1 เฌาพรา ปี วี ต็อห, “แคง มืง เบ, เบ แกวะ โบง อารึบ มาเซ, ต็อห อึณ มูห เฌาพรา. แกวะ โบง อารึบ มาเซ, แตห อัน แบน ปี กรึบ เบ. แกวะ ซัม ฆันทอน, แกวะ โบลห มาว, โบง อารึบ ปี ดี กรึบ เบ. โอว มูห อัน เฌา อี มูห เฌาพรา ปี กรึบ เบ.

2 เบ โลว กัม ซีแง ดีเหลา. เบ โลว โรวเซ โดง กรึบ เบ ดี โอว. โอว มูห อัน เฌา อี มูห เฌาพรา.

3 เซ เบ โบง โดบ ดารา โอว, โบง โดบ ปี จัร โอว ดี เบ, 4 โอว ดี แตห ฆลาย โจห ดอ มูห อาคราว อัน, แตห กาดาย เบ บอด, แตห ปี ซัม เบ ออง, แตห บอ เฮ เบล ปี ซัม เบ มึห เบล กืน. 5 โอว ดี แตห โหงว เบ กืน, แตห เบ มัห เหลณ โหงว เบ, แตห อึณ กอ ฌัม อาคราว โลว เบต เบ เบล มางูน. เบ ดี บอ เบต เบล มางูน, แตห กอ ฌัม อาคราว วี โลว ฮับ เบ ครึง ซีมา. เบ ดี ปึอน ดี โฮม แพ บอ กอย ฆัด เฆียด แคง มืง เบ.

6 โอว มืร ตู แตห อึณ มึห อี กาโฆห ดี เบ, ตู แตห อึณ มึห อี รัน อี พยาก เบ. เบ ดี บอ ปึอน ดี อีด ดาคึย, กอย ดาคึย. โอว ดี ดึห เลห มาโดว แปร แคง มืง เบ, ตู แตห อึณ มึห ดา ซึก อี กาโฆห แคง มืง เบ. 7 เบ ดี ออง บอ แป รันซู เบ, แตห เฆ บอกาเฆลียด เตา เบ. 8 ดูอี เบ พัน วี ดี บอ แป บอ คูงครัห รันซู เบ อู มาย็อห วี. ดูอี เบ อู มาย็อห วี ดี บอ แป บอ คูงครัห รันซู เบ อู หมึณ วี. รันซู เบ ดี บอ ชึม ดี มาปัวะ ลาง เบ.

9 โอว ดี ม็องการา แตห หลูกหลาน เบ แบร กืน. กาดีก ซัดฌา ปี ดัว โอว ดี เบ โอว ตู แตห อึณ บลืง ดอ เหมา. 10 โหงว เบ ดี กืน. อาว โตต ดี โฮม อาดา อู ซีนัม. เบ ดี บอ โลว ดึห เลห โหงว บรีม, แตห อึณ มึห โดง ดี วี ฮับ โหงว กามาย. 11 โอว ดี กอย รึม โดบ เบ แคง ทึบ บีก บอด อี มูห โดง กอย โอว. โอว มืร ตู แวน เบ ดอ เหมา. 12 โอว ดี กอย รึม โดบ เบ. โอว ดี แบน เฌาพรา ปี กรึบ เบ. เบ มืร ดี แบน ดูอี ปี ยอด แมน โอว. 13 โอว มูห เฌาพรา ปี กรึบ เบ. โอว อี ทูด เลห เบ แคง มืง แอฆึบ, แตห เบ ลอด แบน หมาย อี เฮา. โอว แฮะ ดึห แวน อี คาหนาบ เบ, แกวะ แตห เบ โลว คัม ดูก เซเซ.”

14 เฌาพรา ปี วี ต็อห, “เซ เบ ยี ตู โทม โฆรห โอว, เบ ดี โลว คัม หมาบ เบ. เซ เบ ตู โบง โดบ ปี จัร โอว ดี เบ, 15 เซ เบ แวน โฆรห โอว บอ ฌ็อง ดารา โอว, ตู โดบ ปี กาแซณ โอว ดี เบ, 16 โอว ดี ดัม หมาบ ดี เบ ปาย นี. โอว ดี แตห เบ กอ โยว กาเซา อู เณณ. โอว ดี แตห เบ มึห เซา รอฆา อี แตห งาย เบ ลึร, แตห อาซาก เบ ชึม. เบ บอ ซัม มาเซ, อึณ ดี มึห รันซู เบ อี ดี ตัห โฮม. 17 โอว มืร ตู ยอด เบ, แตห เบ ชึม ดี อี เฮา. เฆ อี ฌ็อง เบ ดี อึบ เบ. ปี ซัะ มึห อี คูงครัห เบ, เบ ยี ดี กาดูห ดี เตา.

18 เบ ปี บอ แฮะ กาดูห ปาย ตี เซ เบ ยี ซี แนะ ตู โทม โฆรห โอว, โอว ดี แว ปัว ดูก ดี เบ ปอ บู บูน โกบ หมาบ เบ ตี. 19 โอว ดี ดึห แวน น็อห ดืร น็อห ปีคึก เบ. โอว มืร ตู แตห ฆลาย โจห คอ อี แจก โดง กอย เบ, แตห กาดาย โดง กอย เบ กาฮ็อห โปลม ปี ฮีน. 20 ปี โฆยวฆยา เบ ดี โบง อาว ฮู มึห ดีโคว มาเซ. เบ ดี โบง ฆาน ดีโลย ดีลาย ปีเยณ. กาดาย โดง กอย เบ มืร, อาว ฮู ลัต มาเซ. เฮ เบล ปี ซัม เบ มืร, อาว ฮู มึห เบล อัน.

21 เซ เบ ยี แนะ ฌ็อง โอว, ตู โทม โฆรห โอว, โอว ดี แว ปัว ดูก ดี เบ หลึอม ตี ปอ บู บูน. 22 โอว ดี แตห มาโดว แปร ฮาย ลึบ โดง กอย เบ, ก็อะ ยัม ฆอน เบ, แตห เฆ ปยาต โดว ซัด ปี เฮียง เบ, แตห บอ ดูอี เบ แกร ดี โยม, แกร ดี เปรต, แตห บอ อึณเตณ เบ ราม.

23 เบ ปี บอ แฮะ คัม ปาย ตี เซ เบ ยี ตู โทม โฆรห โอว, แนะ อี ฌ็อง โอว, โบง กาบัห ดี โอว, 24 โอว ดี วี ดัว ดูก ดี เบ, แตห อึณ กาเซา หลึอม อาต นี ปอ บู บูน. 25 โอว ดี แตห ซึก ตัห กาโฆห โดง กอย เบ โกบ แฮะ แวน เบ ปี ลาย กาแซณ เบ ดี โอว. เบ ปี บอ แฮะ เวณ เครียง แคง มืง เบ, โอว ดี แตห เบ มึห เซา รอฆา, แตห เบ ชึม บอ ดี รันซู เบ. 26 โอว ดี โบง แตห เบ เอต ปี ดี โฮม, แตห อีบึณ ฆึร วี กอ ตัห จู กาฟาง อู กาฟาง, ฆึม คามูน เฆ. เฆ ดี ซัะ กาซาง คามูน ตี ดี เบ, ยี ตู โกบ แพ เบ.

27 เบ แฮะ คัม ดูก ตาง แคะ ตี, เซ เบ ยี ซี แนะ โบง กาบัห ดี โอว, ตู โทม โฆรห โอว, 28 โอว ดี รู กาเซา ดี เบ, วี โบง แตห เบ คัม ดูก อี ฮาย กาเซา, แตห อึณ หลึอม อาต นี ตี ปอ บู บูน. 29 เบ ดี กาปราณ กาเซา ปี ดี โฮม, แตห เบ กอ วี ง็อห โฮม ยัง ฆอน เบ. 30 โอว ดี ปยาต แวน โดง กรึบ เบ อารึบ, อี กอย แดง โดง จา. โอว ดี ปยาต แวน กาโช็ง โดง โดะ เบ อึณกรึห อูห หงูน. โอว ดี วี ดึห โดว ยัม เบ, แวน แดง อารึบ ราง อี แฮะ กาบัก แฮะ ลึร ตี. โอว ดี บอ กาอีห กาเซา เบ. 31 โอว ดี ปยาต มืง เบ, ปยาต บอ โดง กรึบ เบ อารึบ. บอ อึณกรึห อูห หงูน ปี โดะ หลู เบ ดี โอว, อึณ มืร ตู ล็อะ น็อห โอว. 32 โอว ดี ปยาต แตห มืง เบ กอ ราม โตต, แตห บอ รันซู เบ อี ตัห กอย โดง ตี กอ วี กาปึณ กาเซา. 33 โอว ดี โบง แตห ดา ซึก ตัห กาโฆห ดี เบ. แตห เบ เตา กาย็อห, ฮาว กอย มืง อี เฮา. มืง เบ ดี ราม, กาปยาต ลึร โตต. 34 เซ มืง เบ แฮะ ราม ปาย ตี อึณ ปึอน ดี กอย ดีเหลา แบน ซีนัม แบน ซีนัม ดอ กอย เบ แคง มืง รันซู เบ. ดอ ตู มึห อาเซ แคง มืง เบ ตี, อึณ บอ ปึอน กอย ดีเหลา ปี ดอ มูห ซีนัม ดีเหลา. 35 ดอ กอย เบ แคง มืง รันซู เบ, กาดาย แคง มืง บรีม เบ ดี บอ ปึอน ดีเหลา ซีคยา โกบ ตู แตห เบ มืง ดีเหลา ดอ โลว ดีเหลา.

36 ดูอี เบ อี ซี ฆีด อี โลว กอย แคง มืง อี เฮา ตึอน, โอว ดี บอ แตห เฆ โยว กาเซา. เซ เฆ ฮี ยึร ฮัม คูน บูด หลา เฮ, อึณ ดี กาโบยว เฆ, แตห เฆ กอ เกห ดี เตา, แตห อึณ กอ ปี เฆ เตา ดา ซึก. เฆ ยี เตา ปีเยณ, อาว มึห รันซู คอ อู วี โดบ เฆ. 37 อึณ ตู มึห อาเซ คูงครัห เฆ. เฆ ยี ดี เตา เกห, ลาย แณต ปี เฆ เตา อี แฮะ โฆ็ง ปัวะ โฆ็ง เลียห, คูงครัห เฆ. เฆ มืร ตู มึห โปลม ดี วี กาโฆห ดี รันซู. 38 เบ ดี บอ ยัม แคง มืง ดูอี เฮา. อึณ ปี กาดาย แคง มืง รันซู เบ ตี ดี บอ หณอด เบ. 39 เฆ อี ซี ฆีด แคง มืง รันซู เบ, เฆ ดี บอ ดีหลัห บอ แกร ดี ยัม โกบ หมาบ เบ บอ โกบ หมาบ ฆูณ ดัง เบ.

40 เซ เบ ยี วี โหลห วี กาลาง หมาบ เบ บอ หมาบ ฆูณ ดัง เบ บอ แปะ แฮะ กาลึบ แปะ แฮะ กาบัห เบ ดี โอว, 41 เซ เบ บอ กาลาง แปะ แฮะ โบง เบ อี แตห โอว โบง กาบัห ดี เบ, อี แตห โอว บอ ตึย เบ ฮาว กอย มืง รันซู เบ, เซ เบ บอ วี มึห น็อห คัม ดี โฆม, คัม ดี โยม, วี หมาณ ดี บลัวะ แวน หมาบ แปะ แฮะ โบง กาบัห เบ ดี โอว, 42 โอว ดี วี โบง โดบ กาดีก ซัดฌา ปี ดึอม ดัว โอว ดี อาโกบ บอ อาแซก บอ อาบราฮัม ตึอน. โอว ดี วี โหลห แปะ แฮะ กาแซณ โอว ลอง มืง เบ ตี. 43 โคว, เบ แฮะ เบลห มืง เบ, แตห อึณ ราม. ดอ ตู กอย เบ แคง มืง ตี, มืง บอ ปึอน ดี กอย ดีเหลา ปี ดอ มูห ซีนัม ดีเหลา. เบ ดูอี อีซาเรลัะ ยี โลว คัม หมาบ เบ โกบ แวน เบ โฆรห โอว บอ หลึร ดารา ปี ดัม อูน โอว. 44 เบ ปี บอ โลว คัม ดูก ตาง บอ โลว กอย แคง มืง รันซู เบ มืร, โอว ยี ตู ปยาต ตู แวน โตต เบ ดอ เหมา. โอว มืร ตู ปยาต แวน กาดีก ซัดฌา ปี ดัว โอว ดี เบ. โอว มูห อัน เฌา อี มูห เฌาพรา ปี กรึบ เบ. 45 โกบ ร็อก โอว ดี เบ, โอว ดี โบง โดบ กาดีก ซัดฌา แปะ แฮะ ดึอม ดัว โอว ดี ดา ดา เบ, อี มูห แปะ แฮะ แยต เลห โอว แคง มืง แอฆึบ ตึอน, แตห บอ ดูอี อาโมยว เฮา ยึร ลอง อัน ตี, แตห เฆ บอ นับ, โอว มูห เฌาพรา ปี กรึบ เบ. อาตี แฮะ หมาน, โอว มูห อัน เฌา อี มูห เฌาพรา.”

46 โฆรห ฌึร ตี ดอน โมยว, แฮะ มูห ดารา บอ โฆรห ปี ดัม อูน เฌาพรา ดี อาโมวแซ ดอ กอย อัน ดี นอน ซีนาย, แตห เฆ ดูอี อีซาเรลัะ โดบ.