1 เฌาพรา ปี วี จัร อาโมวแซ กาลาง ดี เฆ ดูอี อีซาเรลัะ ปอ อึณปัว. 2 อัน ต็อห, “บอ มูห อีบึณ อีมาย อาว ต็อห, เซ อึณ มึห ดูอี อี แฮะ ดัว กาดีก ซัดฌา ดี เฌาพรา, แตห อัน แกม ซีณ, 3 อัน โลว แวน อึม ป็อห เฆ อึม มางูน. บอ อึม มางูน เฆ ป็อห อี ปราง, อัน ตู ปึอน เดียง. บอ เบล มางูน แปะ แฮะ เนียะ อี แตห อึณ แบน อึม, บอ อาตี อัน ตู ปึอน เดียง ดอ เหมา. บอ เบล มางูน อี ซี อีม เฆ อี กาฮ็อห อัน ตู ปึอน โฮม. 4 อาคราว ดอ ดัว อัน กาดีก ซัดฌา ตี, แคะ อี ตัห ดี เฮ เบล มางูน, อัน ตู ปึอน โฮม คอ อู โมยว. บอ กาอาง อัน บอ โกะ อัน, อาว ปึอน โฮม.

5 อาคราว ดอ คัม อัน กาดีก ซัดฌา ตี, อัน มืร ตู ปึอน กับ, ตู ปึอน ฆาะ ฆีณ อัน. อัน โลว แบน ดูอี อี ซีงา บอด, แตห อึณ กอ โนะ แคะ ปี กาแซณ อัน. อัน โลว วาง แตห ฮึก ฆีณ อัน กอ ดีโต็ง. 6 อาคราว ดอ แกม อัน ซีณ ตี, อัน ตู ปึอน ฮาว กาตัด โดว ดูอี ยัม. 7 อึณ ปี บอ มูห ฆูณ อัน, มา อัน, อีกัด วา อัน อี มูห อีบึณ อีมาย, อัน ตู ปึอน ฮาว กาตัด ดอ ยัม เฆ ตี. โคว, อัน แฮะ ฮอต วาง อูน ฮึก ฆีณ อัน, แตห อึณ บยัะ ลอง แฮะ ดัว อัน กาดีก ซัดฌา ดี เฌาพรา. 8 ดอ แฮะ คัม อัน กาดีก ซัดฌา ตี, อัน แฮะ แบน ดูอี ซีงา บอด ดี อาต เฌาพรา. เฆ ดูอี บอ ต็อห, อัน มูห ดูอี นาจารี.

9 เซ อึณ บอ มึห ดูอี อี ตัห ยัม โคบ อัน ดอ ตู ดัน นับ อัน มาเซ, อึณ ปี ฮึก ฆีณ แปะ แฮะ วาง แฮะ หลู อัน ตึอน, แฮะ ฮอต กาดาต. อัน โลว วี หน็อะ, แตห อึณ โนะ บู ซีแง. อัน โลว วี ฆาะ ฆีณ อัน, ฆาะ ดีโมห อัน. 10 เซ แฮะ โนะ ดา ซีแง, อัน โลว ดึห มาโบลย อา โดว. เซ อาว มูห มาโบลย, อัน โลว ดึห มาโบลย แปร อา โดว, ฮาว โดง กอย ดา อี หลู ดี เฌาพรา ดี บาง มาโลห ทึบ บีก บอด. 11 ดา อี หลู ดี เฌาพรา โลว ดึห มาโบลย อาดา อู โดว หลู, แตห อึณ แบน อี ฆ็อห แวน หมาบ อัน. ปอ อู โดว โลว หลู แตห อึณ แบน ปี หลู อี โดะ ดี เงา, แตห อัน วี กาล็อะ ดี เฌาพรา วาย แฮะ ตา ดึร อัน ดูอี ยัม ตึอน. อัน โลว วี ดัว กาดีก ซัดฌา กามาย, แตห ฮึก ฆีณ อัน วี ซีงา บอด ซีแง ตี.

12 อัน ปี วี โลว คัม ซีณ ปอ อู เฌณ. แตห อึณ ปี แปะ แฮะ กาแซณ อัน คา อาต. อาคราว อี แฮะ ปวน ตัห ตี, อาว ลึบ ฌาราง. อัน บอ โลว หลู ฆอน มาบู อี แฮะ โนะ อู ซีนัม, แตห อึณ แบน ปี หลู โกบ แฮะ กาลึบ อัน.

13 อานี อึณ บอ มูห ดารา ลอง ดูอี นาจารี อี แฮะ ดัว กาดีก ซัดฌา ดี เฌาพรา. เซ แฮะ โนะ อาคราว อัน, เฆ อี เฮา โลว ตึย ฮาว อัน บาง มาโลห ทึบ บีก บอด. 14 อัน โลว หลู โดว ซัดดาวา อี ตู มึห โดง เช โดง แน โอย โดว. อึณ บอ มูห มาบู อาโล็ง อู โดว อี แฮะ โนะ อู ซีนัม, แตห อึณ แบน ปี หลู อี โดะ ดี เงา. อึณ บอ โลว บอ มาบู อาหยาง อู โดว อี แฮะ โนะ อู ซีนัม, แตห อึณ แบน ปี หลู อี แฮะ ฆ็อห แวน หมาบ. บอ ฆอน มาบู อาโล็ง อู โดว โลว แบน ปี หลู ดี เฌาพรา อี กอย กาฌูะ โฮม รึม. 15 ปี ดี หลู ตี โลว หลู โดบ ปี ดี หลู ดีฆาว แบน โมยว แบน โมยว บอ โดบ ปี ดี หลู ปี เดียง. แฮะ ฮอต, โลว หลู บอ คามูน อี ตู ฮับ ซีนัม บรัห อู คอน. บอ คามูน ดีแคลบ ปี โบง อี ตา กาแปะ เคาคยูง อี แฮะ กาวัร นามัน บอ คามูน อี แฮะ พ็อห นามัน อี แฮะ แครม.

16 ดา อี หลู ดี เฌาพรา โลว ดึห โตต ฌึร ตี, วี ฮาว ดี อาต เฌาพรา, หลู ปี ดี หลู อี ฆ็อห แวน หมาบ บอ ปี หลู อี โดะ ดี เงา ตี. 17 ดา อี หลู ดี เฌาพรา โลว ดึห มาบู อาโล็ง ตึอน, หลู ดี เฌาพรา. อัน โลว ดึห บอ คามูน อู คอน อี ตู ฮับ ซีนัม บรัห ตึอน, แตห อึณ แบน ปี หลู อี กอย กาฌูะ โฮม รึม. อัน โลว หลู บอ ปี ดี หลู อี มูห ดีฆาว บอ อึม มางูน ตึอน, อี มูห ปี ดี หลู ปี ดี เดียง.

18 ดูอี นาจารี ตึอน, อัน บอ โลว ฆาะ ฆีณ อัน นา อาต มาโลห ทึบ บีก บอด. อัน โลว ดึห ฮึก ฆีณ อัน ตี, วี โดะ แคง เงา อี กอย แดง กาโช็ง หลู ดอ หลู เฆ ปี ดี หลู อี แตห เฆ กอย กาฌูะ โฮม รึม.

19 เซ แฮะ ฮอต ปาย ตี ดา อี หลู ดี เฌาพรา โลว ดึห ยัง มาบู อี มูห ยัง ฆึม อาต อัน แปะ แฮะ ก็อง ซีน เฆ. อัน โลว ดึห บอ คามูน อี ดีพลัะ อู ดีแคลบ, บอ คามูน อี แฮะ แครม อู ดีแคลบ อี กอย แคง คอน ตึอน, วี ฮับ แคง แด ดูอี นาจารี ตึอน. คามูน ตี ดอน โมยว บอ มูห คามูน ปี ตู ปึอน ฮับ ซีนัม บรัห. 20 ปัน ตี ดา อี หลู ดี เฌาพรา โลว ดึห ปี หลู เฆ ตี, มาวัด วีว มาวัด เวณ ดี อาต เฌาพรา, แตห อึณ แบน ปี หลู อี มาวัด วีว มาวัด เวณ. ปี หลู ฌึร ตี, แฮะ แบน ปี หลู อี ซีงา บอด, แฮะ แบน โกรว เฆ ดา อี หลู ดี เฌาพรา. บอ บังน็อห มาบู บอ ยัง ฆึม อาต อัน แฮะ แบน โกรว ดา อี หลู ดี เฌาพรา ตึอน. วาย อัน ตี ดูอี นาจารี ตึอน แฮะ วี ปึอน เดียง อึม มางูน.

21 แคะ ตี อี มูห ดารา ลอง ปี โลว หลู ดูอี อี แฮะ คัม ดี แบน ดูอี นาจารี, อี แฮะ กาแซณ ดี แกม ซีณ. แดง ตี อัน ปึอน ดี หลู ดี เฌาพรา แคะ ปี ปึอน แบน อัน. มาแล, ปี กาแซณ อัน ดี ดัว ดี เฌาพรา, อัน โลว ดัว. อาว ปึอน แตห อึณ บลืง.”

22 เฌาพรา ปี วี จัร อาโมวแซ กาลาง ดี อาโรน เฆ ฆอน อัน ปอ อู เฌณ. 23 อัน ต็อห, “โฆรห ปี ดี ม็องการา ดัว เบ ดี เฆ ดูอี อีซาเรลัะ, เบ โลว ต็อห, 24 ‘แตห เฌาพรา ม็องการา ดัว ดี เบ. แตห อัน ยอด แมน เบ.

25 แตห อาโรง บลาง เฌาพรา บลาง ดี เบ. แตห อัน เฌา กาเว เบ บอ เฆฌู เบ.

26 แตห เฌาพรา ยอด ลึมลา เบ, แตห เบ กอย ดาคึย ฆยามซา.’

27 เซ เฆ บอ ซาคึร ฆาว ปวน โอว, แตห โอว กอย รึม โดบ เฆ ดูอี อีซาเรลัะ เซเซ, โอว ดี บอ ม็องการา ดัว ดี เฆ ปาย ตี.”