1 เฌาพรา ปี วี กาลาง ดี อาโมวแซ ฆาย อาโรน. 2 อัน ต็อห, “ดอ คยัะ เฆ ดูอี อีซาเรลัะ โดง คยัะ เฆ, วี เหมา วี อัน มืร โลว คยัะ กอย โคบ อาลาม พึง อัน บอ โคบ ลักซานา อึณกรึห อัน. แตห โดง คยัะ เฆ ดอน บลาก มางัห ลึบ โตต นา กอย ทึบ บีก บอด. ยี โลว กอย ราม กาโต็ง อัน.”

3 พึง อายูดา เฆ โลว คยัะ นา เลห ซีแง โคบ อาลาม เฆ. อานาโซน อี มูห ฆอน อามีนาดาบ, อัน บอ แบน ดา อี แยต เฆ ครึร อายูดา แคง พึง ตี. 4 เฆ กอย บู หมึณ ดี พวน แหรณ ดี เดา มาย็อห วี.

5 ครึร อาอีซาคา โลว คยัะ โคบ ครึร อายูดา. อาเนทาเนลา อี มูห ฆอน อาจูอา แฮะ แบน ดา อี แยต เฆ. 6 เฆ กอย พัน หมึณ ดี พวน แหรณ ดี พวน มาย็อห วี.

7 ครึร อาเฌบูโลน โลว วี คยัะ โคบ เฆ ตี. อาเอลีอาบ อี มูห ฆอน อาเฮโลน แฮะ แบน ดา อี แยต เฆ. 8 เฆ กอย พัน หมึณ ดี บู แหรณ ดี พวน มาย็อห วี.

9 เฆ โอย พึง ตี แฮะ แบน ครึร อายูดา. เฆ บอกาเฆลียด แฮะ กอย อู แซน ดี ดา หมึณ ดี เดา แหรณ ดี พวน มาย็อห วี. เซ เฆ กาโทะ ฮาว ปอ โปละ, เฆ โลว ฮาว แยต ดี อาต อี เฮา.

10 เฆ อี กอย บลาก นา เตต, เฆ กอย โคบ อาลาม พึง อารูเบน. แคง พึง อารูเบน ตี, อึณ บอ มูห ครึร อารูเบน. อาเอลีจู อี มูห ฆอน อาเซตูรัะ, อัน บอ แบน ดา อี แยต เฆ. 11 เฆ กอย พวน หมึณ ดี เดา แหรณ ดี พัน มาย็อห วี.

12 เฆ ครึร อาซีเมโอน โลว กอย โคบ ครึร อารูเบน เฆ ตี. อาเซลูเมน อี มูห ฆอน อาฌูรีซาเด, อัน บอ แบน ดา อี แยต เฆ ครึร อาซีเมโอน ตี. 13 เฆ กอย พัน หมึณ ดี ดีม แหรณ ดี โอย มาย็อห วี.

14 เฆ ครึร อาฆัด บอ โลว กอย โคบ เฆ. อาเอลาซาบ อี มูห ฆอน อาตูลา, อัน บอ แบน ดา อี แยต ครึร อาฆัด เฆ ตี. 15 เฆ กอย พวน หมึณ ดี พัน แหรณ ดี เดา มาย็อห ดี พัน ฆึร วี.

16 เฆ อี กอย แคง พึง อารูเบน ตี, เฆ บอกาเฆลียด กอย อู แซณ ดี พัน หมึณ ดี อู แหรณ ดี พวน มาย็อห ดี พัน ฆึร วี. เซ เฆ กาโทะ ฮาว ปอ โปละ, พึง เฆ ตี โลว ฮาว โดบ ดี ปัน พึง อายูดา เฆ ตึอน.

17 วาย แฮะ ฮอต ฮาว อา พึง ตี, เฆ ดูอี อาเลวี โลว กาโย็ง ทึบ บีก บอด บอ ฮาว ดี กาแต เฆ ดูอี บอกาเฆลียด. เฆ ดี ฮาว ลาย ดาม แตห อึณ ปี ดอ คยัะ เฆ โคบ อาลาม เฆ ตึอน.

18 เฆ อี คยัะ นา เฆต ซีแง, อึณ บอ มูห ครึร อาเอพารีม. เฆ บอ โลว กอย โคบ อาลาม เฆ. อาเอลีซามา อี มูห ฆอน อามีฮูด, อัน บอ แบน ดา อี แยต เฆ ดูอี แคง ครึร อาเอพารีม ตี. 19 ดูอี เฆ ตี, เฆ กอย พวน หมึณ ดี พัน มาย็อห วี.

20 เฆ ครึร อามานาเซ, เฆ โลว กอย โคบ ครึร อาเอพารีม ตี. อาฆามาเลน อี มูห ฆอน อาเปตาจูรัะ, อัน บอ แบน ดา อี แยต พึง อามานาเซ. 21 ดูอี เฆ กอย โอย หมึณ ดี อา แหรณ ดี อา มาย็อห วี.

22 ครึร อาเบนยาม ปี วี กอย โคบ เฆ. อาพีดาน อี มูห ฆอน อากีตอนี, อัน แบน ดา อี แยต ครึร อาเบนยาม ตี. 23 ดูอี เฆ ตี, เฆ กอย โอย หมึณ ดี พัน แหรณ ดี พวน มาย็อห วี.

24 เซ อึณ ตีห กาฌูะ โตต พึง อาเอพารีม ตี, เฆ กอย อู แซณ ดี ดา แหรณ ดี อู มาย็อห วี. พึง อาเอพารีม ตี โลว โดบ ดี ปัน ดูอี อาเลวี.

25 เฆ อี คยัะ บลาก นา กัว, อึณ บอ มูห ครึร อาดาน. เฆ โลว กอย โคบ อาลาม พึง อาดาน ตี. อึณ บอ มูห อาเฮจา อี มูห ฆอน อามีซาเด, อัน บอ แบน ดา อี แยต ครึร อาดาน ตี. 26 ดูอี เฆ ตี, เฆ กอย เดา หมึณ ดี อา แหรณ ดี บู มาย็อห วี.

27 ครึร อาเซน, เฆ บอ คยัะ โคบ ครึร อาดาน เฆ ตี. อาบาเฆลา อี มูห ฆอน อาออคารา, อัน แบน ดา อี แยต ครึร อาเซน ตี. 28 ดูอี เฆ ตี, เฆ กอย พวน หมึณ ดี อู แหรณ ดี พัน มาย็อห วี.

29 ครึร อานาบทาลี ปี วี คยัะ โคบ เฆ ตี. อาฮีรัะ อี มูห ฆอน อาเอนัน, อัน แบน ดา อี แยต ครึร อานาบทาลี เฆ ตี. 30 ดูอี เฆ ตี, เฆ กอย พัน หมึณ ดี โอย แหรณ ดี พวน มาย็อห วี.

31 เซ อึณ ตีห กาฌูะ โตต พึง อาดาน เฆ ตี บอกาเฆลียด, เฆ กอย อู แซณ ดี พัน หมึณ ดี บู แหรณ ดี เดา มาย็อห วี. เซ เฆ กาโทะ ฮาว ปอ โปละ พึง อาดาน เฆ ตี โลว โดบ นา ปัน ซืด อี.

32 เฆ ดูอี อีซาเรลัะ บอกาเฆลียด, เฆ กอย เดา แซณ ดี โอย แหรณ ดี พัน มาย็อห ดี พัน ฆึร วี. เฆ แฮะ ตีห ดอน อี อี กอย ดี โดง คยัะ เฆ, โดบ อึณกรึห เหมา, อึณกรึห อัน. 33 มาแล, เฆ ยี ตู ตีห ครึร อาเลวี, แตห อึณ บอ โดบ แปะ แฮะ กาลาง อูน เฌาพรา ดี อาโมวแซ ตึอน.

34 ปาย ตี เฆ ดูอี อีซาเรลัะ บอ โบง โดบ ปี กาลาง เฌาพรา ดี อาโมวแซ ตี. เฆ บอ คยัะ กอย โคบ อาลาม พึง เหมา พึง อัน, แตห อึณ โดบ อึณกรึห เหมา, อึณกรึห อัน บอ อึณโฮม เหมา, อึณโฮม อัน.