อาโมวแซ ปี วี ต็อห, “เซ อีมาย นังฆัน ตู ลาย ซีเพา, แตห เฆ ฮาว ดี ดา ตาง อี ซูงพยาด ดารา. ดา ตาง ตี โลว ซูงพยาด อามู ตี. วี อี ตู ลูต, เฆ โลว เบลห. วี อี แฮะ ลูต, เฆ โลว ดัม หมาบ. 2 เซ วี อี แฮะ ลูต ตึอน แฮะ โลว คัม อี มัห อัน, ดา ตาง ตึอน โลว แตห อัน อีด กาตับ ดี กาดาย บอ แตห อี มัห อัน ดี อาต ดา ตาง ตี. อัน โลว คัม แคะ กาดาน หมาบ อัน. 3 เฆ ยี ตู ปึอน มัห แตห อึณ หลึอม พวน ฆึร อึณเพียะ. เซ ฮี กืน หลึอม ตี, โยว บีนอง เบ ตี ดี แบน ปี ลูกตาย เฆ ดูอี.

4 เบ ตู ปึอน ปัก โมต มามัก ดอ แณต อัน ดี โหงว.

5 เซ อึณ มึห เฆ อูกัด อูวา อี กอย รึม, เซ อู วี บอ ยัม อาต มึห อัน ฆอน, ยา ซีปรัห ตี ตู ปึอน วี คัด ดึห อี เฮา อี ตู มูห อูกัด อูวา อีมาย อัน ตึอน. อูกัด อูวา อีมาย อัน ตึอน โลว วี ดึห อัน, แตห เฆ โบง ปี โลว โบง ฆูณ อาน บอ ฆูณ แตะ ดี อัน. 6 เซ ฆอน ฆีณ ฆาย วี มูห ฆอน อีมาย, อัน โลว มาด แตห อึณ ปี ฆอน อูกัด อูวา อัน อี แฮะ ยัม ตึอน. เบ โลว โบง ปาย ตี แกวะ แตห จืร อีมาย ตี หราย กาแต เฆ ดูอี อีซาเรลัะ.

7 เซ อีมาย ตึอน ยี ตู อึง ยา ซีปรัห ตี, ยา ซีปรัห ตึอน โลว ฮาว กาลาง ดี เฆ ดา ตาง อี อึบ มืง ตี ต็อห, ‘อูกัด อูวา อีมาย โอว นี ตู มึห น็อห ซี แตห จืร อีมาย โอว มึห กาแต ดูอี อีซาเรลัะ. อัน ตู ซี โบง ปี โลว โบง อัน ดี โอว.’ 8 แฮะ ฮอต ปาย ตี ดา ตาง อี อึบ มืง ตึอน, เฆ โลว แดะ ดี ดีหมอด อีมาย ตี. เซ อัน ตู ซี โบง อาคาคัร ปี โลว โบง อัน ดี ยา ซีปรัห ตึอน, 9 ยา ซีปรัห ตึอน โลว ตัห กอย เครียะ อีมาย ตี ดี อาต เฆ ดา ตาง อึบ มืง. อัน โลว บูต เลห คูดีณ ดี เปลา อีมาย ตี อาดา อู บลาก, วี ปัต นา อีมาย ตี บอ กาลาง ต็อห, ‘ปาย นี อึณ กาอาบ โบง ดี ดูอี อี ตู คัม ดี โบง แตห อึณโฮม อีกัด อัน แบร กืน.’ 10 วาย ตี กาแต เฆ ดูอี อีซาเรลัะ แตห เฆ กาลาง ลอง อึณโฮม อีมาย ตี ต็อห, ‘อึณโฮม อี แฮะ คัม ดี บูต เลห คูดีณ.’

11 เซ อึณ มึห อีมาย อา วี แฮะ ลาย กาลูต, เซ อีบึณ อู วี วี ฮาว แคร อีมาย อัน, อัน บอ วี ตา ปา ลัะคานา อีมาย อี ตู มูห อีมาย อัน, 12 เบ ตู ปึอน กาเว อีบึณ วี ตี. เบ โลว แดบ แวน แด อัน.

13 แคง ฮู เบ, เบ ตู ปึอน มึห เบล ซัะ อา โมยว, อู โบ็ง จัน, อู โบ็ง อึณจึร. 14 แคง กาง เบ, เบ ตู ปึอน มึห แบล เฆ คอน อา โมยว, อู โบ็ง เตียะ อู โบ็ง ตาง. 15 เซ เบ จัร เบล ซัะ เฆ คอน อี มูห อี หมาน, อึณ แตห อาซาก เบ โต็ง บอ แตห เบ ปึอน ดี กอย เหลณ แคง มืง ปี ดี อาบ เฌาพรา ดี เบ. 16 โคว, เฌาพรา มืร กาอีห กาเซา เฆ อี โบง นา ตู หมาน บอ เฆ อี กาโลว ปาย ตี.

17 แตห เบ โหลห ลอง แปะ แฮะ โบง เฆ ดูอี อามาเลก ดี เบ ดอ กอย เบ โดบ อึณเตณ วาย แฮะ เลห เบ แคง มืง แอฆึบ ตึอน. 18 เฆ มืร ตู โยว ตู โรวเซ เฌาพรา. เฆ บอ แร อึณเตณ เบ บอ กาโฆห ดี ดูอี อี โดบ ดี ปัน อี แฮะ นูน แฮะ ดีหลัห กาเซา. 19 ปาย ตี เซ เฌาพรา แฮะ ฮอต อาบ มืง ตี ดี เบ, แฮะ แตห เบ ลอด อาเพ อาเร ดี รันซู เบ ดอน บลาก, แตห เบ ง็อห แวน โตต แคะ กอย ดูอี อามาเลก. แกวะ แตห อี เฮา วี นัมโหลห เฆ ดอ เหมา. ลอง อัน ตี แกวะ แตห เบ ปีว.”