1 อาคราว ดอ อัน ตี เฆ ดูอี อีซาเรลัะ ตู มึห คูนดีคัม. อึณ บอ มึห ดูอี อาเลวี อู วี. อัน กอย ดี โดง ซืด นอน อาเอพารีม ตึอน. อัน บอ ดึห อีบึณ อี ตัห แคง มืง เบดแลม อี กอย แคง กาดาย มืง ยูดา, แตห อัน แบน อีบึณ เตียะ อัน. 2 มาแล, อีบึณ เตียะ อัน ตี ตู มึห น็อห ซืร น็อห หมาน ดี อัน. อีบึณ ตี บอ แวน อัน, วี เวณ โดง กอย ฆูณ อัน ดี มืง เบดแลม แคง กาดาย มืง ยูดา ตึอน. อัน บอ กอย ดี ตี อาดา พวน มาเฆียน. 3 อีมาย อัน บอ แดะ แดเจณ อัน อู วี, ตึณ บอ มาลา อา โดว, ฮาว กามวน ดี วี ดึห วีว อัน. อีบึณ ตี บอ ยึร อีมาย อัน แฮะ ตัห, อัน บอ แดะ อีมาย อัน ลึบ แคง กาง ฆูณ อัน. ฆูณ อัน มืร บอ ยึร เอียะ อัน ตี แฮะ ตัห, อัน บอ โคย กาเซา. 4 ปาย ตี บึร อัน อี มูห ฆูณ อีบึณ ตึอน บอ รวห อัน, แตห อัน ลึบ แคง กาง อัน. อัน บอ กอย โดบ บึร อัน ตี อาดา โอย ซีแง. เฆ บอ โฮม รึม โฮม กาโดบ ตูง ตัห แบน อัน แคต เฆ ตี.

5 อึณ บอ ปึอน พวน ซีแง, ดูอี อาเลวี ตึอน บอ ยีต ซีณ ซีณวัห เจว, แรน โดว อัน, ต็อห ดี เลห ฮาว. มาแล, บึร อัน วี ต็อห ดี อัน, “แตห แม โฮม คามูน คอ อี แจก, แตห น็อห แม ดาคึย, แฮะ ฮอต แม บอ ฮาว.” 6 ปาย ตี ฆาย อา วี ตึอน บอ วี โฮม. แฮะ ฮอต บึร อัน ปี วี ต็อห ดี เอียะ อัน, “เซ บาย ดี วี ตัม ปอ อู หมึร, แตห เอ กอย โบยว โบยว เกยา เกยา.” 7 ดอ ต็อห ดูอี อาเลวี ตึอน ดี เลห ฮาว, บึร อัน ปี วี แคร ปอ อึณ ปัว, แตห อัน ตัม ปอ อู หมึร. 8 อึณ บอ ฌัม ซีแง อึณ พัน, อัน แฮะ คราม ดี เลห ฮาว. มาแล, ฆูณ อีบึณ ตึอน ปี วี กาลาง ดี อัน ต็อห, “โฮม คอ อู โมยว อู โมยว, บัร วาย วัน ตา ตี บาย ย็อะ วีว.” ฆาย บอ วี โฮม รึม เดียง รึม โดบ เฆ.

9 แฮะ ฮอต, ดูอี อาเลวี ตึอน บอ อีบึณ เตียะ อัน บอ แดเจณ อัน บอ ยีต ต็อห ดี ฮาว. บึร อัน ปี วี ต็อห ดี เฆ, “ยอด, แปร แฮะ วี รีน ดี อับ, แตห เบ วี ตัม ปอ อู หมึร. แคหณา แตห เบ ยีต วีว ซีณ ซีณวัห เจว.” 10 อัน อาว ฮู ซี ตัม ปอ อู หมึร, อัน บอ เลห ฮาว. อัน บอ ฮาว ฌัม โดง ลาย กาซืร ดี มืง เยบูด อี บอ จืร มืง เยรูซาแลม. มาลา อี แฮะ ชึบ กอบ อา โดว บอ อีบึณ เตียะ อัน ตึอน, แฮะ ฮาว รึม โดบ อัน.

11 เฆ บอ ตัห ฌัม โคบ มืง เยบูด ตี, ซีแง มืร แฮะ รีน ดี เฆต. แดเจณ อัน ตึอน วี ต็อห ดี อัน, “ตัห, แตห เอ ฮาว ว็อะ ดี มืง เฆ ดูอี เยบูซีด, แตห เอ ดีเหลา ตัม ดี เฆ.”

12 มาแล, ดา กาณา อัน ตี วี ต็อห, “เอ ตู ปึอน ว็อะ ตัม ดี ดูอี อาโมยว เฮา อี ตู มูห ดูอี อาโมยว อีซาเรลัะ. แตห เอ วี กาโลห ฮาว ฌัม ดี มืง ฆีบียา.” 13 อัน ปี วี ต็อห ดี แดเจณ อัน ตึอน, “แตห เอ ฮาว ราม ปีครัน, แตห เอ ฌัม คอ อู มืง บอ มูห มืง ฆีบียา, บอ มูห มืง รามา, แตห เอ ดีเหลา ตัม ดี ตี คอ อู หมึร.” 14 อัน แฮะ ฮอต ต็อห ปาย ตี เฆ บอ ฮาว โดบ อึณเตณ, เฆ บอ ฮาว ฌัม ดี มืง ฆีบียา อี มูห มืง ดูอี ครึร อาเบนยาม. ซีแง มืร แฮะ ฮอต เฆต. 15 เฆ บอ ต็อห ดี ตัม ดี มืง ฆีบียา ตี อู หมึร. เฆ แฮะ ฮอต ลึบ แคง มืง ตึอน บอ ตูต ดีฆลัะ แคง มืง ตี. ยี ตู มึห อาเซ อี รวห เฆ เวณ แคง กาง, แตห เฆ ปึอน ดี ตัม.

16 ดอ แปร แฮะ ฮอต อับ ว็อง, อึณ บอ มึห ดา กัด อู วี, อัน ตัห ดี โดง นา อัน. อัน บอ มูห ดูอี อี ตัห ดี นอน อาเอพารีม, วี กอย ดี มืง ฆีบียา ตี. เฆ ดูอี แคง มืง ตี, เฆ บอ มูห โตต ดูอี ครึร อาเบนยาม. 17 ดา กัด ตึอน บอ ยึร, แฮะ มูห แคต ดี โต็ง แฮะ ตัห กอย แคง มืง ตี, อัน บอ ดีหมอด เฆ ต็อห, “เบ ตัห นา เหมา? เบ ดี วี ฮาว นา เหมา?”

18 ดูอี อาเลวี ตึอน วี ต็อห ดี อัน, “เย ตัห แล ดี มืง เบดแลม อี กอย แคง กาดาย มืง ยูดา ตึอน. ดอ ตี นี, เย ดี วี เวณ ดี กาง โดง กอย เย อี กอย ดี โดง ซืด นอน อาเอพารีม ตึอน. อาว มึห อาเซ อี รวห เย เวณ ดีเหลา แคง กาง อัน. 19 เปต กาฮ็อห บอ เหรียง ปี ดี โลว ออย มาลา เย มืร, เย แฮะ ฮอต มึห. คามูน เฆ อึม มางูน เย แฮะ มึห แคะ ปี โลว เย. บอ โอว บอ อีบึณ โอว บอ แดเจณ โอว, เย มูห แดเจณ แม. เย ตู โลว มาเซ ปอ อึณ ปัว.”

20 ดา กัด ตึอน วี ต็อห ดี เฆ, “โอว อี ดี รวห เบ, โอว ดี ดัว บอ แคะ ปี โลว เบ. มาแล, เบ แกวะ ตัม ดีฆลัะ นี.” 21 อัน บอ รวห เฆ เวณ แคง กาง อัน, บอ ออย บอ มาลา เฆ ตึอน โฮม เปต. เฆ บอ บาย เปลา เฆ บอ โฮม รึม, เดียง รึม.

22 ดอ ซีงยา โฮม เกยา โฮม ดาคึย เฆ ตี, อึณ บอ มึห ดูอี ตู หมึอม อี มึห น็อห กาวาต กาเซา มัง อี, เฆ บอ ตัห โรบ กาง ตึอน. เฆ บอ มัห มาโลห กาง ตึอน บอ แดะ บอ ดา กัด อี มูห ดา กาณา กาง โดง ตัม เฆ ตึอน ต็อห, “ดึห เลห อีมาย อี ตัห ลึบ แคง กาง แม นี, แตห เย ปึอน ดี อีด รึม โดบ อัน.”

23 ดา กัด อี มูห ดา กาณา กาง ตึอน บอ เลห ดองบาน เฆ บอ กาลาง ดี เฆ ต็อห, “อึย เบ บีนอง โอว, อาว โลว โบง นา ฮาย นา มืก ปาย ตี. โคว, ดูอี วี นี, อัน บอ มูห แคต โอว, อาว โลว โบง อี หมึอม กาดาต ดี อัน. 24 ดี นี แฮะ มึห ฆอน ดีบยา โอว อี ซี มูห ดีบยา แฌด บอ อีบึณ เตียะ อัน. โอว ดี อาบ ฆาย อา วี ตี ดี เบ, แตห เบ โบง แคะ ล็อะ น็อห เบ ดี ฆาย. มาแล, แกวะ แตห เบ โบง นา ฮาย นา มืก ดี อีมาย วี นี.”

25 มาแล, อีมาย เฆ ตึอน ตู โทม โฆรห อัน. ปาย ตี ดูอี อาเลวี ตึอน บอ กาดูห ดี อาบ อีบึณ เตียะ อัน, ดัว ดี เฆ. เฆ บอ อีด บอ ลาย อัน ดอง คืน ฌัม แปร วัห. แปร แฮะ ฮอต วัห, เฆ บอ เบลห อัน. 26 แปร แฮะ ฮอต วัห, อีบึณ อัน ตึอน แฮะ ตัห เกห ดี อาต มาโลห กาง ดา กัด โดง กอย อีมาย อัน ตึอน. อัน บอ กอย ดี ตี ฌัม แปร บลาง.

27 ซีณวัห ตี, อีมาย อัน ตึอน บอ ยีต วึห มาโลห ต็อห ดี เลห ฮาว. ดอ อัน ตี อัน บอ วี ยึร อีบึณ เตียะ อัน แฮะ เกห กอย ดี อาต มาโลห กาง ตี. แด อัน แฮะ วี ฌาน ดี บันโดก มาโลห. 28 อัน มืร ต็อห ดี อีบึณ อัน ตี, “ยีต, แตห เอ ฮาว.” อัน ปี บอ ต็อห ปาย ตี มืร, อีบึณ อัน ตึอน ยี ตู โฆรห. อัน มืร วี โจะ อีบึณ อัน ตี ดาง แดง กาตู มาลา, วี เวณ ดี กาง อัน.

29 อัน แฮะ ฮอต ตัห ฌัม ดี กาง อัน, อัน บอ ดึห มาปัวะ, วี ปา โดว ยัม อีบึณ อัน ตึอน, วี กาแดบ โดง กาดูด กาอาง, แตห อึณ แบน ปอด แบน ปอด อาดา ฆึร ดี อา ปอด. อัน บอ วี ตึย ฮาว ดี ครึร ดูอี อีซาเรลัะ ดอน ครึร. 30 เฆ อี ยึร ลอง อัน ตี วี กาลาง ดี เฆ ดอน อี ต็อห, “ซีณ ดอ เลห ดูอี อีซาเรลัะ แคง มืง แอฆึบ ตึอน, อึณ ตู ดึอม มึห อามู ฌึร นี. แตห เบ ลาย ซังคยาง ดี โลว โบง ปาย เหมา.”