1 อาดา อู ซีแง อาซามโซน บอ โลง ดี มืง ทีมานา. อัน บอ ยึร ดีบยา ดูอี พีลีที อู วี แคง มืง ตี. 2 อัน บอ วี เวณ ดี กาง อัน, วี หมาณ ดี ฆูณ อัน ฆาย มา อัน ต็อห, “โอว แฮะ อึง ดีบยา ดูอี พีลีที อู วี อี กอย แคง มืง ทีมานา. โอว หมาณ, แตห อัน แบน อีบึณ โอว.”

3 มาแล, ฆูณ มา อัน วี ต็อห ดี อัน, “เหมา อึณ ปาย ปี โลว ฮาว ดึห แม ดีบยา ดูอี พีลีที อี มูห ดูอี อาโมยว เฮา? เหมา อึณ ปาย ปี ตู นับ แม ดี เหรต ดีบยา อี มูห ดูอี อาโมยว เอ, ครึร เอ?” อาซามโซน ยี ต็อห ดี ฆูณ อัน, “แตห แม ดีหมอด ดี โอว. โอว แฮะ อึง อัน ดี.” 4 ฆูณ มา อัน ตู นับ อึณ มูห ปี โบง เฌาพรา. โคว, เฌาพรา เหรต ปี ดี ปาย ดี กาโฆห ดี ดูอี พีลีที อี อึบ ดูอี อีซาเรลัะ ดอ อัน ตี. 5 ปาย ตี อาซามโซน บอ ฮาว โลง ดี มืง ทีมานา โดบ ฆูณ อัน ฆาย มา อัน. ดอ ตัห ฌัม เฆ ดี มาน มางูน อี กอย เรต มืง ทีมานา, เฆ บอ ยึร มาครังซี อู โดว อี ฮัม กาอืน บอ ตัห ซืร ดี อาซามโซน. 6 ดอ อัน ตี อู เฌณ น็อห พึอม เฌาพรา บอ ตัห ปลึก อาซามโซน, บอ แตห อัน มึห โปลม มึห แฮณ กืน กาเซา. อัน บอ ปา กายาต มาครังซี ตึอน, ตา มี แด อัน, แตห อึณ ปี อัน ปา กายาต ฆอน มาแป. มาแล, อัน ตู กาลาง ปี โบง อัน ตี ดี ฆูณ อัน ฆาย มา อัน. 7 อัน บอ ตัห โฆรห ตัห มวน ดีบยา ตึอน, อัน บอ อึง กาเซา ดีบยา ตี.

8 วาย อัน ตี อาว เหลณ อาซามโซน วี ต็อห ดี ฮาว คัด ดึห ดีบยา ตึอน. ดอ ฮาว อัน โดบ อึณเตณ, อัน วี วัห ฮาว ยอด มาครังซี ปี ง็อห ยัม อัน ตึอน. อัน วี ยึร อึณลาง มาเพียน บอ งาม มาเพียน แฮะ กอย แคง กาโอ็ง โดว มาครังซี ตึอน. 9 อัน มืร ตา แด อัน, โจก งาม มาเพียน ตึอน, วี ฮับ แคง กาตึง แด อัน. อัน วี โฮม ดอ ฮาว อัน โดบ อึณเตณ. อัน บอ ฮาว ฌัม โดง กอย ฆูณ อัน ฆาย มา อัน, อัน ดัว บอ ฆาย โฮม. ฆาย บอ โฮม. มาแล, อัน ตู กาลาง ดี ฆาย ลอง แฮะ ดึห อัน งาม มาเพียน ตี แคง กาโอ็ง โดว ยัม มาครังซี ตึอน.

10 ปาย ตี ฆูณ อัน บอ ฮาว โดง กอย ฆอน อีบึณ ตึอน. อี มูห อาซามโซน, อัน บอ โบง บลอย ปี โลว โบง กาโณม, แตห อึณ โดบ ฮีด ทูงฆยาม เฆ. 11 เฆ ดูอี พีลีที บอ ยึร อัน, เฆ บอ ร็อห กาโณม โอย ฆึร วี, แตห เฆ แบน ฆึก อัน.

12 อาซามโซน วี กาลาง ดี เฆ ต็อห, “โอว ดี กาลาง โฆรห ลาย ตัะ ดี เบ. เซ เบ บอ แป ดี เวียะ กานัร บลอย อาดา บู ซีแง นี, โอว ดี ดัว ครึง กาตัม ลูย โอย ฆึร ฌึม ดี เบ, บอ ครึง ตา อี ชีด กาเซา อาดา โอย ฆึร ฌึม. 13 เซ เบ ยี ตู แป ดี เวียะ, เบ โลว วี ดัว แคะ ตี ดี โอว.” ดูอี เฆ ตึอน วี ต็อห ดี อัน, “อึร, กาลาง แตห เย โทม โฆรห ลาย ตัะ แม ตี.”

14 อัน มืร กาลาง แตห เฆ โทม. อัน ต็อห, “แคง โมยว อี นับ ดี โฮม, อึณ บอ วี เลห อาโมยว อี มูห ปี ดี โฮม. แคง โมยว อี กยัะ อี มึห แฮณ กืน, อึณ บอ วี เลห อี ซีแงห อี งาม.” ซีเพา โฆรห ลาย ตัะ ตี, เฆ บอ เหรต อาดา โอย ซีแง, เฆ ยี หณัม นับ ปี มูห.

15 อึณ บอ โนะ พวน ซีแง, เฆ บอ กาลาง ดี อีบึณ อาซามโซน ตึอน ต็อห, “แตห แม เงยา อีมาย แม, แตห อัน กาลาง ซีเพา โฆรห ลาย ตัะ ตึอน. เซ อาว ปาย ตี เย ดี โดะ แม บอ ดูอี แคง อึณโฮม ฆูณ แม แคง เงา. อึณ ปี บาย อีมาย แม, แฮะ บาง แตห เย ตัห, บาย วี ซี โฌน เย.”

16 ปาย ตี อีบึณ อาซามโซน ตึอน บอ อึม มูห อึม งาย, วี ต็อห ดี อีมาย อัน, “แม ตู ร็อก โอว, แม ฌ็อง โอว. แม แฮะ กาลาง โฆรห ลาย ตัะ ดี เฆ ฆึก โอว, แม ยี ตู กาลาง ซีเพา อัน แตห โอว นับ.” อัน วี ต็อห ดี อีบึณ อัน, “แม ยอด, แฮะ มูห ฆูณ มา โอว มืร, โอว ตู กาลาง. โอว ดี บอ ปึอน กาลาง ดี แม?” 17 อีบึณ อัน ตึอน บอ ยาม ดัด ดี อาต อัน. อัน บอ เงยา บอ ดูก อีมาย อัน ดอน ซีแง, กอ โนะ บู ซีแง. ซีแง ดี โนะ บู ซีแง ตึอน, อีบึณ อัน บอ ดูก กาเซา, แตห อัน กาลาง แหน ปี ปาย ซีเพา โฆรห ลาย ตัะ ตึอน ดี อีบึณ อัน. แฮะ ฮอต, อีบึณ อัน บอ วี ฮาว กาลาง ดี เฆ ดูอี พีลีที เฆ ตึอน.

18 ปาย ตี อึณ บอ ฌัม ซีแง อึณบู, อาต เฆต ซีแง, ดูอี เฆ ตึอน บอ ฮาว กาลาง ดี อัน ต็อห, “อาว มึห อี ซี ดี งาม หลึอม งาม มาเพียน. อาว มึห อี ซี ดี แฮณ หลึอม มาครังซี.” อาซามโซน วี ต็อห ดี เฆ, “เซ เบ ตู ดึห มามัก โอว, แท มาน เบ, เบ ปี บอ เหรต มืร, เบ ตู นับ ซีเพา โฆรห ลาย ตัะ ตี.”

19 ดอ อัน ตี อู เฌณ, ปวน น็อห พึอม เฌาพรา บอ แตห แฮณ กืน ดี อาซามโซน. อัน บอ โลง ดี มืง อาซาเคโลน, อัน บอ ง็อห ยัม ดูอี โอย ฆึร วี. อัน บอ วี ดึห ครึง ตา เฆ, วี ดัว ดี เฆ อี แฮะ แป ดี เวียะ โฆรห ปี ลาย ตัะ อัน ตึอน. วาย อัน ตี อัน บอ วี รู กาเซา. อัน บอ วี เวณ ดี กาง ฆูณ มา อัน. 20 บึร อัน บอ วี อาบ ดัว อีบึณ อัน ตึอน ดี ฆึก อัน อี ตัห ดี บลอย คัด ตึอน.