1 เฆ ดูอี อีซาเรลัะ แฮะ ฮอต เลห แคง มืง แอฆึบ อาดา อู ซีนัม. ดอ อัน ตี เฆ ซี กอย แคง แปร กาฮ็อห ดี โคบ นอน ซีนาย ตึอน. อึณ บอ วี ฌัม ซีนัม ฮาอา, มาเฆียน ฮาอา, ซีแง เหลห, เฌาพรา บอ วี กาลาง โฆรห ดี อาโมวแซ. ดอ อัน ตี อาโมวแซ กอย แคง ทึบ บีก บอด ตึอน. 2 เฌาพรา ต็อห, “แตห บาย อาโรน ตีห แคะ กอย เฆ ดูอี อีซาเรลัะ บอกาเฆลียด. ตีห โดบ ครึร เหมา ครึร อัน, อึณกรึห เหมา อึณกรึห อัน. แคะ กอย อีมาย, แตห บาย แดม โตต จืร เฆ, ฮับ แคง ฌาราง. 3 จูห อาซาก อา ฆึร ซีนัม โฮะ นา แดง, บาย โลว ตีห โตต แคะ กอย อีมาย อี แฮะ แป ดี กาโฆห ดี กาบัณ. บาย โลว แดม ฌาราง เฆ ตี โดบ อึณกรึห เหมา อึณกรึห อัน. 4 แตห บาย ร็อห ฆีณ อึณโฮม อู วี, แตห เฆ ตัห จอย บาย. 5 เฆ อี โลว จอย ปาย ตี จืร เฆ ปาย นี.

ครึร อารูเบน บอ มูห อาเอลีจู อี มูห ฆอน อาเซตูรัะ.

6 ครึร อาซีเมโอน บอ มูห อาเซลูเมน อี มูห ฆอน อาฌูรีซาเด.

7 ครึร อายูดา บอ มูห อานาโซน อี มูห ฆอน อามีนาดาบ.

8 ครึร อาอีซาคา บอ มูห อาเนทาเนลา อี มูห ฆอน อาจูอา.

9 ครึร อาเฌบูโลน บอ มูห อาเอลีอาบ อี มูห ฆอน อาเฮโลน.

10 ครึร อาเอพารีม อี มูห ฆอน อาโยว อู วี บอ มูห อาเอลีซามา อี มูห ฆอน อามีฮูด. ครึร อามานาเซ อี มูห ฆอน อาโยว ปอ วี บอ มูห อาฆามาเลน อี มูห ฆอน อาเปตาจูรัะ.

11 ครึร อาเบนยาม บอ มูห อาพีดาน อี มูห ฆอน อากีตอนี.

12 ครึร อาดาน บอ มูห อาเฮจา อี มูห ฆอน อามีซาเด.

13 ครึร อาเซน บอ มูห อาบาเฆลา อี มูห ฆอน อาออคารา.

14 ครึร อาฆัด บอ มูห อาเอลาซาบ อี มูห ฆอน อาตูลา.

15 ครึร อานาบทาลี บอ มูห อาฮีรัะ อี มูห ฆอน อาเอนัน.”

16 อึณ มูห เฆ ดูอี ฆึร ดี อา วี ตี แปะ แฮะ ร็อห อาโมวแซ ฆาย อาโรน, แตห เฆ จอย ฆาย. เฆ บอ มูห ดา ตาง อี อึบ ครึร ดูอี อีซาเรลัะ.

17 อาโมวแซ ฆาย อาโรน แฮะ ฮอต แดะ ดูอี แปะ แฮะ ร็อห เฌาพรา เฆ ตี, 18 เฆ บอ แดะ กาฌูะ โตต ดอน ฌึร ดอน ครึร ดอ มูห มาเฆียน ฮาอา, ซีแง เหลห ตึอน. เฆ บอ แดม โตต แคะ กอย จืร เฆ, ครึร เหมา ครึร อัน. เฆ บอ แดม ฌาราง อีมาย ดอน อี อี มูห อาซาก อา ฆึร ซีนัม โฮะ นา แดง, 19 แตห อึณ โดบ ปี กาลาง เฌาพรา ดี อาโมวแซ ตึอน. ปาย ตี อาโมวแซ บอ ตีห เฆ ดูอี อีซาเรลัะ, แตห อัน นับ แคะ กืน เฆ ดอ กอย เฆ แคง แปร กาฮ็อห โคบ นอน ซีนาย ตึอน.

20-21 ครึร อารูเบน อี มูห ฆอน ฆีณ อาโกบ อี บอ จืร อาอีซาเรลัะ ตึอน, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พวน หมึณ ดี เดา แหรณ ดี พัน มาย็อห วี.

22-23 ครึร อาซีเมโอน, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พัน หมึณ ดี ดีม แหรณ ดี โอย มาย็อห วี.

24-25 ครึร อาฆัด, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห ดี กาบัณ, เฆ กอย พวน หมึณ ดี พัน แหรณ ดี เดา มาย็อห ดี พัน ฆึร วี.

26-27 ครึร อายูดา, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย บู หมึณ ดี พวน แหรณ ดี เดา มาย็อห วี.

28-29 ครึร อาอีซาคา, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พัน หมึณ ดี พวน แหรณ ดี พวน มาย็อห วี.

30-31 ครึร อาเฌบูโลน, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พัน หมึณ ดี บู แหรณ ดี พวน มาย็อห วี.

32-33 ครึร อาเอพารีม อี มูห หลูกหลาน อาโยว, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พวน หมึณ ดี พัน มาย็อห วี.

34-35 ครึร อามานาเซ, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย โอย หมึณ ดี อา แหรณ ดี อา มาย็อห วี.

36-37 ครึร อาเบนยาม, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย โอย หมึณ ดี พัน แหรณ ดี พวน มาย็อห วี.

38-39 ครึร อาดาน, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย เดา หมึณ ดี อา แหรณ ดี บู มาย็อห วี.

40-41 ครึร อาเซน, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พวน หมึณ ดี อู แหรณ ดี พัน มาย็อห วี.

42-43 ครึร อานาบทาลี, แคะ กอย อีมาย แปะ แฮะ ตีห ฆาย โดบ อึณกรึห เหมา อึณกรึห อัน, ฆาย แฮะ ฮับ โตต จืร เฆ แคง ฌาราง. จูห ซีณ อาซาก อา ฆึร ซีนัม โฮะ นา แดง, แคะ กอย อีมาย อี แฮะ แป ดี กาโฆห, เฆ กอย พัน หมึณ ดี โอย แหรณ ดี พวน มาย็อห วี.

44 ดูอี เฆ ตี, เฆ มูห อีมาย แปะ แฮะ ตีห อาโมวแซ ฆาย อาโรน, แตห อึณ โดบ อึณกรึห เหมา อึณกรึห อัน. เฆ ดา ตาง ฆึร ดี อา วี ตึอน มืร อี กาดาง ครึร เฆ, เฆ แฮะ จอย ฆาย. 45 เฆ มืร แฮะ ตีห อีมาย อาโมยว ดูอี อีซาเรลัะ ดอน อี, อี แฮะ โนะ อา ฆึร ซีนัม โฮะ นา แดง. อึณ มูห ดอน อี แฮะ ปึอน กาโฆห กาบัณ. 46 เฆ ดูอี อีซาเรลัะ ฆึร ดี อา ครึร ตี, เฆ บอกาเฆลียด กอย เดา แซน ดี โอย แหรณ ดี พัน มาย็อห ดี พัน ฆึร วี.

47 อี มูห ครึร อาเลวี ยี ตู ตีห, ตู ลึบ แคง ฌาราง ตี โดบ อี เฮา. 48 โคว, เฌาพรา แฮะ ฮอต กาลาง อูน ดี อาโมวแซ ต็อห, 49 “ดอ แดม แม ฌาราง อีมาย เฆ ดูอี อีซาเรลัะ อี แฮะ แป ดี กาโฆห ตี, แม แกวะ แดม ฌาราง เฆ ดูอี ครึร อาเลวี. 50 แม โลว แตห ดูอี ครึร อาเลวี โบง ดอน โมยว แคง ทึบ บีก บอด. แตห เฆ ยอด ลึมลา บอ ทึบ บอ โตต ดอน โมยว อี กอย นา แคง. แตห เฆ กาโย็ง ทึบ ตี บอ ครึง ตา อัน ดอน โมยว. แตห เฆ โบง ฆาน แคง ทึบ ตี บอ กอย โรบ อัน. 51 เซ เบ กาโทะ โดง คยัะ เบ, ฮาว ปอ โปละ, เฆ ดูอี ครึร อาเลวี ตี โลว ย็อห ดี เฆรียบ ทึบ บีก ตี, ปี วี ซัม โดง คยัะ กามาย เบ ตี ดอน เฌณ. เซ ดูอี เฮา อี ตู มูห ครึร อาเลวี ตัห กาตัด ทึบ บีก บอด ตี, เบ โลว ง็อห ยัม อัน. 52 เฆ ดูอี อีซาเรลัะ ดอน ครึร อี ตู มูห ครึร อาเลวี, แตห เฆ คยัะ โดบ พึง เหมา พึง อัน. แตห เฆ กอย โดบ อาลาม เฆ โมยว เหมา โมยว อัน. 53 มาแล, อี มูห ดูอี ครึร อาเลวี, เฆ โลว กอย โรบ ทึบ บีก บอด ตี, แกวะ แตห อึณ มึห อาเซ ปึอน ดี ตัห กาตัด, โบง แตห เฌาพรา รู บอ ดัว ดูก ดี ดูอี อีซาเรลัะ.”

54 เฌาพรา แฮะ ฮอต กาลาง ปาย ตี เฆ ดูอี อีซาเรลัะ บอ โบง โดบ ปี กาลาง เฌาพรา ดี อาโมวแซ ตี.