1 เฌาพรา แฮะ กอย แคง ทึบ บีก บอด, วี จัร อาโมวแซ, 2 แตห อัน วี กาลาง ดี เฆ ดูอี อีซาเรลัะ ต็อห, “เซ เบ ซี หลู ดี เฌาพรา, แตห เบ ดึห มามัก, มาบู บอ มาแป อี กอย แคง พึง โดว ซัดดาวา ปี เฮียง เบ, แตห เบ หลู โดว เฆ ตี.

3 เซ อึณ บอ มูห มามัก อี แบน ปี ดี หลู อี โดะ ดี เงา, เบ โลว หลู โดว อาโล็ง อี ตู มึห โดง ดี แน. เบ บอ โลว ตัห หลู นา อาต มาโลห ทึบ บีก บอด ตึอน, แตห อึณ ล็อะ น็อห เฌาพรา. 4 ดูอี อี หลู ตี, อัน โลว ดาง แด อัน แดง ฆีณ โดว ปี ดี หลู อัน ตี, แตห เฌาพรา รับ ปี หลู อัน ตี, แตห อัน วี กาล็อะ ดี เฌาพรา. 5 อัน โลว ง็อห โดว ตี, ซัวะ แมง อัน ดี อาต เฌาพรา. ฆอน อีมาย อาโรน เฆ อี มูห ดูอี หลู ดี เฌาพรา, เฆ โลว ดึห หนาม โดว ตี, ฮูห ปัะ ดี แรง กาโช็ง หลู อี กอย ดี อาต มาโลห ทึบ บีก ตึอน. เฆ โลว ฮูห ปัะ หนาม ตี บอ พวน บลาก. 6 วาย ตี อัน โลว ลีด เลห ฮูน อัน บอ กาแดบ แตห อึณ แบน ปอด ดีตาง. 7 เฆ ดา อี หลู ดี เฌาพรา โลว ดึห เฮ, ดาง แดง กาโช็ง หลู บอ กาดึง เงา ดี เฮ ตี. 8 เฆ โลว ดึห ดีฆัร ยัง เฆ ตึอน บอ ฆีณ อัน บอ เบรียง อัน, เบลห ซีคยา แคง เงา อี แฮะ กูห ตี. 9 มาแล, โคงนัร อัน บอ เปลา อัน, ดูอี ตึอน โลว บาย แคง อึม. แฮะ ฮอต, ดา อี หลู ดี เฌาพรา โลว ดึห โตต ดอน โมยว, วี โดะ แคง เงา, หลู แดง กาโช็ง ตึอน, แตห อึณ แบน ปี หลู อี โดะ ดี เงา. อูห หงูน อัน ดี ล็อะ น็อห เฌาพรา.

10 เซ อึณ มึห ดูอี อี ซี หลู โดว ซัด แคง พึง ปี เฮียง อัน, อึณ บอ มูห มาบู เฆ มาแป, แตห อึณ แบน ปี ดี หลู อี โดะ ดี เงา, อัน โลว ดึห โดว อาโล็ง อี ตู มึห โดง ดี แน, ตัห หลู. 11 อัน โลว ง็อห โดว ตี, ซัวะ แมง อัน นา กัว กาโช็ง หลู. แฮะ ฮอต, เฆ ดา อี หลู ดี เฌาพรา วี โลว ดึห หนาม โดว ตี, วี ฮูห ปัะ ดี แรง กาโช็ง บอ พวน บลาก. 12 วาย ตี อัน โลว กาแดบ โดว ตี, แตห อึณ แบน ปอด ดีตาง. ดา อี หลู ดี เฌาพรา โลว วี ดึห ยัง โดว ตี บอ ฆีณ อัน บอ เบรียง อัน, วี เบลห ซีคยา แคง เงา อี แฮะ กูห แดง กาโช็ง หลู ตึอน. 13 มาแล, โคงนัร อัน บอ เปลา อัน ดูอี ตี โลว บาย แคง อึม. ดา อี หลู ดี เฌาพรา บอ โลว ดึห โตต วี โดะ แคง เงา, หลู แดง กาโช็ง หลู ตึอน, แตห อึณ แบน ปี หลู อี โดะ ดี เงา, แตห อูห หงูน อัน ล็อะ น็อห เฌาพรา.

14 เซ ดูอี ซี ดึห มาซีม แตห อึณ แบน ปี ดี หลู ดี เฌาพรา อี โดะ ดี เงา, แตห อัน ดึห มาโบลย แปร. เซ อาว ปาย ตี มืร, แตห อัน ดึห มาโบลย ดีแตด. 15 ดา อี หลู ดี เฌาพรา โลว ดึห ตัห ดี กาโช็ง หลู, กาเวียะ กาดัด แมง อัน. แฮะ ฮอต, วี ดึห ฆีณ อัน, โดะ แคง เงา แดง กาโช็ง หลู. หนาม อัน โลว วี กาจอด ดี เบรต กาโช็ง หลู. 16 อัน โลว ดึห เมียม อัน บอ อี กอย แคง เมียม อัน, วี แวน นา เลห ซีแง กาโช็ง หลู ดี โดง เบลห อูน เฆ กาฟาง. 17 อัน โลว ปา เพียง อัน ดืด แตห โดว อัน กาบลัห, ยี ตู แตห อึณ กาดัด. แฮะ ฮอต, อัน โลว ดึห โดว มาโบลย ตี, โดะ แคง เงา, หลู แดง กาโช็ง หลู, แตห อึณ แบน ปี หลู อี โดะ ดี เงา, แตห อูห หงูน อัน ล็อะ น็อห เฌาพรา.”