1 เฌาพรา วี จัร อาโมวแซ, 2 แตห อัน วี กาลาง ดี ดูอี อีซาเรลัะ ต็อห, “เซ อึณ มึห ดูอี อี แฮะ กาแซณ ดี หลู ดูอี อู วี ดี เฌาพรา, อัน โลว วี ทูด วีว วี ตี, วี ดัว ง็อห อัน ดี เฌาพรา. 3 เบ โลว ซูงพยาด ง็อห ดูอี ปาย นี. เซ อึณ มูห อีมาย, อาซาก อัน แฮะ โนะ อา ฆึร ซีนัม ฌัม เดา ฆึร ซีนัม, เบ โลว หลู รึอน เดา ฆึร โบ็ง อาดา อัน. เบ โลว ซัะ รึอน ตี ตา เบล ซัะ อี กอย แคง ทึบ บีก บอด. 4 เซ อึณ มูห อีบึณ, อาซาก อัน แฮะ โนะ อา ฆึร ซีนัม ฌัม เดา ฆึร ซีนัม, เบ โลว หลู รึอน โอย ฆึร โบ็ง. 5 เซ อึณ มูห ดูอี, อาซาก อัน แฮะ โนะ พัน ซีนัม ฌัม อา ฆึร ซีนัม, เซ อัน มูห อีมาย, เบ โลว หลู รึอน อา ฆึร โบ็ง. เซ อึณ มูห ฆอน อีบึณ, แตห เบ หลู รึอน ฆึร โบ็ง. 6 เซ อึณ มูห ฆอน อีมาย, อาซาก อัน แฮะ โนะ อู มาเฆียน ฌัม พัน ซีนัม, เบ โลว หลู รึอน พัน โบ็ง. เซ อึณ มูห ฆอน อีบึณ, เบ โลว หลู รึอน โอย โบ็ง. 7 เซ อึณ มูห อีมาย อาซาก แฮะ โนะ เดา ฆึร ซีนัม โฮะ นา แดง, เบ โลว หลู รึอน ฆึร ดี พัน โบ็ง. เซ อึณ มูห อีบึณ, เบ โลว หลู รึอน ฆึร โบ็ง. แตห เบ หลู ปาย ตี.

8 เซ อึณ ยี มูห ดูอี อี แฮะ ฆีน กาเซา, ตู ปึอน ดัว แคะ ปี โลว หลู อัน, แตห อึณ ทูด วีว แปะ แฮะ ดึอม กาแซณ อัน, ดูอี วี ตี โลว ฮาว โดง กอย ดา อี หลู ดี เฌาพรา, แตห ดา อี หลู ดี เฌาพรา ซูงพยาด ดัว แคะ ดี มึห อัน.

9 เซ เบ แฮะ กาแซณ ดี หลู โดว ซัดดาวา ดี เฌาพรา, เซ โดว ตี แฮะ หมึอม หลู, อึณ ดี แบน โดว อี ซีงา บอด. 10 บอ มูห โดว อี หมึอม, โดว อี ตู หมึอม, ดูอี อี แฮะ ฮอต กาแซณ ดี หลู ตี, อัน ตู ปึอน วี กาปลูะ หลู ปอ อู โดว. เซ อัน ยี วี กาปลูะ วี หลู โดว เฮา, บอ อา โดว แฮะ แบน โดว อี ซีงา บอด ปี โลว หลู อัน ดี เฌาพรา. 11 เซ โดว ซัด ปี กาแซณ เบ ดี หลู ตี มูห โดว ซัด อี ตู ซีงา อี ตู บอด, อี ตู กาอาบ แตห อัน แบน ปี หลู ดี เฌาพรา, เบ โลว ดึห โดว ปี กาแซณ เบ ตี, ฮาว ตึย ดี ดา อี หลู ดี เฌาพรา. 12 ดา อี หลู ดี เฌาพรา โลว ซูงพยาด ง็อห อัน, แตห อึณ กาดาน แคะ หมึอม ตู หมึอม โดว ซัด ตี. อัน ต็อห แคะ เหมา, เบ โลว ดัว แคะ ตี. 13 เซ ดูอี ตี บอ ซี ทูด วีว โดว ตี, โลว เค ง็อห อัน แคะ ปี ซูงพยาด อูน ดา อี หลู ดี เฌาพรา ตึอน. อัน โลว วี ปัว ปอ พัน บูน อู บูน.

14 เซ อึณ มึห ดูอี อี ซี หลู กาง อัน ดี เฌาพรา, แตห อึณ ซีงา บอด, ดา อี หลู ดี เฌาพรา โลว ซูงพยาด ง็อห อัน, ยอด กาง ตี, โยว อึณ ซีคยา, ตู ซีคยา. อัน บอ ต็อห ง็อห อัน แคะ เหมา, ดูอี อี หลู ตี โลว ดัว แคะ ตี. 15 เซ ดูอี อี หลู กาง ตี วี ซี ทูด วีว, แตห อัน เค แคะ แฮะ กาลาง อูน ดา อี หลู ดี เฌาพรา บอ วี ปัว ปอ พัน บูน อู บูน. แฮะ ฮอต, กาง ตี วี แบน กาง อัน.

16 เซ อึณ มึห ดูอี อี ซี หลู มาน เฆ โดง นา ดี เฌาพรา, แตห อึณ ซีงา บอด, เบ โลว ซูงพยาด ง็อห อัน แคะ ลึบ ซีมา โหงว. เซ ซีมา โหงว ลึบ ฆึร เอพา อี มูห อู คอน ดี บู แบล, ง็อห อัน แฮะ มึห รึอน พัน ฆึร โบ็ง. 17 เซ อัน หลู มาน เฆ โดง นา ดอ มูห ซีนัม ดี โลว ดัว วีว ตึอน, ง็อห อัน มูห แคะ ปี กาลาง อูน ตี. 18 เซ อัน ยี หลู วาย ซีนัม ดี โลว ดัว วีว ตี, ดา อี หลู ดี เฌาพรา โลว ตีห ซีนัม อี ซี ฆีด, กอ ดี ฌัม ซีนัม ดี โลว ดัว วีว ปอ อู เฌณ. ง็อห อัน โลว โยม โดบ ซีนัม อี ซี ฆีด ตี. 19 เซ อัน บอ วี ซี ทูด วีว โดง นา แปะ แฮะ หลู อัน ตี, อัน โลว เค ง็อห อัน แคะ ปี กาลาง อูน ดา อี หลู ดี เฌาพรา บอ วี ปัว พัน บูน อู บูน. 20 เซ ดูอี ตี วี ย็อง โดง นา ตี ดี อี เฮา อาต ปึอน อัน ดี ทูด วีว ดี เฌาพรา, อัน อาว ฮู ปึอน วี ทูด วีว ดอ เหมา 21 เซ อึณ ฌัม ซีนัม ดี โลว วี ดัว วีว ตึอน, มาน เฆ โดง นา ฌึร ตี แบน อี ซีงา บอด, แบน โกรว เฌาพรา. ดา อี หลู ดี เฌาพรา ปึอน วี รัณ ดี โฮม.

22 เซ อึณ ยี มึห ดูอี อี แฮะ หลู โดง นา เฆ มาน ปี จึห อัน ดี อี เฮา, เซ อาว มูห คาฆูน ปี กาซาง ฆูณ อัน, 23 ดา อี หลู ดี เฌาพรา โลว ตีห หนาง ซีนัม ซี ฆีด กอ ฌัม ซีนัม ดี โลว วี ดัว วีว ตึอน, วี ซูงพยาด ง็อห อัน. แฮะ ฮอต, ดูอี อี หลู ตึอน โลว ดัว ง็อห อัน ตี ซีแง ตี. รึอน ตี แฮะ บอด กาเซา. โคว, อึณ แฮะ แบน แปะ แฮะ หลู ดี เฌาพรา. 24 ดอ ฌัม ซีนัม ดี โลว ดัว วีว ตึอน, มาน เฆ โดง นา ตี, เบ โลว วี อาบ วีว ดี ดา กาณา บรีม อัน. 25 แคะ ปี ซูงพยาด เบ ง็อห ปี ดี หลู ดอน โมยว, เบ โลว ซัะ ตา เบล ซัะ อี กอย แคง ทึบ บีก บอด.

26 ฆอน ฆีณ โดว ซัดดาวา อาว ปึอน หลู ดี เฌาพรา. อึณ แฮะ ฮอต มูห โกรว เฌาพรา. บอ มูห มาบู, มามัก เฆ มาแป, อึณ แฮะ มูห โตต โกรว เฌาพรา. 27 เซ อึณ มูห ฆอน ฆีณ โดว ซัดดาวา โมยว อี ตู ซีงา, เบ โลว วี ทูด วีว, ดัว ง็อห แปะ แฮะ ซูงพยาด เฆ ดี อาต. เบ โลว วี ปัว ปอ พัน บูน อู บูน. เซ ดา กาณา อัน ยี ตู วี ทูด วีว, ดา อี หลู ดี เฌาพรา โลว ย็อง ดี อี เฮา. วี อี จึห โลว ดัว ง็อห อัน แคะ แฮะ ฮอต ซูงพยาด ตึอน.

28 โมยว เหมา อาว ต็อห, แปะ แฮะ กาแซณ เบ ดี หลู กาดัด ดี เฌาพรา, บอ มูห ดูอี บอ มูห โดว ซัดดาวา บอ มูห มาน เฆ โดง นา, อาว ปึอน วี ย็อง, อาว ปึอน วี ทูด วีว. แฮะ แบน อี ซีงา บอด อี มูห โกรว เฌาพรา.

29 ปี บอ มูห ดูอี แปะ แฮะ กาแซณ เบ ดี หลู กาดัด ดี เฌาพรา มืร, อาว ปึอน วี ทูด วีว. เบ โลว แตห อัน ยัม.

30 แคะ กอย โมยว อี ลัต แดง กาดาย ดอน โมยว, บอ มูห โมยว อี มึห เฆา, บอ มูห โมยว อี มึห เบล, ฆึร บูน อู บูน มูห โกรว เฌาพรา. อึณ แฮะ บอด กาเซา. 31 เซ อึณ ยี มึห ดูอี อี ซี ทูด วีว ฆึร บูน อู บูน ตี, เบ โลว เค ง็อห อัน บอ วี ปัว ปอ พัน บูน อู บูน. 32 แคง โดว ซัดดาวา ปี เฮียง เบ, ฆึร โดว อู โดว เบ โลว กาย็อห เลห, แตห อึณ แบน โกรว โอว อี มูห เฌาพรา. 33 ดา กาณา โดว ซัด ตี ยี ตู ปึอน ดึห โดว อี ตู หมึอม, วี ปลูะ โดว แปะ แฮะ ฮอต ร็อห อัน ตี. เซ อัน ยี ดึห โดว เฮา, วี ปลูะ โดว ตี, บอ โดว ตี, บอ โดว ปี กาปลูะ อัน แฮะ แบน โกรว เฌาพรา.”

34 อาตี, อึณ มูห ดารา ปี ดัม อูน เฌาพรา ดี อาโมวแซ ดอ กอย อัน แดง นอน ซีนาย, แตห เฆ ดูอี อีซาเรลัะ โบง โดบ.