อาโมวแซ ปี วี ต็อห, “เซ อึณ มึห อีมาย อู วี, อัน แฮะ ฮอต คัด ดึห อีบึณ, อัน ปี วี ซี แวน อีบึณ ตี โกบ แฮะ ยึร อัน อีบึณ ตี โบง อี ตู กาอาบ โบง, อัน แดม แปะ, ดัว ดี อีบึณ อัน ตี, แตห อีบึณ ตี เลห ฮาว ตัะ กาง อัน. 2 เซ อีบึณ ตี แฮะ ฮอต เลห ฮาว ตัะ กาง อีมาย อัน, ปี วี ฮาว ดึห อีมาย ปอ อู วี, 3 เซ อีมาย อัน วี ตี มืร ตู อึง อัน, ปี วี ซี แวน อัน, ปี วี แดม แปะ ดัว ดี อัน, แตห อี นับ ฆาย แฮะ ลาย แวน กาดัด. เซ อาว ปาย ตี อีมาย อัน ตี ดี บอ ยัม, 4 อีมาย บรีม อัน ตึอน อาว ปึอน วี ดึห วีว อัน วาย อีมาย ปอ วี แฮะ ฮอต ลาย อีบึณ ตี. เฌาพรา ปี กรึบ เบ บอ กาอีห กาเซา อามู ฌึร ตี. แกวะ แตห เบ โบง แตห อึณ แบน หมาบ แคง มืง ปี ดี อาบ ดัว เฌาพรา ดี เบ, อี ดี แบน คาฆูน เบ ตึอน.

5 เซ อึณ มึห อีมาย อี ซีลอะ คัด กามาย, เบ แกวะ แตห อัน ฮาว กาโฆห บอ โบง ฆาน มืง. แตห เบ แตห อัน กอย ดี กาง อัน อาดา อู ซีนัม, แตห อึณ โบยว ดาคึย ดี น็อห อัน บอ ดี อีบึณ อัน ตี.

6 เซ เบ บอ ดัว อี เฮา การ็อห กาวาย ดี เบ, เบ แกวะ แตห อัน กัม มาว กรีด โหงว อัน ดี เบ บอ มูห อา โบ็ง บอ มูห มี โบ็ง นา แดง, อาว ปึอน ดึห. เซ เบ ดึห มาว กรีด โหงว ตี, อึณ ปี เบ แตห อัน กัม อาซาก อัน ดี เบ.

7 เซ เบ ยึร ดูอี อู วี อี แฮะ ปรา ดี เหมต ดูอี อีซาเรลัะ, แตห ดูอี ตี แบน หมาย อัน, เซ อัน บอ ย็อง วี ตี ดี อี เฮา, ดูอี อี ปรา ตี, เบ โลว ง็อห แวน. เซ เบ โบง ปาย ตี อึณ ปี เบ ดึห แวน หมาบ กาแต เบ.

8 เซ เบ มึห เซา ดูะ อี นับ ดี ดึก ดี อี เฮา, แตห เบ ซาดีก. เบ โลว โบง โตต ดอน โมยว แคะ ปี กาลาง เฆ ดา อี หลู ดี เฌาพรา ดี เบ อี มูห ดูอี อาเลวี. แตห เบ บอ โบง โดบ ซีคยา แคะ ปี กาลาง โอว ดี เฆ ดอน โมยว. 9 แตห เบ โหลห แปะ แฮะ โบง เฌาพรา ปี กรึบ เบ ดี นาง มีรียัม ดอ เลห เบ แคง มืง แอฆึบ ดอ ฮาว เบ โดบ อึณเตณ ตึอน.

10 เซ เบ ดัว อี เฮา การ็อห กาวาย ดี เบ มัง โมยว, แกวะ ลึบ ฮาว แคง กาง อัน, ดึห โกรวกราม อัน อี แบน โกรว กัม โกรว งาม อัน ดี เบ. 11 เบ โลว กอย บัร นา เรต กาง, แตห อัน ดึห เลห โกรว ปี ดี กัม ปี ดี งาม อัน ดัว ดี เบ. 12 เซ ดูอี ตี มูห ดูอี ฆีน ดูอี พลาน, แกวะ แตห เบ ดึห อูน ฮึบ เฆ ครึง ตา ปี กัม อัน ตี, แตห อึณ กาโลห หมึร. 13 เซ ซีแง ฮี เฆต, แตห เบ ดัว วีว ดี อัน ดอน ซีแง, แตห อัน มึห ดี ชึบ, มึห ดี ปลึก ดอ อีด อัน. เซ เบ โบง ปาย ตี อัน ดี วี มึห น็อห ซี ดาง ฆูง เฆฌู ดี เบ, แตห อึณ ล็อะ บอ น็อห เฌาพรา ปี กรึบ เบ.

14 เซ อึณ มึห ดูอี ฆีน, ดูอี พลาน อี ตู มึห มาเซ, ตัห ฌาง ดี เบ, บอ มูห ดูอี อีซาเรลัะ, บอ มูห ดูอี อาโมยว เฮา อี กอย กาแต เบ, เบ ตู ปึอน กาโลว อัน. 15 แตห เบ ดัว รูห รัณ อัน ซีณ อาต เฆต ซีแง. โกบ แฮะ ฆีน กาเซา อัน, อัน แฮะ ฮอต โลว ฌาย รึอน ตี. เซ อาว ปาย ตี โยว อัน วี ซาคึร เฌาพรา, แตห อึณ แบน หมาบ ดี เบ.

16 เบ ตู ปึอน ง็อห ยัม ฆูณ กาดาง ฆอน อัน. ฆอน ตู ปึอน ยัม กาดาง ฆูณ. ดูอี ดอน อี โลว ยัม กาดาง หมาบ อาเซ หมาบ อัน. 17 ดอ มึห เบ อามู, เบ โลว ซูงพยาด แตห อึณ โดบ ดารา บอ ดี ดูอี อาโมยว เฮา บอ เฆ ฆอน ซีปรัห. เบ ตู ปึอน ดึห ครึง ตา ปี ตัห กัม ตัห งาม ยา ซีปรัห. 18 แตห เบ โหลห ดอ แฮะ แบน เบ หมาย อี เฮา แคง มืง แอฆึบ ตึอน. เฌาพรา ปี กรึบ เบ ยี แฮะ ทูด เลห เบ. โกบ อึณ ปาย ตี โอว ดัม อูน เบ ปาย นี.

19 ดอ แฮะ ฮอต โซะ เบ โหงว, เซ เบ ปีว ดี ดึห ซีบัยะ โหงว มัง ซีบัยะ, อาว ฮู โลว วี ฮาว ดึห. แตห เบ อูน ปาย ตี แตห เฆ ดูอี อาโมยว เฮา บอ เฆ ฆอน ซีปรัห, เฆ ยา ซีปรัห ตัห แฆบ ดี เฆ. ปาย ตี แตห เฌาพรา วี ปึอน ดี ม็องการา ดัว ฆาน ปี โบง เบ ดอน โมยว. 20 เซ เบ แฮะ ฮอต มัห โจห เบล นามัน เบ อาดา อู เฌณ, อาว ฮู โลว วี ฮาว มัห ปอ อู เฌณ. แตห เบ อูน อาดา เฆ ดูอี อาโมยว เฮา บอ อาดา เฆ ฆอน ซีปรัห เฆ ยา ซีปรัห. 21 เซ เบ แฮะ ฮอต เบต เบล มางูน เบ อาดา อู เฌณ, อาว ฮู โลว วี ฮาว เบต ปอ อู เฌณ. แตห เบ แตห เฆ ดูอี อาโมยว เฮา บอ เฆ ฆอน ซีปรัห เฆ ยา ซีปรัห แฆบ. 22 แกวะ แตห เบ ปีว ดอ แฮะ ดึอม แบน เบ หมาย แคง มืง แอฆึบ ตึอน. โกบ อึณ ปาย ตี โอว ดัม อูน ดารา นี ดี เบ.”