1 ดอ อัน ตี อาโมวแซ บอ เฆ ดา ตาง ดูอี อีซาเรลัะ วี กาลาง ดี เฆ ดูอี กืน ต็อห, “แตห เบ โบง โดบ ดารา ปี ดัม อูน โอว ดี เบ อาตึร นี. 2 วาย แฮะ กาโลห เบ อึม แบลง ยอดาน, วี ลึบ ฮาว แคง มืง แปะ แฮะ อาบ เฌาพรา ดี เบ, แตห เบ ดึห มาว ตาง แบน โบ็ง แบน โบ็ง, วี อึณปราย พ็อห ทูน. 3 แตห เบ วี แดม โฆรห ดารา อัน เฌา ตี ดอน แด, ดึก ดี มาว เฆ ตี. อาว เหลณ เบ ดี กาโลห แบลง อึม ยอดาน ตึอน บอ ตัห กอย แคง มืง บอด, มืง หมึอม แปะ แฮะ ดึอม กาแซณ เฌาพรา ดี ดัว ดี เฆ ฆูณ ดัง เบ บอ ต็อห ดี ดัว ดี เบ. ปัน อัน ตี เบ โลว โบง ปาย ตี. 4 เซ เบ แฮะ ฮอต กาโลห ฌัม บลาก นา ดอย อึม แบลง ยอดาน, เบ โลว ดึห มาว ตี, วี ฮาว เบลห กาจ็อง แดง นอน เอบาน. แตห เบ โบง โดบ ปี กาลาง โอว ดี เบ อาตึร นี, วี อึณปราย พ็อห ทูน. 5 โดง ตี, เบ บอ โลว ดึห มาว, โบง กาโช็ง หลู ดี เฌาพรา ปี กรึบ เบ. เบ ยี ตู ปึอน ดึห ฮีน, ด็อห มาว ตี ดอ เหมา. 6 เซ เบ โบง กาโช็ง หลู อาดา เฌาพรา ปี กรึบ เบ ตี, เบ โลว ดึห มาว อี กอย แคง นา แคง มาน. เบ ตู ปึอน ดึห มาว แปะ แฮะ ด็อห แฮะ อึณปราย. แดง กาโช็ง หลู ฌึร ตี โลว หลู ปี ดี หลู อี โดะ ดี เงา ดี เฌาพรา ปี กรึบ เบ. 7 เบ โลว หลู บอ ปี ดี หลู อี กอย กาฌูะ โฮม รึม, แตห เบ โฮม โบยว โบยว เกยา เกยา ดี อาต เฌาพรา ปี กรึบ เบ. 8 โฆรห เฌาพรา ดอน แด, เบ โลว แดม แดง มาว แปะ แฮะ กาจ็อง แฮะ พ็อห เบ ทูน.”

9 แฮะ ฮอต กาลาง ปาย ตี อาโมวแซ เฆ ดา อี หลู ดี เฌาพรา อี มูห ดูอี อาเลวี, เฆ ปี วี กาลาง ดี ดูอี อีซาเรลัะ ปอ อึณ ปัว ต็อห, “อึย เบ ดูอี อีซาเรลัะ, แตห เบ กอย เยน เยน, บัร เบ โทม. อาตึร นี, เบ แฮะ แบน ดูอี ปี อึบ เฌาพรา ปี กรึบ เบ. 10 โคว, แตห เบ โทม โฆรห เฌาพรา อี อึบ เบ, แตห เบ บอ โบง โดบ ดารา อัน เฌา แปะ แฮะ กาลาง โอว ดี เบ อาตึร นี.”

11 ซีแง ตี, อาโมวแซ ปี วี ดัม อูน ดี เฆ ดูอี อีซาเรลัะ ต็อห,

12 “เซ เบ แฮะ ฮอต กาโลห อึม แบลง ยอดาน ตึอน, เฆ ครึร เบ มัง ครึร โลว โฮะ แดง นอน ฆีราเจม, ม็องการา ดัว ดี เฆ ดูอี กืน. อึณ บอ มูห ครึร อาซีเมโอน, ครึร อาเลวี, ครึร อายูดา, ครึร อาอีซาคา, ครึร อาโยว บอ ครึร อาเบนยาม. 13 เฆ ครึร ตี โลว กอย แดง นอน เอบาน บอ กาลาง โฆรห ดืง ดี เฆ ดูอี กืน. อึณ บอ มูห ครึร อารูเบน, ครึร อาฆัด, ครึร อาเซน, ครึร อาเฌบูโลน, ครึร อาดาน บอ ครึร อานาบทาลี.

14 เฆ ดูอี อาเลวี, เฆ โลว ดัด กาลาง โฆรห ตาง ดี เฆ ดูอี อีซาเรลัะ ต็อห,

15 ‘ดูอี อี โบง ดี กรึบ อารึบ ราง, บอ มูห ปี โบลห ปี ดอก, บอ มูห ปี โหลว ปี จึม, อัน โลว คัม โฆรห ดืง เฌาพรา. โคว, เฌาพรา กาอีห กาเซา อารึบ ราง ตี แปะ แฮะ โบง ดูอี อี แฮะ แหลว ดี โบง บอ เครียง อูน โดง ตู ลึห ดี อี.’ วาย อัน ตี แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

16 ‘ดูอี อี ตู โรวเซ ฆูณ มา อัน, อัน โลว คัม ปี ดืง เฌาพรา.’ วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

17 ‘ดูอี อี รึต กาโทะ หล็อก กาอูน กาดาย เฆ อี กอย กาเครียะ ดี อัน, อัน โลว คัม ปี ดืง เฌาพรา.’ ปาย ตี แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

18 ดูอี อี แยต ดูอี งาย อับ วัห อึณเตณ บอ กาลึบ อึณเตณ, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

19 ดูอี อี ซูงพยาด ตู หมาน ดี เฆ ดูอี อาโมยว เฮา บอ ดี ฆอน ซีปรัห เฆ ยา ซีปรัห, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

20 ดูอี อี วี ลูต อีบึณ ฆูณ อัน, โบง แตห ฆูณ อัน ชึม ซาเร, อัน โลว คัม ปี ดืง เฌาพรา.’ วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

21 ดูอี อี ลาย โดว ซัดดาวา บอ มูห โดว ซัด โมยว เหมา อาว ต็อห, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

22 ดูอี อี ลูต อีกัด อัน, ลูต วา อัน, บอ ฆอน นา ฆูณ บอ ฆอน นา มา, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

23 ดูอี อี วี ลูต ฆึณ อัน อี มูห มา อีบึณ อัน, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

24 ดูอี อี โบง แตห อี เฮา มึห เซา, อัน โลว คัม ปี ดืง เฌาพรา. วาย อัน ตี แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

25 ดูอี อี ฌาง ดี ง็อห ยัม ดูอี อี ตู มึห หมาบ, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’

26 ดูอี อี ตู โทม ตู โบง โดบ ดารา นี, อัน โลว คัม ปี ดืง เฌาพรา. วาย อัน ตี, แคะ กอย เฆ ดูอี บอกาเฆลียด โลว ต็อห, ‘แตห อึณ แบน ปาย ตี.’”