึณ ดี เดา แหรณ วี. แคง มืง ฆีบียา ตึอน มืร เฆ แฮะ ร็อห อีมาย ปอ บู มาย็อห วี. 16 กาแต ดูอี เฆ ตี แปะ แฮะ ร็อห เฆ, อึณ มูห ดูอี แด ฆัะ อาดา บู มาย็อห วี. เฆ บอ มูห ดูอี อี ซาโนห ดี ปึะ มักโกง, อึณ ดืน ตู บลืง ดอ เหมา.

17 ดา ซึก แปะ แฮะ พึก ซีคยา เฆ ดูอี อีซาเรลัะ อี แฮะ โฆ็ง มาปัวะ ลาง ดอน อี, เฆ กอย พวน แซณ วี. อึณ ยี ตู บา ดูอี อาเบนยาม.

18 เฆ ดูอี อีซาเรลัะ บอ โฮะ ดี มืง เบดาเอน. เฆ บอ ดีหมอด เฌาพรา ต็อห, “ครึร เหมา อี โลว ฮาว กาโฆห ดี ดูอี อาเบนยาม ดี อาต อี เฮา?” เฌาพรา วี ต็อห, “ครึร อายูดา อี โลว แยต อี เฮา.”

19 ปา แคหณา ซีณ ซีณวัห เจว, เฆ ดูอี อีซาเรลัะ แฮะ ยีต ฮาว. เฆ บอ ฮาว คยัะ โคบ มืง ฆีบียา ตึอน. 20 เฆ โฮะ ต็อห ดี กาโฆห ดี ดูอี อาเบนยาม. เฆ มืร แฮะ ตัห กอย ลาย กาซืร ดี ดูอี อาเบนยาม ดี โคบ มืง ฆีบียา ตึอน. 21 เฆ ดา ซึก ดูอี อาเบนยาม บอ เลห แคง มืง ตึอน, ตัห กาโฆห ดี ดูอี อีซาเรลัะ อู เฌณ. ซีแง ตี, เฆ ดูอี อีซาเรลัะ แฮะ เกห ยัม อาดา อา หมึณ ดี อา แหรณ วี. 22 ปาย ตี เฆ ดูอี อีซาเรลัะ บอ ลาย กาลาง, แกวะ แตห เฆ โยว. เฆ วี ครึง ดี กาโฆห ปี คา อาต. 23 เฆ บอ ฮาว ดี โดง กรึบ เฆ ดี เฌาพรา. เฆ บอ วี ตัห ยาม ดี อาต เฌาพรา, แตห อึณ กอ ฌัม บา ดี อับ. เฆ บอ วี ดีหมอด เฌาพรา ต็อห, “เย ซี ดี ปึอน ฮาว กาโฆห ดี บีนอง เย อี มูห ดูอี อาเบนยาม ปอ อู เฌณ?” เฌาพรา วี ต็อห ดี เฆ, “แตห เบ ฮาว.”

24 เฆ ดูอี อีซาเรลัะ ปี วี โฮะ กาโฆห ดี ดูอี อาเบนยาม ปอ อู เฌณ. 25 ซีแง ตี มืร เฆ ดา ซึก ดูอี อาเบนยาม บอ เลห ตัห แคง มืง ฆีบียา ตึอน, บอ กาโฆห ดี เฆ ดา ซึก ดูอี อีซาเรลัะ อี กยัะ ดี กาโฆห, เฆ บอ ง็อห ดูอี อีซาเรลัะ อู หมึณ ดี ดา แหรณ วี อี แฮะ โฆ็ง มาปัวะ ลาง ดอน อี.

26 แคะ กอย เฆ ดูอี อีซาเรลัะ บอ วี เวณ โตต ดี มืง เบดาเอน ตึอน. เฆ บอ วี ตัห มูด ฆึบ ดี อาต เฌาพรา บอ ยาม. เฆ บอ ยืน ปี ดี โฮม ซีแง ตี กอ ฌัม บา ดี อับ. เฆ บอ หลู บอ โดว ซัด อี แบน ปี ดี หลู อี โดะ ดี เงา บอ ปี ดี หลู อี กอย กาฌูะ โฮม รึม ดี อาต เฌาพรา. 27 อาคราว ดอ อัน ตี ฌีดืก เฌาพรา ซี กอย ดี มืง เบดาเอน. บอ อาพีเนฮาด อี มูห ฆอน อาเลอาซา บอ หลาน อาโรน ตึอน, อัน ลึมลา ฌีดืก เฌาพรา ตี. เฆ ดูอี กืน บอ วี ดีหมอด เฌาพรา. 28 เฆ ต็อห, “เย ซี ดี ปึอน วี โฮะ กาโฆห ดี บีนอง เย อี มูห ดูอี อาเบนยาม ปอ อู เฌณ?” เฌาพรา วี ต็อห, “แตห เบ ฮาว กาโฆห แคหณา. โอว ดี แตห เบ แป เฆ.”

29 ปาย ตี เฆ ดูอี อีซาเรลัะ บอ แตห ดา ซึก เฆ มัง อี เครียง เฆ, บัร โคบ มืง ฆีบียา ตึอน. 30 บอ ฌัม ซีแง ฮาโอย, เฆ ดูอี อีซาเรลัะ มืร โฮะ ดี มืง ฆีบียา ปี ซีแง อาต ตึอน. 31 เฆ ดูอี อาเบนยาม บอ เลห แคง มืง เฆ, ตัห กาโฆห ดี ดูอี อีซาเรลัะ อู เฌณ. เฆ มืร แฮะ ฮาว ราม กาโต็ง ดี มืง เฆ, เฆ บอ ง็อห ยัม ดูอี อีซาเรลัะ มอก โอย ฆึร วี ดี กาย็อห อึณเตณ อี ฮาว ดี มืง เบดาเอน ฆาย มืง ฆีบียา.

32 ดูอี อาเบนยาม เฆ ตึอน ทาง แคง น็อห เฆ ต็อห, “เย ดี แป เฆ ปี ซีแง อาต ตึอน.” เฆ ดูอี อีซาเรลัะ บอ วี ลาย กาลาง ต็อห, “แตห เอ วี วีว, แตห เอ ณ็อะ เฆ, แตห เฆ ฮาว ราม โต็ง ดี มืง บอ ตัห กาฌูะ โดบ อึณเตณ นี.”

33 ปาย ตี เฆ ดา ซึก ดูอี อีซาเรลัะ บอ วี วีว นา ปัน, วี ฮาว ดี มืง บาลัะตัะมา. เฆ อี แฮะ เครียง เฆ ตึอน มืร, วี เลห ตัห โดง เครียง เฆ อี แฮะ กอย นา เฆต ซีแง มืง ฆีบา ตึอน. 34 อีมาย อี กยัะ อี หมึอม อู หมึณ วี ตึอน แปะ แฮะ ร็อห อูน เฆ กานัร ดูอี อีซาเรลัะ, เฆ บอ กาโฆห ดี ดูอี แคง มืง ฆีบียา. เฆ บอ กาโฆห กาเซา ซีแง ตี. ปี บอ แฮะ ปาย ตี มืร, เฆ ดูอี อาเบนยาม ยี หณัม นับ แฮะ ฌัม ปัน ดี ชึม เฆ. 35 ซีแง ตี เฌาพรา บอ แตห เฆ ดูอี อีซาเรลัะ แป ดูอี อาเบนยาม. เฆ ดูอี อีซาเรลัะ บอ กาโฆห บอ ง็อห ยัม ดูอี อาเบนยาม อี แฮะ โฆ็ง มาปัวะ ลาง ดอน อี อาดา อา หมึณ ดี พัน แหรณ ดี อู มาย็อห วี.

36 แฮะ ฮอต ปาย ตี เฆ ดูอี อาเบนยาม กอ วี นับ, เฆ แฮะ ชึม. เฆ ดูอี อีซาเรลัะ อี แฮะ เตา วีว ดี เฆ ดูอี อาเบนยาม ตึอน, เฆ มืร แฮะ น็อห ตาง ดี เฆ ดูอี อีซาเรลัะ อี แฮะ เครียง แฮะ บัร โคบ มืง ฆีบียา ตึอน. 37 เฆ ดูอี อี แฮะ เครียง เฆ ตี, เฆ บอ เลห ตัห บอ กาแบลบ ลึบ ฮาว แคง มืง ฆีบียา ครัน ครัน. เฆ บอ กาย็อห ดูอี เฆ, แตห เฆ ฌัม ดอน กาโตะ กาเตียม. เฆ บอ โฆห บอ แดบ ยัม ดูอี แคง มืง บอ มืง. 38 เฆ ดูอี อีซาเรลัะ บอ เฆ ดูอี อี แฮะ เครียง เฆ ตึอน, เฆ แฮะ ลาย โพรม ดี โดะ เงา ตาง อี กูห จา, แตห เฆ ยึร ดัก เงา อี เลห แคง มืง ตึอน.

39 แฮะ ฮอต, เฆ ดูอี อีซาเรลัะ อี แฮะ เตา ตึอน, เฆ ดี บอ นับ ดี วี กาบัด ตัห ดี มืง ฆีบียา. มาแล, เฆ ดูอี อาเบนยาม แฮะ จูห ดี ง็อห ยัม ดูอี อีซาเรลัะ มอก โอย ฆึร วี. กานัร เฆ, เฆ วี ลาย ต็อห, “แฮะ หมาน, เอ ดี วี กาโฆห แป เฆ ปี ปี ดึอม แป เอ ดี เฆ อาต นี ตึอน.” 40 ดอ อัน ตี อึณ บอ มึห ดัก เงา กาจูห ดี เลห ตัห แคง มืง ตึอน. เฆ ดูอี อาเบนยาม บอ วี กาบัด ยอด นา ปัน บอ ยึร แปละ เงา แฮะ ฌัม ฆางหราว, แฮะ กาซึม มืง เฆ. 41 เฆ ปี วี ยึร บอ เฆ ดูอี อีซาเรลัะ แฮะ วี กาบัด ณืร เฆ. เฆ บอ กาปึณ กาเซา. ดอ อัน ตี เฆ มืร แฮะ วี นับ, เฆ แฮะ ฮอต ชึม. 42 ปาย ตี เฆ บอ วี เตา ดูอี อีซาเรลัะ, วี เทว ดี ฮาว แคง แปร กาฮ็อห. มาแล, เฆ ยี ตู ลอด อี กาโฆห ดี เฆ. โคว, เฆ แฮะ โจห ดี กาแต ดูอี อีซาเรลัะ อี วี เลห ตัห แคง มืง แบน มืง. เฆ บอ คัม ดูก ตาง กาเซา. 43 เฆ ดูอี อีซาเรลัะ มืร แวง โรบ รันซู เฆ, เฆ มืร ตู ฆืด ตู ดีเหลา. เฆ บอ คูงครัห ดูอี อาเบนยาม กอ ฌัม โดง ซืด กาดาย บลาก นา เลห ซีแง มืง ฆีบียา ตึอน. เฆ บอ ง็อห บอ แดบ ยัม เฆ โดบ อึณเตณ ตี. 44 ดา ซึก ดูอี อาเบนยาม อี กยัะ ดีโลย บอ ยัม อาดา อู หมึณ ดี ดา แหรณ วี. 45 เฆ อี ซี ฆีด ซี กอย, เฆ บอ วี วัห ฮาว แคง แปร กาฮ็อห โดง กอย ดาอาง มาว รีมโมน. ดอ ฮาว เฆ โดบ อึณเตณ ตี, อึณ มึห ปอ พัน แหรณ วี อี แฮะ ยัม. เฆ ดูอี อีซาเรลัะ บอ คูงครัห เฆ กอ ฌัม ดี มืง ฆีโดม, ปี วี ง็อห ยัม ปอ อา แหรณ วี.

46 ซีแง ตี เฆ ดา ซึก ดูอี อาเบนยาม อี กยัะ ดีโลย, เฆ แฮะ ยัม อาดา อา หมึณ ดี พัน แหรณ วี. 47 อึณ บอ ฆีด อาดา เดา มาย็อห วี อี ลอด. เฆ แฮะ เตา ฮาว แคง แปร กาฮ็อห โดง กอย ดาอาง มาว รีมโมน. เฆ บอ กอย ดี ตี อาดา พวน มาเฆียน. 48 เฆ ดูอี อีซาเรลัะ บอ วี ฮาว โดง กอย เฆ ดูอี อาเบนยาม อี ซี ฆีด ซี กอย. เฆ บอ ง็อห ยัม ดอน อี บอ โดว ซัดดาวา เฆ บอ ดึห เงา, โดะ ดอน มืง แคะ ปี ยึร เฆ.