1 อาโมวแซ ปี วี กาลาง ฮาว ดี เฆ ดูอี อีซาเรลัะ บอกาเฆลียด ต็อห, 2 “ดอ ตี นี อาซาก โอว แฮะ โนะ อู มาย็อห ดี อา ฆึร ซีนัม. วาย นี โอว มืร อาว ฮู ปึอน แยต เบ ปอ อึณ ปัว. เฌาพรา แฮะ กาลาง อูน ดี โอว ต็อห, ‘แม ตู ปึอน กาโลห อึม แบลง ยอดาน นี.’ 3 เฌาพรา ปี กรึบ เบ อี ดี วี แยต ฮาว เบ. อัน ดี ปยาต แวน เฆ ดูอี อี กอย ดี ตี, แตห เบ กอ ปึอน ดี อึบ มืง ตี. บอ อาโยวซูอา อี ดี แยต เบ โดบ ปี กาลาง เฌาพรา. 4 เฌาพรา ดี โบง ดี ดูอี เฆ ตี, แตห อึณ ปี ปี ดึอม โบง อัน ดี คูนดีคัม อาซีโฮน ฆาย อาออคัะ อี อึบ ดูอี อาโมยว อาโมวรีด ตึอน ดอ แฮะ ปยาต อัน ดี เฆ บอ มาน มืง เฆ. 5 เฌาพรา ดี อาบ เฆ ดี เบ. เบ มืร โลว โบง ดี เฆ, แตห อึณ ปี ปี กาลาง โอว ดี เบ บอ โตต ดอน โมยว. 6 แตห เบ มึห โปลม บอ มึห น็อห ยัะ. อาว โลว โยว, อาว โลว กย็อก เฆ. เฌาพรา ปี กรึบ เบ ดี บอ ฮาว รึม โดบ เบ. อัน เฌา มืร ตู เบลห ตู แวน เบ.”

7 วาย อัน ตี อาโมวแซ วี แดะ อาโยวซูอา, วี กาลาง ดี อัน แตห บอ เฆ ดูอี อีซาเรลัะ โทม. อัน ต็อห, “แตห แม มึห โปลม บอ มึห น็อห ยัะ. แม อี ดี แยต ดูอี เฆ นี ฮาว อึบ มืง แปะ แฮะ กาแซณ แฮะ ดืง อูน เฌาพรา ดี ดัว ดี ฆูณ ดัง เบ. แม บอ โลว กาซาง กาดาย แคง มืง ตี ดี เฆ, แตห อึณ แบน คาฆูน เฆ. 8 เฌาพรา ดี แยต แม บอ กอย รึม โดบ แม. อัน ตู เบลห ตู แวน แม. อาว โลว โยว, อาว โลว น็อห เตียะ.”

9 ปัน ตี อาโมวแซ วี แดม อูน ดารา ตี, ดัว ดี เฆ ดา อี หลู ดี เฌาพรา อี มูห ดูอี อาเลวี อี ปึอน กาฆอด ฌีดืก เฌาพรา บอ ดี เฆ ดา ตาง อี อึบ ดูอี อีซาเรลัะ บอกาเฆลียด. 10 แฮะ ฮอต อัน ต็อห ดี เฆ, “ดอ แฮะ โนะ บู ซีนัม อี มูห ซีนัม ดี โลว ควาง นี ปี ทูก อี เฮา, ฮี ฌัม บลอย กอย แคง ทึบ, เบ โลว ตีห ดารา นี. 11 แตห เบ ตีห ดารา นี, แตห เฆ ดูอี อีซาเรลัะ บอกาเฆลียด โทม ดอ ตัห กรึบ เฆ เฌาพรา โดง ปี ดี ร็อห อูน เฌาพรา. 12 แตห แม แดะ เฆ ตัห กาฌูะ โตต, บอ อีมาย บอ อีบึณ บอ ฆอน ดีรอย บอ ดูอี อาโมยว เฮา อี กอย แคง มืง ตี โดบ เบ, แตห เบ ดอน อี ปึอน ดี โทม ดารา เฌาพรา นี. แตห เบ พึก ดี โรวเซ เฌาพรา ปี กรึบ เบ, โฆยวฆยา ดี โดบ ซีคยา ดารา เฌาพรา ดอน โมยว. 13 เซ เบ โบง ปาย ตี หลูกหลาน เฆ อี หณัม ดึอม โทม ดารา เฌาพรา นี, เฆ ดี บอ ปึอน ดี โทม. ปาย ตี เฆ ดี บอ นับ ดี โรวเซ เฌาพรา โจว กอย เฆ แคง มืง ปี ดี อึบ เฆ วาย กาโลห เฆ อึม แบลง ยอดาน.”

14 วาย อัน ตี เฌาพรา วี ต็อห ดี อาโมวแซ, “แม อาว ฮู กอย เหลณ. แตห แม แดะ อาโยวซูอา, แตห บาย ตัห ดี ทึบ บีก บอด, แตห โอว ปึอน ดี ดัม อูน ฆาน ดี อัน.” ปาย ตี อาโมวแซ ฆาย อาโยวซูอา บอ ฮาว โดง กอย ทึบ บีก บอด ตึอน.

15 เฌาพรา บอ กาปลูห ดี ร็อง อึณอูะ อี กอย ดี ทึบ บีก บอด ตึอน. 16 เฌาพรา มืร กาลาง ดี อาโมวแซ ต็อห, “แม ดี บอ ยัม, กอย รึม โดบ เฆ ฆูณ ดัง แม. วาย แฮะ ยัม แม ตี, ดูอี เฆ นี เฆ ดี กาบัห ดี โอว, วี ฮาว กรึบ เฌา ปี กรึบ ดูอี เฮา อี กอย แคง มืง โดง ดี ฮาว กอย เฆ ตี. เฆ ดี บอ แวน โอว บอ ปี ลาย กาแซณ เฆ ดี โอว. 17 ปัน ตี โอว ดี บอ รู กาเซา ดี เฆ บอ แวน เฆ, ตู ยอด เฆ. เฆ ดี บอ ลึร ชึม, โลว คัม อาเพ อาเร อี หมึอม โยว กาเซา. ดอ อัน ตี เฆ ดี บอ วี โหลห อี แฮะ แบน ดี เฆ ตี โกบ ตู กอย รึม เฆ โดบ โอว อี มูห เฌาพรา ปี กรึบ เฆ. 18 ดอ อัน ตี โอว มืร ตู จอย เฆ โกบ แฮะ โบง เฆ อี ตู หมึอม อี ฮาย กาเซา บอ แฮะ กรึบ เฌา ปี กรึบ ดูอี อาโมยว เฮา.

19 ดอ ตี นี แตห แม แดม อูน โหมว ปี ต็อห โอว นี, วี มาโนว เฆ ดูอี อีซาเรลัะ, แตห เฆ เฮน, แตห อึณ กอ ดึก ดี โมต เฆ, แตห อึณ แบน ซักเซ อาดา โอว ลอง หมาบ เฆ ดูอี อีซาเรลัะ. 20 โอว ดี ตึย แตห เฆ กอ ฌัม แคง มืง บอด, มืง หมึอม อี มูห กาดาย บอด. แตห อึณ บอ โดบ กาดีก ซัดฌา แปะ แฮะ ดืง อูน โอว ดี ฆูณ ดัง เฆ. โดง ตี เฆ ดี บอ ปึอน ดี โฮม ลึง ตา ลึง, กอย ดาคึย ฆยามซา. มาแล, ดอ อัน ตี เฆ ยี ดี วัห โอว, วี กรึบ เฌา ปอ กาดัง. เฆ ดี บอ แวน โอว, ปยาต แวน บอ ปี กาแซณ เฆ. 21 ปาย ตี เฆ ดี คัม ดูก อี หมึอม โยว กาเซา. ดอ อัน ตี เฆ โลว ต็อห โหมว นี, แตห อึณ แบน ซักเซ ลอง หมาบ เฆ. โคว, หลูกหลาน เฆ ตู ปีว หมาบ ตี ดอ เหมา. โอว มืร แฮะ ฮอต นับ ปี ดี ปาย เฆ ซีณ อาต แยต ฮาว โอว เฆ แคง มืง ปี กาแซณ โอว ดี เฆ.” 22 ซีแง ตี อาโมวแซ บอ แดม อูน โหมว ตี บอ วี มาโนว เฆ ดูอี อีซาเรลัะ.

23 วาย อัน ตี เฌาพรา วี กาลาง ดี อาโยวซูอา อี มูห ฆอน อานูน ตึอน ต็อห, “แตห แม มึห โปลม บอ มึห น็อห ยัะ. แม ดี ปึอน ดี แยต ดูอี อีซาเรลัะ ฮาว แคง มืง แปะ แฮะ ดัว โอว กาดีก ซัดฌา ดี เฆ. โอว ดี บอ กอย รึม โดบ แม.”

24 อาโมวแซ บอ แดม อูน ดารา เฌาพรา ตี, แตห อึณ กอ ฮอต โตต. 25 แฮะ ฮอต, อัน วี ดัม เฆ ดา อี หลู ดี เฌาพรา อี มูห ดูอี อาเลวี, อี ปึอน กาฆอด ฌีดืก เฌาพรา ต็อห, 26 “แตห เบ ดึห บับ ดารา นี, เบลห โคบ ฌีดืก เฌาพรา อี มึห ดีพลัะ มาว ลอง ปี กาแซณ เฌาพรา, แตห บับ นี แบน ซักเซ ลอง หมาบ เฆ ดูอี ปี อึบ อัน เฌา. 27 โอว แฮะ ฮอต นับ แคะ ดืร กาเซา น็อห เบ. เบ บอ มึห น็อห ซี กาบัห เซเซ. เบ แฮะ โบง กาบัห ดี เฌาพรา ดอ มูห โจว โอว นี. วาย ยัม โอว เบ บอ นับ ดี แว โบง กาบัห เซเซ. 28 แตห เฆ ดา ตาง อี แยต เบ ดอน ครึร บอ เฆ อามู อามาด เบ บอกาเฆลียด ตัห กาฌูะ โดง กอย โอว, แตห โอว ปึอน ดี กาลาง โฆรห นี, แตห เฆ โทม ดอน อี. โอว ดี แตห บอ ฆางหราว บอ กาดาย แบน ซักเซ ลอง หมาบ เฆ. 29 โคว, โอว แฮะ ฮอต นับ, วาย ยัม โอว, เบ ดี บอ ฮาย กาเซา. เบ ดี แวน ดารา ปี กาลาง อูน โอว ดี เบ. อาคราว นา อาต ฮาว เบ ดี บอ กาดูห ดูก โกบ หมาบ ปี โบง เบ. เบ ดี บอ โบง แตห เฌาพรา รู กาเซา.”

30 แฮะ ฮอต, อาโมวแซ บอ ดึห โหมว ตี, ตีห แตห เฆ ดูอี อีซาเรลัะ บอกาเฆลียด ปึอน ดี โทม ดอ กอย กาฌูะ เฆ ตี.