1 โฆรห นี บอ มูห โฆรห อาโมวแซ อี มูห แดเจณ เฌาพรา. อัน ม็องการา ดัว ดี เฆ ดูอี อีซาเรลัะ อาต ยัม อัน. 2 อัน ต็อห, “เฌาพรา แฮะ เลห ตัห ดี นอน ซีนาย. ดอ ตัห อัน เฌา ตี, อึณ บอ ปี ซีแง แฮะ เลห แคง มืง เซอี. อัน เฌา บอ ตัห ดี นอน พาราน, แตห บลาง อัน บอ ตัห ดี เฆ ดูอี ปี อึบ อัน. อามู อามาด อี บอด บอ ตัห โดบ อัน, กอ มึห แบน แหรณ แบน หมึณ. แด อัน เฌา บลาก อาอัห บอ มึห เงา บลาง.

3 แฮะ หมาน, แม เฌาพรา ร็อก ดูอี บอกาเฆลียด อี มูห ดูอี ปี ร็อห แม. แม เฌา บอ จอย บอ ฆ็อง แร เฆ อี มูห ดูอี ปี อึบ แม. ปาย ตี เฆ บอกาเฆลียด บอ โฆม ฆึบ ดี เปลา แม เฌา. แตห เฆ โทม โฆรห แม.

4 อึณ มูห ดารา เฌาพรา แปะ แฮะ กาลาง อาโมวแซ ดี เอ, อึณ ดี แบน คาฆูน บอด ดี เอ ดูอี อาโมยว อาโกบ.

5 ดอ ตัห กาฌูะ กาดึม เฆ ดา ตาง อี อึบ อี แยต เฆ ดูอี อีซาเรลัะ ดอน ฌึร ดอน ครึร, เฌาพรา บอ แบน คูนดีคัม อี อึบ เฆ.

6 แกวะ แตห ครึร อารูเบน ยัม หราย โตต, แตห เฆ มึห อาซาก. แกวะ แตห เฆ เปรต ดอ เหมา.”

7 แฮะ ฮอต, อัน บอ กาลาง โฆรห ม็องการา ดี ครึร อายูดา ต็อห, “อึย แม เฌาพรา, หมาณ แตห แม โทม โฆรห ปี ดัด แดะ เฆ ครึร อายูดา, แตห เฆ บอ วี ลาย กาล็อะ ลาย ดาคึย ดี ดูอี อีซาเรลัะ อี มูห อาโมยว อัน. หมาณ แม เฌาพรา, แตห เฆ มึห โปลม เฆ แฮณ ดี กาโฆห ดี รันซู เฆ. แตห แม จอย, แตห เฆ แป รันซู เฆ.”

8 โฆรห อี ม็องการา ดัว ดี ครึร อาเลวี อัน บอ ต็อห, “อึย แม เฌาพรา, แม แฮะ ร็อห ครึร อาเลวี, แตห เฆ ปึอน ดี จัร มาว อูรีม ฆาย ทูมีม ตึอน. แม เฌา มืร แฮะ แฌด ดี ยอด น็อห เฆ ดี โดง จืร มาซา บอ ตู ลาย ซีเพา ดอ กอย เฆ โดง โตห อึม เมรีบา ตึอน.

9 เฆ มืร แฮะ บยัะ เฆ แฮะ โรวเซ แม เฌา หลึอม โรวเซ เฆ ฆูณ มา บอ บีนอง เฆ บอ หลูกหลาน เฆ. เฆ แฮะ ต็อห ดี ฆูณ มา เฆ, ‘โอว ตู นับ เบ.’ เฆ บอ โฆยวฆยา ดี โทม โฆรห แม เฌา บอ จอย แตห อี คัม กาดีก ซัดฌา แปะ แฮะ ดัว เฆ ดี แม เฌา.

10 เฆ ดี บอ มาโนว ปี ดัม อูน แม เฌา ดี เฆ อาโมยว อาโกบ. เฆ ดี บอ มาโนว ดารา แม ดี ดูอี อีซาเรลัะ. เฆ บอ โดะ หลู อึณกรึห อูห หงูน ดี อาต แม เฌา บอ หลู ปี ดี หลู อี โดะ ดี เงา บอ หลู โดว ซัดดาวา ดี แม เฌา แดง กาโช็ง หลู.

11 อึย แม เฌาพรา, แตห แม บอ ม็องการา ดัว โกรวกราม เฆ. ปี โบง ปี รัณ เฆ, แตห อึณ บอ ล็อะ น็อห แม เฌา. หมาณ, แตห แม เฌา มัห ณอย รันซู อี กาโฆห ดี เฆ, แกวะ แตห เฆ ปึอน ดี วี ยีต ดอ เหมา.”

12 โฆรห ม็องการา ดี ครึร อาเบนยาม อัน บอ ต็อห, “ครึร นี บอ มูห ครึร ปี ร็อก เฌาพรา. แตห เฆ ปึอน ดี กอย ซีคยา โคบ เฌาพรา. อัน เฌา บอ จอย ฆ็อง แร เฆ ดอง วัน. อัน แตห เฆ กอย ดาคึย กาแต นอน.”

13 โฆรห ม็องการา ดี ครึร อาโยว อัน บอ ต็อห, “แตห เฌาพรา ม็องการา ดัว ดี มาน มืง เฆ, แตห อึม ดีงาน บอ โจห แคง ฆางหราว โลง, แตห อึณ บอ มึห อึม กืน นา ครึม กาดาย.

14 แตห ซีแง บอ ดัว บลาง อัน ดี เบล ปี ซัม เฆ, แตห อึณ บอ ซีน บอ ซีแงห. แตห มาเฆียน บอ ม็องการา ดัว แคะ ปี ปึอน อัน ดัว.

15 บอ แดง นอน อี แฮะ กอย แคง มืง เฆ ซีณ อาต นี, แตห อึณ บอ เลห เบล บอด เบล หมึอม เซเซ บอ นา อาต ฮาว ดอน โจว ดอน บาน.

16 แตห อึณ บอ มึห มี โกรว บอด โกรว หมึอม ดีโลย. แตห เฌาพรา อี แฮะ ดึอม กาลาง โฆรห แคง เงา อี เลห แคง ยวน ตึอน บอ กาล็อะ ดี เฆ บอ ม็องการา ดัว นา หมึอม ดี เฆ. แตห อาโมยว อาโยว ปึอน ม็องการา ตี โกบ แฮะ แบน อาโยว ฆูณ ดัง เฆ บอ ดา อี แยต อูกัด อูวา อัน.

17 เฆ ดา ซึก แคง ครึร อาเอพารีม บอ แคง ครึร อามานาเซ, เฆ มึห แบน แหรณ แบน หมึณ. เฆ มึห โปลม เฆ แฮณ ปี มัก อาโล็ง อี มูห ฆอน ฆีณ. เฆ ปี มัก อาโล็ง แปร, บอ นับ ดี ตูห ยัม รันซู เฆ. เฆ ดูอี อาเอพารีม บอ เฆ ดูอี อามานาเซ บอ ปี มัก อาโล็ง ตี. เฆ ดี บอ ตูห ยัม รันซู เฆ, แตห อึณ กอ ฌัม โดง ซืด กาดาย.”

18 อี มูห ครึร อาเฌบูโลน ฆาย อาโมยว อาอีซาคา อาโมวแซ บอ ต็อห, “เบ ดูอี อาเฌบูโลน, แตห เบ โบยว ดาคึย โกบ ปึอน เบ ดี ลึบ ลึบ เลห เลห. บอ เบ ดูอี อาโมยว อาอีซาคา, แตห เบ โบยว ดาคึย กอย แคง ทึบ เบ.

19 เฆ ดี บอ แดะ ดูอี กืน ตัห แดง นอน เฌาพรา, แตห เฆ หลู ปี ดี หลู อี มูห อี หมาน. เฆ ดี บอ ปึอน โกรวกราม บอด แคง อึม นัมมูกซารา, บอ แคง กาฮาต โคบ บาง อึม ตี.”

20 ลอง ครึร อาฆัด อัน บอ ต็อห, “แตห เอ อืบ เฌาพรา อี แฮะ แตห ครึร อาฆัด กอย โดง กาว็อห. อาโมยว อาฆัด ตี, เฆ ดี บอ ปี มาครังซี อี บัร ดี ก็อะ โฮม แด เฆ ฆีณ อี.

21 เฆ มืร แฮะ ปึอน ร็อห กาดาย อี บอด หลึอม กาดาย อี เฮา. อึณ บอ มูห แปะ แฮะ กาย็อห อูน เฆ ดา ตาง อาดา เฆ. เฆ มืร แฮะ โบง โดบ ปี อึง เฌาพรา ดอ ตัห กาฌูะ กาดึม เฆ อี มูห ดา ตาง อี อึบ อี แยต เฆ ดูอี อีซาเรลัะ.”

22 ลอง ครึร อาดาน อัน ต็อห, “ครึร อาดาน บอ ปี มาครังซี หนึม อี แดน เลห แคง มืง บาซัน.”

23 ลอง ครึร อานาบทาลี อัน ต็อห, “อาโมยว อานาบทาลี แฮะ ปึอน กืน ม็องการา ปี เฆฌู เฌาพรา ดี เฆ. เฆ แฮะ ปึอน ดี บึง มืง บลาก นา เตต กอ วี ฌัม ดี อึม ดึง.”

24 ลอง ครึร อาเซน อัน ต็อห, “อาเซน แฮะ ปึอน ม็องการา บอด อี หลึอม บีนอง วอแว อัน. อัน บอ แฮะ ล็อะ กาเซา น็อห เฌาพรา หลึอม ครึร เฮา. แตห ดูอี อาโมยว อัน ครัม โกบ แฮะ ลึง เบล นามัน.

25 แซ มาโลห กาง เฆ ดี บอ มูห ฮีน เฆ บ็อง เดณ. เฆ ดี บอ ปึอน ดี กอย ดาคึย ฆยามซา บอ โจว เฆ.

26 อึย เบ ดูอี อีซาเรลัะ, อาว มึห อี ปี เฌาพรา ปี กรึบ เบ. เฌาพรา ปี กรึบ เบ, อัน กอย แคง ฆางหราว, ตัห โลง แดง อึณอูะ, แตห อัน จอย เบ. ปาย ตี อัน บอ บยัะ อาพูง ดังโคว อัน.

27 เฌาพรา อี กอย เซเซ บอ มูห โดง บึง เบ. อึณ ปี อัน โจะ เบ ตา แด อัน. อัน ดี โฮว เตา รันซู เบ. อัน ดัว อามีง ต็อห, ‘ปยาต แวน เฆ.’

28 โกบ อึณ ปาย ตี เฆ ดูอี อีซาเรลัะ บอ ปึอน ดี กอย ฆัด เฆียด. อาว มึห อี ดัว ดูก ดี เฆ. เฆ หลูกหลาน อาโกบ กอย ดาคึย แคง มืง โดง แฮะ มึห โหงว เฆ อึม มางูน กืน, มืง โดง โจห อึม ดีงาน, รึก กาดาย.

29 อึย เบ ดูอี อีซาเรลัะ, เบ แฮะ ปึอน ม็องการา บอด. อึย เบ ดูอี แปะ แฮะ คยอด เฌาพรา, อาว มึห อาเซ ปี เบ. เฌาพรา แฮะ ปี มัง ฆ็อง เบ. อัน แฮะ จอย เบ. อึณ บอ ปี มาปัวะ ลาง เฆ บลา เลียห อี ง็อห ยัม รันซู เบ, แตห เบ กอ ออง. รันซู เบ กอ กาดูห ดี ตัห โฆม ฆึบ ดี อาต เบ. เบ ดี บอ แณต ฮาว แดง กาตูะ เฆ.”