1 เฌาพรา วี จัร อาโมวแซ แตห อัน วี กาลาง ดี เฆ ดูอี อีซาเรลัะ ต็อห, 2 “เซ อึณ มึห ดูอี อี มึห ดีม ดี ฮูน อี นับ ดี แบร, เซ อึณ มึห บอ ดูอี อี มึห อี รอต อี ฌึอม เลห ดี โดว อัน, บอ ดูอี อี แฮะ ตา ปา โดว ดูอี ยัม, แม โลว แตห ดูอี ฌึร ตี เลห กอย นา เรต โดง คยัะ เบ. ดูอี ฌึร ตี, เฆ ตู ซีงา โดบ ปี ดัม ดารา. 3 เบ โลว จัร ดูอี อี ตู ซีงา เฆ ตี ดอน อี, บอ อีบึณ บอ อีมาย, แตห เฆ กอย นา เรต, แกวะ แตห โดง คยัะ เบ บอ โดง กอย โอว แบน โดง ตู ซีงา.” 4 เฌาพรา แฮะ ฮอต กาลาง โฆรห ตี, เฆ ดูอี อีซาเรลัะ มืร โบง ปาย ตี. เฆ บอ แตห ดูอี ฌึร ตี เลห ฮาว นา เรต โดง คยัะ เฆ. เฆ บอ โบง ดี เฆ แตห อึณ โดบ ปี กาลาง เฌาพรา ดี อาโมวแซ ตี.

5 เฌาพรา ปี วี จัร อาโมวแซ, 6 แตห อัน วี กาลาง ดี เฆ ดูอี อีซาเรลัะ ต็อห, “เซ อึณ มึห ดูอี อี แฮะ โบง นา ตู หมึอม, บอ มูห อีบึณ อีมาย อาว ต็อห, อี แฮะ ลูต อี เฮา, ลูต บอ เฌาพรา, 7 อัน โลว วี กาลาง ปี ลูต อัน ตี, วี หมาณ ดี บลัวะ ดี เฌาพรา. อัน บอ โลว วี เวียะ วีว โตต แคะ ปี ลูต อัน. แดง ตี, อัน โลว วี ปัว พัน บูน อู บูน, วี ดัว โตต ดี ดูอี แปะ แฮะ ลูต อัน ตึอน. 8 มาแล, เซ ดูอี แปะ แฮะ ลูต อัน ตี แฮะ ฮอต ยัม, เซ อัน มืร ตู มึห บีนอง วอแว อี ดี กาอาบ ดึห อูน โกรว ปี เวียะ อัน ตี, อัน โลว หลู ดี เฌาพรา, อาบ ดัว ดี ดา อี หลู ดี เฌาพรา. แดง ตี, อัน โลว ดึห บอ มาบู อาโล็ง อู โดว, แตห อึณ แบน ปี หลู อี แตห อัน วี กาล็อะ ดี เฌาพรา. 9 ดอน โมยว ปี หลู เฆ ดูอี อีซาเรลัะ ดี เฌาพรา แฮะ แบน โตต โกรว ดา อี หลู ดี เฌาพรา วี อี รับ ตี. 10 บอ แคะ ปี ดัว เฆ ดี ดา อี หลู ดี เฌาพรา แฮะ แบน โกรว อัน.”

11 เฌาพรา ปี วี จัร อาโมวแซ กาลาง ดี เฆ ดูอี อีซาเรลัะ ปอ อึณปัว ต็อห, 12 “เซ อีบึณ อี แฮะ มึห อีมาย โบง ตู กาซืร ดี อีมาย อัน, เซ อัน วี ปรา ดี ลาย ลูต ลาย ลาย ดี อีมาย อี เฮา, 13 อีมาย อัน ยี ตู ยึร, อัน มืร แป ดี เครียง ลอง ตู ซีงา อัน โมยว อี โดบ ดารา, อึณ มืร ตู มึห อี ยึร ลอง อัน ตี, 14 เซ อีมาย อัน ยี ทาง อีบึณ อัน แฮะ ลาย ดี อี เฮา, บอ แบน น็อห ตู ดาคึย, อัน โลว แตห อีบึณ อัน ฮาว โดง กอย ดา อี หลู ดี เฌาพรา. 15 เซ อาว ปาย ตี เซ อีบึณ อัน ตู มึห ดี โบง นา ตู หมึอม, อัน ยี ทาง อีบึณ อัน ลาย ดี อี เฮา, บอ อีมาย ตี โลว แดะ อีบึณ อัน ฮาว โดง กอย ดา อี หลู ดี เฌาพรา. อัน โลว โฆ็ง บอ กาแปะ ซีโฆ็งรา อู โอวมา อี มูห อู แบล ดี อู ควาก, แตห อึณ แบน ปี หลู อาดา อีบึณ อัน. อาว โลว ฮับ นามัน นา แดง กาแปะ ตี. บอ กาณัน เลโบน อาว โลว ฮับ. อึณ แบน ปี หลู โกบ อีมาย ตู หณึม น็อห อีบึณ อัน. อึณ แบน บอ ปี หลู อี แตห อึณ ลึห ซีคยา ลอง หมาบ.

16 ดา อี หลู ดี เฌาพรา โลว แดะ อีบึณ ตี, แตห อัน ตัห กอย นา อาต เฌาพรา. 17 แฮะ ฮอต, อัน โลว ดึห อึม อี ซีงา, ฮูห แคง กาโละ กาดาย, วี ดึห กาปูห อี กอย ดี บืน ทึบ บีก บอด ตึอน, วี ฮับ แคง อึม ตี, แตห อึณ ซ็อง. 18 อัน โลว กาย็อห ฮึก ฆีณ อีบึณ ตึอน บอ แตห อัน โฆ็ง กาแปะ ตึอน แคง แด อัน. อึณ แบน ปี หลู โกบ ตู หณึม อีมาย น็อห อีบึณ อัน. ดา อี หลู ดี เฌาพรา โลว วี โฆ็ง อึม ซ็อง ตี แคง แด อัน. อึณ แบน อึม ปี ดืง อี. 19 แฮะ ฮอต, อัน โลว ดืง อีบึณ ตี ต็อห, ‘เซ อีมาย อี เฮา ตู มึห ดี อีด รึม โดบ แม, แม มืร ตู มึห ดี แตห อีมาย อี เฮา ลาย แม แดง อีมาย บรีม แม, เซ แม มืร ตู มึห ดี โบง แตห โดว แม ตู ซีงา, แกวะ แตห อึม ดืง ตี แบน อาเพ อาเร มาเซ ดี แม. 20 มาแล, เซ แม แฮะ มึห ดี ลาย ลูต ลาย ลาย ดี อีมาย ปอ อู วี อี ตู มูห อีมาย บรีม แม, เซ แม แฮะ โบง แตห แม ตู ซีงา, 21 แตห เฌาพรา ดัว ดูก ดี แม, แตห อึณ แบน ฆึม เฮียะ บอ วัต ฆึห ดี แม. ดอ อัน ตี แตห เฌาพรา โบง แตห แม แบน ปี เอห ปี พยาก อี เฮา. 22 เซ อึม ปี ดืง แม นี ฮี ลึบ แคง วัต แม, แตห อึณ แบน วัต ฆึห วัต อ็อห ดี แม. แตห บอ ฆึม แม เฮียะ กาณัณ.’ แฮะ ฮอต, อีบึณ ตี มืร โลว ต็อห, ‘แตห อึณ มูห, แตห อึณ หมาน.’

23 เซ แฮะ ฮอต ต็อห ปาย ตี ดา อี หลู ดี เฌาพรา โลว แดม อูน โฆรห กาซัม ดืง ตี, โลว วี บาย กาซัม ดืง ตี ฮับ แคง อึม ซ็อง ตึอน. 24 แฮะ ฮอต, อัน โลว วี ดึห อึม ซ็อง อี มูห อึม ปี ดืง ตี, วี ดัว อีบึณ เดียง. อึม ตี ดี ลึบ แคง โดว โบ็ง อัน บอ แตห อัน เซา กาเซา. 25 ดา อี หลู ดี เฌาพรา ตึอน โลว วี ดึห ปี ดี หลู อี มูห กาแปะ อี กอย แคง แด อีบึณ ตึอน, วี มาวัด วีว มาวัด เวณ ดี อาต เฌาพรา. แฮะ ฮอต, บอ วี เบลห หลู แดง กาโช็ง หลู. 26 อัน โลว วี ดึห ปี ดี หลู กาแปะ ตึอน อาดา อู กาเนียม, วี โดะ แดง กาโช็ง หลู, แตห อึณ แบน ปี ดี หลู อี แตห เฌาพรา นัมโหลห เฆ. วาย อัน ตี อัน โลว วี แตห อีบึณ ตึอน เดียง อึม ซ็อง ตี. 27 เซ อีบึณ ตึอน แฮะ ฮอต เดียง อึม ตี, เซ อัน แฮะ มึห ดี ลาย ลูต ลาย ลาย ดี อีมาย อี เฮา, อึม ปี ดืง ตี ฮี ลึบ แคง โดว โบ็ง อัน, อึณ ดี แบน วัต ฆึห วัต อ็อห ดี อัน. บอ ฆึม อัน ดี เฮียะ กาณัณ. เฆ ดูอี เฮา อี กอย โคบ อัน, เฆ ดี บอ ดืง อัน. 28 มาแล, เซ อีบึณ ตี ยี ตู มึห ดี ลูต เรา, ตู มึห ดี แตห อีมาย อี เฮา ลาย อัน, อัน มืร ดี ลอด อาเพ อาเร ฌึร ตี ดอน โมยว, อัน ดี วี ปึอน ดี เฮียง ฆอน.

29 อานี อึณ มูห ดารา ลอง อีมาย อี ตู หณึม น็อห อีบึณ อัน, อี ทาง อีบึณ อัน แฮะ ลาย ลูต ลาย ลาย ดี อีมาย อี เฮา. 30 เซ อึณ มึห อามู ฌึร ตี, โลว จัร อีบึณ ตี ฮาว กอย นา อาต เฌาพรา. แฮะ ฮอต ดา อี หลู ดี เฌาพรา โลว โบง โดบ ดารา นี ดอน โมยว. 31 อี มูห อีมาย อัน, อัน ตู มึห หมาบ มาเซ. อึณ ยี มูห อีบึณ ตึอน, เซ อัน แฮะ มึห ดี โบง นา ตู หมึอม, อัน โลว คัม หมาบ อัน.”