คาน 3
ลอง ครึร อาเลวี
1 อานี อึณ มูห ดูอี แคง อึณโฮม อาโรน ฆาย อาโมวแซ. เฆ ดูอี ตี เฆ กอย ดอ กาลาง เฌาพรา โฆรห ดี อาโมวแซ ดอ กอย อัน แดง นอน ซีนาย.
2 ฆอน อีมาย อาโรน บอ มูห อานาดาบ อี มูห ฆอน ฆีณ บอ อาบีฮู, อาเลอาซา บอ อาอีทามา. 3 เฆ ดอน อี แฮะ แบน โตต ดูอี อี หลู ดี เฌาพรา. อาโมวแซ แฮะ พ็อห นามัน แดง ฆีณ เฆ, แตห เฆ แบน ดูอี บอด อี ปึอน ดี โบง ฆาน เฌาพรา. 4 อานาดาบ ฆาย อาบีฮู, ฆาย ยี แฮะ ยัม ดอ กอย เฆ แคง แปร กาฮ็อห โคบ นอน ซีนาย ตึอน. ฆาย แฮะ ยัม โกบ แฮะ หลู ฆาย ปี หลู อี โดะ ดี เงา ปี ตู จัร เฌาพรา เฆ โบง. ฆาย หณัม มึห ฆอน. โคว, อาเลอาซา ฆาย อาอีทามา แฮะ แบน ดา อี หลู ดี เฌาพรา บอ โบง ฆาน เฌาพรา ดอ มูห โจว ฆูณ ฆาย ตี.
5 เฌาพรา วี ต็อห ดี อาโมวแซ, 6 “แตห แม จัร เฆ ดูอี ครึร อาเลวี, แตห เฆ ตัห จอย อาโรน โบง ฆาน เฌาพรา. 7 เฆ โลว โบง ฆาน แคง ทึบ บีก บอด. เฆ โลว โบง ฆาน ตี กาดาง ดา อี หลู ดี เฌาพรา, บอ ดาง เฆ ดูอี บอกาเฆลียด. 8 เฆ โลว ยอด ลึมลา ครึง ตา อี กอย แคง ทึบ บีก บอด บอ โบง โตต ดอน โมยว ปี โลว โบง เฆ ดูอี อีซาเรลัะ. 9 แตห แม อาบ เฆ ดูอี อาเลวี ตี ดี อาโรน บอ ดี ฆอน อัน, แตห เฆ ปึอน ดี จอย เฆ โบง มี ฆาน เฆ ตี. 10 แม แตห อาโรน เฆ ฆอน อัน โบง ฆาน ปี โบง ดา อี หลู ดี เฌาพรา. เซ อี เฮา อู วี ตัห ต็อห ดี โบง ฆาน เฆ ตี แคง ทึบ บีก บอด, เบ โลว ง็อห ยัม อัน.”
11 แฮะ ฮอต ปัน ตี เฌาพรา ปี วี ดัม อาโมวแซ ปอ อึณปัว ต็อห, 12 “แม ยอด, โอว แฮะ ร็อห ดูอี อาเลวี เฆ ตี, แตห เฆ กาดาง ดอน อี อี มูห ฆอน ฆีณ แคง อาโมยว ดูอี อีซาเรลัะ. โกบ อึณ ปาย ตี เฆ ดูอี อาเลวี แฮะ แบน โกรว โอว. 13 โคว, แคะ กอย ฆอน อีมาย อี มูห ฆอน ฆีณ, เฆ มูห โตต โกรว โอว. ดอ แฮะ ง็อห โอว ฆอน ฆีณ แคง มืง แอฆึบ ตึอน, โอว แฮะ วี ดึห แคะ กอย ฆอน ฆีณ เฆ ดูอี อีซาเรลัะ, บอ มูห ดูอี, บอ มูห โดว ซัดดาวา, แตห เฆ แบน โกรว โอว. เฆ แฮะ แบน ดูอี โอว. โอว มูห เฌาพรา.”
14 ดอ กอย เฆ แคง แปร กาฮ็อห โคบ นอน ซีนาย ตึอน, เฌาพรา วี กาลาง ดี อาโมวแซ ปอ อู เฌณ. อัน ต็อห, 15 “แตห แม ตีห โตต แคะ กอย เฆ อีมาย แคง ครึร อาเลวี. แตห แม ตีห เฆ โดบ อึณกรึห เหมา อึณกรึห อัน บอ อึณโฮม เหมา อึณโฮม อัน. จูห ซีณ อาซาก อู มาเฆียน โฮะ นา แดง, แตห แม ตีห เฆ บอกาเฆลียด.”
16 ปัน ตี อาโมวแซ บอ ตีห แคะ กอย เฆ, โบง โดบ ปี กาลาง เฌาพรา ดี อัน.
17 อาเลวี บอ มึห ฆอน โอย วี. อึณ บอ มูห อาเฆนราโซน, อาโควฮาด บอ อาเมนรารี.
18 อึณกรึห ฆอน อาเฆนราโซน, อึณ บอ มูห อึณกรึห อาลีบานี บอ อึณกรึห อาซีมี.
19 อึณกรึห ฆอน อาโควฮาด บอ มูห อึณกรึห อามารัม, อึณกรึห อาอีฌาฮา, อึณกรึห อาเฮโบรว บอ อึณกรึห อาอูซีเอน.
20 อึณกรึห ฆอน อาเมนรารี บอ มูห อึณกรึห อามาลี ฆาย อึณกรึห อามูซี. ดูอี เฆ ตี แฮะ แบน ฆูณ ดัง แคง อึณกรึห เฆ อี มูห ครึร อาเลวี.
21 เฆ ดูอี อาโมยว อาเฆนราโซน ตึอน บอ มูห ดูอี อาลีบานี บอ ดูอี อาซีมี. 22 ฆอน อีมาย แปะ แฮะ ตีห เฆ, อาซาก อี แฮะ ปึอน อู มาเฆียน โฮะ นา แดง, เฆ บอกาเฆลียด กอย บู แหรณ ดี พัน มาย็อห วี. 23 ดูอี เฆ ตี, เฆ โลว คยัะ นา ปัน ทึบ บีก บอด, อี มูห นา เฆต ซีแง. 24 อาเอลาซาบ อี มูห ฆอน อาลาเอน ตึอน, อัน บอ แบน ดา ตาง อี แยต เฆ ดูอี อาโมยว อาเฆนราโซน ตึอน. 25 ฆาน ปี โลว โบง เฆ ดูอี อาเฆนราโซน, เฆ โลว ลึมลา ทึบ บีก บอด, บอ บีก เฆ ฮูน ปี ตับ นา แดง, บอ บีก ฆ็อง ดี บาง มาโลห ทึบ บีก บอด. 26 เฆ บอ โลว ลึมลา บอ บีก ฆ็อง ดี โล็ง อี กอย โรบ แวง ทึบ บีก บอด. เฆ บอ โลว ยอด บอ กาโช็ง หลู, บอ บีก ฆ็อง ดี มาโลห แวง, บอ วัน เฆ ตึอน. เฆ โลว ยอด แมน ลึมลา ดอน โมยว อี ลาย บา แคง ครึง ตา อาฌัะ ตี.
27 เฆ ดูอี อาโมยว อาโควฮาด บอ มูห อึณกรึห อามารัม, อึณกรึห อาอีฌารา, อึณกรึห อาเฮโบรว บอ อึณกรึห อาอูซีเอน. 28 ฆอน อีมาย แปะ แฮะ ตีห เฆ อาซาก อี แฮะ โนะ อู มาเฆียน โฮะ นา แดง, เฆ กอย ดา แหรณ ดี เดา มาย็อห วี. เฆ ดูอี อาโมยว อาโควฮาด, เฆ มืร โลว ลึมลา ทึบ บีก บอด. 29 เฆ ดูอี ตี, เฆ บอ คยัะ กอย นา กัว ทึบ บีก บอด. 30 อาเอลีฌาพาน อี มูห ฆอน อาอูซีเอน ตึอน, อัน บอ แบน ดา ตาง อี แยต เฆ ดูอี อาโควฮาด ตี. 31 ฆาน ปี โลว โบง เฆ, เฆ โลว ยอด ลึมลา ฌีดืก เฌาพรา, บอ กาโช็ง บอ ดัง เงา ออม, บอ กาโช็ง หลู. เฆ บอ โลว ยอด ลึมลา บอ ครึง ตา แคง ทึบ บีก บอด บอ บีก ฆ็อง. เฆ โลว ยอด ลึมลา โตต ดอน โมยว อี ลาย บา แคง ครึง ตา ตี. 32 อาเลอาซา อี มูห ฆอน ดา อี หลู ดี เฌาพรา อี จืร อาโรน ตึอน, อัน บอ แบน ดา ตาง อี อึบ เฆ ดา ตาง อี แยต เฆ ดูอี อาเลวี เฆ ตี. อัน โลว ยอด เฆ บอกาเฆลียด อี โบง ฆาน, อี ลึมลา ทึบ บีก บอด ตี.
33 เฆ ดูอี อาโมยว อาเมนรารี ตึอน บอ มูห อึณกรึห อามาลี บอ อึณกรึห อามูซี. 34 ฆอน อีมาย แปะ แฮะ ตีห เฆ, อาซาก อี โนะ อู มาเฆียน โฮะ นา แดง, เฆ กอย เดา แหรณ ดี อา มาย็อห วี. 35 เฆ ดูอี ตี, เฆ บอ คยัะ กอย นา กัว ทึบ บีก บอด. อาจูเรลัะ อี มูห ฆอน อาพีเฮลา ตึอน, อัน บอ แบน ดา ตาง อี แยต เฆ. 36 เฆ โลว ยอด ลึมลา แบน แคง ทึบ บีก บอด. เฆ บอ โลว ยอด มานัก อัน, ร็อง อัน บอ เจณ ดี ดัง แบน บอ แซ อัน. เฆ โลว ยอด ลึมลา โตต ดอน โมยว อี ลาย บา แคง ครึง ตา ฌึร ตี. 37 เฆ บอ โลว ยอด บอ ร็อง แวง บอ เจณ ร็อง ตี บอ หล็อก บอ วัน อัน.
38 อาโมวแซ บอ อาโรน เฆ ฆอน อัน, เฆ บอ คยัะ นา อาต ทึบ บีก บอด อี มูห บลาก นา เลห ซีแง. เฆ บอ ยอด ลึมลา ทึบ บีก บอด ตี. เฆ บอ โบง กาดาง เฆ ดูอี อีซาเรลัะ. เซ อี เฮา ตัห ต็อห ดี ลึบ แคง ทึบ บีก บอด ตี, เฆ โลว ง็อห ยัม ดูอี วี ตี.
39 อาโมวแซ บอ ตีห เฆ อีมาย ดูอี อาโมยว อาเลวี อาซาก อี แฮะ โนะ อู มาเฆียน โฮะ นา แดง, แตห อึณ ปี แปะ แฮะ จัร เฌาพรา อัน โบง. เฆ บอกาเฆลียด กอย อา หมึณ ดี อา แหรณ วี.
40 เฌาพรา ปี วี จัร อาโมวแซ ต็อห, “แตห แม ตีห แดม แคะ กอย ฆอน ฆีณ อี มูห ฆอน อีมาย แคง ดูอี อีซาเรลัะ, จูห ซีณ อาซาก อู มาเฆียน โฮะ นา แดง. 41 แตห แม ตีห บอ เฆ ดูอี อาเลวี ตี, แตห เฆ กาดาง ฆอน ฆีณ เฆ ดูอี อีซาเรลัะ ดอน วี, แตห เฆ แบน โกรว โอว. แตห แม ดึห บอ โดว ซัดดาวา ปี เฮียง เฆ ดูอี อาเลวี อี มูห ฆอน ฆีณ, แตห เฆ กาดาง โดว ซัด อี มูห ฆอน ฆีณ ปี เฮียง เฆ ดูอี อีซาเรลัะ บอกาเฆลียด. โอว มูห เฌาพรา.”
42 อาโมวแซ บอ ตีห แคะ กอย ฆอน ฆีณ อี มูห ฆอน เฆ ดูอี อีซาเรลัะ โดบ ปี กาลาง เฌาพรา ดี อัน. อัน บอ แดม จืร เฆ, ฮับ แคง ฌาราง. 43 อาซาก อีมาย อี แฮะ โนะ อู มาเฆียน โฮะ นา แดง, เฆ บอกาเฆลียด กอย อา หมึณ ดี อา แหรณ ดี อา มาย็อห ดี บู ฆึร ดี โอย วี.
44 เฌาพรา ปี วี ต็อห ดี อาโมวแซ, 45 “แตห แม แตห เฆ ดูอี อาเลวี กาดาง ฆอน ฆีณ เฆ ดูอี อีซาเรลัะ บอกาเฆลียด. ดึห บอ โดว ซัด ปี เฮียง เฆ ดูอี อาเลวี, แตห เฆ กาดาง โดว ซัด อี มูห ฆอน ฆีณ ปี เฮียง เฆ ดูอี อีซาเรลัะ บอกาเฆลียด. เฆ ดูอี อาเลวี, เฆ มูห โกรว โอว อี มูห เฌาพรา. 46 ฆอน ฆีณ เฆ ดูอี อีซาเรลัะ อี กืน หลึอม เฆ ดูอี อาเลวี อาดา อา มาย็อห ดี บู ฆึร ดี โอย วี ตึอน, แม โลว ทูด วีว เฆ ดี โอว. 47 แม โลว ทูด ฆอน เฆ ตี, อู วี ดี เหมา รึอน พัน โบ็ง. โลว ซัะ รึอน ตี ตา เบล ซัะ อี กอย แคง ทึบ บีก บอด. 48 รึอน ตี, แม โลว ดัว ดี อาโรน เฆ ฆอน อัน, แตห อึณ ทูด วีว เฆ ดูอี อีซาเรลัะ ดี โอว.”