1 อาดา อู ซีแง อาซามโซน บอ ฮาว แคง กาดาย มืง ดูอี พีลีที ดี มืง ฆาซา. อัน บอ ยึร ยา มาลัม อู วี บอ อีด รึม โดบ ยา มาลัม ตี. 2 เฆ ดูอี แคง มืง ฆาซา ตี บอ นับ อาซามโซน แฮะ ตัห กอย ดี ตี, เฆ บอ บัร โรบ ดี ตี. เฆ บอ บัร ดี บาง มาโลห มืง บอ ดอง คืน. แคง หมึร ตี เฆ ตู ฮาว ปอ โปละ. เฆ ยี แฮะ คราม ต็อห, “แปร ฮี วัห เอ ดี ง็อห ยัม อัน.”

3 มาแล, อาซามโซน วี อีด ฌัม กาแต ซึอม. อัน บอ วี ยีต ฮาว. อัน บอ โฆรบ ฮาว บอ บลัะ มาโลห มืง บอ อา บลัะ. อัน บอ รึต บอ ร็อง อัน. อัน บอ กาเวียะ ดึห ฮาว บอ แบน อัน บอ โตต. อัน วี ฆอด ฮาว แวน กาแดะ นอน อี กอย กาตัด มืง เฮโบรว ตึอน.

4 วาย อัน ตี แฮะ ราม เหลณ, อาซามโซน ปี วี อึง อีบึณ ปอ อู วี อี จืร นาง เดลียา. อัน กอย ดี ดีลัยะ จอรีก. 5 เฆ ดา ตาง ดูอี พีลีที บอ ฮาว โดง กอย อีบึณ ตี บอ กาลาง ดี อัน ต็อห, “แตห แม ปีหล็อก ดี อาซามโซน, ดีหมอด อัน, แตห อัน กาลาง ลอง โปลม เฆ แฮณ อัน, อัน มึห โกบ มาเซ, แตห อัน บอ กาลาง ลอง เหมา เอ ดี ปาย ดี แป อัน. แตห เอ ปึอน ดี ปัก อัน บอ โบง แกวะ แตห อัน ซี ปึอน ดี งึห ฆีณ อัน. แฮะ ฮอต, เย ดอน อี ดี ดัว รึอน อู แหรณ ดี อู มาย็อห เซเคน ดี แม.” ^a

6 นาง เดลียา วี ต็อห ดี อาซามโซน, “โอว หมาณ, แตห แม กาลาง ดี โอว, โปลม แม เฆ แฮณ แม นี, แม มึห โกบ มาเซ บอ ดี ดึห มาเซ ปัก แม, แตห อึณ กอ แป ดี อึบ แม?”

7 อาซามโซน วี ต็อห, “เซ เฆ ดึห วัน ฮูน บู ณ็อง อี ซี อีม อี หณัม กาฮ็อห บอ ปัก โอว, แฮณ โอว เฆ โปลม โอว นี กอ ดี โยม โลง ปี อี เฮา.”

8 เฆ ดา ตาง ดูอี พีลีที มืร ดึห วัน ฮูน บู ณ็อง อี ซี อีม, ดัว ดี นาง เดลีลา. อัน มืร ปัก อูน อาซามโซน. 9 อัน วี จัร ดูอี มัง อี, แตห เฆ เครียง แคง โฮง อีด อัน. อัน มืร วี แดะ อาซามโซน ต็อห, “อึย อาซามโซน, เฆ ดูอี พีลีที แฮะ ตัห, ต็อห ดี เหมต แม.” อาซามโซน มืร ดืด กาดัด วัน เฆ ตึอน, แตห อึณ ปี อัน ดืด กาดัด วัน กาตัม เรณ อี แฮะ กาซึม ดี เงา. เฆ มืร ตู ปึอน ดี นับ ลอง แฮณ อัน ตึอน.

10 นาง เดลียา วี ต็อห ดี อาซามโซน, “แม แฮะ ณ็อะ โอว, กาโลว โอว. ดอ ตี นี, แตห แม วี กาลาง ดี โอว ดี ตา มาเซ, ปึอน ดี ปัก แม.”

11 อาซามโซน วี ต็อห ดี อัน, “เซ แม ดึห วัน กามาย ปี หณัม ดึอม จัร อี บอ ปัก โอว, ปัก ซีคยา ซีคยา, โปลม โอว เฆ แฮณ โอว กอ ดี โยม โลง ปี อี เฮา.”

12 ปาย ตี นาง เดลียา วี ดึห วัน กามาย, ปัก ซีคยา ซีคยา อัน. ปาย ตี เฆ ดูอี อี บัร ดี ยอด ตึอน, เฆ แฮะ วี เครียง เฆ แคง โฮง อีด อัน. ดอ อัน ตี นาง เดลีลา วี แดะ อัน ต็อห, “อึย อาซามโซม, เฆ ดูอี พีลีที แฮะ ตัห ต็อห ดี เหมต แม.” อาซามโซน บอ ดืด กาดัด วัน ตึอน ปี อัน ดืด กาดัด เซณ ดีแตด.

13 นาง เดลียา ปี วี กาลาง ดี อาซามโซน ต็อห, “แม ปี ซี แนะ ณ็อะ โอว, กาโลว โอว. กาลาง ดี โอว โลว ดึห มาเซ กอ ปึอน ปัก แม.” อาซามโซน วี ต็อห ดี อัน, “เซ เบ ดึห ฮึก ฆีณ โอว บู โหณม, วี ด็อะ ดึก แคง บีก ปี ด็อะ เฆ, ปี วี ดึห มากาทอก ดอก ฮับ แคง อึณกรึห ด็อะ บีก, แฮณ โอว เฆ โปลม โอว กอ ดี โยม โลง ปี อี เฮา.” 14 ดอ อีด อัน นาง เดลีลา วี ดึห ฮึก ฆีณ อัน บู โหณม, วี ด็อะ ฮับ แคง บีก ปี ด็อะ เฆ, ปี วี ดึห มากาทอก, ดอก. แฮะ ฮอต, อัน บอ วี แดะ ต็อห, “อึย อาซามโซน, ดูอี พีลีที แฮะ ตัห, ต็อห ดี เหมต แม.” อาซามโซน บอ วี อึณซึห. อัน บอ วี ดืด เลห ฮึก ฆีณ อัน แคง ด็อะ ตึอน.

15 นาง เดลีลา ปี วี ต็อห ดี อาซามโซน, “เหมา แม ต็อห, ‘โอว ร็อก แม.’ อึณ ยี ตู บา น็อห แม. แม แฮะ ณ็อะ โอว, แฮะ โนะ โอย เฌณ. แม ยี ตู กาลาง ดี โอว โกบ มาเซ ปี มึห แม โปลม กืน แคะ ตี.” 16 อีบึณ ตึอน บอ ดูก อัน ดอน หมึร ดอน หณา, แตห อัน กาลาง, แตห อัน กอ ปึร กอ แพ, แตห อัน กอ วี ซี ยัม.

17 ปาย ตี อัน บอ กาลาง แคะ บอ มึห แคง น็อห อัน. อัน ต็อห, “ฮึก ฆีณ โอว นี, โอว ตู ดึอม ฆาะ ซีณ ดอ ฆึอด โอว. โอว แฮะ อาบ หลู โดว โอว ดี เฌาพรา, แบน ดูอี นาจารี. เซ ฮี ฆาะ ฮึก ฆีณ โอว นี, โปลม โอว เฆ แฮณ โอว ดี วี โยม โลง ปี อี เฮา.”

18 ปาย ตี นาง เดลียา แฮะ นับ, คา นี อัน แฮะ กาลาง โฆรห มูห โฆรห หมาน อาคาคัร. อัน บอ วี กาลาง ฮาว โฆรห ดี ดา ตาง ดูอี พีลีที อัน ต็อห, “แตห เบ วี ตัห ปอ อู เฌณ. คา นี อัน แฮะ กาลาง อี มูห อี หมาน ดี โอว.” ดา ตาง ดูอี พีลีที มืร โฆ็ง ตัห รึอน, ตัห ดัว ดี อีบึณ ตึอน. 19 นาง เดลีลา วี แตห อาซามโซน มากึอม ฆึม อัน. อัน บอ มาหลึม แตห อัน ปึอน ดี อีด. อัน บอ วี แดะ ดูอี ปอ อู วี, วี ตัห ฆาะ ฮึก ฆีณ อาซามโซน บู โหณม ตึอน. โปลม อัน กาจูห ดี โยม แตห แฮณ อาซามโซน กอ หราย.

20 แฮะ ฮอต ปาย ตี อัน มืร วี ดัด ต็อห, “อึย อาซามโซน, ดูอี พีลีที แฮะ ตัห ต็อห ดี เหมต แม.” อาซามโซน บอ อึณซึห. อัน วี กาพา ต็อห, “โอว ดี บอ ลอด ปี อาต นี ตึอน.” อัน ยี ตู นับ เฌาพรา แฮะ ฮอต เบลห แวน อัน.

21 เฆ ดูอี พีลีที บอ ตัห เหมต อัน. เฆ บอ แฆวะ เลห คอ งาย อัน บอ อา โบ็ง. เฆ บอ วี ดึห โลง อัน ดี มืง ฆาซา, วี ดึห วัน บ็อง เดณ ปัก อัน. เฆ วี จัร อัน กรีด ดีฆาว แคง กาปึม. 22 มาแล, ฮึก ฆีณ อัน ปี วี แกร ดี โต็ง ปอ อู เฌณ.

23 แคะ กอย เฆ ดา ตาง ดูอี พีลีที แฮะ ตัห กาฌูะ โบง บลอย หลู ดี เฌา ดาโฆน อี มูห เฌา ปี กรึบ เฆ. เฆ บอ โบง แตห โบยว โบยว เกยา เกยา. เฆ บอ ต็อห, “เฌา ปี กรึบ เอ แฮะ แตห เอ ออง รันซู เอ อี มูห อาซามโซน นี.”

24 ดอ ยึร เฆ ดูอี กืน ดี อาซามโซน, เฆ มืร อืบ เฌา ปี กรึบ เฆ ต็อห, “เฌา ปี กรึบ เอ, แฮะ อาบ รันซู เอ ดี เอ. อัน แฮะ มูห อี ปยาต มืง เอ, บอ แฮะ โบง แตห ดูอี ยัม แกร ดี กืน.”

25 ดอ แฮะ เกยา เฆ ตี, เฆ วี ต็อห, “แดะ อาซามโซน ตัห ดี นี, แตห อัน ตัห พีหลาก แตห เอ ยอด.” เฆ มืร แดะ เลห อัน แคง กาปึม ตึอน. อัน มืร พีหลาก แตห อึณ หมึอม กาณัห. เฆ บอ ดึห เบลห อัน ดี กาแต ร็อง กาง ตาง ตึอน.

26 อาซามโซน วี กาลาง ดี ฆอน อีมาย อี ปา แด อัน ต็อห, “แตห แม ฮาว เบลห โอว โคบ ร็อง อี บึม กาง ตาง ตี, แตห โอว ปึอน ดี เน ดี ร็อง ตี.”

27 แคง กาง ตาง ตี, แฮะ มึห บอ อีบึณ อีมาย บอ เฆ ดา ตาง ดูอี พีลีที, เฆ แฮะ ตัห กอย โตต ดี ตี. แดง ตี, อึณ บอ มึห บอ อีบึณ อีมาย วี กอย นา แดง กาตูะ กาง โอย แหรณ วี, บัร ดี ยอด ปี ปาย อาซามโซน ดี พีหลาก อัน. 28 ดอ อัน ตี อาซามโซน บอ ซาคึร เฌาพรา ต็อห, “อึย แม เฌาพรา อี อึบ โตต ดอน โมยว, แตห แม โหลห โอว อี มูห แดเจณ แม. โอว หมาณ, แตห แม ดัว แฮณ ดี โอว มี ปอ เฌณ นี, แตห โอว ปึอน ดี วี โบง เวียะ ดี เฆ มี ปอ อู เฌณ นี. แตห โอว ปึอน ดี วี โบง เวียะ ดี เฆ ดูอี พีลีที อี แฮะ แฆวะ เลห งาย โอว บอ อา บลาก นี.” 29 อาซามโซน บอ ปา ร็อง อา ณ็อง อี กอย ดี กาแต อี บึม กาง ตาง ตึอน. แด อัน บลาก อาอัห บอ ณู เลห อู ณ็อง. แด อัน บลาก อาฆัะ ปี วี ณู เลห ปอ อู ณ็อง. 30 อัน มืร ดัด ต็อห, “แตห โอว ยัม รึม โดบ เฆ ดูอี พีลีที เฆ นี.” อัน มืร ปีเลห โตต แคะ มึห อัน แฮณ บอ ฌูน ร็อง ตี. กาง ตาง ตึอน บอ กาบัก ดีฆรับ โลง ทีบ แดง เฆ ดา ตาง บอ เฆ ดูอี บอกาเฆลียด. ปาย ตี เฆ อี ยัม รึม ดอ ยัม อัน ตี, อึณ กืน หลึอม เฆ อี ยัม ดอ ซี อีม อัน.

31 แฮะ ฮอต ปาย ตี เฆ วา อัน บอ ดูอี แคง อึณโฮม อัน บอ วี ตัห ดึห โดว ยัม อัน ตี, วี ฮาว ดีบ ดี กาแต มืง โฌวรา ฆาย มืง เอซาตอลา แคง บาเรว ฆูณ อัน อี จืร อามานอ ตึอน. อัน มืร แฮะ แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา อา ฆึร ซีนัม.