อาโมวแซ ต็อห, “แตห ฆางหราว โทม โฆรห ปี กาลาง โอว. แตห บอ กาดาย โนว โฆรห อี เลห แคง โมต โอว.

2 โฆรห ปี มาโนว โอว, แตห อึณ บอ ปี ฆลาย อี โจห โลง. แตห อึณ บอ ปี อึม ดีงาน อี โจห. แตห อึณ บอ ปี ฆลาย อี โจห แดง เปต ปี ซัม อี. แตห อึณ บอ ปี อึม ฆลาย อี โจห แดง อี ปูะ เลห กามาย.

3 โอว ดี กาลาง ลอง ปี ปาย เฌาพรา. แตห เบ ดูอี ปี อึบ อัน บอ อืบ แคะ ตาง อาพูง ดังโคว อัน เฌา.

4 เฌาพรา ปี ดาอาง มาว อี มูห โดง ปึอน กอย ซีคยา. ปี โบง อัน บอ เฌะฌูง โตต ดอน โมยว. อึณเตณ ปี แหน อัน แฮะ โดบ ดารา ดอน ณ็อง. อัน บอ มูห เฌาพรา อี มึห น็อห ซืร น็อห หมาน บอ ตู นับ ดี โบง อี ตู หมาน. อัน โบง มี นา ซืร นา หมาน เซเซ.

5 อี มูห เฆ, เฆ ยี โบง นา ฮาย นา มืก ดี เฌาพรา. เฆ อาว ฮู มูห ฆอน อัน โกบ แฮะ โบง เฆ อี กาดาต. เฆ มูห อี ตู โดบ นา หมาน, บอ มึห น็อห โฆะ น็อห แฆะ.

6 อึย เบ ดูอี รึร อี ตู มึห อางยาน, เบ ทาง เบ ปึอน โบง ฌึร ตี, วี เวียะ ฆูง เฆฌู เฌาพรา. อัน เฌา แฮะ มูห ฆูณ เบ, แฮะ พาน เบลห เบ. อัน เฌา แฮะ โบง อารึบ เบ, แตห เบ แบน ดูอี.

7 แตห เบ วี โหลห อาคราว อี แฮะ ปวน ตัห อาต นี, กาดัวะ กาพา ลอง ดา ดา เบ. แตห เบ วี ดีหมอด ฆูณ เบ. เฆ ดี บอ กาลาง ดี เบ. แตห เบ วี ดีหมอด เฆ ดูอี กัด ดูอี แฆ, เฆ ดี บอ แค ดี เบ.

8 เฌาพรา อี อึบ โตต ดอน โมยว, อัน แฮะ กาย็อห กาซาง กาดาย ดี ดูอี แบน โมยว แบน โมยว, แตห อึณ แบน คาฆูน เฆ. แตห อึณ มึห กาอูน โดง ดี กอย เฆ. อัน เฌา บอ กาซาง โดบ แคะ กืน ดูอี อีซาเรลัะ.

9 โคว, ครึร อาโกบ ตึอน, อัน เฌา แฮะ ร็อห, แตห เฆ แบน อาโมยว ดูอี ปี อึบ อัน บอ แบน ปี คาฆูน อัน.

10 อัน เฌา แฮะ ยอด แมน เฆ แคง แปร กาฮ็อห โดง ง็อง ดูอี. โดง ตี อึณ บอ มึห มี ฮัม เฆ กาอืน มาโดว แปร ฮาย. อัน เฌา บอ ฆ็อง แร เฆ บอ ยอด แมน ลึมลา เฆ. อึณ กอ ปี อัน ลึมลา ฆอน งาย อัน.

11 ปี โบง เฌาพรา ดี เฆ บอ ปี มาฆลาง อี ปยาต กาฮูน อัน บอ บึณ นา แดง ฆอน อัน. อัน บอ บลัห เพียง อัน, โซก แตห ฆอน อัน กอย แดง เพียง อัน.

12 อึณ มึห มี เฌาพรา อู กาดัง อี แยต ฮาว เฆ. เฌา ปี กรึบ ดูอี เฮา ตู กอย รึม โดบ เฆ.

13 อัน เฌา แตห เฆ กอย โดง มึห นอน จา บอ แตห เฆ ปึอน ดี โฮม อี ลัต แคง โดง นา เฆ. แตห เฆ เดียง บอ งาม มาเพียน แคง ดัห มาว บอ ปึอน ดี ดึห นามัน โดง มึห ดาอาง มาว.

14 เฆ บอ ปึอน ดี โฮม อึม ปู บอ อึม ปู โฆระ ดี มามัก เฆ มาแป. บอ ยัง มาบู เฆ มาแป อี แฮะ ฆลัณ กาเซา, บอ มาบู อาโล็ง อี ตัห แคง มืง บาซัน บอ เคาคยูง อี หมึอม กาเซา บอ อึม มางูน อี แฌด, เฌาพรา แฮะ ดัว ดี เฆ ฌึร ตี ดอน โมยว.

15 ดูอี อีซาเรลัะ เฆ ตี, เฆ แฮะ ฆลัณ บอ วี กาบัห ดี เฌาพรา. เฆ แฮะ กอย ดาคึย, แฮะ มึห เฌะฌูง, แฮะ ฆลัณ ดอน อี. เฆ บอ แวน เฌาพรา อี พาน เบลห เฆ. เฆ บอ วัห อัน เฌา อี ปี ดาอาง มาว อี แฮะ คยอด เฆ.

16 เฆ บอ วี กรึบ เฌา ปี กรึบ อี เฮา, โบง แตห เฌาพรา รู ดี เฆ, แตห เฌาพรา กาอีห ปี กรึบ เฆ อารึบ ราง.

17 เฆ บอ วี หลู ดี กานัม อี ตู มูห เฌาพรา, อี มูห เฌา อี โบว ตัห กามาย ปี ตู ดึอม โรวเซ ฆูณ ดัง เฆ.

18 เบ วี ปีว เฌาพรา ปี กรึบ เบ อี ปี ดาอาง มาว. เบ มืร แฮะ ปีว เฌาพรา อี แตห เบ มึห อาซาก อี ปี ฆูณ เบ.

19 เฌาพรา แฮะ ยึร ลอง อัน ตี, อัน บอ แวน เฆ. โคว, เฆ ฆอน อีบึณ ฆอน อีมาย แฮะ โบง แตห อัน รู.

20 อัน เฌา มืร ต็อห, ‘โอว ตู ยอด เฆ ดอ เหมา. โอว ดี บัร ดี ยอด, โยว เฆ ดี ปาย เหมา. เฆ มูห ดูอี น็อห โฆะ. เฆ มูห ฆอน อี ตู โบง นา ซืร นา หมาน.

21 เฆ วี ดึห โมยว อี ตู มูห เฌาพรา โบง แตห โอว ลูต น็อห. เฆ บอ ดึห อารึบ ราง อี ตู มึห ดีโคว, โบง แตห โอว รู. ปาย ตี โอว ดี แตห เฆ วี หลัยะ ดูอี อี ตู มึห โปลม เฆ แฮณ. โอว ดี แตห เฆ วี ปีรู ปีจาว เฆ ดี ดูอี อาโมยว เฮา อี ตู มึห อางยาน.

22 น็อห รู โอว ตี, อึณ แฮะ กูห ปี เงา ดี บอ กาซึม ฌัม โดง ลึก มืง มารานัะ. อึณ ดี บอ กาซึม บอ กาดาย บอ ปี ปีด ปี ซัม ดูอี โตต ดอน โมยว. บอ ดัง นอน บอกาเฆลียด ดี กาฮ็อห แครม.

23 โอว ดี วี ดึห กาฌูะ อี ตู หมึอม ดอน โมยว, วี แตห เฆ คัม. โอว ดี บอ ดึห แคะ กอย อัะ โอว, วี บัณ เฆ.

24 โอว ดี บอ แตห อี ยัม โกบ ดูก อี เอต ปี ดี โฮม. เฆ ดี บอ มึห โดว กาฮัวะ โดว ดาด กาเซา. เฆ ดี บอ ยัม ดี เซา รอฆา. โอว ดี วี จัร มาโดว แปร ฮาย ตัห ปยาต เฆ บอ แตห มาฮัณ อี มึห อาย อี แฮณ กาเซา ตัห โฌะ เฆ.

25 นา เรต กาง ฆอน เฆ ดี บอ ยัม ดี มาปัวะ ลาง. แคง กาง เฆ, เฆ ดี บอ โลว โยว กาเซา. ฆอน กาโณม ฆอน ดีบยา เฆ ดี บอ ยัม. จูห ดี ฆอน ดีรอย กอ ฌัม ดูอี กัด อาว มึห อี ลอด.

26 อึณ แฮะ กาอาบ โอว ปยาต แวน โตต เฆ, แกวะ แตห ดูอี แดง กาดาย นี ซี โหลห เฆ.

27 มาแล, โอว ยี ตู ซี แตห รันซู เฆ วี ปีพูง เฆ บอ ทาง, เฆ แฮะ กาโฆห แฮะ ออง ดูอี ปี อึบ โอว. อึณ ยี มูห โอว อี แฮะ แตห เฆ ลึร ชึม.’ เฌาพรา แฮะ ต็อห แคะ ตี.

28 อัน เฌา วี ต็อห, ‘โคว, ดูอี อีซาเรลัะ ตู มึห อางยาน. เฆ ตู นับ ดี เฌณฌา ซีคยา.

29 โอว ซี แตห เฆ มึห อางยาน, แตห โฆรห โอว กาหลูห ดี น็อห เฆ, แตห เฆ โหลห ลอง อาฆยึร ปี โบง เฆ.

30 ดูอี อู วี แฮะ กาโฆห แป ดูอี เฆ แบน แหรณ. ดูอี อา วี แฮะ กาโฆห แป ดูอี เฆ แบน หมึณ. โกบ มาเซ อึณ แฮะ แบน ปาย ตี? อึณ มูห เฌาพรา ปี กรึบ เฆ, อี ปี ดาอาง มาว, อัน แฮะ แวน เฆ. เฌาพรา อี อึบ โตต ดอน โมยว, อัน มืร แฮะ อาบ เฆ ดี อี เฮา.

31 รันซู เฆ ตี มืร แฮะ นับ, เฌาพรา ปี กรึบ เฆ ตู มึห โปลม เฆ แฮณ, อาว มึห ปวน ปี เฌาพรา ปี กรึบ ดูอี อีซาเรลัะ.

32 รันซู เฆ ตี มืร แฮะ ฮาย กาเซา. ปี โบง เฆ ปี เฮ มางูน อี ตัห มืง โซวโดม บอ อี กอย แคง กาดาย มืง โฆวโมวรา. อึณ บอ ปี เบล มางูน ตี แฮะ มึห โฆง. กาโย็ง อัน แฮะ ซ็อง.

33 อึณ บอ ปี บอ อึม มางูน ตี มึห อาย มาฮัณ.

34 โอว อี มูห เฌาพรา บอ วี โหลห แปะ แฮะ โบง รันซู ดี เฆ ตี. โอว บอ บัร อาคราว ปัน ดี ซังโดว ดี วี ดัม หมาบ ดี เฆ.

35 โอว อี ดี วี โบง เวียะ ดี เฆ. อึณ ดี บอ ฌัม อาคราว ดี ชึม เฆ. อาคราว ดี ฌัม เฆ ดูก มืร แฮะ กาตัด ดี ตัห. อาเพ อาเร อี ดี ปยาต เฆ ดี บอ ตัห ครัน ครัน.’

36 เฌาพรา ดี บอ วี ซูงพยาด อามู เฆ ดูอี ปี อึบ อัน บอ กาเว เฆ แดเจณ อัน ดอ แฮะ ยึร อัน ลอง ตู มึห เฆ โปลม เฆ แฮณ บอ อาว ฮู ฆีด อาเซ, บอ มูห หมาย อี, บอ มูห ดา กาณา อี.

37 เฌาพรา ดี บอ วี ต็อห, ‘เฌา ปี กรึบ ปี บึง เฆ, เฆ กอย ดี เหมา?

38 เฆ แฮะ หลู ยัง บอ เบรียง โดว ซัด, แตห เฌา เฆ โฮม. เฌา เฆ ตี มืร แฮะ เดียง อึม มางูน แปะ แฮะ หลู ดูอี ตี. ดอ ตี นี, แตห เฌา เฆ ตี ตัห จอย เบ. แตห เฆ ตัห ฆ็อง แร เบ.

39 แตห เบ นับ, โอว อู กาดัง นี, โอว มูห เฌาพรา. เฌา ปี กรึบ อี เฮา, เฆ อาว มูห เฌาพรา อาคาคัร. โอว แตห อี มึห อาซาก บอ แตห อี ยัม. โอว แตห อี เซา, ปี วี แตห อึณ หราย. อาว มึห ปวน อาเซ อี ปึอน คยอด เลห อี ดี โอว.

40 โอว มืร แฮะ โจะ โซ็ง แด โอว บอ ดืง ต็อห, อึณ แฮะ หมาน, โอว กอย เซเซ. ปาย ตี บอ ปี กาลาง โอว นี แฮะ หมาน.

41 โอว ดี บอ ลาะ อูน มาปัวะ ลาง โอว, แตห อึณ ราว. โอว บอ บัร ดี ซูงพยาด โดบ ดารา. โอว ดี โบง เวียะ ดี รันซู โอว. โอว ดัม หมาบ ดี เฆ อี ฌ็อง โอว.

42 บลา อัะ โอว ดี บอ ล็อะ อี, แตห หนาม เลห กืน. มาปัวะ ลาง โอว ดี บอ แดบ ยัง ดูอี กืน. หนาม กืน ตี, บอ มูห หนาม ดูอี อี แฮะ ปาะ, อี แฮะ ดีม, ดูอี ปี เหมต ฮาว อี เฮา บอ หนาม เฆ อี แยต รันซู, อี แฮะ คัม อี แดบ ฆีณ เฆ.’

43 อึย เบ ดูอี อาโมยว เฮา, แตห เบ โคย ดาคึย โดบ เฆ ดูอี ปี อึบ เฌาพรา. โคว, เฌาพรา ดี วี ดัม หมาบ ดี เฆ อี ง็อห ยัม แดเจณ อัน. อัน ดี วี โบง เวียะ ดี เฆ รันซู อัน, วี ฆ็อห แวน หมาบ เฆ ดูอี อาโมยว อัน บอ หมาบ แคง มืง เฆ.” แคะ ตี โหมว ปี มาโนว อาโมวแซ ดี เฆ ดูอี อีซาเรลัะ.

44 อาโมวแซ ฆาย อาโยวซูอา อี มูห ฆอน อานูน ตึอน บอ ต็อห โหมว ตี, แตห เฆ ดูอี อีซาเรลัะ ปึอน ดี โทม ดอน อี. 45 อาโมวแซ แฮะ ฮอต กาลาง โตต แคะ กอย โฆรห เฌาพรา ดี เฆ ดูอี อีซาเรลัะ, 46 อัน วี ต็อห ดี เฆ, “แตห เบ ซาดีก, แคะ กอย ดารา เฌาพรา ปี กาลาง โอว ดี เบ อาตึร นี, แตห เบ แตห อึณ ลึบ แคง น็อห เบ. แตห เบ วี กาลาง บอ ดี เฆ หลูกหลาน เบ, แตห บอ เฆ วี โฆยวฆยา ดี โบง โดบ ดารา เฌาพรา ดอน โมยว. 47 โฆรห นี, อาว มูห โฆรห ดีโลย ดีลาย, อึณ ดี ดัว อาซาก ดี เบ. เซ เบ โบง โดบ, อาซาก เบ ดี บอ โต็ง. เบ ดี บอ ปึอน ดี กอย เหลณ แคง มืง โดง ดี ฮาว กอย เบ วาย กาโลห เบ อึม แบลง ยอดาน ตี.”

48 ซีแง ตี เฌาพรา ปี วี กาลาง ดี อาโมวแซ ต็อห, 49 “แตห แม ฮาว ดี โดง จืร อาบารีม อี มึห นอน แบน โปละ แบน โปละ อี กอย แคง กาดาย มืง โมวอาบ อี ลาย กาซืร ดี มืง เยรีโคว ตึอน. แฮะ ฮอต แม บอ วี โฮะ ดี นอน เนปอ, แตห แม วี มางัห ยอด มืง กานัณ แปะ แฮะ ต็อห โอว ดี แตห ดี เฆ ดูอี อีซาเรลัะ, แตห เฆ ฮาว กอย ฮาว บึง. 50 แม ดี บอ ยัม แดง นอน ตี ปี อีกัด แม อี จืร อาโรน, อี แฮะ ยัม แดง นอน โฮวรา ตึอน. 51 บาย แฮะ ปีรู ดี โอว กาแต เฆ ดูอี อีซาเรลัะ ดอ กอย เบ โคบ โตห อึม เมรีบา ตึอน, อี มูห โดง จืร กาเดด อี กอย แคง แปร กาฮ็อห จีนา ตึอน. บาย มืร ตู บยัะ แคะ บอด โอว ดี เฆ ดูอี อีซาเรลัะ. 52 โคว อัน ตี, โอว แตห มี แม กอย โต็ง ยอด มืง ตี. มาแล, แม ตู ปึอน ดี ลึบ แคง มืง แปะ แฮะ ต็อห โอว ดี ดัว ดี เฆ ดูอี อีซาเรลัะ ตี.”