1 ดอ กอย เฆ ดูอี อีซาเรลัะ แคง มืง โมวอาบ, เฌาพรา ซี แตห ดูอี อีซาเรลัะ วี ลาย กาแซณ ดี อัน. อัน บอ จัร อาโมวแซ กาลาง ดี เฆ ดูอี อีซาเรลัะ ลอง อัน ตี. โฆรห กาแซณ นี, เฌาพรา วี ปัว แดง แปะ แฮะ ลาย กาแซณ อัน ดี เฆ ดี นอน ซีนาย ตึอน.

2 อาโมวแซ บอ แดะ เฆ ดูอี อีซาเรลัะ บอกาเฆลียด บอ กาลาง ดี เฆ ต็อห, “เบ แฮะ ฮอต ยึร แปะ แฮะ โบง เฌาพรา ดี คูนดีคัม แคง มืง แอฆึบ บอ ดี เฆ อามู อามาด อัน บอ ดี มืง อัน ตี บอ มืง. 3 เบ มืร แฮะ ฮอต ยึร แปะ แฮะ โบง เฌาพรา อี หมึอม อาม กาเซา บอ อี หมึอม โยว กาเซา. เบ แฮะ ยึร บอ แคะ ตาง ปวน เฌาพรา. 4 ปี บอ แฮะ ปาย ตี มืร, เฌาพรา ยี หณัม แตห อึณ กาหลูห ดี น็อห เบ. อึณ มืร ตู ลึห มาเซ ดี งาย เบ บอ ดี โหยะ เบ กอ ฌัม อาตึร นี. 5 อาดา พวน ฆึร ซีนัม เฌาพรา แฮะ ตึย เบ ฮาว แคง แปร กาฮ็อห. ครึง ตา เบ บอ แคลบ ปี ตา เบ ยี ตู บรีม, ตู ราม. 6 เบ ตู มึห ดี โฮม คามูน, ตู มึห ดี เดียง อึม มางูน เฆ ป็อห. เฌาพรา แฮะ โบง ปาย ตี แตห เบ นับ, อัน มูห เฌาพรา ปี กรึบ เบ.

7 ดอ ตัห ฌัม เบ โดง กอย เอ นี, คูนดีคัม อาซีโฮน อี อึบ มืง เฮซาโพน บอ คูนดีคัม อาออคัะ อี อึบ มืง บาซัน แฮะ เลห กาโฆห ดี เอ. มาแล, เอ แฮะ วี กาโฆห แป เฆ. 8 เอ บอ วี ปึอน มืง เฆ. เอ บอ วี กาซาง ดัว ดี ดูอี อาโมยว อารูเบน, อาโมยว อาฆัด บอ อาโมยว ดูอี อามานาเซ อาดา อู กาแต, แตห อึณ แบน คาฆูน เฆ.

9 โคว อัน ตี, แตห เบ โบง โดบ ซีคยา กาดีก ซัดฌา นี, แตห อึณ บอด, แตห อึณ หมึอม ดอน โมยว ปี โบง เบ. 10 อาตึร นี แคะ กอย เบ บอกาเฆลียด ตัห กอย ดี อาต เฌาพรา. บอ มูห ดา กาณา เบ บอ เฆ ดูอี แคง ครึร เบ, ดา ตาง เบ บอ อามู อามาด เบ บอ อีมาย ดูอี อีซาเรลัะ ดอน อี, 11 บอ มูห อีบึณ เฆ ฆอน เบ บอ เฆ ดูอี อาโมยว เฮา อี กอย รึม โดบ เบ, อี เกด เฮ บอ อี ต็อะ อึม เบ, 12 แตห เบ ตัห กอย ดี นี, แตห เบ คัม กาดีก ซัดฌา. อาตึร นี แตห เบ ดืง กาแซณ ดี เฌาพรา ปี กรึบ เบ. 13 เฌาพรา ดี แตห เบ นับ ซีคยา ลอง แบน เบ ดูอี อาโมยว ปี อึบ อัน, อัน บอ มูห เฌาพรา ปี กรึบ เบ, แตห อึณ บอ โดบ แปะ แฮะ กาแซณ อัน ดี เบ บอ แปะ แฮะ ดึอม ดืง อูน อัน ดี เฆ ฆูณ ดัง เบ อี มูห อาบราฮัม, อาแซก บอ อาโกบ เฆ ตึอน. 14 แดง ตี, อาว มูห เฌาพรา ดัว กาดีก ซัดฌา นี มี ดี เบ อี กอย ดี อาต เฌาพรา ดอ ตี นี. 15 อัน เฌา ดัว กาดีก ซัดฌา ตี บอ ดี เฆ อี ตู กอย ดี นี อาตึร นี.

16 เบ มืร โลว โหลห ดอ กอย เบ แคง มืง แอฆึบ บอ ดอ ฮาว เบ โดบ อึณเตณ บอ ฮาว กาแต ดูอี อาโมยว เฮา แปะ แฮะ กาโลห เบ. 17 เบ แฮะ ยึร อารึบ ราง อี หมึอม กาอีห ปี โบง เฆ ตา เฮ เฆ มาว, รึอน เฆ ครีว. 18 ปาย ตี แตห เบ ซาดีก แคะ กอย เบ ดี นี ดอน อี. บอ อีบึณ บอ อีมาย บอ ดอน อึณโฮม ดอน ครึร, แกวะ แตห อึณ มึห คอ อู วี อี แวน เฌาพรา ปี กรึบ เบ, วี ฮาว กรึบ เฌา ปี กรึบ ดูอี เฮา. แกวะ แตห เบ มึห น็อห อี ปี เรียห เฮ อี เลห เบล ซ็อง บอ เบล อี มึห โฆง.

19 ปาย ตี แตห เบ ซาดีก, แกวะ แตห อึณ มึห อี ยึร โฆรห ปี กาแซณ นี, อี ต็อห แคง น็อห อัน, ‘อึณ ดี แบน อี หมึอม ดี โอว. โอว ปี บอ โบง โดบ น็อห บรีม น็อห ดืร โอว มืร, เฌาพรา ดี ม็องการา ดัว ดี โอว.’ อาเซ กาพา ฌึร ตี, อัน โบง แตห ดอน อี ลึร ชึม, บอ เฆ อี ปี กาดาย บอด บอ เฆ อี ปี กาดาย อี แฮะ วี ฌืด กาฮ็อห ต็อง. 20 เฌาพรา ตู ฆ็อห แวน หมาบ ดูอี ฌึร ตี ดอ เหมา. เฌาพรา ดี วี รู กาเซา ดี อัน, แตห อัน วี คัม แคะ กอย ปี ดืง ดอน โมยว แปะ แฮะ แดม อูน แคง บับ เฌาพรา นี, แตห อัน ลึร ชึม, แกวะ ฮู แตห อี ซี นัมโหลห อัน. 21 เฌาพรา ดี กาย็อห เลห ดูอี ตี แคง ดูอี อีซาเรลัะ, แตห อัน วี คัม ปี ดืง เฌาพรา ดอน โมยว, แตห อึณ บอ โดบ โฆรห ดืง อี แฮะ แดม อูน แคง บับ ดารา นี.

22 หลูกหลาน เบ อี ดี ฆึอด ตัห วาย นี บอ เฆ ดูอี อาโมยว เฮา อี ตัห มืง โต็ง เฆ ตึอน, เฆ ดี ยึร ดูก บอ เซา รอฆา ปี ดี ดัว เฌาพรา แคง มืง เบ ตี. 23 โคว, แดง กาดาย เบ, อึณ ดี บอ มึห กันดืก บอ ดัก เงา บอ ซัยะ ดีโลย. อึณ ดี บอ ราม, อาว ฮู ปึอน ซัม มาเซ. แปร เฆ เปต มืร ตู ลัต. มืง เบ ตี ดี แบน มืง อี กาปยาต ลึร ปี มืง โซวโดม ฆาย มืง โฆวโมวรา, อึณ ดี บอ ปี มืง ดามา บอ มืง เฌโบวยีม แปะ แฮะ ซาฆึบ แวน เฌาพรา ดอ แฮะ รู กาเซา อัน. 24 ดอ อัน ตี ดูอี มืง เฮา บอกาเฆลียด ดี บอ ต็อห, ‘เหมา อึณ ปาย ปี โบง เฌาพรา ปาย นี แคง มืง นี? โกบ มาเซ เฌาพรา รู กาเซา ปาย แซน นี?’

25 อี เฮา ปี ดี วี ต็อห, ‘อึณ มูห โกบ เฆ ดูอี ปี อึบ เฌาพรา แฮะ หลึร โฆรห ปี ลาย กาแซณ เฌาพรา บอ ดี ฆูณ ดัง เฆ ดอ ดึห เลห เฌาพรา ดี เฆ แคง มืง แอฆึบ ตึอน. 26 เฆ แฮะ วี กรึบ เฌา ปี ตู ดึอม กรึบ เฆ อี มูห เฌา ปี ตู ควาง เฌาพรา เฆ กรึบ. 27 โกบ อึณ ปาย ตี เฌาพรา รู กาเซา ดี เฆ, แตห เฆ วี คัม ดูก แปะ แฮะ ดืง เฌาพรา, แปะ แฮะ แดม อูน แคง บับ ดารา นี.

28 เฌาพรา แฮะ รู กาเซา บอ มึห น็อห กาอีห กาเซา บอ ดึห แวน เฆ, แตห เฆ เลห แคง มืง เฆ ตี, แตห อึณ ปี อัน รึต เลห บอ เรียห บอ ดัง บอ โตต, วี แตห เฆ กอย แคง มืง เตต มืง ตัะ โดง กอย เฆ ดอ ตี นี.’

29 อึณ ซี มึห ปี ตู นับ เอ ดอ ตี นี, อี กอย ดี เฌาพรา. ปี บยัะ แหน เฌาพรา, อึณ ยี มูห อาดา เอ, บอ อาดา หลูกหลาน เอ, แตห เอ โบง โดบ ดารา ตี เซเซ.” แคะ ตี อาโมวแซ แฮะ กาลาง.