1 เฌาพรา วี จัร อาโมวแซ, 2 แตห อัน วี กาลาง ดี เฆ ดูอี อีซาเรลัะ ต็อห, “เซ อึณ มึห ดูอี อี ดึห ฆอน อัน, หลู ดี เฌา มูล็อก, บอ มูห ดูอี อาโมยว เบ, บอ มูห ดูอี อาโมยว เฮา, อาเซ โบง ปาย ตี อัน โลว คัม ดี ยัม อาคัร หมาน. พึง เฆ ดูอี กืน โลว กาโพรม ดี ดึห มาว, วึณ อัน. 3 อาเซ โบง ปาย ตี อึณ ปี อัน โบง แตห ทึบ บีก บอด กาดาต. อึณ บอ ปี อัน ตู รีมาด แคะ บอด โอว. โอว มืร ตู ยอด อัน, ตู มาด อัน มูห ดูอี อาโมยว อีซาเรลัะ. 4 เซ พึง เฆ ดูอี กืน ตู ณึงราง ยึร ลอง แปะ แฮะ โบง อัน ตี, ตู แตห อัน ยัม, 5 โอว ยี ดี แวน ดูอี ตี, ตู ยอด บอ อัน บอ ดูอี แคง อึณโฮม อัน บอกาเฆลียด บอ เฆ อี โบง โดบ อัน, อี ตู โดบ โอว, อี กรึบ เฌา มูล็อก ตี. โอว มืร ตู มาด เฆ มูห ดูอี อาโมยว อีซาเรลัะ. โคว, ดอ โบง เฆ ปาย ตี เฆ แฮะ แวน โอว ปี อีบึณ แวน อีมาย อัน, วี แบน ยา มาลัม.

6 เซ อึณ มึห ดูอี อี ฮาว ดีหมอด ยา เปร บอ บึง ดา บู มืง, บอ อาตี แฮะ ปี อีบึณ แวน อีมาย อัน, วี แบน ยา มาลัม. โอว มืร ตู ยอด อัน, ตู มาด อัน มูห ดูอี อาโมยว อีซาเรลัะ.

7 แตห เบ โดบ ซีคยา โฆรห โอว, แตห เบ ซีงา บอด. โคว, โอว มูห อัน เฌา อี มูห เฌาพรา ปี กรึบ เบ.

8 แตห เบ โบง โดบ ซีคยา ดารา โอว นี. โคว, อึณ มูห โอว เฌาพรา อี แตห เบ ซีงา บอด.

9 อาเซ ดืง ฆูณ มา อัน, อัน โลว คัม ดี ยัม, แตห อัน คัม หมาบ อัน.

10 อาเซ วี ดึห วี ลาย อีบึณ อี อี มูห ดูอี อีซาเรลัะ นังฆัน, เบ โลว ดึห บอ อัน บอ อีบึณ ตี แตห ฆาย ยัม.

11 อาเซ วี ดึห วี ลาย อีบึณ ฆูณ อัน, โบง แตห ฆูณ อัน ชึม ซาเร, เบ โลว ดึห บอ อัน บอ อีบึณ ตี, แตห ฆาย ยัม, แตห ฆาย คัม หมาบ ฆาย.

12 อาเซ วี ดึห วี ลาย เอา อัน, เบ โลว ง็อห ยัม ฆาย บอ อา วี อาคัร หมาน. โคว, แปะ แฮะ โบง ฆาย ตู โดบ ปี กาอาบ โดบ ดูอี. อึณ แตห ฆาย โลว คัม หมาบ ฆาย.

13 เซ อีมาย นังฆัน วี ลาย ลูต ลาย ลาย, แฮะ หมึอม กาอีห กาเซา ปี โบง ฆาย. เบ โลว ง็อห ยัม ฆาย บอ อา วี, แตห ฆาย คัม หมาบ ฆาย.

14 อาเซ ดึห บอ ฆอน บอ มา, แตห ฆาย แบน อีบึณ อัน, อัน โบง อี มืก กาเซา. เบ โลว โดะ ยัม เฆ แคง เงา บอ โอย วี. โมยว อี มืก ตี, แกวะ แตห อึณ มึห กาแต เบ.

15 เซ อีมาย ลาย โดว ซัด, เบ ดี โลว ง็อห ยัม บอ อัน บอ โดว ซัด ตี.

16 เซ อีบึณ ลาย โดว ซัด, เบ โลว ง็อห ยัม อีบึณ ตี บอ โดว ซัด ตี. ฆาย โลว คัม หมาบ ฆาย ตี.

17 เซ ดูอี อู วี วี ดึห อูกัด อูวา อัน, บอ มูห อีกัด อาราง อัน บอ วา อาราง อัน, บอ มูห อีกัด ซืบ, วา ซืบ อัน, เซ อัน วี ดึห วี ตี แบน อีบึณ อัน, อึณ แตห ฆาย ชึม ซาเร. เบ โลว แป แวน ฆาย, แตห ดอน อี ยึร ลอง อัน ตี. โกบ แฮะ วี ลาย อัน อูกัด อูวา อาราง อัน, อัน โลว วี คัม หมาบ อัน ตี.

18 เซ อีมาย อีด โดบ อีบึณ ดอ มึห อัน ครึง กาปลูะ, เบ โลว แป แวน ฆาย, แกวะ ฮู มาด ฆาย มูห ดูอี อาโมยว เบ.

19 เซ อึณ มึห อี วี ดึห วี ลาย ฆึณ อัน, มาอาน อัน บอ มาแตะ อัน, อึณ แฮะ ปี อัน ลูต เรา. อัน แฮะ วี ลูต บีนอง กาเครียะ อัน. บอ อีบึณ บอ อีมาย ตี โลว คัม หมาบ ฆาย.

20 อาเซ วี ดึห วี ลาย อีบึณ อีกัด ฆูณ อัน บอ อีบึณ วา ฆูณ อัน, อีบึณ อีกัด มา อัน บอ อีบึณ วา มา อัน, อัน โบง แตห ฆูณ แตะ, ฆูณ อาน อัน บอ บึร อัน ชึม ซาเร. ฆาย บอ อา วี โลว คัม หมาบ ฆาย. บอ โจว ฆาย, ฆาย อาว ฮู นับ ดี มึห ฆอน.

21 อาเซ วี ดึห วี ลาย อีบึณ อีกัด อัน, บอ อีบึณ วา อัน, แตห อึณ วี แบน อีบึณ อัน, อัน โบง อี หมึอม กาอีห. อัน แฮะ โบง แตห อูกัด อูวา อัน ชึม ซาเร. โคว, ฆาย ตู ปึอน ดี เฮียง ฆอน ดอ เหมา.

22 เบ โลว โบง โดบ ดารา โอว บอ โทม โฆรห ปี กาลาง โอว ดอน โมยว. เบ ฮี ฌัม แคง มืง กานัณ อี มูห มืง โดง ดี แยต โอว เบ ฮาว กอย, แกวะ แตห อึณ ปี มืง ตี โลว ฮึร แวน เบ. 23 เบ ตู ปึอน โดบ ฮีด เฆ ดูอี อาโมยว เฮา ปี ดี ณอน เตา โอว ดี อาต เบ. โกบ โบง เฆ อี หมึอม กาอีห ฌึร ตี ดอน โมยว, โอว แฮะ กาอีห กาเซา เฆ. 24 โอว แฮะ ดึอม ดัว กาดีก ซัดฌา ต็อห, โอว ดี แตห เบ ปึอน คาฆูน อี มูห มืง บอด บอ กาดาย หมึอม, แตห อึณ บอ มึห บอ เฮ เบล ดอน โมยว, แตห เบ มึห ปี ดี โลว เบ ดอน โมยว. โอว ดี แตห อึณ แบน มืง ปี อึบ เบ. โอว บอ มูห อัน เฌา อี มูห เฌาพรา ปี กรึบ เบ, อี แฮะ ดึห กาย็อห เบ ดี ดูอี อาโมยว เฮา.

25 โกบ อึณ ปาย ตี เบ โลว นับ ดี กาย็อห โดว ซัดดาวา เบ บอ มาซีม, โมยว เหมา อี ซีงา บอด, โมยว เหมา ตู ซีงา บอด. เบ ตู ปึอน โฮม ยัง ซัดดาวา บอ ยัง มาซีม เฆ โดว อี มึอน ฮาว ดี กาดาย อี ตู ซีงา, แกวะ แตห บอ เบ วี แบน อี ตู ซีงา บอด. โคว, โอว แฮะ ฮอต ต็อห, โดว เฆ ตี มูห โมยว ตู หมึอม. 26 เบ โลว แตห โดว เบ ซีงา บอด อาดา โอว. โคว, โอว อี มูห เฌาพรา ปี กรึบ เบ, โอว แฮะ ซีงา บอด. โอว แฮะ แตห เบ กาฆ็อห กาย็อห ดี ดูอี อาโมยว เฮา, แตห เบ แบน ดูอี อี บึง กรึบ มี โอว.

27 เซ อึณ ยี มึห ยา เปร บอ ดา บู มืง กาแต เบ, เบ โลว ดึห มาว, วึณ ยัม เฆ. อาเซ โบง ฌึร ตี, อัน โลว คัม หมาบ อัน.”