1 ดอ อัน ตี อึณ มึห ดูอี อู วี อี จืร อามีคา. อัน กอย ดี นอน อาเอพารีม. 2 อัน บอ กาลาง ดี มา อัน ต็อห, “ดอ ปรา อี ดี รึอน แม อาดา อู แหรณ ดี อู มาย็อห เซเคน ตึอน, โอว แฮะ ยึร แม แฮะ ดืง, แฮะ เอห ดูอี ปรา ตี. รึอน ตี โอว อี แฮะ ดึห. อึณ ซี กอย ดี โอว.” มา อัน วี ต็อห ดี อัน, “อึย ฆอน อึย, แตห เฌาพรา ม็องการา ดัว ดี แม.”

3 ดอ วี ดัว วีว อัน รึอน อู แหรณ ดี อู มาย็อห เซเคน ดี มา อัน ตี, มา อัน วี ต็อห ดี อัน, “โอว ดี วี ดึห รึอน ตี, วี หลู ดี เฌาพรา. รึอน ตี แตห แม โหลว โบง อารึบ ราง. โอว ดี วี อาบ วีว รึอน ตี ดี แม, แตห แม ปึอน ดี โบง ปาย ตี.”

4 อัน บอ ดึห รึอน ตึอน วี ดัว ดี มา อัน. มา อัน บอ ดึห รึอน อาดา อา มาย็อห เซเคน ดัว ดี ดา อี นับ ดี จึม รึอน, แตห อัน โบง อารึบ ราง. อัน แฮะ ฮอต โหลว อารึบ ราง ตี, เฆ อูน ดี กาง อามีคา.

5 อามีคา บอ มึห โฮง โดง กรึบ เฆ อารึบ แบน โมยว แบน โมยว. อัน บอ โบง อารึบ ราง มัง โมยว บอ ซีโตว เอโพด อู พืน, เบลห. อัน บอ ดาง ฆอน อีมาย อัน อู วี, แตห อัน แบน ดา อี หลู ดี เฌา เฆ ตี. 6 ดอ อัน ตี เฆ ดูอี อีซาเรลัะ ตู มึห คูนดีคัม. ดอน อี โบง แคะ ปี อึง อัน.

7 บาน ดอ อัน ตี อึณ บอ มึห กาโณม ครึร อาเลวี อู วี. อัน กอย ดี มืง เบดแลม อี กอย แคง กาดาย มืง ยูดา ตึอน. 8 อัน บอ เลห ฮาว นา เรต มืง, วีน ดี เหรต โดง ดี กอย อัน. ดอ ฮาว วีว ฮาว เวณ อัน ตี, อัน บอ ตัห ฌัม ดี กาง อามีคา อี กอย ดี นอน อาเอพารีม ตึอน.

9 อามีคา บอ ดีหมอด อัน ต็อห, “แม ตัห นา เหมา?” อัน มืร วี ต็อห, “โอว มูห ดูอี อาเลวี อี กอย ดี มืง เบดแลม แคง กาดาย มืง ยูดา. โอว เหรต โดง ดี กอย กามาย.”

10 อามีคา วี ต็อห ดี อัน, “แตห แม กอย รึม โดบ โอว ดี นี, แบน อี ดัว อากยาม อางยาน ดี โอว, แบน บอ ดา อี หลู ดี เฌาพรา อาดา โอว. โอว ดี ดัว รึอน ดี แม, อู ซีนัม อาดา ฆึร เซเคน, แตห แม มึห บอ ครึง ตา บอ ปี ดี โฮม.” 11 ปาย ตี ดูอี อาเลวี ตึอน บอ โพรม ดี กอย รึม โดบ อามีคา ตึอน, แตห อัน บอ ปี ฆอน อีมาย อามีคา อู วี. 12 อามีคา บอ ดาง แตห อัน แบน ดา อี หลู ดี เฌาพรา อาดา อัน. อัน มืร กอย ดี กาง อามีคา ตี. 13 อามีคา วี ต็อห, “ดอ ตี นี โอว แฮะ นับ เฌาพรา ดี ม็องการา ดัว ดี โอว โกบ แฮะ มึห ดูอี อาเลวี อี แฮะ ตัห แบน ดา อี หลู ดี เฌาพรา อาดา โอว.”