1 อาโมวแซ ปี วี ต็อห, “เซ เบ โทม โฆรห เฌาพรา อี มูห เฌาพรา ปี กรึบ เบ บอ โบง โดบ ซีคยา ดารา อัน ปี กาลาง โอว ดี เบ อาตึร นี ดอน โมยว, อัน เฌา ดี โจะ มยูก เบ, แตห เบ มึห ซาเร บอ อาพูง ดังโคว หลึอม ดูอี ดอน โมยว แดง กาดาย นี. 2 เซ เบ โทม โฆรห เฌาพรา อี มูห เฌาพรา ปี กรึบ เบ ตี, เบ ดี บอ ปึอน ปี ม็องการา ดัว เฌาพรา ดี เบ, แตห อึณ บอ กอย รึม โดบ เบ เซเซ.

3 เฌาพรา ดี ม็องการา ดัว ดี เบ ดอ กอย เบ แคง มาน มืง เบ บอ ดอ รัณ เบ โดง นา เบ.

4 เฌาพรา ดี ม็องการา ดัว, แตห เบ มึห ฆอน, แตห บอ ปี ปีด ปี ซัม เบ บอด บอ หมึอม. อัน ดี แตห บอ โดว ซัดดาวา เบ แบร กืน, แตห บอ ฆอน มามัก, ฆอน มาบู เฆ มาแป กอย ดาคึย แคง พึง เฆ.

5 เฌาพรา ดี ม็องการา ดัว บอ ดี คอน เฆ กรึก เบ บอ ดี ก็อก เฆ ซีลัยะ กาวัร เบ คามูน.

6 เฌาพรา ดี ม็องการา ดัว ดอ ลึบ ดอ เลห เบ แคง กาง เบ.

7 เฌาพรา ดี บอ แป รันซู เบ ดอ ตัห กาโฆห เฆ ดี เบ. เฆ ดี ตัห กาโฆห ดี เบ อู บลาก, เฆ ดี บอ เตา ฮาว ดอน บลาก.

8 เฌาพรา ดี ม็องการา ดัว ฆาน ปี โบง เบ ดอน โมยว. อัน เฌา ดี ม็องการา ดัว บอ ฆรัว โหงว เบ, บอ มืง ปี ดี ดัว อัน ดี เบ.

9 เซ เบ โบง โดบ ดารา เฌาพรา ปี กรึบ เบ, เฌาพรา ดี แตห เบ แบน ดูอี อี ซีงา บอด, แตห อึณ บอ โดบ กาดีก ซัดฌา แปะ แฮะ ดืง อัน ดี ดัว ดี เบ. 10 ปัน อัน ตี แคะ กอย ดูอี แดง กาดาย นี ดอน โมยว, เฆ ดี บอ ยึร เฌาพรา แฮะ ร็อห เบ. เฆ ดี บอ โยว เบ. 11 เฌาพรา ดี แตห หลูกหลาน เบ แบร กืน กาเซา, แตห บอ มามัก เฆ มาบู เบ แบร กืน, แตห บอ ปี ปีด ปี ซัม เบ เลห กืน กาเซา แคง มืง แปะ แฮะ กาแซณ เฌาพรา ดี ดัว ดี เฆ ฆูณ ดัง เบ ตี.

12 อึณ ดี บอ ปี เฌาพรา ดี วึห มาโลห แคง ฆางหราว, แตห ฆลาย โจห ดอ ซังโดว, แตห อัน บอ ม็องการา ดัว แคะ ปี โบง เบ. ปาย ตี เบ ดี วี ปึอน ดัว เฆ ดูอี อาโมยว เฮา การ็อห กาวาย ดี เบ. อี มูห เบ, เบ ยี ตู โลว การ็อห กาวาย ดี อี เฮา. 13 เซ เบ โทม บอ โบง โดบ ซีคยา ดารา ปี กาลาง โอว ดี เบ อาตึร นี, เฌาพรา ตู แตห เบ แบน ดูอี อี โลว โดบ ดี ปัน อี เฮา. อัน ดี แตห เบ แบน ดูอี อี แยต ดี อาต อี เฮา. อัน เฌา มืร ตู แตห เบ ชึม ปี ดูอี อี โจห เตียม. อัน แตห เบ ปึอน นา บอด นา หมึอม เซเซ, ปี ดูอี อี กอย โดง จา. 14 เซ เบ ตู วัห ตู แวน คอ อู แด, ตู วี กรึบ เฌา ปี กรึบ อี เฮา, เบ ดี บอ ปึอน ดี บึง นา บอด นา หมึอม ปาย ตี.

15 มาแล, เซ เบ ยี ตู โทม โฆรห เฌาพรา ปี กรึบ เบ, ตู โบง โดบ ซีคยา ดารา อัน บอ ปี จัร อัน ดี โอว แตห โอว กาลาง ดี เบ อาตึร นี, เบ โลว วี คัม ปี ดืง เฌาพรา ปี ต็อห โอว ดอ ตี นี ดอน โมยว.

16 เฌาพรา ดี ดืง เบ ดอ กอย เบ แคง มาน มืง เบ, บอ ดอ รัณ เบ โดง นา เบ.

17 เฌาพรา ดี ดืง บอ คอน เบ เฆ กรึก เบ บอ ก็อก เบ เฆ ซีลัยะ กาวัร เบ คามูน.

18 เฌาพรา ดี ดืง ฆอน เบ, แตห เฆ เปรต กาเซา. แตห บอ ปี ปีด ปี ซัม เบ อาว ฮู บอด. อัน ดี บอ แตห โดว ซัดดาวา เบ เปรต, แตห บอ ฆอน มามัก, ฆอน มาบู เฆ มาแป อาว ฮู ดาคึย แคง พึง เฆ.

19 เฌาพรา ดี ดืง เบ ดอ ลึบ ดอ เลห เบ แคง กาง เบ.

20 เฌาพรา ดี ดืง เบ บอ ปยาต เบ, แนนัะ เบ บอ ปี โบง ปี รัณ เบ ดอน โมยว. อัน ดี โบง แตห เบ ลึร บอ ชึม ครัน ครัน. โคว, เบ แฮะ วัห เฌาพรา บอ โบง อี ตู หมึอม ดอน โมยว. 21 อัน เฌา ดี แตห เบ คัม ดูก ตาง กาเซา, แตห เบ มึห เซา รอฆา แบน โมยว แบน โมยว. แตห อึณ กอ ปยาต โตต เบ, แกวะ แตห เบ ซี ฆีด คอ อู วี แคง มืง โดง ดี ฮาว กอย เบ. 22 เฌาพรา ดี โบง แตห เบ มึห เซา อี แตห โปลม แกร ดี โยม, แตห เบ มึห โดว กาฮัวะ, โดว ดาด บอ อ็อห. บอ ดี กาดาย โดง กอย เบ, อึณ ดี บอ กาฮ็อห ต็อง, แลง ดี บอ โจห ดี กาโย็ง โหงว เบ. อึณ ดี บอ มึห คูน ดาด, บอ กาดีห เงียน ดี บอ ดึก ดอน โปละ. อึณ แตห เบ คัม ดูก, แตห อึณ กอ ฌัม ปัน ดี ลึร ชึม โตต เบ. 23 อัน เฌา มืร แตห เบลณ ปี บ็อง เดณ. อึณ ดี บอ แตห กาดาย กอ โปลม แหนน ฮีน. 24 เฌาพรา มืร ตู แตห ฆลาย โจห, แตห มี คูน บูด ตัห กาปูห เฆ กาดาย กามอต โดง กอย เบ, แตห เบ กอ ลึร ชึม โตต.

25 เฌาพรา ดี แตห รันซู เบ แป เบ. เบ ดี บอ ตัห ดี เฆ อู บลาก, เบ ยี กาดูห ดี เตา เฆ ฮาว บู บลาก. ดอ ยึร เฆ ดูอี เฮา ลอง แฮะ แบน ปาย ตี ดี เบ, เฆ ดี บอ วี กาจัว กาปึณ อู เฌณ. 26 โดว ยัม เบ ดี บอ แบน ปี ดี โฮม มาซีม เฆ มาโดว แปร. อาว มึห อาเซ อี ดี ณอน เตา เฆ. 27 เฌาพรา ดี แตห เบ มึห เซา บึบ อี แฮะ ดึอม เลห ดี เฆ ดูอี แคง มืง แอฆึบ ตึอน. เฌาพรา ดี แตห เบ ลาน บอ ดีม บอ โดว, แตห เบ มึห เหรา อี ตู นับ ดี หราย ดอ เหมา. 28 เฌาพรา แตห เบ แบน ยอง แบน ฟึณ, บอ แบน เซา งาย อับ, บอ แตห น็อห เบ กาฟัร กาเฟียน. 29 ดอ กาแต ซีแง เฌาพรา ดี แตห เบ ฮาว กาเกียง กาเกห ปี ดูอี งาย อับ. แคะ ปี โบง ปี รัณ เบ, อาว มึห อี ออง มาเซ. เบ ดี บอ คัม อี เฮา คาหนาบ เบ บอ พาด ดึห โกรวกราม เบ เซเซ, อาว มึห อี ดี จอย เบ คอ อู วี.

30 เบ ปี บอ แฮะ หมาย อูน อีบึณ อู วี, แตห อัน แบน ปาว เบ, อึณ ยี มึห อี เฮา ดี วี เหมต ลาย อัน. เบ ปี บอ แฮะ ซัม อูน กาง, เบ ยี ตู ปึอน ดี กอย. เบ ปี บอ แฮะ โบง อูน มาน มางูน, เบ ยี ตู ปึอน ดี โฮม เบล อัน. 31 อี เฮา ดี ง็อห ยัม มามัก เบ ดี อาต เบ, เบ ยี ตู ปึอน ดี ฮาบ ยัง อัน. อี เฮา ดี วี ตึณ ฮาว มาลา เบ, แกวะ แตห เบ ซี วี ปึอน วีว ดอ เหมา. มาบู เบ, เบ ดี กาดูห ดี อาบ ดี รันซู เบ, อาว มึห อี ดี จอย เบ คอ อู วี. 32 ฆอน อีบึณ เฆ ฆอน อีมาย เบ, ดูอี อาโมยว เฮา ดี บอ ดึห ฮาว แบน หมาย เฆ ดอ ยึร เบ. เบ ดี บอ บัร ดี ยอด, มอง ปัน ดี วี ตัห เฆ, แตห งาย เบ กอ โมว กอ กาปยอย มืร, อึณ ยี ตู มึห ดีโคว มาเซ, เบ บอ บัร ปีเยณ. 33 ดูอี ปี ตู ดึอม ยึร ดึอม นับ เบ, เฆ ดี วี ดึห ดี โฮม โหงว แปะ แฮะ รัณ หณาบ กาเซา เบ. แดง ตี, เบ ปี วี โลว คัม ปี คาหนาบ อี เฮา เซเซ, แตห อึณ กอ ปี เฆ แณต เบ เซเซ. 34 โกบ คัม เบ ดูก ตี, อึณ ดี แตห น็อห เบ รึร ฟึณ. 35 เฌาพรา ดี แตห เบ มึห บึบ อี ตู นับ ดี หราย ดอ เหมา. อาว วัน มี ดี กีณโกร็ง เบ เฆ ดี เปลา เบ, อึณ ดี บอ แบร จูห ดี กาบา เปลา เบ กอ ฌัม ดี ฆีณ เบ.

36 เฌาพรา ดี ดึห เบ บอ คูนดีคัม แปะ แฮะ หมาณ เบ ดี อัน, แตห เบ ฮาว ดี มืง ปี ตู ดึอม นับ เบ บอ ฆูณ ดัง เบ. โดง ตี, เบ ดี กาดูห ดี กรึบ เฌา ปี กรึบ อี เฮา อี มูห เฮ เฆ มาว แปะ แฮะ โบง อูน ดูอี. 37 แคง มืง โดง ดี ดึห ฮาว เฌาพรา เบ ตี, เบ ดี บอ แบน ปี อาม บอ ปี กาอีห อี เฮา บอ ปี กาณัห ดูอี ดอน ฌึร ดอน ครึร.

38 เบ ปี บอ ฮับ ซีมา กืน มืร, เบ ยี ดี วี ปึอน ดี โซะ อี แจก โกบ แฮะ โฮม มา อาโฌ็ง. 39 เบ ปี บอ ซัม เฮ มางูน กืน บอ ยอด ลึมลา ซีคยา มืร, เบ ยี ตู ปึอน ดี โฮม เบล อัน เฆ อึม อัน. โคว, วัะลัว ดี โฮม โตต. 40 เฮ นามัน เบ ปี บอ แฮะ กืน แตห อึณ กอ โนะ แคง มืง เบ ตี ดอน โปละ มืร, เบ ยี ตู ปึอน ดี พ็อห นามัน. โคว, เบล อัน ดี รัห, อาว ดัน ซีน. 41 เบ ปี บอ แฮะ มึห ฆอน อีบึณ, ฆอน อีมาย กืน มืร, เฆ ยี ตู ปึอน กอย รึม โดบ เบ. โคว, รันซู เบ ดี เหมต ฮาว เฆ. 42 มา อาโฌ็ง กืน ดี บอ ตัห โฮม โตต หลา เฮ เบ บอ ปี ปีด ปี ซัม เบ ดอน โมยว.

43 ดูอี อาโมยว เฮา อี กอย กาแต เบ, เฆ ดี บอ แกร ดี มึห ซาเร เฆ ปวน หลึอม เบ. อี มูห เบ, เบ ยี ดี แกร ดี คย็อะ, แกร ดี โจห เตียม. 44 เฆ ดี บอ วี มึห รึอน ดัว เบ การ็อห กาวาย ดี เฆ. อี มูห เบ, เบ ยี ตู มึห ดี ดัว เฆ การ็อห กาวาย ดี เบ. เฆ ดี บอ แบน อี แยต เบ. เบ ยี ดี โดบ ดี ปัน เฆ.

45 ปี ดืง ฌึร ตี ดอน โมยว ดี โจห โตต ดี เบ, แตห อึณ กอ ฌัม ปัน ดี ลึร ชึม โตต เบ โกบ ตู ดึห ดี โทม เบ โฆรห เฌาพรา บอ ตู โบง โดบ เบ ดารา เฌาพรา ปี กรึบ เบ บอ ปี ดัม ปี กาลาง อูน อัน ดี เบ. 46 ปี ดืง ตี แฮะ แตห อึณ ลึห ซีคยา ดี เบ บอ ดี หลูกหลาน เบ ลอง เฌาพรา แฮะ ดัม หมาบ ดี เบ, แตห เบ โยว บอ โรวเซ เฌาพรา เซเซ. 47 เฌาพรา แฮะ ฮอต ม็องการา ดัว นา บอด นา หมึอม ดี เบ ดอน โมยว. มาแล, เบ ตู มึห น็อห ดาคึย น็อห ฌอนโฌม ดี โบง ปี อึง อัน เฌา. 48 โคว อัน ตี, เบ กาดูห ดี วี โฆม รันซู เบ ปี ดี จัร เฌาพรา ตัห กาโฆห ดี เบ. ปัน อัน ตี เบ ดี กาปราณ ปี ดี โฮม บอ ซี เดียง อึม. เบ ดี บอ แบน อาฆลัะ บอ ฆีน กาเซา, แบน หมาย รันซู เบ. อึณ ดี ปี อัน เฌา ดี ดึห มัง ฆอด ฮีน, เบลห แดง เมา เบ, แตห อึณ กอ ฌัม ปัน ดี ปยาต แวน โตต อัน ดี เบ.

49 เฌาพรา ดี วี ดึห ตัห ดูอี อู โมยว อี ตัห โดง ซืด กาดาย, ปี ตู นับ เบ โฆรห เฆ. เฆ ดี บอ ตัห ครัน ครัน โดง กอย เบ ปี มาฆลาง ดี เลา ตัห. 50 อารึบ เฆ มืร แฮะ หมึอม โยว. เฆ ตู นับ ดี โรวเซ ดูอี กัด, ดูอี แฆ. เฆ มืร ตู นับ ดี กาเว ดูอี หนึม เฆ ฆอน. 51 เฆ ดี บอ ง็อห โฮม ฆอน โดว ซัดดาวา เบ บอ โหงว ดีฆาว อี เลห แคง มาน เบ, แตห อึณ กอ ฌัม ปัน ดี ลึร ชึม โตต เบ. เฆ มืร ตู อูน แตห อึณ กาโลย มาเซ ดี เบ. บอ มูห โหงว ดีฆาว, เบล มางูน, เบล นามัน บอ แคง พึง ฆอน มาบู, มามัก เฆ มาแป, แตห อึณ กอ ฌัม ปัน ดี ลึร ชึม โตต เบ. 52 เฆ ดี บอ แวง โรบ ดอน มืง แคง กาดาย ปี ดี อาบ เฌาพรา ดี เบ, แตห อึณ กอ ฌัม ปัน ดี ลึร ชึม โตต เบ. แรง มืง ปี บอ แฮะ จา แฮะ คึกคัม, ปี บอ แฮะ มูห โดง บึง เบ, อึณ ดี บอ เกห กาปยาต ลึร โตต.

53 ดอ ตัห โรบ รันซู โดง กอย เบ ตี, อึณ ดี บอ ดูก กาเซา ดี น็อห เบ ลอง ปี ดี โฮม. เบ ดี กาดูห ดี วี โฮม ฆอน เบ อี มูห ฆอน อีบึณ, ฆอน อีมาย แปะ แฮะ ดัว เฌาพรา ดี เบ. 54 อึณ ปี บอ มูห อีมาย อี มึห น็อห ดีฮาง บอ ซี โบง นา บอด นา หมึอม มืร, อัน อาว ฮู มึห น็อห กาเว บีนอง วอแว อัน บอ อีบึณ ปี ร็อก อัน บอ ฆอน อัน อี ซี ฆีด เฆ ตึอน. 55 ดอ โฮม อัน ยัง ฆอน อัน ตี, อัน มืร ตู กาซาง ดัว ดี อี เฮา โกบ อาว ฮู มึห ปี ดี โฮม มาเซ. 56 อึณ ปี บอ มูห อีบึณ อี มึห น็อห อึณจูะ อึณจัม บอ ซี โบง นา บอด นา หมึอม, กอ ฮู ยัะ ฌาบ แดง กาดาย โกบ แฮะ อึณจัม เปลา อัน, อัน ดี บอ มึห น็อห ปาย ตี. ดอ ตัห โรบ รันซู ดี มืง โดง กอย อัน ตี, อัน มืร อาว ฮู มึห น็อห กาเว อีมาย ปี ร็อก อัน บอ ฆอน อัน. 57 โกรว ฆอน อัน บอ ฆอน อัน อี ฆึอด ตัห กามาย, อัน บอ คราม ดี ปรา ดี โฮม มี อัน อู วี. อัน ตู ซี กาซาง ดี อาเซ โกบ อี ดูก อี หณาบ ปี ดัว รันซู ดี เบ.

58 เซ เบ ตู มึห น็อห ดี โบง โดบ ซีคยา ดารา แปะ แฮะ แดม อูน แคง บับ นี ดอน โมยว, เซ เบ ตู โรวเซ ปวน ตาง เฌาพรา ปี กรึบ เบ อี แฮะ โบง อี หมึอม อาม กาเซา, 59 อัน เฌา ดี แตห บอ เบ บอ หลูกหลาน เบ บอ ครึร เบ คัม ดูก ดี เซา รอฆา อี ตู นับ ดี หราย, อี หมึอม โยว บอ แฮณ กาเซา. 60 แดง ตี, อัน เฌา ดี แตห เบ คัม เซา รอฆา ปี โยว เบ, อี ปี ปี ดึอม ยึร เบ แคง มืง แอฆึบ ดอน โมยว, อี ตู นับ ดี หราย ดอ เหมา. 61 แดง ตี, อัน เฌา ดี แตห เบ คัม ดูก ดี เซา รอฆา ดอน โมยว, บอ ดูก อี ตาง กาเซา อี ตู มึห ดี แดม แคง บับ ดารา นี. อัน เฌา ดี แตห เบ คัม, แตห เบ กอ ลึร ชึม โตต. 62 เบ ปี บอ แฮะ กืน กอ ปี ซีมัณ แคง เบลณ มืร, เบ ยี ดี วี เปรต กาเซา โกบ ตู โทม เบ โฆรห เฌาพรา ปี กรึบ เบ. 63 เฌาพรา แฮะ โคย ดาคึย ดี เฆฌู เบ แตห เบ แบร กืน. ปาย ตี อัน เฌา ปี ดี วี โคย ดาคึย ดี วี ปยาต แวน เบ, โบง แตห เบ ลึร ชึม, ปี วี ดึห เลห เบ แคง มืง โดง ดี ฮาว กอย เบ ตี.

64 เฌาพรา ดี บอ แตห เบ กอย กาย็อห กาแต ดูอี ดอน โมยว, จูห โดง ซืด กาดาย อู บลาก, ปี วี ฌัม โดง ซืด กาดาย ปอ อู บลาก. เบ ดี บอ วี กรึบ เฌา อี มูห เฮ เฆ มาว, อี มูห เฌา ปี ตู ดึอม กรึบ เบ บอ ฆูณ ดัง เบ ดอ เหมา. 65 เบ อาว ฮู มึห ดอ โบยว ดอ ดาคึย ดอ เหมา. โดง ดี บึง มืร, เบ อาว ฮู มึห. เฌาพรา ดี โบง แตห น็อห เบ กาฮัวะ, แกวะ แตห เบ มึห ปี หน็อะ อึณด็อะ มาเซ, แตห เบ ยึร มี อี ดูก อี ซ็อง ดี น็อห เบ. 66 อาซาก เบ ดี มึห อาเพ อาเร เซเซ. เบ ดี บอ กาปึณ ดอน หมึร ดอน หณา, โยว มี ดี ยัม. 67 น็อห เบ ดี บอ โยว กาเซา ลอง แปะ แฮะ ยึร เบ. ดอ มูห เจว หณา, เบ ดี บอ กาปรา แตห แปร อับ. บา ดี อับ, เบ ดี วี กาปรา แตห แปร วัห. อึณ ดี บอ ปาย ตี ดอน หมึร ดอน หณา. 68 เฌาพรา ดี วี ดึห ตัห รึร ซังโพว, วี ตึย วีว เบ แคง มืง แอฆึบ โดง แฮะ ต็อห เฌาพรา, อัน ตู แตห เบ วี วีว ดอ เหมา. โดง ตี, เบ ดี บอ วี เหรต ดี ย็อง โดว เบ ดี รันซู เบ, แตห เบ แบน หมาย เฆ. อึณ ยี ตู มึห อี จึห เบ คอ อู วี.” อาโมวแซ แฮะ กาลาง แคะ ตี ลอง กาซัม ดืง เฌาพรา ดี เฆ.