คาน 13
ลอง อาซามโซน
1 เฆ ดูอี อีซาเรลัะ ปี วี โบง หมาบ อี ตู ล็อะ น็อห เฌาพรา. โคว, เฌาพรา วี แตห ดูอี พีลีที อึบ เฆ อาดา พวน ฆึร ซีนัม.
2 ดอ อัน ตี อึณ มึห ดูอี อู วี, อัน จืร อามานอ. อัน บอ มูห ดูอี ครึร อาดาน อี กอย แคง มืง โฌวรา. อีบึณ อัน แฮะ หมัน, ตู นับ ดี มึห ฆอน. 3 อามู อามาด เฌาพรา บอ ตัห กาปลูห ดี อีบึณ ตี บอ กาลาง โฆรห ดี อัน ต็อห, “แม ปี บอ แฮะ หมัน, ตู นับ ดี มึห ฆอน มืร, แม ดี วี แด บาดีก ซันเท, วี มึห ฆอน อีมาย อู วี. 4 ปาย ตี แตห แม ซาดีก, แกวะ เดียง ป็อห, แกวะ เดียง อึม มางูน อี ปราง, แกวะ โฮม ปี ดี โฮม อี ตู ซีงา โดบ ปี ดัม ดารา. 5 โคว, แม ดี แด บาดีก ซันเท บอ มึห ฆอน อีมาย. เซ ฆอน แม ตี ฮี ฆึอด, แม ตู ปึอน ฆาะ ฆีณ อัน ดอ เหมา. โคว, จูห ซีณ ฆึอด อัน ตี, อัน มูห ดูอี ปี อึบ เฌาพรา เซเซ. อัน บอ มูห ดูอี อี แฮะ หลู อาบ โดว อัน ดี เฌาพรา, แบน ดูอี นาจารี. อัน มืร แบน อี คยอด เลห เฆ ดูอี อีซาเรลัะ ดี ดูอี พีลีที.”
6 อีบึณ ตึอน บอ วี กาลาง ดี อีมาย อัน ต็อห, “ดูอี ปี ตึย เฌาพรา อู วี, อัน แฮะ ตัห กาปลูห ดี โอว. อารึบ อัน ปี อามู อามาด เฌาพรา อี หมึอม โยว กาเซา. โอว มืร ตู ดีหมอด นา ตัห อัน. อัน มืร ตู กาลาง จืร อัน ดี โอว. 7 มาแล, อัน วี ต็อห ดี โอว, “แม ดี แด บาดีก ซันเท, มึห ฆอน อีมาย อู วี. ซีณ ดอ ตี นี ฮาว, แม แกวะ เดียง ป็อห, แกวะ เดียง อึม มางูน อี ปราง. แกวะ โฮม ปี ดี โฮม อี ตู ซีงา. โคว, ซีณ ซีแง ฆึอด อัน กอ ฌัม ปัน ดี กัด ยัม อัน, ฆอน อีมาย แม ตี ดี แบน ดูอี นาจารี อี มูห ดูอี ปี อึบ เฌาพรา เซเซ.”
8 อามานอ วี ซาคึร ดี เฌาพรา ต็อห, “อึย แม เฌาพรา, โอว หมาณ, ดูอี แปะ แฮะ จัร แม เฌา ตัห ตึอน, แตห อัน วี ตัห ปอ อู เฌณ, แตห อัน ตัห มาโนว เย ปี ดี ปาย เย ดี ยอด ลึมลา ฆอน ตี.”
9 เฌาพรา มืร โทม ปี ซาคึร อามานอ ตึอน. อามู อามาด เฌาพรา ปี วี ตัห โดง กอย อีบึณ ตึอน ดอ กอย อัน แคง โดง นา. ดอ อัน ตี อีมาย อัน ยี ตู กอย รึม โดบ อัน. 10 อัน มืร ปีครัน อัน ฮาว แดะ อีมาย อัน, บอ กาลาง ดี อีมาย อัน ต็อห, “ยอด, ดูอี อี ตัห ดี โอว ซีแง อาต ตึอน, อัน แฮะ วี ตัห ปอ อู เฌณ.” 11 อามานอ มืร ฮาว รึม โดบ อีบึณ อัน, ฌัม โดง กอย ดูอี วี ตี. อัน บอ ดีหมอด ดูอี ตี ต็อห, “แม มูห ดูอี อี แฮะ กาลาง โฆรห ดี อีบึณ โอว?” อัน วี ต็อห, “แฮะ มูห.”
12 ปัน ตี อามานอ บอ ดีหมอด ต็อห, “เซ อึณ ดี บอ แบน แคะ ปี ต็อห แม ตี, เย โลว โบง ปาย เหมา ดี ฆอน ดีแตด ตี? เย โลว โบง มาเซ ดี อัน?”
13 อามู อามาด เฌาพรา ตึอน วี ต็อห ดี อัน, “อีบึณ แม โลว ซาดีก, โลว โบง แคะ แปะ แฮะ กาลาง อูน โอว ดี อัน ดอน โมยว. 14 อัน ตู ปึอน โฮม อี เลห ดี เฮ มางูน คอ อู โมยว, ตู ปึอน เดียง ป็อห, ตู ปึอน เดียง อึม มางูน อี ปราง. อัน มืร ตู ปึอน โฮม ปี ดี โฮม อี ตู ซีงา อี โดบ ดารา. อัน โลว โบง โดบ แคะ ปี กาลาง อูน โอว ตี ดอน โมยว.”
15 อามานอ วี ต็อห ดี อามู อามาด เฌาพรา, “โอว หมาณ, แตห แม กอย บัร อู กาจัน, แตห โอว กอ ฮอต แรน ฆอน มาแป โอว อาดา แม เฌา.”
16 อามู อามาด เฌาพรา วี ต็อห, “แม ปี บอ หมาณ แตห โอว กอย บัร มืร, โอว ตู โฮม ปี ดี โฮม ตี. มาแล, เซ แม มึห น็อห ซี หลู, แตห แม หลู ปี ดี หลู อี โดะ ดี เงา ดี เฌาพรา.” อามานอ ยี หณัม นับ ดูอี วี ตี มูห อามู อามาด เฌาพรา.
17 อัน วี ต็อห ดี ดูอี วี ตี, “มาเซ ปี จืร แม? โคว, เซ ฮี โบว แบน ดอน โมยว แคะ ปี กาลาง อูน แม นี, โอว ซี อืบ มยูก แม.”
18 อามู อามาด เฌาพรา ตึอน วี ต็อห ดี อัน, “เหมา อึณ ปาย ปี ซี นับ แม ปี จืร โอว, อึณ มูห จืร อี ตู นับ ดี กาหลูห ดี น็อห แม.” 19 ปัน ตี อามานอ บอ ดึห มาแป ดีแตด อู โดว บอ ปี ดี หลู ดีฆาว, แตห อึณ แบน ปี ดี หลู ดี เฌาพรา. อัน บอ เบลห หลู แดง มาว. ดอ ซี กอย ยอด อามานอ ฆาย อีบึณ อัน ตี, เฌาพรา บอ โบง อี หมึอม อาม. 20 อึณ บอ มึห เงา เลห ดี กาโช็ง หลู ตึอน, วี กูห โฮะ ฆางหราว. อามู อามาด เฌาพรา ตึอน บอ โฮะ โดบ แปละ เงา ตี. อามานอ ฆาย อีบึณ อัน บอ ยึร ลอง อัน ตี, ฆาย บอ มูด ฆึบ ดี กาดาย อู เฌณ. 21 อามู อามาด เฌาพรา ตึอน มืร อาว ฮู วี ตัห กาปลูห ดี อามานอ ฆาย อีบึณ อัน ปอ อึณ ปัว. ปาย ตี อามานอ บอ นับ, แฮะ มูห อามู อามาด เฌาพรา.
22 อามานอ วี ต็อห ดี อีบึณ อัน, “อาย นี, อาย ดี บอ ยัม อาคาคัร. โคว, อาย แฮะ ยึร เฌาพรา.”
23 อีบึณ อัน วี ต็อห, “เซ เฌาพรา ซี แตห อาย ยัม, อัน เฌา ตู รับ ปี หลู อี โดะ ดี เงา บอ ปี หลู โหงว ดีฆาว เฆ นี. อัน เฌา มืร ตู บยัะ แบน โมยว แบน โมยว ปาย นี. บอ ดอ ตี นี อัน เฌา มืร ตู มึห ดี กาลาง โฆรห มาเซ.”