1 ดอ กอย อาโมวแซ แดง นอน ซีนาย ตึอน, เฌาพรา วี จัร อัน, 2 แตห อัน วี กาลาง ดี เฆ ดูอี อีซาเรลัะ ต็อห, “ปัน ดี ลึบ เบ แคง มืง แปะ แฮะ ต็อห โอว ดี ดัว ดี เบ ตึอน, บอ กาดาย แคง มืง ตี เบ โลว แตห อึณ ดีเหลา, แตห อึณ ล็อะ น็อห เฌาพรา. 3 อาดา เดา ซีนัม เบ แฮะ ปึอน รัณ มาน, รัณ โดง นา. แฮะ ปึอน ครัห เฮ มางูน เบ, แฮะ ปึอน แฆบ อูน เบล ปี ปีด ปี ซัม เบ. 4 มาแล, บอ ฌัม ซีนัม อึณบู, เบ โลว แตห กาดาย ดีเหลา. เบ ดูอี โลว ดีเหลา บู ซีแง อู เฌณ. ปาย ตี เบ โลว แตห กาดาย เบ ดีเหลา บู ซีนัม อู เฌณ. เบ โลว โบง ปาย ตี แตห อึณ ล็อะ น็อห เฌาพรา. อาว โลว รัณ มาน, รัณ โดง นา. อาว โลว ครัห เฮ มางูน เบ. 5 บอ กาโย็ง อี เลห ตัห ราง อัน แคง มาน แคง โดง นา เบ มืร, แกวะ ฮาว โซะ, ฮาว เบต. บอ เฮ มางูน ปี ตู ครัห เบ รา อัน, อี เบล ราง อัน, เบ แกวะ ฮาว แฆบ, ฮาว เบต. อึณ มูห ซีนัม อี แตห กาดาย ดีเหลา. 6 ดอน อี ยี ปึอน เหรต ปี ดี โฮม อี เลห ราง อัน, ดึห แคะ ปี โลว อัน. บอ อาดา อึณโฮม เบ บอ อาดา หมาย เบ บอ อาดา ดูอี อี ฌาง ดี เบ บอ อาดา เฆ ดูอี อาโมยว เฮา อี กอย รึม โดบ เบ 7 บอ อาดา โดว ซัดดาวา เบ บอ อาดา เฆ มาโดว แปร, อึณ ดี มึห ปี ดี โฮม ดอน โมยว อี เลห ราง อัน.”

8 “เบ โลว ตีห ซีนัม ดีเหลา บู เฌณ. อึณ แบน บู ซีนัม บู เฌณ. บอกาเฆลียด อึณ แบน พวน ฆึร ดี ดีม ซีนัม. วาย แฮะ โตต พวน ฆึร ดี ดีม ซีนัม ตี, 9 ดอ ฌัม มาเฆียน อึณบู, ซีแง ฆึร, อึณ มูห ซีแง ปี โลว โบง เบ บลอย อี แตห เบ วี ลาย กาล็อะ ดี เฌาพรา. ซีแง อัน ตี เบ โลว จัร ดูอี อู วี, แตห อัน บูด เวา, แตห อึณ ลึห กาลัต บอ มืง. 10 ซีนัม ตี, อี มูห ซีนัม พัน ฆึร, เบ โลว แตห อึณ แบน ซีนัม อี ซีงา บอด. อึณ ดี แบน ซีนัม ดอ แตห เบ ดูอี ดอน อี วี แบน ดูอี อี กอย ทังฮาง. ดอน อี บอ โลว กอย ดาคึย ซีนัม ตี. กาดาย แปะ แฮะ ย็อง อี เฮา ดี เบ, เบ โลว วี ดัว วีว ดี กาณา บรีม อัน. บอ เฆ ดูอี แปะ แฮะ ย็อง อี, แตห เฆ แบน หมาย อี, เฆ ดี ปึอน วี เวณ ดี กาง เฆ, เวณ แคง อึณโฮม เฆ. 11 ซีนัม พัน ฆึร ตี, อึณ ดี แตห เบ โบยว ดาคึย. ซีนัม ตี เบ ตู ปึอน ซัม มาเซ. กาโย็ง อี เลห ตัห ราง อัน ดี ดัง อัน ตึอน มืร, เบ ตู ปึอน โซะ, ตู ปึอน เบต. เฮ มางูน ปี ตู กาดูห เบ ดี ครัห, อี วี เบล ตัห ราง อัน, เบ ตู ปึอน เบต, ตู ปึอน ดึห อูน. 12 โคว, อึณ มูห ซีนัม อี แตห เบ โบยว ดาคึย. อึณ มูห ซีนัม บอด บอ ซีนัม. เบ ดี โฮม มี อี เลห ตัห ราง อัน แคง มาน แคง โดง นา เบ.

13 ดอ ซีนัม อี แตห เบ โบยว ดาคึย ตี ดอน อี ดี วี ปึอน เวณ บึง คาฆูน บรีม อัน.

14 ปาย ตี เซ เบ ดูอี อีซาเรลัะ นังฆัน บอ ลาย จึห ลาย ย็อง กาดาย, เบ แกวะ ลาย ปีหล็อก. 15 ง็อห กาดาย ปี ลาย กาจึห กาย็อง เบ ตี, เบ โลว กาลาง โดบ อาคราว อี ซี ฆีด แตห กอ ฌัม ซีนัม ดี โลว ดัว วีว, แตห อึณ โดบ ปอ หนาง ซีนัม ซี ปึอน ซัม ปึอน โซะ. 16 เซ ซีนัม อัน บอ กืน, ง็อห อัน บอ โฮะ. เซ ซีนัม อัน บอ เปรต, ง็อห อัน บอ โยม โลง. โคว, อึณ มูห มี เบล อี ดี เลห แคง กาดาย ตี ปี กาจึห กาย็อง เบ. 17 แกวะ แตห เบ ลาย ปีหล็อก, แตห เบ ยี โยว เฌาพรา. โอว มูห อัน เฌา อี มูห เฌาพรา ปี กรึบ เบ.

18 เบ โลว โบง โดบ ดารา โอว ตี บอ ปี จัร โอว เบ โบง. ปาย ตี เบ มืร ดี ปึอน ดี กอย ดาคึย บอ ลอด อาเพ อาเร แคง มืง ตี. 19 กาดาย มืร ดี มึห เบล, มึห กาโย็ง อัน. เบ มืร ดี บอ ปึอน ดี โฮม แพ, กอย ดาคึย ฆัด เฆียด. 20 เซ มัง อี บอ นับ ต็อห, ‘ปัน ดี ฌัม ซีนัม อึณบู ตี, เหมา เอ ดี ปาย ดี ปึอน ดี โฮม, เซ เอ ตู ปึอน ดี ซัม มาเซ, ตู ปึอน ดี เบต เบล มาเซ?’ 21 โอว ยี ต็อห, เฌาพรา ดี ม็องการา ดัว กืน ดอ ฌัม ซีนัม อึณเดา. อัน แตห อึณ เลห กืน เบล เฆ โหงว, แตห อึณ กอ ฆลึม โฮม อาดา โอย ซีนัม. 22 เซ เบ รัณ มาน เฆ โดง นา เบ ดอ มูห ซีนัม อึณดา, เบ ซี มึห ปี ดี โฮม ปี ซัม เบ ซีนัม อึณเดา. เบ ดี บอ มึห แตห กอ ฌัม ซีนัม อึณ ดีม.

23 กาดาย เบ ตู ปึอน ย็อง กาดัด ดี อี เฮา. อึณ มูห กาดาย โอว เฌาพรา. เบ ปี ดูอี อี คาด ดี กอย ดี กาดาย โอว. 24 กาดาย แปะ แฮะ ฮอต จึห เบ, เบ โลว วี แตห ดา กาณา บรีม อัน ปึอน ดี ทูด วีว.

25 เซ อึณ มูห ดูอี อีซาเรลัะ อี แฮะ ฆีน กาเซา, แฮะ ย็อง ฮาว กาดาย อัน, แตห บีนอง วอแว อี กาเครียะ ดี อัน วี ทูด วีว. 26 เซ ดูอี วี ตี ยี ตู มึห บีนอง อี ดี ทูด วีว กาดาย ตี, เซ อัน ยี ปึอน ทูด วีว ราง อัน, 27 แตห อัน ตีห บอ ซีนัม อาต ฌัม ซีนัม ดี โลว ดัว วีว ตึอน, แตห อัน เค มี อาดา ซีนัม ตี. 28 เซ อัน ยี ตู มึห รึอน อาดา ปี ดี โลว ทูด วีว ตี, แตห ดูอี อี แฮะ จึห ตึอน รัณ ฮาว กอ ฌัม ซีนัม ดี โลว ดัว วีว. กาดาย ตี, อัน โลว วี ดัว วีว ดี กาณา บรีม อัน ซีนัม ตี. แฮะ ฮอต, ดา กาณา บรีม ตี ปึอน วี ฮาว กอย ดี กาดาย อัน ตี.

29 เซ อึณ มึห ดูอี อี แฮะ ย็อง กาง อัน อี กอย แคง มืง อี มึห แรง โรบ มืง ตี, อัน ปึอน ทูด วีว มี กานัร อู ซีนัม, ตีห ซีณ ซีแง ย็อง อัน ตี. กานัร ซีนัม ตี อัน แฮะ ปึอน ทูด วีว. 30 เซ อัน ยี ตู ทูด วีว ซีนัม ตี, อัน อาว ฮู ปึอน ทูด วีว. กาง อัน ตี ดี แบน กาง ดูอี อี จึห ตึอน. อึณ ดี แบน โกรว อัน, แตห กอ ฌัม โจว หลูก โจว หลาน อัน. ปี บอ แฮะ ฌัม ซีนัม โลว ดัว วีว มืร, อาว ฮู โลว ดัว วีว. 31 มาแล, เซ อึณ มูห กาง อี ตู กอย แคง มืง อี มึห แรง, กาณา บรีม อัน แฮะ ปึอน ทูด วีว ปี ทูด วีว อัน โดง นา เฆ มาน ตึอน. กาง ฌึร ตี โลว วี อาบ วีว ดี กาณา บรีม อัน ดอ ฌัม ซีนัม ดี โลว ดัว วีว.

32 อี มูห ครึร ดูอี อาเลวี, เฆ ยี ปึอน ทูด วีว เซเซ กาง อี กอย แคง มืง โดง กอย เฆ. 33 เซ ดูอี อาเลวี แฮะ ย็อง กาง อี กอย แคง มืง อัน, ยี ตู ปึอน ทูด วีว, ดา อี จึห โลว วี ดัว วีว ซีนัม ดี โลว วี ดัว วีว ตึอน. โคว, ดูอี อาเลวี อี กอย แคง มืง เฆ กาแต เฆ ดูอี อีซาเรลัะ, เฆ ปึอน กอย แคง กาง อี แฮะ แบน โกรว เฆ เซเซ. 34 บอ มาน เฆ โดง นา อี กอย โคบ มืง เฆ ตี, อาว ปึอน ย็อง ดอ เหมา. อึณ มูห โกรว เฆ เซเซ.

35 เซ ดูอี อีซาเรลัะ อี กอย เครียะ เบ แฮะ ฆีน, เซ อัน อาว ฮู ปึอน จอย โดว บรีม อัน, เบ โลว จอย อัน, แตห อึณ ปี เบ จอย แคต อี กอย กาแต เบ, แตห อัน บอ ปึอน ดี กอย ฮาว โดบ เบ. 36 แคะ ปี ดัว เบ ดี อัน, แกวะ ดึห เอียง อัน คอ อู โมยว. เบ โลว โยว เฌาพรา. แตห บีนอง เบ ปึอน ดี กอย ฮาว โดบ เบ. 37 รึอน ปี ดัว เบ อัน การ็อห, เบ ตู ปึอน ดึห เอียง อัน. ปี ดี โฮม ปี ย็อง ดัว เบ ดี อัน, เบ ตู โลว ดึห อามยาด อัน. 38 โอว เฌาพรา อี มูห เฌาพรา อี ทูด เลห เบ แคง มืง แอฆึบ, อี วี อาบ มืง กานัณ ดี เบ, โอว แฮะ มูห เฌาพรา ปี กรึบ เบ. อึณ มูห โอว อี จัร เบ โบง ปาย ตี.

39 เซ ดูอี อีซาเรลัะ อี กอย เครียะ เบ แฮะ ฆีน, เซ อัน แฮะ ย็อง โดว อัน, แตห อัน แบน หมาย เบ, เบ ตู ปึอน จัร อัน โบง ฆาน ปี หมาย เบ. 40 อัน โลว กอย รึม โดบ เบ ปี ดูอี อี ฌาง ดี เบ บอ ปี แคต อี กอย โดบ เบ. อัน ดี แบน ปี ซูต ปี จัร เบ กอ ฌัม ซีนัม ดี วี ดัว วีว ตึอน. 41 ซีนัม ตี, บอ อัน บอ อีบึณ ฆอน วา อัน ดี โลว เลห ดี เบ, วี เวณ โดง กอย อึณโฮม อัน, เวณ โดง กอย กาดาย ฆูณ ดัง อัน. 42 เฆ ดูอี อีซาเรลัะ มูห แดเจณ โอว เฌาพรา. เฆ ตู ปึอน แบน หมาย อี ดอ เหมา. โอว เฌาพรา แฮะ แยต เลห เฆ แคง มืง แอฆึบ. 43 เบ ตู ปึอน จัร เฆ โบง อี หณาบ กาเซา. แตห เบ โยว เฌาพรา ปี กรึบ เบ.

44 เซ เบ โลว หมาย, แตห เบ จึห ดูอี อาโมยว เฮา อี กอย โคบ เบ, แตห เฆ แบน หมาย เบ. 45 ฆอน เฆ ดูอี อาโมยว เฮา อี แฮะ ตัห กอย โดบ เบ แฮะ ปึอน จึห, แตห เฆ แบน หมาย เบ. บอ หลูกหลาน เฆ อาโมยว เฮา อี ฆึอด แคง มืง เบ ตี แฮะ ปึอน แตห เฆ แบน ปี ซูต ปี จัร เบ เซเซ. 46 เบ แฮะ ปึอน ดึห เฆ แบน ปี คาฆูน ปี ดี ปึอน ปลูะ หลูกหลาน เบ. เฆ ปึอน แบน ปี ซูต ปี จัร เบ บอ โจว เฆ. เซ อึณ ยี มูห ดูอี อีซาเรลัะ, เบ ตู ปึอน จัร เฆ โบง ฆาน อี จัน กาเซา.

47 เซ ดูอี อาโมยว เฮา อี กอย กาแต เบ แฮะ วี มึห วี ครัม, เบ ดูอี อีซาเรลัะ อู วี ยี แฮะ วี ฆีน, แฮะ วี กาดูห ดี ย็อง โดว อัน, วี แบน หมาย ดูอี อาโมยว เฮา ตี, เซ อัน บอ แบน หมาย แคง ครึร วอแว ดูอี อาโมยว เฮา ตี, 48 เบ แฮะ ปึอน วี ทูด วีว อัน เซเซ. บอ วอแว อัน แฮะ ปึอน ทูด วีว อัน. 49 บอ ฆูณ แตะ อัน บอ ฆอน อีกัด ฆอน วา อัน, เซ อึณ มูห บีนอง อี มูห อึณกรึห อึณกราต อัน, เฆ ดอน อี แฮะ ปึอน ทูด วีว อัน. เซ เฌาพรา ดี โบง นา หมึอม ดี อัน, อัน บอ ปึอน ดี ทูด วีว โดว บรีม อัน ราง อัน. 50 เบ โลว ตีห ซีนัม อี ซี กอย แตห กอ ฌัม ซีนัม ดี โลว วี ดัว วีว ตึอน. ง็อห ปี โลว ดัว ดูอี อี ทูด วีว หมาย ตี โลว โดบ ง็อห ฌาง ดูอี อู วี อาดา ซีนัม อี ซี กอย ตี. 51 เซ อึณ ซี ฆีด เหลณ, อี ดี ทูด เลห หมาย ตี โลว ดัว กืน. 52 เซ อึณ ยี ซี ฆีด เปรต, ง็อห อัน โลว โยม โลง. 53 ดา กาณา อี มูห ดูอี อาโมยว เฮา โลว มาด อัน ปี ดูอี อี ฌาง ดี อัน. เบ โลว ซาดีก, แกวะ แตห อัน จัร กาเซา หมาย อี มูห บีนอง เบ.

54 เซ อึณ ยี ตู มึห อี ดี ทูด วีว หมาย ตี, ดา กาณา อัน โลว เบลห วีว อัน บอ อีบึณ ฆอน วา อัน ดอ ฌัม ซีนัม ดี โลว ดัว วีว. 55 โคว, เซ อึณ มูห ดูอี อีซาเรลัะ, อู วี มืร ตู ปึอน แบน หมาย อี เฮา เซเซ. เฆ มูห แดเจณ โอว อี มูห เฌาพรา. โอว แฮะ แยต เลห เฆ แคง มืง แอฆึบ. โอว มืร มูห อัน เฌา อี มูห เฌาพรา ปี กรึบ เฆ.”