1 เฌาพรา วี จัร อาโมวแซ ปอ อึณปัว, 2 แตห อัน วี กาลาง ดี อาโรน เฆ ฆอน อัน ต็อห, “แตห เบ รีมาด ปี ดี หลู เฆ ดูอี อีซาเรลัะ ดี โอว อี ซีงา บอด. เซ เบ ตู โบง ปาย ตี อึณ ปี เบ ตู รีมาด แคะ บอด โอว.

3 กาแต เฆ หลูกหลาน แม อี ดี ซืบ ตัห นา อาต นี ฮาว, เซ อึณ มึห ดูอี อี ตู ซีงา โดบ ปี ดัม ดารา, เซ อัน ตัห กาตัด ปี หลู เฆ ดูอี อีซาเรลัะ ดี โอว อี ซีงา บอด, ดูอี วี ตี อาว ปึอน ตัห โดง กอย โอว บอ หลู ปี ดี หลู ดี โอว ดอ เหมา. ปาย ตี เบ โลว โบง โดบ ดอน โจว ดอน บาน นา อาต นี ฮาว. โอว มูห อัน เฌา อี มูห เฌาพรา.

4 เซ อึณ มึห ดูอี แคง หลูกหลาน อาโรน อี ดี ซืบ ตัห นา อาต นี, อี มึห รอฆา ดี ฮูน อัน อี นับ ดี แปร, นับ ดี ดึก, มึห บอ อี รอต ฌึอม เลห ดี โกรว อัน, ดอ ตู ซีงา อัน ปาย ตี อัน ตู ปึอน โฮม ปี ดี โฮม อี ซีงา บอด. เซ ดา อี หลู ดี เฌาพรา ตา ดึร โมยว ตู ซีงา บอ มูห โกบ โดว ยัม, บอ มูห โกบ อึม โกรว อัน อี แหล เลห, บอ ฌึร ตี แตห อัน ตู ซีงา. 5 บอ เซ อัน ตา ดึร โดว ซัด อี หลัน, อี มึอน, อึณ แตห อัน ตู ซีงา. บอ เซ อัน ตา ดึร อี เฮา อี ตู ซีงา โมยว เหมา อาว ต็อห, อึณ วี แตห บอ อัน ตู ซีงา. 6 ดา อี หลู ดี เฌาพรา อี ตู ซีงา ตี, อัน ตู ซีงา ฌัม บา ดี อับ. อาต ตา อัน อึม, อัน ตู ปึอน โฮม ปี หลู อี ซีงา บอด. 7 วาย ตี, เซ ซีแง ฮี เฆต, อัน แฮะ วี ซีงา. ปาย ตี อัน แฮะ วี ปึอน โฮม ปี หลู อี ซีงา อี มูห ปี ดี โฮม อัน. 8 อัน ตู ปึอน โฮม ยัง โดว ซัด อี ยัม ราง อัน. บอ โดว ซัด ปี ก็อะ ยัม มาโดว แปร อี ฮาย, อาว ปึอน โฮม. อึณ ดี แตห อัน ตู ซีงา. โอว มูห อัน เฌา อี มูห เฌาพรา.

9 แคะ กอย ดา อี หลู ดี เฌาพรา ดอน อี โลว โดบ ดารา ปี ดัว อูน โอว นี. เซ เฆ ตู โดบ อึณ ดี แบน หมาบ ดี เฆ, แตห เฆ ยัม โกบ ตู รีมาด เฆ ดารา โอว. โอว มูห เฌาพรา อี แตห เฆ ซีงา บอด.

10 อึณ มึห มี เฆ ดูอี แคง อึณโฮม ดา อี หลู ดี เฌาพรา อี ปึอน โฮม ปี หลู อี ซีงา บอด. เซ อึณ มูห ดูอี ตัห กอย โดบ เฆ, บอ มูห ดูอี ฌาง ดี เฆ, บอ มูห ดูอี เฮา, อาว ปึอน โฮม คอ อู วี. 11 เซ อึณ ยี มูห หมาย ปี จึห ดา อี หลู ดี เฌาพรา, บอ หมาย อี ฆึอด แคง อึณโฮม อัน, วี ตี แฮะ ปึอน โฮม ปี โฮม อัน. 12 เซ ฆอน อีบึณ ดา อี หลู ดี เฌาพรา คัด ดึห อีมาย อี ตู มูห ดูอี หลู ดี เฌาพรา, อัน มืร ตู ปึอน โฮม ปี หลู อี ซีงา ตี. 13 มาแล, เซ ฆอน อีบึณ ตี แฮะ วี แบน ยา ซีปรัห, ยี ตู มึห ฆอน คอ อู วี, เซ อัน วี ตัห กอย ดี กาง ฆูณ อัน ปี ดอ มูห อัน ดีบยา, อีบึณ ตี แฮะ ปึอน วี โฮม ปี โฮม ฆูณ อัน. ปาย ตี อึณ มึห มี ดูอี แคง อึณโฮม ดา อี หลู ดี เฌาพรา อี ปึอน โฮม ปี หลู ฌึร ตี.

14 เซ อึณ มึห ดูอี อี ตัห โฮม แคง กาง ดา อี หลู ดี เฌาพรา, ยี ตู นับ, อึณ มูห ปี หลู อี ซีงา บอด, อัน โลว วี เวียะ ปี หลู ตี บอ วี ปัว พัน บูน อู บูน, ดัว ดี ดา อี หลู ดี เฌาพรา ตึอน. 15 ดา อี หลู ดี เฌาพรา ดอน อี โลว รีมาด ปี หลู อี ซีงา บอด, อี มูห ปี หลู เฆ ดูอี อีซาเรลัะ ดี เฌาพรา. 16 อาว ปึอน ควาง อี เฮา โฮม, แตห อึณ แบน หมาบ ดี อัน, แตห อัน โลว วี เวียะ โตต. โคว, อึณ มูห โอว เฌาพรา อี โบง แตห ปี หลู ตี ซีงา บอด.”

17 เฌาพรา ปี วี จัร อาโมวแซ ปอ อึณ ปัว, 18 แตห อัน วี กาลาง ดี อาโรน เฆ ฆอน อัน ดอน อี บอ ดี เฆ ดูอี อีซาเรลัะ บอกาเฆลียด ต็อห, “เซ เบ ซี หลู ดี เฌาพรา, เบ บอ มูห ดูอี อีซาเรลัะ, บอ มูห ดูอี อาโมยว เฮา อี กอย รึม โดบ เบ, เซ เบ ซี หลู ปี ดี หลู อี โดะ ดี เงา, บอ มูห ปี หลู ปี ดึอม กาแซณ เบ, บอ มูห ปี หลู ปี ซี หลู เบ แบน โมยว แบน โมยว, เบ โลว ซาดีก. โดว ปี หลู เบ ตี, แกวะ แตห อึณ มึห โดง เช โดง แน. 19 เบ โลว ดึห มัก อาโล็ง, มาบู อาโล็ง บอ มาแป อาโล็ง อี เฌะฌูง, วี หลู, แตห เฌาพรา รับ ปี หลู เบ ตี อี แฮะ กาดาง เบ.

20 เบ ตู ปึอน ดึห โดว อี มึห โดง เช, วี หลู ดี เฌาพรา. โคว, เฌาพรา ตู รับ โมยว ตี, แตห อึณ แบน ปี หลู อี แฮะ กาดาง เบ. 21 เซ อึณ มึห ดูอี อี ซี หลู ปี ดี หลู อี กอย กาฌูะ โฮม รึม, เซ อัน ซี หลู บอ ปี ดี หลู ปี ดึอม กาแซณ อัน บอ หลู ปี ซี หลู อัน แบน โมยว แบน โมยว, อัน โลว หลู โดว อี ตู มึห โดง เช โดง แน, แตห เฌาพรา ปึอน รับ. 22 เบ ตู ปึอน ดึห โดว อี งาย อับ, โดว อี เปลา แฆะ, โดว อี แฮะ มึห โดง เช, โดว อี มึห บึบ มึห ดีม, วี หลู ดี เฌาพรา. โดว ฌึร ตี อาว ปึอน ดึห ดอ เหมา, เบลห แดง กาโช็ง หลู อี โดะ ดี เงา. 23 เซ เบ ยี มึห น็อห ซี หลู ราง เบ แบน โมยว แบน โมยว, เบ ปึอน ดึห มามัก เฆ มาบู อี ตู แฌะฌูง ตี, วี หลู. มาแล, เซ อึณ มูห ปี กาแซณ เบ ดี หลู, โดว ฌึร ตี อาว ปึอน หลู. 24 บอ โดว ซัด อี แฮะ ฮอต ซัห, อี แฮะ ซีเนียะ กาลาต เฆา อัน อี แฮะ อ็อห, เบ ตู ปึอน ดึห ตัห หลู ดี เฌาพรา คอ อู โดว. เบ ตู ปึอน หลู ฌึร ตี แคง มืง เบ. 25 บอ โดว ปี ดึห ตัห เบ ดี ดูอี อาโมยว เฮา อี มึห โดง เช ปาย ตี อาว ปึอน หลู แตห อึณ แบน ปี หลู ดี เฌาพรา อี มูห เฌาพรา ปี กรึบ เบ. โดว เฆ ตี, อาว ปึอน หลู โกบ แฮะ ฮอต ลึร เฆ. เฌาพรา มืร ตู รับ เฆ.”

26 เฌาพรา ปี วี กาลาง ดี อาโมวแซ ปอ อึณปัว. อัน ต็อห, 27 “เซ มาบู, มาแป, มามัก เบ มึห ฆอน, แตห อัน กอย โดบ มา อัน อาดา บู ซีแง. วาย ตี, แฮะ ปึอน แบน ปี ดี หลู ดี เฌาพรา อี โดะ ดี เงา. 28 บอ มูห มาบู, มามัก, มาแป, โมยว เหมา อาว ต็อห, อาว ปึอน ง็อห บอ ฆอน บอ มา อัน, แตห ฆาย ยัม อู ซีแง.

29 ดอ หลู เบ ปี ดี หลู อี ดาง ฆูง เฆฌู ดี เฌาพรา, โลว โบง โดบ ดารา, แตห เฌาพรา รับ ปี หลู เบ ตี อี แฮะ กาดาง เบ. 30 ซีแง หลู ตี, เบ โลว โฮม โตต ปี หลู เบ ตี. อาว ปึอน อูน แตห อึณ กาโลย ฌัม ปา แคหณา. โอว มูห อัน เฌา อี มูห เฌาพรา.

31 แตห เบ โบง โดบ ดารา โอว ดอน โมยว. โอว มูห อัน เฌา อี มูห เฌาพรา. 32 เบ แกวะ โบง มาเซ อี ตู รีมาด แคะ บอด โอว. แคะ กอย ดูอี อีซาเรลัะ บอกาเฆลียด, เฆ โลว โหลห เซเซ แคะ บอด โอว. 33 โอว มูห เฌาพรา อี โบง แตห เบ ซีงา บอด. โอว มืร แฮะ ดึห เลห เบ แคง มืง แอฆึบ, แตห โอว ปึอน ดี แบน เฌาพรา ปี กรึบ เบ. อึณ มูห โอว อี อึบ เบ.”