1 อาโมวแซ วี ต็อห, “วาย แฮะ ฮอต ฮาว กอย เบ แคง มืง ปี ดี อาบ เฌาพรา ดี เบ, เบ มืร แฮะ ฮอต อึบ มืง ตี, 2 เซ ปี ปีด ปี ซัม เบ แฮะ ฮอต เลห, เบ โลว ดึห เบล ดัง บอ กาโย็ง โหงว ปี โซะ เบ ดี อาต, ฮับ แคง คอน, วี ดึห ฮาว โดง ดี ร็อห อูน เฌาพรา แตห อึณ มูห โดง ดี กอย อัน, 3 วี ฮาว ตึย ดี เฆ ดา อี หลู ดี เฌาพรา. เบ บอ โลว กาลาง ดี อัน ต็อห, ‘อาตึร นี โอว แฮะ ตัห ตึย โกรว นี บอ กาลาง บยัะ, เฌาพรา ปี กรึบ แม, อัน แฮะ ฮอต แตห โอว ตัห ฌัม แคง มืง แปะ แฮะ ดัว เฌาพรา ดี เอ, แตห อึณ โดบ ปี ดึอม กาแซณ อัน เฌา ดี เฆ ฆูณ ดัง เอ.’ 4 ปัน ตี ดา อี หลู ดี เฌาพรา โลว ดึห คอน ตี, วี ฮาว อูน โคบ กาโช็ง หลู ดี เฌาพรา อี มูห เฌาพรา ปี กรึบ เบ. 5 แฮะ ฮอต ปาย ตี เบ โลว กาลาง ดี อาต เฌาพรา ปี กรึบ เบ ตี ต็อห, ‘ฆูณ ดัง โอว อี จืร อาโกบ อี มูห ดูอี อาโมยว อาราม แฮะ ฮาว วีว ฮาว เวณ แบน โปละ แบน โปละ. อัน แฮะ แยต ดูอี อึณโฮม อัน ฮาว ดี มืง แอฆึบ. ดอ อัน ตี เฆ ปี บอ แฮะ เปรต มืร, แคง มืง แอฆึบ เฆ ยี วี แบน ดูอี อาโมยว กืน, อาโมยว ตาง. 6 มาแล, เฆ ดูอี แอฆึบ แฮะ คาหนาบ เย, แตห เย โบง ฆาน อี หณาบ กาเซา. เย แฮะ คัม ดี แบน หมาย เฆ, แฮะ ดูก กาเซา ดี เย. 7 แฮะ ฮอต, เย บอ วี ซาคึร หมาณ ดี เฌาพรา ปี กรึบ ฆูณ ดัง เย, แตห อัน เฌา จอย เย. อัน เฌา บอ โทม โฆรห เย บอ ยอด อี ดูก อี หณาบ กาเซา ดี เย ตี. อัน เฌา มืร แฮะ นับ แคะ คาหนาบ อี ดี เย บอ แคะ คัม เย. 8 ดอ อัน ตี อัน เฌา มืร บยัะ อาพูง ดังโคว ตาง อัน บอ คยอด เลห เย แคง มืง แอฆึบ. อัน เฌา มืร แฮะ บยัะ อี หมึอม อาม กาเซา แบน โมยว แบน โมยว, โบง บอ อี หมึอม โยว กาเซา. 9 อัน เฌา วี แยต เย ตัห กอย ดี นี, วี กาเว เย, ดัว มืง อี บอด อี หมึอม นี ดี เย. 10 โกบ อึณ ปาย ตี ดอ ตี นี เย วี ดึห ตัห เบล ดัง บอ โหงว ปี โซะ เย ดี อาต อี แฮะ เลห แคง กาดาย แปะ แฮะ อาบ แม เฌาพรา ดี เย ตี.’ เบ แฮะ ฮอต กาลาง ปาย ตี เบ โลว วี ดึห คอน เบ ตึอน, เบลห ดี อาต เฌาพรา บอ วี กรึบ อัน เฌา ดี ตี. 11 แตห เบ วี อืบ มยูก อัน เฌา บอ ดาง ฆูง เฆฌู ดี อัน เฌา โกบ แฮะ ม็องการา ดัว อัน นา บอด นา หมึอม ดี เบ บอ ดี อึณโฮม เบ บอกาเฆลียด. แตห บอ ดูอี อาเลวี บอ ดูอี อาโมยว เฮา อี กอย กาแต เบ บอ โบยว ดาคึย โดบ เบ.

12 ฮี ฌัม ซีนัม ฮาโอย, อึณ แฮะ มูห ซีนัม ปี โลว หลู เบ ฆึร บูน อู บูน. เซ เบ แฮะ ฮอต เบต ปี ซัม ปี ปีด เบ อี แฮะ แบร แฮะ กืน, อาดา ฆึร บูน อู บูน เบ โลว วี ดึห เฮียง เฆ ดูอี อาเลวี บอ เฆ ดูอี อาโมยว เฮา บอ เฆ ฆอน ซีปรัห เฆ ยา ซีปรัห, แตห เฆ กอ ปึอน ดี โฮม แพ, โฮม ซีคยา แคง มืง เบ. 13 เซ เบ แฮะ ฮอต โบง ปาย ตี เบ โลว วี กาลาง ดี เฌาพรา ต็อห, ‘ปี ดี หลู ฆึร บูน อู บูน อี แฮะ ซีงา บอด นี, อาว ฮู มึห ดี ฆีด ดี กาโลย คอ อี แจก แคง กาง เย. เย แฮะ ดัว โตต ดี ดูอี อาเลวี, บอ ดี ดูอี อาโมยว เฮา บอ เฆ ฆอน ซีปรัห เฆ ยา ซีปรัห, แตห อึณ บอ โดบ แปะ แฮะ จัร แม เฌาพรา เย โบง. เย มืร ตู บลืง ตู ปีว ดารา ปี ดัม อูน แม เฌา คอ อู โมยว. 14 ดอ ดูก ดอ กลึร โอว, โอว มืร ดืน ตู ดึห ดี โฮม โกรว ตี. ดอ ตู ซีงา โอว, โอว มืร ตู ดึห เลห แคง อาตี คอ อี แจก. โอว มืร ตู ดึห ดัว ดี ดูอี ยัม. อึย แม เฌาพรา, โอว มืร แฮะ โทม โฆรห แม. โอว มืร แฮะ โบง โดบ ปี ดัม อูน แม ดี เย. 15 แม เฌา บอ กอย แคง ฆางหราว อี มูห โดง ซีงา บอด. แตห แม วี ยอด โลง ดูอี อีซาเรลัะ อี มูห ดูอี ปี ร็อห แม. แตห แม เฌา บอ ม็องการา ดัว ดี เย บอ ดี มืง บอด, มืง หมึอม แปะ แฮะ อาบ ดัว แม เฌา ดี เย. แตห อึณ โดบ แปะ แฮะ ดืง, แฮะ กาแซณ แม เฌา ดี ดัว ดี เฆ ฆูณ ดัง เย.’

16 อาตึร นี เฌาพรา ปี กรึบ เบ แฮะ ดัม อูน, แตห เบ โทม ดารา อัน บอ ปี ดัม อูน อัน เฌา โตต ดอน โมยว. ปาย ตี แตห เบ คัด น็อห คัด พึอม เบ, โบง โดบ ดารา อัน. 17 อาตึร นี, เบ แฮะ ฮอต โพรม ดี ต็อห, เฌาพรา แฮะ มูห เฌาพรา ปี กรึบ เบ. เบ มืร แฮะ ดัว กาดีก ซัดฌา ดี โทม โฆรห อัน เฌา บอ โบง โดบ ดารา อัน บอ โบง แคะ ปี ดัม ปี จัร อัน ดอน โมยว. 18 อาตึร นี, เฌาพรา มืร แฮะ ฮอต รับ เบ, กาลาง แตห เบ นับ, แตห เบ แบน ดูอี ปี อึบ อัน อาคาคัร. เบ ปี โกรว อัน อี แฮะ ง็อห ตาง, แตห อึณ บอ โดบ แปะ แฮะ ดึอม กาแซณ อัน เฌา ดี เบ. อัน เฌา มืร ดัม อูน ดี เบ, แตห เบ โบง โดบ ดารา อัน บอ โตต ดอน โมยว. 19 อัน เฌา ดี แตห เบ มึห ซาเร, มึห อาพูง ดังโคว หลึอม เฆ ดูอี เฮา แปะ แฮะ พาน เบลห อัน เฌา บอกาเฆลียด, แตห อี เฮา บอ อืบ เบ บอ โรวเซ เบ, แตห เบ แบน ดูอี อี ซีงา บอด อี โดบ มี ปี ดัม อูน เฌาพรา ปี กรึบ เบ, แตห อึณ ปี แปะ แฮะ ดึอม กาลาง อัน เฌา.”