1 เฌาพรา วี จัร อาโมวแซ, 2 แตห อัน วี กาลาง ดี เฆ ดูอี อีซาเรลัะ ต็อห, “โอว ดัม เบ, แตห เบ โบง บลอย แบน โมยว แบน โมยว. ดอ โบง เบ บลอย ตี, เบ โลว ตัห กาฌูะ, แตห เบ ปึอน ดี กรึบ โอว เฌาพรา.”

3 เฌาพรา วี ต็อห, “เบ โลว โบง ฆาน อาดา เดา ซีแง. มาแล, ซีแง อึณบู มูห ซีแง ดีเหลา, ซีแง โลว ตัห กาฌูะ เบ, กรึบ โอว. ซีแง ตี อาว ปึอน โบง ฆาน, รัณ ฆาน. เบ โลว ตัห กาฌูะ กาดึม, กรึบ เฌาพรา. ซีแง ดีเหลา ตี, มูห ซีแง ดอ โหลห เบ เฌาพรา ดี โดง กอย เบ ดอน นา ดอน โปละ. 4 ปาย ตี อึณ มึห บลอย แบน โมยว แบน โมยว ปี โลว โบง เบ ปัน ดี ฌัม อาคราว แปะ แฮะ ดัม อูน โอว.

5 บลอย โลว โหลห เบ เฌาพรา ดอ กาโลห อัน กาง เบ, อึณ จูห มาเฆียน เหลห, ซีแง ฆึร ดี อึณพวน ดอ บา ดี อับ. 6 ดอ ฌัม ซีแง ฆึร ดี อึณพัน, เบ โลว จูห บลอย โฮม คามูน ตู ฮับ ซีนัม บรัห. คามูน อี ตู ฮับ ซีนัม บรัห ตี, เบ โลว โฮม อาดา บู ซีแง. 7 ซีแง ดอ โฆว บลอย ตี, เบ โลว กอย กาฌูะ กาดึม, กรึบ เฌาพรา. อาว ปึอน โบง ฆาน เบ. 8 เบ โลว หลู ปี ดี หลู อี โดะ ดี เงา อาดา บู ซีแง. ซีแง อึณบู ตี, เบ ปี วี โลว ตัห กาฌูะ กาดึม, กรึบ เฌาพรา. อาว ปึอน โบง ฆาน เบ.”

9 เฌาพรา ปี วี กาลาง ดี อาโมวแซ ปอ อึณ ปัว ต็อห, 10 “แตห แม วี กาลาง ดี เฆ ดูอี อีซาเรลัะ, ปัน ดี ตัห ลึบ เบ แคง มืง ปี ดัว โอว ดี เบ, แตห เบ ปัก ซีบัยะ โหงว ปี โซะ เบ อี มูห เบล ดัง, ดึห ตัห อู ซีบัยะ ดัว ดี ดา อี หลู ดี เฌาพรา. 11 อัน ดี ดึห ซีบัยะ โหงว ตี หลู, แตห อึณ แบน ปี หลู ดี เฌาพรา อี มาวัด วีว มาวัด เวณ, แตห เฌาพรา รับ ปี หลู เบ อี แฮะ กาดาง เบ ตี. ดา อี หลู ดี เฌาพรา โลว หลู วาย ซีแง ดีเหลา. 12 ซีแง หลู เบ ซีบัยะ โหงว ตี, เบ โลว ดึห บอ ฆอน มาบู อี หณัม โนะ อู ซีนัม, อี ตู มึห โดง เช โดง แน, วี หลู โดบ, แตห อึณ แบน ปี หลู ดี เฌาพรา อี โดะ ดี เงา. 13 เบ โลว ดึห บอ กาแปะ เคาคยูง อาดา อา โอวมา อี มูห กาบัก โอย แบล. เบ โลว กาวัร นามัน บอ หลู โดบ, แตห อึณ แบน ปี หลู อี โดะ ดี เงา. เบ โลว หลู โดบ บอ อึม มางูน อู กาเปา. อูห หงูน ปี หลู ตี ดี บอ ล็อะ น็อห เฌาพรา. 14 เซ อึณ มูห ดีฆาว กามาย, บอ มูห ดีฆาว อีม, บอ มูห แปะ แฮะ โคว เบ แบน คามูน, เบ ตู ปึอน โฮม อาต หลู เบ ปี หลู ฌึร ตี ดี เฌาพรา. เบ บอ กอย ดี เหมา อาว ต็อห, เบ โลว โบง โดบ ปาย ตี ดอน โจว ดอน บาน.

15 จูห ซีณ ซีแง ดีเหลา, วาย ซีแง หลู เบ ซีบัยะ โหงว ดี เฌาพรา, ตีห แตห อึณ กอ โนะ บู คานา ตึง. 16 ดอ แฮะ โนะ พัน ฆึร ซีแง อี แฮะ ปวน, กอ ฌัม ซีแง วาย ซีแง ดีเหลา อึณบู ตี, เบ โลว หลู ซีบัยะ โหงว กามาย ดี เฌาพรา. 17 กาง อู กาง โลว ดึห ตัห คามูน อา โบ็ง, หลู ดี เฌาพรา. แตห อึณ แบน ปี หลู อี มาวัด วีว มาวัด เวณ. เซ เบ โบง คามูน ตี, เบ โลว ดึห กาแปะ เคาคยูง อาดา อา โอวมา อี มูห กาบัก โอย แบล, ฮับ บอ ซีนัม บรัห, ฆึม แคง เงา, วี หลู ดี เฌาพรา, แตห อึณ แบน ปี หลู เบล ดัง. 18 เบ โลว ดึห ฆอน มาบู อาโล็ง อี หณัม โนะ อู ซีนัม, อี ตู มึห โดง เช อาดา บู โดว บอ ฆอน มามัก อาโล็ง อู โดว, มาแป อาโล็ง อา โดว, วี หลู โดบ คามูน ตึอน. เบ โลว หลู แตห อึณ แบน ปี หลู อี โดะ ดี เงา, โลว หลู กาโดบ ปี หลู ดีฆาว ตึอน บอ ปี หลู อึม มางูน. อูห หงูน ปี หลู ตี ดี บอ ล็อะ น็อห เฌาพรา. 19 เบ โลว วี ดึห มาแป อาดา อู โดว, วี หลู, แตห อึณ แบน ปี หลู อี แตห เฌาพรา ฆ็อห แวน หมาบ. เบ โลว ดึห บอ มาบู ดีแตด อี หณัม โนะ อู ซีนัม อาดา อา โดว, แตห อึณ แบน ปี หลู อี กอย กาฌูะ โฮม รึม. 20 ดา อี หลู ดี เฌาพรา โลว หลู บอ คามูน ตึอน โดบ มาบู ดีแตด อา โดว ตี, แตห อึณ แบน ปี หลู อี มาวัด วีว มาวัด เวณ. อึณ มูห ปี ดี หลู อาดา ดา อี หลู ดี เฌาพรา อี แฮะ ซีงา บอด กาเซา. 21 ซีแง ดอ โบง เบ บลอย ตี, เบ โลว ตัห กาฌูะ กรึบ เฌาพรา. เบ ตู ปึอน โบง ฆาน เบ. ดารา นี เบ โลว โบง โดบ เซเซ ดอน โจว ดอน บาน, ดอ กอย เบ ดอน นา ดอน โปละ.

22 ดอ โซะ เบ โหงว แคง โดง นา เบ, แกวะ โซะ โตต ดี โคบ ดี กาโตะ โดง นา เบ. เบ ตู โลว วี ฮาว โซะ อี ซี ฆีด, ซี กอย วาย แฮะ ฮอต เบ โซะ. เบ โลว อูน ฌึร ตี อาดา เฆ ดูอี ฆีน, ดูอี เอต. โอว มูห อัน เฌา อี มูห เฌาพรา ปี กรึบ เบ.”

23 เฌาพรา ปี วี จัร อาโมวแซ, 24 แตห อัน วี กาลาง ดี เฆ ดูอี อีซาเรลัะ ต็อห, “ดอ มูห ซีแง ดอ โฆว แคง มาเฆียน อึณบู, เบ โลว โบง ซีแง ดีเหลา. เบ โลว ตัห กาฌูะ กาดึม โหลห เฌาพรา บอ บูด เวา นึง แป. 25 เบ ตู ปึอน โบง ฆาน เบ, ยี โลว หลู ดี เฌาพรา, แตห อึณ แบน ปี หลู อี โดะ ดี เงา.”

26 เฌาพรา ปี วี กาลาง ดี อาโมวแซ ปอ อึณปัว ต็อห, 27 “ซีแง ฆึร แคง มาเฆียน อึณบู, อึณ มูห ซีแง วี ลาย กาล็อะ เบ ดี เฌาพรา. เบ โลว ตัห กาฌูะ กาดึม, กรึบ เฌาพรา บอ ยืน ปี ดี โฮม. เบ ดี บอ โลว หลู ดี เฌาพรา, แตห อึณ แบน ปี หลู อี โดะ ดี เงา. 28 ซีแง ตี, เบ ตู ปึอน โบง ฆาน มาเซ. โคว, ซีแง ตี มูห ซีแง ดอ โลว หลู ดา อี หลู ดี เฌาพรา ดาง เบ, แตห เบ วี ลาย กาล็อะ ดี เฌาพรา. 29 เซ อึณ มึห ดูอี อี ตู ยืน ปี ดี โฮม ซีแง ตี, แกวะ แตห เบ มาด อัน มูห ดูอี อีซาเรลัะ. 30 วี เหมา อี โบง ฆาน ซีแง ตี, โอว เฌาพรา ดี ง็อห ยัม อัน. 31 แกวะ โบง ฆาน มาเซ. อาตี มูห ดารา ปี โลว โดบ เบ เซเซ ดอน โจว ดอน บาน. เบ บอ กอย ดี เหมา, เบ โลว โบง ปาย ตี. 32 จูห บา ดี อับ ซีแง อึณดีม, ฌัม บา ดี อับ ซีแง ฆึร แคง มาเฆียน ตี, อึณ มูห ซีแง ดีเหลา. เบ โลว ดีเหลา บอ ยืน ปี ดี โฮม.”

33 เฌาพรา ปี วี จัร อาโมวแซ, 34 แตห อัน กาลาง ดี เฆ ดูอี อีซาเรลัะ ต็อห, “ซีแง บลอย โลว กอย แคง ทึบ, อึณ จูห มาเฆียน อึณบู, ซีแง ฆึร ดี อึณพัน บอ ฮาว แตห อึณ กอ โนะ บู ซีแง. 35 ซีแง กาจูห บลอย ตี, เบ โลว ตัห กาฌูะ กรึบ เฌาพรา. อาว ปึอน โบง ฆาน เบ. 36 กานัร บู ซีแง ตี, ดอน ซีแง เบ โลว หลู ดี เฌาพรา, แตห อึณ แบน ปี ดี หลู อี โดะ ดี เงา. ดอ ฌัม ซีแง อึณดา, เบ โลว วี ตัห กาฌูะ, วี กรึบ เฌาพรา บอ หลู ดี เฌาพรา, แตห อึณ แบน ปี หลู อี โดะ ดี เงา. อึณ มูห ซีแง กาแดะ บลอย ตี. แกวะ แตห เบ โบง ฆาน เบ.

37 บลอย ฌึร ตี มูห บลอย ปี ดัม เฌาพรา เบ โบง. เบ โลว ตัห กาฌูะ, กรึบ เฌาพรา บอ หลู ปี หลู อี โดะ ดี เงา บอ ปี หลู ดีฆาว แบน โมยว แบน โมยว บอ ปี หลู โมยว เฮา แบน โมยว แบน โมยว บอ ปี หลู อึม มางูน, แตห อึณ โดบ แคะ ปี กาลาง อูน เฌาพรา ซีแง เหมา ซีแง อัน. 38 ปี โลว หลู เบ ตี, เบ โลว หลู แดง ปี หลู เบ ซีแง ดีเหลา บอ แดง ปี หลู เบ แบน โมยว แบน โมยว บอ แดง ปี วี โลว หลู อี เซ เฆ แฮะ ดัว กาดีก ซัดฌา, บอ แดง ปี ซี หลู เบ ดอน โมยว.

39 จูห ซีณ มาเฆียน อึณบู, ซีแง ฆึร ดี อึณพัน วาย แฮะ โซะ เบ โหงว, บอ วาย แฮะ เบต เบ เบล, แตห เบ โบง บลอย ตี ดี เฌาพรา อาดา บู ซีแง. ซีแง ดอ โฆว ตึอน, เบ โลว ดีเหลา. ดอ ฌัม ซีแง อึณดา, เบ ปี วี โลว กอย ดีเหลา ปอ อู เฌณ. 40 ซีแง ดอ โฆว ตี, เบ โลว ดึห ตัห เบล อี ชีด อี ตัห ดี เฮ อี มึห กาปลูย ฆลัม, ดึห ตัห บอ รา เฮ จึก บอ รา เฮ อี มึห หลา กืน, บอ รา เฮ อาราบ อี กอย โคบ แบลง อึม. เบ โลว ดึห ตัห ฌึร ตี, โบง บลอย แตห เบ โคย บอ อืบ มยูก เฌาพรา ปี กรึบ เบ อาดา บู ซีแง ตี. 41 เบ โลว โบง บลอย ตี, อู ซีนัม บู ซีแง. อึณ มูห แปะ แฮะ จัร โอว เบ โบง ดอน โจว ดอน บาน นา อาต ฮาว. 42 ดอ อัน ตี เบ ดูอี อีซาเรลัะ บอกาเฆลียด โลว กอย แคง ทึบ อาดา บู ซีแง. 43 เซ เบ โบง ปาย ตี ดูอี อาโมยว เบ อี ดี ซืบ ฮาว นา อาต, เฆ ดี บอ นับ บอ โนว ลอง เฌาพรา แฮะ ดึอม แตห เฆ ดูอี อีซาเรลัะ กอย แคง ทึบ ดอ แยต เลห อัน ดี เฆ แคง มืง แอฆึบ ตึอน. อึณ มูห โอว เฌาพรา, อี มูห เฌาพรา ปี กรึบ เบ.”

44 เฌาพรา แฮะ ฮอต กาลาง ฌึร ตี ดอน โมยว, อาโมวแซ วี กาลาง ลอง อัน ตี ดี เฆ ดูอี อีซาเรลัะ, แตห เฆ นับ อาคราว ปี โลว โบง เฆ บลอย โมยว เหมา โมยว อัน.