1 วาย อัน ตี แฮะ ราม เหลณ อาซามโซน บอ วี ฮาว จัร อีบึณ อัน ดอ มูห อาคราว โซะ โหงว. อัน บอ โฆ็ง ฮาว บอ มาแป ดีแตด อู โดว. อัน บอ ต็อห, “โอว ดี ฮาว ลึบ แคง อีด โดง กอย อีบึณ โอว.” มาแล, บึร อัน ยี ตู แตห อัน ฮาว ลึบ.

2 บึร อัน วี กาลาง ดี อัน ต็อห, “โอว ทาง, แม แฮะ ฌ็อง กาเซา อัน, โอว มืร แฮะ วี อาบ แตห อัน แบน อีบึณ ฆึก แม. มาแล, วา อัน ปี ซี ชีด หลึอม อัน. แตห แม วี ดึห วา อัน ตี กาดาง อัน.”

3 ปาย ตี อาซามโซน วี ต็อห, “คา นี ฮาว, ปี ดี โบง โอว ดี เฆ ดูอี พีลีที, อาว ฮู แบน หมาบ ดี โอว. โอว ดี โบง นา จาว ดี เฆ ปาย คาคัร.” 4 อัน บอ ฮาว เหมต มาโซว แปร โอย มาย็อห โดว. อัน บอ ปัก กาดึก ซีดา เฆ แบน ฆู แบน ฆู, ปี วี ดึห เงา ราง ปัก ดึก ดี ซีดา เฆ. 5 แฮะ ฮอต, อัน บอ ปีด็อะ เงา ราง ตึอน, วี เบลห แตห เฆ ฮาว แคง โดง นา เฆ ดูอี พีลีที. ปาย ตี เงา บอ กาซึม โหงว เฆ, บอ กาโย็ง บอ ดัง อัน. แดง ตี, อึณ บอ กาซึม บอ โอ็ง เฮ นามัน เฆ, บอ มาน มางูน เฆ.

6 เฆ ดูอี พีลีที บอ วี ลาย ดีหมอด ต็อห, “อาเซ อี โบง อาตี?” แฮะ ฮอต, เฆ บอ วี นับ, แฮะ มูห อาซามโซน อี โบง ปาย ตี. โคว, บึร อัน อี มูห ดูอี อาโมยว ทีมานา ตึอน แฮะ ดึห อีบึณ อัน, วี อาบ ดัว ดี ฆึก อัน. ปาย ตี เฆ ดูอี พีลีที บอ วี ฮาว ดึห อีบึณ ตี บอ ฆูณ อัน ตึอน, โดะ แคง เงา. 7 อาซามโซน วี ต็อห ดี เฆ, “ปี โบง เบ นี, โอว ดี วี โบง เวียะ ดี เบ, แตห อึณ กอ เบระ ดี น็อห โอว.” 8 อัน บอ กาโฆห ดี เฆ บอ มัห กาเซา เฆ. อัน บอ ง็อห ยัม เฆ กืน. วาย ตี, อัน บอ วี ฮาว กอย แคง กาเดา มาว โดง จืร เอทาม.

9 เฆ ดูอี พีลีที บอ วี แรน ซึก. เฆ ตัห คยัะ แคง กาดาย มืง ยูดา. เฆ บอ กาย็อห ฮาว ดอน นา ดอน โปละ โคบ มืง เลฮี. 10 เฆ ดูอี อายูดา บอ วี ฮาว ดีหมอด เฆ ต็อห, “เหมา อึณ ปาย ปี โลว ตัห กาโฆห เบ ดี เย?” เฆ มืร วี ต็อห, “เย ตัห แตห เย ปึอน ดี เหมต อาซามโซน, คร็อง อัน แคง กาปึม, แตห อึณ ปี แปะ แฮะ โบง อัน ดี เย.”

11 ปาย ตี เฆ ดูอี อายูดา อาดา โอย มาย็อห วี บอ ฮาว ดี กาเดา มาว เอทาม ตึอน บอ กาลาง ดี อาซามโซน ต็อห, “แม แฮะ นับ ซีคยา ลอง เฆ ดูอี พีลีที อี อึบ เย. ดอ ตี นี แม แฮะ โบง แตห เย ฌัม ดูก.” อัน วี ต็อห, “โอว โบง เวียะ ดี เฆ, แคะ ปี โบง เฆ ดี โอว.”

12 เฆ ปี วี ต็อห ดี อัน, “เย ตัห ดี นี, แตห เย ปึอน ดี เหมต แม, ฮาว อาบ ดี ดูอี พีลีที.” อาซามโซน วี ต็อห ดี เฆ, “แตห เบ คัม โฆรห ดืง, เบ ตู ง็อห ยัม โอว.”

13 เฆ มืร วี ต็อห ดี อัน, “แฮะ หมาน, เย ตู ง็อห ยัม แม. เย ดี ดึห วัน, ปัก แม, วี ฮาว อาบ แม ดี เฆ ดูอี พีลีที.” เฆ บอ ดึห วัน กามาย อา ณ็อง, ปัก อัน, เฆ บอ ดึห เลห อัน นา เรต กาเดา ตึอน. 14 ดอ ตัห ฌัม เฆ ดี มืง เลฮี ตึอน, เฆ ดูอี พีลีที มืร ฮูนซา กาแบลบ ตัห ณืร อัน. ดอ อัน ตี อู เฌณ ปวน น็อห พึอม เฌาพรา บอ วี แตห แฮณ อี กืน กาเซา ดี อัน. อัน บอ ดืด กาดัด วัน ปี ปัก เฆ ดี อัน. อึณ บอ ปี, อัน ดืด กาดัด วัน กาตัม เรณ อี แฮะ กาซึม เงา. 15 ดอ อัน ตี อัน วี ยึร กาอาง กูงกาบ มาลา อี หณัม อูห อัม, อัน บอ ดึห กาอาง ตี, มัห ดูอี กืน. อัน บอ ปึอน ดี ง็อห ยัม ดูอี อู แหรณ วี, ตา กาอาง กูงกาบ มาลา ตี.

16 อาซามโซน บอ วี ต็อห, “โอว แฮะ ตา กาอาง กูงกาบ มาลา, แตห ดูอี แบน ปี มาลา. โอว แฮะ แป ปี ยัม ดูอี แบน แหรณ วี, ตา กาอาง กูงกาบ มาลา นี.” 17 อัน แฮะ ฮอต ต็อห ปาย ตี อัน บอ วี ซาวึณ แวน กาอาง กูงกาบ มาลา ตึอน. เฆ บอ แตห โดง ตี จืร ฮามาดเลฮี.

18 ดอ อัน ตี อาซามโซน แฮะ วี ซี เดียง กาเซา อึม. อัน บอ วี ซาคึร แดะ เฌาพรา ต็อห, “แม เฌา แฮะ จอย แตห โอว อี มูห แดเจณ แม กาโฆห ออง. ดอ ตี นี, แม ซี แตห โอว วี ยัม โกบ ตู มึห โอว ดี เดียง อึม? แม ซี แตห เฆ ดูอี พีลีที อี มูห ดูอี อี ตู โดบ แม วี แป โอว?” 19 ดอ อัน ตี เฌาพรา บอ วึห แตห อึม โตห เลห แคง กาเดา กาดาย ดี มืง เลฮี ตึอน. อึม ตี บอ เลห ตัห อู เฌณ. อัน แฮะ ฮอต เดียง อึม ตี, อัน บอ มึห โปลม เฆ แฮณ. อึม โตห ตี เฆ บอ แตห อึณ จืร เอนฮักกอรา. อึณ บอ กอย ดี มืง เลฮี ตี กอ ฌัม ดอ ตี นี.

20 อาซามโซน แฮะ แบน ดา ตาง อี ซูงพยาด ดารา ดี เฆ ดูอี อีซาเรลัะ ดอ มูห โจว บาน เฆ ดูอี พีลีที ตี อาดา อา ฆึร ซีนัม.