1 วาย แฮะ ยัม อาโมวแซ อี มูห แดเจณ เฌาพรา, เฌาพรา วี กาลาง อูน ดี วี อี จอย อาโมวแซ อี จืร อาโยวซูอา, อี มูห ฆอน อานูน ตึอน. อัน ต็อห, 2 “แดเจณ โอว อี จืร อาโมวแซ แฮะ ฮอต ยัม. บอ แม บอ เฆ ดูอี อีซาเรลัะ บอกาเฆลียด แตห เบ แรน โดว เบ, แตห เบ ฮาว กาโลห อึม แบลง ยอดาน, แตห เบ ฌัม แคง มืง ปี ดี ดัว โอว ดี เบ อี มูห ดูอี อีซาเรลัะ. 3 กาดาย โดง ดี แณต ฮาว เบ โอว ดี ดัว ดี เบ, แตห อึณ โดบ ปี ดึอม กาแซณ โอว ดี อาโมวแซ ตึอน. 4 กาอูน กาดาย เบ ตี, อึณ ดี บอ จูห ดี แปร กาฮ็อห บลาก นา เตต, วี โฮะ ฌัม ดี นอน เลบานูน บลาก นา กัว. นา เลห ซีแง อึณ ดี จูห บอ ดี อึม แบลง อูพาราด, อี มูห กาดาย เฆ ดูอี เฮทีด. อึณ บอ ฮาว แตห อึณ กอ วี ฌัม ดี อึม นัมมูกซารา บลาก นา เฆต ซีแง. 5 อึย อาโยวซูอา, อาว มึห อี ปึอน คัม อี ปึอน กาแคณ ดี แม บอ โจว แม. โอว ดี กอย รึม โดบ แม ปี ปี ดึอม กอย รึม โอว โดบ อาโมวแซ ตึอน. โอว ดี กอย รึม โดบ แม เซเซ, ตู แวน แม ดอ เหมา.

6 แตห แม มึห โปลม บอ มึห น็อห ยัะ. โคว, แม โลว โบง แตห ดูอี เฆ ตี ปึอน ดี บึง คาฆูน แคง มืง แปะ แฮะ กาแซณ อูน โอว ดี เฆ ฆูณ ดัง เบ. 7 แตห แม มึห น็อห โปลม บอ มึห น็อห ยัะ อาคาคัร. แตห เบ ปี วี คัด น็อห ดี โบง โดบ ซีคยา ดารา แปะ แฮะ กาลาง แดเจณ โอว ดี เบ อี มูห อาโมวแซ. แตห อึณ ปี เบ ฮาว ซืร โดบ อึณเตณ, แกวะ แตห เบ วัห นา ฆัะ นา อัห. เซ แม โบง ปาย ตี แม บอ ฮาว ดี เหมา, แม ดี ออง เซเซ. 8 แตห แม กาลาง ดารา ตี เซเซ. แตห แม กาดัวะ กาพา ดารา ปี แดม อูน แคง บับ นี ดอง วัน ดอง คืน. แตห อึณ แตห เบ ปึอน ดี โดบ ซีคยา. เซ แม โบง ปาย ตี แม ดี บอ ออง. อึณ บอ แบน แคะ ปี โบง แม. 9 แตห แม โหลห ปี ดัม อูน โอว ดี แม. โอว ต็อห, แตห แม มึห น็อห ยัะ บอ ปีกยัะ แม. อาว โลว โยว, อาว โลว น็อห เตียะ. โคว, โอว อี มูห เฌาพรา ปี กรึบ แม ดี บอ กอย รึม โดบ แม ดอน นา ดอน โปละ.”

10 แฮะ ฮอต ปาย ตี อาโยวซูอา วี จัร เฆ อี มูห ดา ตาง อี อึบ ดูอี กืน ต็อห, 11 “แตห เบ ฮาว โดง กอย เฆ ดูอี กืน, กาลาง ดี เฆ ต็อห, ‘แตห เบ แรน อูน โกรวกราม เบ. โคว, วาย โอย ซีแง เบ โลว กาโลห อึม แบลง ยอดาน, ฮาว ดึห มืง ปี ดี อาบ เฌาพรา ดี เบ.’”

12 ดอ อัน ตี อาโยวซูอา บอ กาลาง โฆรห ดี ครึร อารูเบน, ครึร อาฆัด บอ ครึร อามานาเซ อาดา อู กาแต. 13 อัน ต็อห, “แตห เบ โหลห โฆรห ปี กาลาง อูน อาโมวแซ อี มูห แดเจณ เฌาพรา ตึอน. อัน แฮะ ต็อห, ‘เฌาพรา ปี กรึบ เบ แฮะ แตห เบ ปึอน ดี ดีเหลา, แฮะ ดัว กาดาย นี ดี เบ.’ 14 อีบึณ เบ เฆ ฆอน เบ บอ โดว ซัดดาวา เบ ปึอน กอย บลาก นา เลห ซีแง อึม แบลง ยอดาน. อี มูห เฆ ดา ซึก เบ, เฆ โลว โฆ็ง ครึง กาโฆห เฆ, แยต ดี อาต, จอย บีนอง วอแว เบ กาโลห อึม ตี. 15 เฆ โลว จอย แตห อึณ กอ ฌัม ปัน ดี ปึอน เบ มืง อี กอย นา เฆต ซีแง อึม แบลง ยอดาน, มืง แปะ แฮะ ต็อห เฌาพรา ปี กรึบ เบ ดี ดัว ดี เบ ตี. เซ อัน เฌา แฮะ ฮอต แตห เฆ ดูอี อีซาเรลัะ กอย ดาคึย, กอย ดีเหลา ปี เบ แฮะ ดีเหลา, เบ ปึอน ดี วี ตัห โดง กอย เบ ตี, อี มูห มืง อี กอย นา เลห ซีแง อึม แบลง ยอดาน แปะ แฮะ ดัว อาโมวแซ อี มูห แดเจณ เฌาพรา ดี เบ.”

16 แฮะ ฮอต, เฆ มืร วี กาลาง ดี อาโยวซูอา ต็อห, “เย ดี โบง โดบ ปี กาลาง อูน แม ตี. เย ดี ฮาว โดง จัร แม เย ฮาว. 17 เย มืร ดี โทม โฆรห แม เซเซ, แตห อึณ ปี ดอ แฮะ โทม เย โฆรห อาโมวแซ ตึอน. แตห เฌาพรา ปี กรึบ เอ กอย รึม โดบ แม เซเซ, แตห อึณ ปี ดอ แฮะ กอย รึม อัน เฌา โดบ อาโมวแซ ตึอน. 18 อาเซ วี แทณ โฆรห แม บอ ตู ซี โทม โฆรห ปี กาลาง แม, ดูอี วี ตี โลว คัม ดี ยัม. มาแล, แตห แม มึห แฮณ บอ มึห น็อห ยัะ.”