1 เฌาพรา วี จัร อาโมวแซ, 2 แตห อัน วี กาลาง ดี เฆ ดูอี อีซาเรลัะ ต็อห, “เบ โลว ดึห ตัห นามัน อี ซีงา ปี กรีด เฆ ตา เบล นามัน, แตห เบ ฮับ แคง เงา ออม ตาง อี กอย แคง ทึบ บีก บอด, แตห เงา ออม ตาง ตี บอ บลาง เซเซ. 3 อาโรน โลว ปีด็อะ อูน เงา ออม ตาง ตี นา เรต บีก ฆ็อง, อี กอย นา อาต ฌีดืก แคง โดง ซีงา บอด หลึอม โตต ตึอน. อัน โลว ลึมลา เงา อี กอย ดี อาต เฌาพรา ตี, ซีณ บา ดี อับ กอ ฌัม แปร บลาง. อาตี อึณ มูห แปะ แฮะ จัร โอว เบ โบง โดบ ดอน โจว ดอน บาน นา อาต อาว. 4 อาโรน โลว ลึมลา ดัง เงา ออม ปี โบง เฆ ตา ครีว แฌด ตี, แตห เงา บลาง ดี อาต เฌาพรา เซเซ.

5 เบ บอ โลว ดึห กาแปะ เคาคยูง อี แฮะ กามอต ซีคยา อาดา อา โอวมา อี มูห กาบัก โอย แบล, โบง แตห อึณ แบน คามูน ฆึร ดี อา โบ็ง, วี ฆึม แคง กาฟาง. 6 เบ โลว เบลห, โบง อา อึณแปรง. อู อึณแปรง เดา โบ็ง. เบลห แดง กาโช็ง ครีว ปี โบง อูน เฆ ดี อาต เฌาพรา ตึอน. 7 เบ โลว ดึห กาณัน เลโปน อี แฌด, ฮับ ดี อา อึณแปรง ตึอน. แฮะ ฮอต, เบ โลว โดะ กาณัน เลโปน ตี แคง เงา, แตห อึณ แบน ปี หลู อี โดะ ดี เงา, แตห เฌาพรา โหลห เบ. 8 ปูง อาตึร นี ฮาว นา อาต, บู ซีแง อู เฌณ, เบ โลว ดึห คามูน ฌึร ตี, เบลห ดี อาต เฌาพรา. เซ ฌัม ซีแง ดีเหลา, เบ โลว โบง ปาย ตี แตห อึณ แบน ปี โลว โบง เฆ ดูอี อีซาเรลัะ เซเซ. 9 คามูน ตี, อึณ ดี แบน ปี ดี โฮม อาโรน เฆ หลูกหลาน อัน. เฆ โลว โฮม คามูน ตี ดี โดง ซีงา บอด. โคว, คามูน ตี แฮะ ซีงา บอด หลึอม ปี ดี โฮม ปี ปึอน เฆ ดอน โมยว อี มูห ปี หลู เฆ ดูอี กืน ดี เฌาพรา. อึณ มูห ปี หลู อี โดะ ดี เงา.”

10-11 อู ซีแง อึณ มึห อีมาย อู วี. ฆูณ อัน มูห ดูอี แอฆึบ. มา อัน มูห ดูอี อีซาเรลัะ, อี จืร นาง เซลอมีด อี มูห ฆอน อาตีปารี อี มูห ครึร อาดาน. ดูอี วี ตี บอ กาลูต ดี ดูอี อีซาเรลัะ อู วี แคง โดง คยัะ เฆ ตึอน. ดอ ลาย กาเอห ฆาย ตี, อัน บอ แคณ บอ ดืง เอห เฌาพรา. แฮะ ฮอต, เฆ บอ ดึห ตัห อัน โดง กอย อาโมวแซ. 12 เฆ บอ คร็อง อูน อัน, บัร, แตห เฆ นับ ปี ซี แตห เฌาพรา เฆ โบง ดี อัน.

13 เฌาพรา บอ กาลาง ดี อาโมวแซ ต็อห, 14 “ดึห ดูอี ตี เลห นา เรต โดง คยัะ เบ. แตห ดอน อี อี แฮะ ยึร โฆรห ปี เอห ปี ดืง อัน ตึอน กาโพรม ดี ดาง แด เฆ แดง ฆีณ อัน. แฮะ ฮอต, แตห เฆ ดูอี บอกาเฆลียด ดึห มาว, วึณ ยัม อัน. 15 แฮะ ฮอต ปาย ตี แตห แม กาลาง ดี เฆ ดูอี อีซาเรลัะ, วี เหมา อี เอห ดืง เฌาพรา, อัน โลว คัม หมาบ อัน ตี. 16 วี เหมา อี แคณ เฌาพรา, เบ โลว ง็อห ยัม อัน. บอ มูห ดูอี อีซาเรลัะ, บอ มูห ดูอี อาโมยว เฮา อี กอย กาแต เบ ดูอี อีซาเรลัะ, วี เหมา อี แซะ แนนัะ เฌาพรา, เบ ดูอี บอกาเฆลียด โลว ดึห มาว, วึณ แตห อัน กอ ยัม อาคาคัร.

17 อาเซ ง็อห อาซาก อี, อัน มืร โลว คัม อี ง็อห อาซาก อัน. 18 อาเซ แตห โดว ซัด อี เฮา ยัม, อัน มืร โลว วี เวียะ โดว อีม. เซ ชึม โดว อีม, โลว วี เวียะ โดว อีม. 19 เซ ดูอี อู วี โบง แตห อี เฮา กาดูห เซา, โบง แตห อี เซา ปาย เหมา, อัน มืร โลว วี คัม เซา ปาย ตี. 20 เซ อัน โบง แตห กาอาง อี เฮา กาบัก, อี เฮา โลว วี โบง แตห กาอาง อัน กาบัก. เซ อัน โบง แตห งาย อี เฮา อับ, เฆ โลว โบง แตห บอ งาย อัน วี อับ. เซ อัน โบง แตห หราง อี กาบัก, เฆ โลว โบง แตห บอ หราง อัน วี กาบัก. เซ อัน โบง เซา ดี อี ปาย เหมา, อัน มืร โลว วี คัม ปาย ตี. 21 อาเซ ง็อห ยัม โดว ซัด อี เฮา อู โดว, อัน โลว วี เวียะ อู โดว. อาเซ ยี ง็อห ยัม ดูอี, อัน โลว วี คัม ดี ยัม. 22 อึณ มูห ดารา มี อู โมยว. บอ เบ ดูอี อีซาเรลัะ บอ เฆ ดูอี อาโมยว เฮา, เบ โลว ซูงพยาด อามู เฆ, โดบ ดารา อู โมยว ตี. โอว มูห อัน เฌา อี มูห เฌาพรา ปี กรึบ เบ.”

23 อาโมวแซ กาลาง ลอง อัน ตี ดี เฆ ดูอี อีซาเรลัะ. แฮะ ฮอต, เฆ บอ ดึห ดูอี อี ดืง เอห เฌาพรา ตึอน, แตห อัน เลห นา เรต โดง คยัะ เฆ. เฆ บอ ดึห มาว วึณ ยัม อัน. ปาย ตี เฆ ดูอี อีซาเรลัะ โบง โดบ ปี กาลาง เฌาพรา ดี อาโมวแซ.