1 วาย อัน ตี อาโมวแซ บอ เลห แคง ฆลัง ดี มืง โมวอาบ, วี ฮาว ดี นอน เนปอ, แตห อัน กอ วี ฌัม กาแดะ นอน ปีซากา อี กอย ลาย กาซืร ดี มืง เยรีโคว. เฌาพรา บอ บยัะ กาดาย มืง บอ มืง ดี อัน. อึณ บอ จูห ดี กาดาย มืง ฆีเลอาด กอ ฌัม กาดาย มืง ดาน. 2 อึณ มูห บอ กาดาย โดง กอย เฆ ดูอี อานาบทาลี บอ มืง, กาดาย มืง อาเอพารีม, กาดาย มืง อามานาเซ บอ โดง กอย เฆ ดูอี อายูดา ดอน โปละ, กอ วี ฌัม ดี อึม นัมมูกซารา. 3 อาโมวแซ บอ ยึร บอ กาดาย มืง ยูดา บลาก นา เตต, บอ แคง ฆลัง ดี มืง เยรีโคว อี บอ จืร มืง เฮ จึก, กอ วี ฌัม ดี มืง โฌวอาน. 4 เฌาพรา วี ต็อห ดี อัน, “อึณ มูห มืง แปะ แฮะ ดืง แฮะ กาแซณ โอว ดี อาบราฮัม บอ อาแซก บอ อาโกบ เฆ ตึอน. โอว แฮะ ต็อห ดี ดัว ดี หลูกหลาน เฆ. โอว แฮะ แตห แม ยึร. โอว ยี ตู แตห แม ลึบ ฮาว แคง มืง ตี.”

5 ปาย ตี อาโมวแซ อี มูห แดเจณ เฌาพรา บอ ยัม แคง มืง โมวอาบ ปี ดึอม กาลาง เฌาพรา ดี อัน. 6 เฌาพรา บอ ดึห โดว ยัม อัน ตี, ดีบ แคง ดีลัยะ อาดา อู โปละ อี มูห แคง มืง โมวอาบ ตี, อี ลาย กาซืร ดี มืง เบดเบอูรา. ปี บอ แฮะ ต็อห ปาย ตี มืร, อึณ ยี ตู มึห อาเซ อี ยึร อึณอวน อัน กอ ฌัม ดอ ตี นี. 7 ดอ ยัม อาโมวแซ, อาซาก อัน แฮะ โนะ อู มาย็อห ดี อา ฆึร ซีนัม. งาย อัน มืร ตู โมว ตู กาปยอย. อัน ยี มึห โปลม มึห แฮณ ปี บรีม. 8 เฆ ดูอี อีซาเรลัะ บอ กลึร บอ ยาม โกบ ยัม อาโมวแซ กอ โนะ โอย ฆึร ซีแง. ดอ อัน ตี เฆ กอย แคง ฆลัง ดี มืง โมวอาบ ตึอน, แตห อึณ กอ ฮอต อาคราว ดี โลว ยาม บอ กลึร เฆ.

9 อาโยวซูอา มืร แฮะ มึห อางยาน แปะ แฮะ ดัว เฌาพรา ดี อัน. โคว, อาโมวแซ แฮะ ดึอม ดาง แด อัน แดง ฆีณ อาโยวซูอา, ม็องการา ดัว ดี อัน. เฆ ดูอี อีซาเรลัะ มืร โทม โฆรห อาโยวซูอา บอ โบง โดบ ดารา เฌาพรา ปี กาลาง อูน เฌาพรา ดี อาโมวแซ ตึอน.

10 วาย อัน ตี อาว ฮู มึห ดา อี บยาน โฆรห เฌาพรา คอ อู วี อี ปี อาโมวแซ. เฌาพรา แฮะ นับ อัน, กาลาง โฆรห ลาย โดว นา ดี อัน. 11 อาโมวแซ มืร แฮะ โบง อี หมึอม อาม แบน โมยว แบน โมยว ปี จัร เฌาพรา อัน โบง ดี คูนดีคัม บอ ดี เฆ อามู อามาด อัน บอ ดี เฆ ดูอี บอกาเฆลียด แคง มืง แอฆึบ. 12 อึณ มืร ตู มึห อาเซ อี แฮะ ดึอม บยัะ แคะ ตาง ปวน เฌาพรา, บอ โบง อี หมึอม อาม บอ อี หมึอม โยว อี ปี แปะ แฮะ โบง อาโมวแซ, แตห เฆ ดูอี อีซาเรลัะ ดอน อี ยึร.