1 เฌาพรา วี จัร อาโมวแซ, แตห อัน วี กาลาง ปอ อึณ ปัว ดี ฆอน อาโรน เฆ อี มูห ดา อี หลู ดี เฌาพรา ตึอน, แตห อัน ต็อห, “ดา อี หลู ดี เฌาพรา วี เหมา อาว ต็อห, อาว ปึอน แตห โดว อัน กาดาต โดบ ปี แคร ดารา. อาว ปึอน ตา ดึร ดูอี ยัม อี มูห อาโมยว อัน. 2 เซ อึณ ยี มูห วอแว กาเครียะ อัน, บอ มูห ฆูณ มา อัน, บอ มูห ฆอน อีมาย ฆอน อีบึณ อัน, บอ มูห อีกัด วา ฆอน อีมาย 3 บอ อีกัด วา อี มูห ฆอน อีบึณ อี ซี มูห ดีบยา, อี ซี บึง อัน โกบ ตู มึห อัน อีมาย, อึณ มูห มี ดูอี ฌึร ตี, เซ อู วี บอ ยัม, ดา อี หลู ดี เฌาพรา แฮะ ปึอน แตห โดว อัน กาดาต โกบ ตา ดึร อัน วี ตี. 4 เซ ดูอี ยัม มูห บีนอง บลาก อีบึณ อัน, อาว ปึอน ดึร แตห โดว อัน กาดาต.

5 ดา อี หลู ดี เฌาพรา ตู ปึอน ฆาะ ฆีณ, ฆาะ ดีโมห ดี กูงกาบ เฆ. อาว ปึอน ซัวะ ฮูน, ซัวะ ยัง เฆ อี บยัะ ปี ปาย เฆ ดี กลึร ดี เหงา โกบ แฮะ ยัม ดูอี ตี. 6 เฆ โลว โบง แตห โดว เฆ ซีงา อาดา เฌาพรา ปี กรึบ เฆ. อาว ปึอน โบง ปี เฆ อี ตู รีมาด แคะ บอด เฌาพรา. โคว, เฆ โลว หลู ปี หลู อี โดะ ดี เงา ดี เฌาพรา. เฆ โลว ยอด โดว เฆ, แตห อึณ ซีงา เซเซ.

7 เฆ ตู ปึอน คัด ดึห อีบึณ อี แฮะ ดึอม แบน ยา มาลัม. เฆ ตู ปึอน คัด ดึห อีบึณ อี แฮะ ดึอม แวน อีมาย. โคว, เฆ มูห ดา อี หลู ดี เฌาพรา อี ซีงา บอด อาดา เฌาพรา ปี กรึบ เฆ. 8 เบ ดูอี บอกาเฆลียด โลว โรวเซ ดา อี หลู ดี เฌาพรา. อัน มูห ดูอี อี ซีงา บอด โกบ หลู อัน ปี ดี โฮม ดี เฌาพรา ปี กรึบ เบ. เบ โลว มาด เฆ มูห ดูอี อี ซีงา บอด. โคว, บอ โอว แฮะ มูห เฌาพรา อี ซีงา บอด. โอว มืร โบง แตห บอ เฆ ซีงา บอด.

9 เซ ฆอน อีบึณ ดา อี หลู ดี เฌาพรา แบน ยา มาลัม, อัน แฮะ พยาก ซาเร ฆูณ อัน. เบ โลว ง็อห ยัม อัน, วี โดะ แคง เงา.

10 อี มูห ดา ตาง ดา อี หลู ดี เฌาพรา วี แปะ แฮะ ร็อห เฆ แคง บีนอง อัน, วี แปะ แฮะ พ็อห เฆ นามัน ดี ฆีณ อัน, วี อี แฮะ ปึอน ชึบ ครึง ดา ตาง อี หลู ดี เฌาพรา, อัน ตู ปึอน แตห ฮึก ฆีณ อัน กาฟัร. อาว ปึอน กายาต ครึง อัน บอ บยัะ น็อห กลึร น็อห เหงา อัน โกบ ดูอี ยัม. 11 อัน ตู ปึอน ฮาว โดง กอย ดูอี ยัม. ปี บอ แฮะ มูห ฆูณ มา อัน มืร, อัน ตู ปึอน แตห โดว อัน กาดาต โกบ แฮะ ยัม ดูอี ตี. 12 โคว, ดา ตาง ดา อี หลู ดี เฌาพรา, อัน แฮะ ฮอต อาบ โดว อัน ดี เฌาพรา ดอ คัม อัน ดี พ็อห นามัน เฌาพรา ดี ฆีณ อัน. อัน ตู ปึอน เลห นา เรต โดง ซีงา บอด, วี ฮาว โดง กอย ดูอี ยัม, โบง แตห โดง ซีงา บอด วี กาดาต. โอว มูห อัน เฌา อี มูห เฌาพรา.

13 อัน โลว ดึห มี ดีบยา แฌด, แบน อีบึณ อัน. 14 อัน ตู ปึอน คัด ดึห ยา มาลัม เฆ ยา ซีปรัห, บอ มูห ยา ซีปรัห อีม, บอ มูห ยา ซีปรัห ยัม. อัน โลว ดึห มี อี มูห ดีบยา แฌด, อี มูห ดูอี อาโมยว อัน. 15 เซ อาว ปาย ตี ฆอน อัน อี แฮะ กาอาบ แบน ดูอี อี ซีงา ตึอน, เฆ ดี วี แบน อี ตู ซีงา. อึณ ยี มูห โอว, โอว มูห อัน เฌา อี แฮะ ดาง แตห อัน แบน ดา อี ซีงา บอด.”

16 เฌาพรา ปี วี จัร อาโมวแซ ปอ อึณ ปัว, 17 แตห อัน วี กาลาง ดี อาโรน ต็อห, “หลูกหลาน แม, ดูอี อี ดี ซืบ ฮาว นา อาต นี ดอน โจว ดอน บาน, เซ อึณ มึห ดูอี อี มึห โดง เช, อัน ตู ปึอน หลู ปี ดี โฮม ดี โอว. 18 วี อี มึห โดง เช ฌึร ตี, อึณ บอ มูห งาย อับ, เปลา แฆะ, อารึบ ตู เฌะฌูง, 19 เปลา โฆะ, แด โฆะ, 20 กาตูะ ฆูห, โดว แอก, งาย ปรัห, มึห ดีม อี มึห อึม กาตึม, บอ ดูอี อี ตู มึห เฆา ซีคยา, อาเซ มึห โดง เช ฌึร ตี ดอน อี อาว ปึอน หลู ดี โอว. 21 เซ อึณ มึห หลูกหลาน อาโรน อี มูห ดา อี หลู ดี เฌาพรา, เซ อัน มึห โดง เช ฌึร ตี, อาว ปึอน หลู ปี หลู อี โดะ ดี เงา ดี โอว. 22 วี อี มึห โดง เช ปาย ตี อัน ดี ปึอน ดี โฮม ปี ดี โฮม ปี หลู อี ดี โอว อี แฮะ บอด กาเซา บอ ปี หลู อี ซีงา บอด ตึอน. 23 มาแล, โกบ มึห อัน โดง เช ตี, อัน ตู ปึอน ตัห เครียะ บีก ฆ็อง อี ซีงา บอด. อัน ตู ปึอน ตัห กาตัด กาโช็ง หลู, แกวะ แตห โกรว อี ซีงา บอด เฆ ตี วี กาดาต. โอว มูห อัน เฌา, โอว แฮะ แตห ฌึร ตี แบน โมยว อี ซีงา บอด.” 24 เฌาพรา แฮะ ฮอต กาลาง โฆรห ตี ดอน โมยว, อาโมวแซ บอ วี กาลาง ดี อาโรน เฆ ฆอน อัน บอ ดี เฆ ดูอี อีซาเรลัะ บอกาเฆลียด.