1 เฌาพรา วี กาลาง ดี อาโมวแซ ฆาย อาโรน ต็อห, 2 “แตห บาย แดม ฌาราง เฆ ดูอี ครึร อาเลวี, อี มูห อาโมยว อาโควฮาด. แตห บาย ตีห เฆ โดบ อึณกรึห เหมา อึณกรึห อัน, อึณโฮม เหมา อึณโฮม อัน. 3 แดม ฌาราง เฆ อีมาย ดอน อี, จูห ซีณ อาซาก โอย ฆึร ซีนัม, ฌัม พัน ฆึร ซีนัม. อึณ มูห เฆ อี แฮะ ปึอน โบง ฆาน แคง ทึบ บีก บอด.

4 ฆาน ปี โลว โบง เฆ ตี, อึณ มูห ฆาน อี ซีงา บอด กาเซา. ปี โลว โบง เฆ, อึณ ปาย นี. 5 เซ ฮี ฌัม ปัน ดี กาโทะ เบ โดง คยัะ เบ, อาโรน เฆ ฆอน อัน โลว ลึบ แคง ทึบ บีก บอด, ดึห โลง บีก ฆ็อง อี กอย นา อาต ฌีดืก เฌาพรา, ปี วี ปลึก ดี ฌีดืก ตี. 6 แฮะ ฮอต ปาย ตี เฆ โลว วี ดึห ฮูน มามัก อึม วี ปลึก. ปี วี ดึห บอ บีก คอง วี ปลึก นา แดง. แฮะ ฮอต, เฆ โลว วี ปลอะ อูน บอ มัง ฆอด อัน.

7 แดง กาโช็ง โดง ดาง เฆ คามูน ดี อาต เฌาพรา ตึอน มืร, เฆ โลว ดึห บีก คอง, ดัะ นา แดง บอ วี ดึห ซีลัยะ บอ เบลห อาโฌว, อึณปาน บอ ก็อก ปี ฮับ อึม มางูน. บอ คามูน ตึอน โลว เบลห แดง กาโช็ง ตี เซเซ. เฆ โลว ดึห อาฌัะ เฆ ตี, วี ดาง นา แดง กาโช็ง. 8 แฮะ ฮอต, เฆ ปี วี โลว ดึห บีก เรณ, วี ปลึก นา แดง อาฌัะ ตี ดอน โมยว, ปี วี ดึห ฮูน มามัก อึม, วี ปลึก นา แดง. วี ปลอะ บอ มัง ฆอด อัน.

9 เฆ บอ โลว ดึห บีก คอง, วี ปลึก ดัง เงา ออม. ปลึก บอ ออม นามัน, อึณเกียบ, มัง บยัด เงา ออม, บอ กาเปา นามัน. เฆ โลว วี เบลห โตต นา แคง บีก คอง ตึอน. 10 แฮะ ฮอต, เฆ โลว ดึห ดัว เงา ออม ตึอน, บอ ครึง ตา อัน ดอน โมยว, ปี วี ฮับ อูน แคง ฮูน มามัก อึม. วี ปัก ดึก ดี มัง ฆอด.

11 บอ แดง กาโช็ง หลู อี มูห ครีว ตึอน, เฆ โลว ดึห บีก คอง, ดัะ นา แดง, ปี วี ดึห ฮูน มามัก อึม, วี เบลห นา แดง, วี ปลอด บอ มัง ฆอด อัน.

12 ครึง ปี โลว จัร, โลว ตา แคง ทึบ บีก บอด ดอน โมยว, เฆ โลว ฮับ อูน แคง บีก คอง. ปี วี ดึห ฮูน มามัก อึม, วี ปลึก, วี เบลห แดง มัง ฆอด อัน.

13 แดง กาโช็ง หลู อี มูห บ็อง, เฆ โลว ดึห แวน โตต กาฟาง อัน. เฆ โลว วี ดึห บีก เรณ แฆ, ดัะ นา แดง. 14 เฆ ปี วี โลว ดึห ครึง ปี โลว จัร โลว ตา ดี กาโช็ง หลู ตี, วี เบลห นา แคง. อึณ บอ มูห พาน, มัง แณต ยัง, มัง โซก, ซีลัยะ เฆ อึณปาน แบน โมยว แบน โมยว. เฆ โลว วี ดึห ฮูน มามัก อึม วี ปลึก นา แดง, วี ปลอะ อูน บอ มัง ฆอด อัน.

15 เซ อาโรน เฆ ฆอน อัน แฮะ ฮอต ซีบลึก โตต โกรว อี ซีงา บอด ตี บอ ครึง ตา อัน ดอน โมยว, เซ เฆ ฮี ดี เลห ฮาว, อี มูห ดูอี อาโมยว อาโควฮาด ตึอน, เฆ โลว ตัห กาฆอด ฮาว โกรว ตี. โกรว อี ซีงา บอด ตี, เฆ ดูอี อาโมยว อาโควฮาด ตี ยี ตู ปึอน ดึร ตู ปึอน ปา ดอ เหมา. เซ วี เหมา ฮี ตา ดึร ตา ปา, อัน ดี ยัม อู เฌณ. อานี อึณ มูห ฆาน ปี โลว โบง เฆ อาโมยว อาโควฮาด. ดอน เฌณ ดอ กาโทะ เฆ โดง คยัะ เฆ, เฆ โลว โบง ปาย ตี.

16 อาเลอาซา อี มูห ฆอน ดา อี หลู ดี เฌาพรา อี จืร อาโรน ตึอน. อัน บอ โลว ยอด ลึมลา นามัน อี กอย แคง ทึบ บีก บอด อี มูห นามัน ปี ฮับ แคง เงา ราง ตาง ตึอน. อัน โลว ลึมลา บอ ซีนัม อูห หงูน ปี โดะ ดี เงา บอ ดีฆาว ปี หลู เฆ ดอน ซีแง, บอ นามัน ปี พ็อห เฆ ดี ฆีณ. อัน อี ยอด ลึมลา โตต ดอน โมยว อี กอย แคง ทึบ บีก บอด.”

17 เฌาพรา ปี วี กาลาง ดี อาโมวแซ ฆาย อาโรน ต็อห, 18 “แกวะ แตห เฆ อาโมยว อาโควฮาด หราย แคง ครึร อาเลวี. 19 ดอ ตัห ฌัม กาตัด เฆ โกรว อี ซีงา บอด อี แฮะ ฮอต กาบีด ตึอน, แกวะ แตห เฆ โลว ยัม. แตห อาโรน เฆ ฆอน อัน ลึบ ดี อาต แคง ทึบ บีก บอด, แตห เฆ กาซาง ฆาน ปี โลว โบง เฆ ดูอี อาโควฮาด ตี วี เหมา วี อัน, แตห เฆ นับ ปี โลว โฆ็ง โลว ฆอด เฆ ดอน อี. 20 มาแล, อู กาจัน มืร, เฆ ตู ปึอน งึอบ ครึง อี ซีงา บอด อี ตู กาบีด ตี. เซ เฆ ฮี ยอด, เฆ โลว ยัม.”

21 เฌาพรา ปี วี กาลาง ดี อาโมวแซ ปอ อึณ ปัว ต็อห, 22 “แตห แม ตีห เฆ ดูอี อาเลวี อี มูห ดูอี อาโมยว อาเฆนราโซน, แดม ฌาราง เฆ. แตห แม ตีห เฆ โดบ อึณกรึห เหมา อึณกรึห อัน, อึณโฮม เหมา อึณโฮม อัน. 23 แตห แม ตีห โตต แคะ กอย อีมาย, จูห ซีณ อาซาก โอย ฆึร ซีนัม กอ ฌัม พัน ฆึร ซีนัม. อึณ มูห เฆ อี แฮะ ปึอน ดี โบง ฆาน แคง ทึบ บีก บอด.

24 ฆาน ปี โลว โบง เฆ อาโมยว อาเฆนราโซน ตี, ปี โลว ฆอด โลว ปัห เฆ, อึณ ปาย นี. 25 แคะ บอ มึห บีก แคง ทึบ บีก บอด, เฆ โลว ฆอด โตต ดอน โมยว. บอ มูห บีก อี ตับ นา แดง, บอ ฮูน มามัก อึม อี ตับ นา เรต, บอ บีก ฆ็อง ดี บาง มาโลห ตึอน, 26 บอ บีก อี แบน โล็ง แวง อี ฆ็อง โรบ ทึบ บีก บอด ฆาย กาโช็ง หลู, บอ บีก อี ฆ็อง ดี มาโลห แวง, บอ วัน อัน เฆ ตึอน, เฆ โลว ฆอด โตต ดอน โมยว อี ลาย บาะ แคง ครึง ตา อาโมยว ตี. 27 แคะ ปี โลว โบง เฆ ดูอี อาเฆนราโซน ตี, บอ มูห ปี โลว ฆอด, บอ มูห ปี โลว รัณ, แตห อาโรน เฆ ฆอน อัน อึบ เฆ, แตห เฆ นับ ซีคยา แคะ ปี โลว โบง เฆ. 28 ฆาน ปี โลว โบง เฆ อาโมยว อาเฆนราโซน แคง ทึบ บีก บอด, อึณ ปาย ตี. เฆ โลว โบง โดบ ปี จัร อาอีทามา อี มูห ฆอน ดา อี หลู ดี เฌาพรา อี จืร อาโรน ตึอน.”

29 เฌาพรา แฮะ ฮอต กาลาง โฆรห ตี, อัน ปี วี ต็อห, “แตห แม ตีห เฆ ดูอี อาโมยว อาเมนรารี, ตีห โดบ อึณกรึห เหมา อึณกรึห อัน, อึณโฮม เหมา อึณโฮม อัน. 30 ตีห โตต แคะ กอย อีมาย, จูห ซีณ อาซาก โอย ฆึร ซีนัม กอ ฌัม พัน ฆึร ซีนัม. อึณ บอ มูห เฆ อี แฮะ ปึอน ดี โบง ฆาน แคง ทึบ บีก บอด. 31 ฆาน ปี โลว โฆ็ง โลว ฆอด เฆ, บอ ปี โลว โบง เฆ แคง ทึบ บีก บอด, อึณ ปาย นี. เฆ โลว ฆอด แบน บอ อึณแรบ อัน, ร็อง อัน บอ เจณ ดี ดัง ร็อง. 32 เฆ บอ โลว ฆอด บอ ร็อง แวง, บอ เจณ ร็อง ตี, บอ หล็อก บอ วัน อัน. เฆ บอ โลว ฆอด โตต ดอน โมยว อี ลาย บาะ แคง ครึง ตา อาโมยว ตี. แม โลว จัร เฆ, แตห เฆ นับ ซีคยา ฆาน ปี โลว โบง เฆ วี เหมา วี อัน. 33 อาตี มูห ฆาน ปี โลว โบง เฆ อาโมยว อาเมนรารี แคง ทึบ บีก บอด. เฆ มืร โลว โบง โดบ ปี จัร อาอีทามา อี มูห ฆอน ดา อี หลู ดี เฌาพรา อี จืร อาโรน ตึอน.”

34-48 เฌาพรา แฮะ ฮอต กาลาง ปาย ตี อาโมวแซ ฆาย อาโรน บอ เฆ ดา ตาง อี แยต พึง เฆ ตึอน, เฆ บอ ตีห เฆ ดูอี อาเลวี โอย โมยว. อึณ บอ มูห อาโมยว อาโควฮาด, อาโมยว อาเฆนราโซน บอ อาโมยว อาเมนรารี. เฆ บอ แดม ฌาราง อีมาย ดอน อี อี มึห อาซาก โอย ฆึร ซีนัม กอ ฌัม พัน ฆึร ซีนัม. อึณ มูห เฆ อี แฮะ แป ดี โบง ฆาน แคง ทึบ บีก บอด. เฆ บอ แดม ฌาราง เฆ โดบ อึณกรึห เหมา อึณกรึห อัน, อึณโฮม เหมา อึณโฮม อัน, แตห อึณ ปี ปี จัร เฌาพรา เฆ โบง. เฆ ดูอี อาโควฮาด กอย อา แหรณ ดี บู มาย็อห ดี พัน ฆึร วี. เฆ ดูอี อาโมยว อาเฆราโซน กอย อา แหรณ ดี เดา มาย็อห ดี โอย ฆึร วี. เฆ ดูอี อาเมนรารี กอย โอย แหรณ ดี อา มาย็อห วี. เฆ ดูอี แคง ครึร อาเลวี เฆ บอกาเฆลียด กอย ดา แหรณ ดี พัน มาย็อห ดี ดา ฆึร วี. อาโมวแซ ฆาย อาโรน แฮะ จัร ดูอี เฆ ตี ดอน อี, แตห เฆ โบง ฆาน เฆ, ราง อาเซ ราง อัน.

49 ปาย ตี อาโมวแซ บอ โบง โดบ ปี กาลาง เฌาพรา ดี อัน, แตห เฆ ดอน อี นับ ฆาน ปี โลว โบง โลว ฆอด เฆ วี เหมา วี อัน. อาโมวแซ บอ แดม ฌาราง เฆ, โดบ ปี ดัม เฌาพรา ดี อัน.