1 วาย อัน ตี อาโมวแซ วี ต็อห, “ดอ ตี นี โอว แฮะ แตห เบ นับ, อึณ มึห ม็องการา บอด บอ โฆรห ดืง อี ตู หมึอม. เซ โมยว ตี แฮะ โบว แบน ดี เบ ดอ แฮะ แตห เฌาพรา เบ กอย กาย็อห กาแต เฆ ดูอี อาโมยว เฮา, แตห เบ บอ วี โหลห โฆรห ตี. 2 เซ เบ บอ หลูกหลาน เบ วี กาปลูะ น็อห, วี ตัห บึง เฌาพรา, วี แตห บอ น็อห บอ พึอม เบ วี โทม โดบ โฆรห เฌาพรา ปี กาลาง โอว ดี เบ อาตึร นี, 3 เฌาพรา ปี กรึบ เบ ดี วี กาเว เบ, วี ดัว อี หมึอม ดี เบ. อัน เฌา ดี วี ดึห ตัห เบ กาแต ดูอี อาโมยว เฮา โดง แฮะ กอย กาย็อห กาเรห เบ ตี, แตห เบ วี กอย แคง มืง เบ. 4 เบ ปี บอ แฮะ กอย กาย็อห กาเรห, แฮะ โต็ง กาเซา กอ ฌัม โดง ซืด กาดาย มืร, เฌาพรา ปี กรึบ เบ, อัน ปี ดี วี ดึห ตัห กาฌูะ เบ ปอ อู เฌณ. 5 ปาย ตี เบ ดี วี ปึอน ดี ตัห กอย กาฌูะ แคง มืง โดง ดึอม กอย ฆูณ ดัง เบ. อึณ ดี วี แบน มืง เบ. เบ ดี วี กอย ดาคึย, วี แบร กืน หลึอม เฆ ฆูณ ดัง เบ. 6 เฌาพรา ปี กรึบ เบ ดี วี แตห เบ บอ หลูกหลาน เบ มึห น็อห อี นับ ดี โทม โฆรห, แตห บอ น็อห บอ พึอม เบ บอ โตต แคง น็อห เบ วี ร็อก อัน เฌา, แตห เบ บอ มึห อาซาก โต็ง บอ กอย แคง มืง ตี. 7 เฌาพรา ดี วี บยอง โฆรห ดืง ตึอน, วี แตห เฆ รันซู เบ อี ฌ็อง เบ, อี คาหนาบ เบ วี คัม. 8 ปาย ตี เบ ดี วี โทม โฆรห เฌาพรา บอ วี โบง โดบ ดารา ปี กาลาง โอว ดี เบ อาตึร นี. 9 ปัน ตี เฌาพรา ปี กรึบ เบ ดี วี แตห ฆาน ปี โบง เบ ออง ดอน โมยว. เบ ดี บอ มึห หลูกหลาน กืน กาเซา. พึง มาบู เฆ มามัก เบ มืร ดี วี แบร กืน กาเซา. มาน เบ เฆ โดง นา เบ มืร ดี บอ เลห กาโย็ง กืน กาเซา. เฌาพรา ดี วี มึห น็อห โคย ดาคึย โกบ แฮะ วี มึห เบ, แตห อึณ ปี ดอ แฮะ โคย ดาคึย อัน ดอ มูห โจว เฆ ฆูณ ดัง เบ. 10 มาแล, เบ โลว โทม โฆรห เฌาพรา ปี กรึบ เบ บอ โบง โดบ ดารา แปะ แฮะ แดม อูน แคง บับ ดารา นี, แตห บอ น็อห บอ พึอม เบ วี โหลห เฌาพรา เซเซ.

11 ดารา ปี กาลาง โอว ดี เบ อาตึร นี อาว มูห ดารา อี หณาบ โดบ. อาว มูห ปี ตู ปึอน โดบ เบ อี ปี อึณ กอย กาโต็ง ดี เบ. 12 อาว มูห ดารา อี กอย แคง ฆางหราว อี จา กาเซา. เบ ตู โลว ดีหมอด ต็อห, ‘อาเซ ดี โฮะ แคง ฆางหราว, ดึห ตัห ดารา ตี, แตห เย โทม, แตห เย โบง โดบ?’ 13 ดารา ตี มืร ตู กอย นา ดอย อึม นัมมูกซารา. เบ ตู โลว ดีหมอด ต็อห, ‘อาเซ ดี กาโลห อึม นัมมูกซารา ฮาว ดึห ตัห ดารา ตี, แตห เย โทม, แตห เย โดบ?’ 14 อาว มูห ปาย ตี. ดารา ตี แฮะ กอย เครียะ เบ. แฮะ กอย แคง โมต เบ บอ แคง น็อห เบ, แตห เบ โดบ.

15 ดอ ตี นี โอว แฮะ แตห เบ ร็อห อี หมึอม บอ อี ตู หมึอม, อี แตห เบ มึห อาซาก บอ อี แตห เบ ยัม. 16 โคว, โอว จัร เบ อาตึร นี, แตห เบ ร็อก เฌาพรา ปี กรึบ เบ บอ โทม โฆรห อัน. แตห เบ บอ คัม ดี โบง โดบ ดารา อัน ตี. เซ เบ บอ โบง ปาย ตี เบ ดี บอ แบน ดูอี อาโมยว ตาง กาแต ดูอี บอกาเฆลียด. เฌาพรา ปี กรึบ เบ ดี บอ ม็องการา ดัว ดี เบ แคง มืง โดง ดี ฮาว กอย, ฮาว บึง เบ ตี.

17 มาแล, เซ น็อห เบ ยี วี บลืง, ตู วี โทม โฆรห เฌาพรา ปี วี ฮาว โทม โฆรห ปี กาซูห อี เฮา ดี เบ, วี กรึบ เฌา ปี กรึบ ดูอี เฮา, 18 โอว ต็อห ดี เบ อาตึร นี, เบ ดืน ดี ชึม อาคาคัร. อาซาก เบ มืร ตู โต็ง. เบ มืร ตู ปึอน ดี กอย เหลณ แคง มืง โดง ฮาว กอย เบ วาย กาโลห เบ อึม แบลง ยอดาน.

19 ดอ ตี นี โอว แตห เบ ร็อห ลอง อี แตห เบ มึห อาซาก บอ ลอง อี แตห เบ ยัม บอ ลอง ปี ม็องการา ดัว เฌาพรา บอ ลอง ปี ดี ดืง เฌาพรา. โอว มืร แตห บอ กาดาย บอ ฆางหราว แบน ซักเซ ลอง แปะ แฮะ กาลาง โอว ดี เบ ตี. ปาย ตี แตห เบ ร็อห แตห บอ หลูกหลาน เบ มึห อาซาก. 20 แตห เบ ร็อก เฌาพรา ปี กรึบ เบ, แตห เบ โทม โฆรห อัน บอ กอย กาดึก กาด็อะ ดี อัน. โคว, เซ เบ โบง ปาย ตี เบ ดี มึห อาซาก โต็ง, กอย แคง มืง แปะ แฮะ ดืง อูน เฌาพรา ดี ดัว ดี เฆ ฆูณ ดัง เบ อี มูห อาบราฮัม, อาแซก บอ อาโกบ เฆ ตึอน.”