1 อาคราว ดอ อัน ตี เฆ ดูอี อีซาเรลัะ ตู มึห คูนดีคัม. เฆ ดูอี ครึร อาดาน บอ เหรต กาดาย โดง ดี กอย เฆ. โคว, ดอ ฌัม อาคราว ตี เฆ หณัม โฮว เตา เฆ ดูอี อี กอย แดง กาดาย อี แบน คาฆูน เฆ แปะ แฮะ กาย็อห ดูอี อีซาเรลัะ อาดา เฆ. 2 ปาย ตี เฆ บอ ร็อห ดูอี อี กยัะ อาดา พัน วี แคง ครึร ดูอี อาดาน ตึอน, แตห เฆ เลห ดี มืง โฌวรา ฆาย มืง เอซาตอลา, แตห เฆ ฮาว คยอง ดี ยอด มืง. ดูอี เฆ ตี มูห ดา อี แยต ดอน อึณกรึห แคง ครึร เฆ. ดอ ตัห ฌัม เฆ ดี นอน อาเอพารีม, เฆ บอ ตัห ตัม ดี กาง อามีคา. 3 ดอ กอย เฆ นา เรต กาง อามีคา ตี, เฆ แฮะ โนว โฆรห กาโณม อี มูห ดูอี อาเลวี ตึอน. เฆ บอ ฮาว โดง กอย อัน บอ ดีหมอด อัน ต็อห, “อาเซ แฮะ ตึย แม ตัห กอย ดี นี? โกบ มาเซ แม แฮะ ตัห กอย ดี นี? ฆาน มาเซ ปี โบง แม?”

4 อัน วี ต็อห ดี เฆ, “โอว แบน ดูอี อี ดัว อากยาม อางยาน ดี อามีคา, แบน บอ ดา อี หลู ดี เฌาพรา อาดา อัน.”

5 เฆ ปี วี ต็อห ดี อัน, “อึร, เซ อึณ ปาย ตี, หมาณ แม ดีหมอด เฌาพรา, แตห เย นับ ลอง ปี ดี ฮาว โบง เย นี, อึณ ดี ออง ตู ออง.”

6 ดา อี หลู ดี เฌาพรา ตึอน วี ต็อห, “อาว โลว แตห เบ มึห น็อห แหม น็อห กาฮัวะ ลอง ปี ดี ฮาว โบง เบ ตี. เฌาพรา อี ดี ยอด แมน เบ, แตห เบ ออง.”

7 ปาย ตี เฆ ดูอี พัน วี ตึอน, บอ วี เลห ฮาว ฌัม ดี มืง เลซา. เฆ บอ นับ ดูอี แคง มืง ตี อาว มึห อี ดูก อี หณาบ มาเซ. เฆ บอ กอย ฆัด เยน, ฆยามซา. เฆ บอ ปี ดูอี อี กอย แคง มืง ซีโดน ตึอน. เฆ กอย แคง มืง เฆ ตี, แฮะ มึห เฌะฌูง โตต ดอน โมยว, อาว มึห ปี จูด ลูด มาเซ. เฆ มืร แฮะ กอย ราม กาโต็ง ดี มืง ซีโดน. เฆ มืร ตู มึห อี เฮา อี แบน ฆึก เฆ อี ดอย โดบ เฆ.

8 เฆ ดูอี พัน วี ตึอน บอ วี ตัห ฌัม ดี มืง โฌวรา ฆาย มืง เอซาตอลา. บีนอง วอแว เฆ บอ กาโพรม ดี ดีหมอด ลอง แปะ ฮาว ยึร ฮาว นับ เฆ ตึอน.

9 เฆ มืร วี กาลาง แตห บีนอง วอแว เฆ โทม. เฆ ต็อห, “แตห เอ ฮาว กาโฆห ดี ดูอี แคง มืง เลซา อู เฌณ. มืง แปะ แฮะ ฮาว ยึร เย ตี, อึณ บอ มูห มืง ซีคยา, มืง ดี ชีด, อาว โลว ปีรึร เอ ปาย นี. แตห เอ ฮาว กาโฆห ครัน ครัน, แตห เอ ปึอน มืง เฆ ตี. 10 เซ เบ ฮี ฮาว ฌัม ดี มืง ตี, เบ ดี บอ ยึร ดูอี อี กอย ดาคึย, ตู โยว มาเซ. อึณ บอ มูห มืง ตาง, มืง กาว็อห. แฮะ มูห มืง อี มึห เฌะฌูง โตต ดอน โมยว. แฮะ มูห มืง ปี ดี อาบ เฌาพรา ดี เบ.”

11 ปาย ตี เฆ ดูอี ครึร อาดาน อาดา เดา มาย็อห วี บอ แรน ดา ซึก เฆ, บอ เลห ดี มืง โฌวรา ฆาย มืง เอซาตอลา ตึอน. 12 เฆ บอ ฮาว คยัะ นา เลห ซีแง มืง กีรียาดยารีม อี กอย แคง กาดาย มืง ยูดา. โดง ตี เฆ บอ แตห อึณ จืร โดง คยัะ ดูอี ครึร อาดาน กอ ฌัม ดอ ตี นี. 13 เฆ ปี วี ยีต ดี ตี, ปี วี ฮาว ดี นอน อาเอพารีม, วี ฮาว ฌัม ดี กาง อามีคา ตึอน.

14 ดอ อัน ตี เฆ ดูอี พัน วี อี แฮะ ฮาว คยอง ดี ยอด มืง เลซา ตึอน, เฆ วี กาลาง ดี บีนอง เฆ ต็อห, “เบ นับ, แคง กาง เฆ นี อาดา อู กาง อึณ มึห อารึบ ราง ปี โบลห เฆ อี มูห เฮ. เฆ แฮะ วี โหลว บอ อารึบ ราง ตา รึอน, แฮะ มึห บอ อารึบ แบน โมยว แบน โมยว บอ ซีโตว เอโพด อู พืน. เซ เย นับ ปาย ตี เย ดี บอ นับ มาเซ ปี โลว โบง เย.” 15 เฆ บอ ฮาว ยอด โดง กอย อามีคา, เฆ บอ ลึบ กาง กาตูะ โดง กอย กาโณม อี มูห ดูอี อาเลวี ตึอน. เฆ บอ กาลาง โฆรห ดี อัน. 16 เฆ ดูอี ครึร อาดาน อาดา เดา มาย็อห วี อี แฮะ โฆ็ง ครึง กาโฆห ดอน อี, เฆ วี กอย ดี บาง มาโลห กาง ตึอน. 17 เฆ ดูอี พัน วี อี แฮะ ฮาว คยอง ดี ยอด มืง ตึอน, เฆ บอ ลึบ ฮาว แคง กาง อู เฌณ. เฆ บอ ดึห อารึบ ราง อี มูห เฮ, บอ ปี โหลว เฆ ตา รึอน ตึอน, ดึห บอ อารึบ แบน โมยว แบน โมยว บอ ซีโตว เอโพด ตึอน. ดา อี หลู ดี เฌาพรา ตึอน มืร จ็อง โดบ เฆ ดูอี เดา มาย็อห วี อี แฮะ โฆ็ง ครึง กาโฆห ตึอน.

18 ดอ ลึบ ฮาว ดูอี เฆ ตี แคง กาง อามีคา บอ ดึห อารึบ ราง ปี โบลห ปี โหลว เฆ, บอ ซีโตว เอโพด บอ อารึบ ราง แบน โมยว แบน โมยว, ดา อี หลู ดี เฌาพรา วี ดีหมอด เฆ ต็อห, “มาเซ ปี โบง เบ?”

19 เฆ วี ต็อห ดี อัน, “กอย หนีม หนีม, แกวะ โฆรห. แตห แม วี ฮาว รึม โดบ เย, แบน ดา อี หลู ดี เฌาพรา อาดา เย. แม ทาง อา เหมา ดี หมึอม, เซ แม แบน ดา อี หลู ดี เฌาพรา อาดา ดูอี อู วี บอ เซ แม แบน ดา อี หลู ดี เฌาพรา อาดา ดูอี อู ครึร อี มูห ดูอี อีซาเรลัะ?” 20 ดา อี หลู ดี เฌาพรา บอ โคย ดาคึย บอ ดึห ซีโตว เอโพด, ดึห บอ อารึบ ราง แบน โมยว แบน โมยว บอ อารึบ ปี โบลห ปี โหลว เฆ ตึอน, ฮาว รึม โดบ พึง เฆ ตี. 21 เฆ บอ วี วีว, เฆ บอ ตึย ฆอน เฆ บอ โดว ซัดดาวา บอ โกรวกราม เฆ แยต ดี อาต.

22 เฆ แฮะ เลห ฮาว ราม กาโต็ง ดี กาง อามีคา ตึอน, เฆ ดูอี อี กอย กาตัด กาง อามีคา ตึอน, เฆ บอ วี ลาย แดะ ตัห กาฌูะ, วี คูงครัห โดบ ดูอี ครึร อาดาน เฆ ตึอน. เฆ บอ ฮาว ครับ เฆ อู เฌณ. 23 ดูอี ครึร อาดาน เฆ บอ วี กาบัด ยอด, วี ดีหมอด อามีคา ต็อห, “แม มึห ปี โลว มาเซ, แม กอ โลว แดะ ดูอี กืน แคะ ตี ตัห โดบ เย?”

24 อามีคา วี ต็อห ดี เฆ, “เบ แฮะ ดึห ฮาว อารึบ แปะ แฮะ โบง อูน โอว, บอ ดา อี หลู ดี เฌาพรา อาดา โอว. แฮะ ฮอต เบ ซี บอ วี ดีหมอด, มาเซ ปี โลว โอว? โอว ดี บอ มึห มาเซ แดง ลอง อัน ตี?”

25 เฆ ดูอี ครึร อาดาน วี ต็อห ดี อัน, “แม แกวะ โมต กืน, โยว อึณ มึห ดูอี กาฮ็อห, เฆ ดี วี กาโฆห ดี แม, แตห บอ แม บอ ดูอี แคง อึณโฮม แม ดี บอ ชึม.” 26 เฆ แฮะ ฮอต ต็อห ปาย ตี, เฆ บอ ฮาว. อามีคา ยอด ดูอี เฆ ตี แหนน ดี มึห โปลม เฆ แฮณ หลึอม อัน, อัน บอ วี เวณ ดี กาง อัน.

27 เฆ ดูอี ครึร อาดาน บอ ดึห โกรว แปะ แฮะ โบง อามีคา บอ ดา อี หลู ดี เฌาพรา ตึอน, เฆ บอ วี ฮาว กาโฆห ดี ดูอี แคง มืง เลซา ดอ ตู ทาง ตู นัมโหลห เฆ, ดอ กอย ดาคึย, กอย เยน เยน เฆ. เฆ บอ ดึห มาปัวะ ลาง บอ บลา เลียห, ง็อห ยัม ดูอี แคง มืง ตี, วี ดึห เงา โดะ แวน มืง บอ มืง. 28 เฆ ดูอี แคง มืง ตี, โกบ แฮะ กอย ราม กาโต็ง เฆ ดี มืง ซีโดน บอ โกบ ตู ลาย ลึบ ลาย เลห เฆ ดี อี เฮา. เฆ อาว มึห อี ตัห จอย เฆ. มืง เฆ ตี, อึณ บอ กอย แคง ดีลัยะ อี กอย กาตัด มืง เบดราฮอพัะ. เฆ ดูอี ครึร อาดาน บอ วี อึณปราย โบง กามาย มืง ตี. แฮะ ฮอต, เฆ บอ วี ฮาว กอย ดี ตี.

29 มืง เฆ ตี เฆ บอ แตห จืร มืง ดาน โดบ จืร ฆูณ ดัง เฆ อี มูห อาดาน, อี มูห ฆอน อา อีซาเรลัะ ตึอน. จืร บรีม มืง ตี, อึณ บอ จืร มืง เลซา. 30 เฆ ดูอี ครึร อาดาน บอ ดึห อูน อารึบ ราง ปี ดึห ตัห เฆ ดี กาง อามีคา ตึอน, แตห อึณ แบน ปี กรึบ เฆ. อาโยวนาทาน อี มูห ฆอน อาเฆโซม บอ มูห หลาน อาโมวแซ ตึอน, บอ อัน บอ หลูกหลาน อัน แฮะ แบน ดา อี หลู ดี เฌาพรา กอ ฌัม ดอ เหมต ฮาว รันซู เฆ ดี ดูอี แคง ครึร อาดาน. 31 อารึบ ราง ปี โบง ปี โหลว อามีคา ตึอน, เฆ บอ กรึบ อูน บอ โจว, ดอ กอย โดง กรึบ เฆ เฌาพรา ดี มืง ซีโลว ตึอน.