1 วาย แฮะ ฮอต ยัม อาโยวซูอา, เฆ ดูอี อีซาเรลัะ วี ดีหมอด เฌาพรา ต็อห, “แคง ครึร แดเจณ แม เฌา นี, ครึร เหมา อี ดี ปึอน ดี กาโฆห ดี ดูอี กานัณ ดี อาต ครึร เฮา?”

2 เฌาพรา วี ต็อห ดี เฆ, “ครึร อายูดา อี โลว แยต ดี อาต ครึร เฮา. โอว แฮะ ฮอต อาบ กาดาย มืง ตี ดี เฆ.”

3 ปาย ตี เฆ ดูอี อายูดา วี กาลาง ดี เฆ ดูอี ครึร อาซีเมโอน อี มูห บีนอง เฆ ต็อห, “แตห เบ ฮาว โดบ เย, แตห เอ โฮะ ดี กาดาย มืง แปะ แฮะ ป็อก เฌาพรา ดี ดัว ดี เย. แตห เย กาโฆห ดี ดูอี กานัณ. แฮะ ฮอต, เย ปี ดี วี ฮาว รึม โดบ เบ, ฮาว ดี มืง แปะ แฮะ ป็อก เฌาพรา ดี ดัว ดี เบ.” ปาย ตี เฆ ดูอี อาซีเมโอน บอ ดูอี อายูดา บอ กาโดบ ฮาว.

4 ดอ ฮาว กาโฆห เฆ, เฌาพรา มืร แตห เฆ แป ดูอี อาโมยว กานัณ บอ ดูอี อาโมยว เพเรซีด. เฆ บอ ง็อห ดูอี ตี อู หมึณ วี ดี มืง เบจีก ตึอน. 5 ดี ตี เฆ บอ กาตูณ คูนดีคัม อาตอนีเพเรซีก บอ กาโฆห ดี อัน. 6 อัน ปี บอ แฮะ เตา เฆ มืร, เฆ ยี แนะ คูงครัห โดบ ดี เหมต อัน. เฆ แฮะ ฮอต เหมต อัน, เฆ บอ แดบ แวน กานู มา แด บอ กานู มา เปลา อัน.

7 คูนดีคัม อาตอนีเบจีก วี ต็อห, “คูนดีคัม บู ฆึร วี โอว แฮะ กาดูห ดี แดบ แวน กานู มา เปลา บอ กานู มา แด เฆ. เฆ บอ กาดูห ดี ทอน ดี โฮม โบม บรัด อี โจห ดี มาตีณ โอว. แคะ ปี โบง โอว ตี, เฌาพรา แฮะ วี แตห โอว คัม ดอ ตี นี.” ปาย ตี เฆ บอ ดึห ฮาว อัน ดี มืง เยรูซาแลม. อัน บอ ฮาว ยัม ดี ตี.

8 เฆ ดูอี อายูดา แฮะ กาโฆห ปึอน มืง เยรูซาแลม. เฆ บอ ง็อห ยัม ดูอี บอ ดึห เงา โดะ กาซึม มืง ตาง ตี.

9 วาย อัน ตี เฆ ปี วี กาโฆห ดี ดูอี กานัณ อี กอย ดี กาแต นอน บอ ดี ดัง นอน. เฆ กาโฆห บอ ดี เฆ อี กอย บลาก นา เตต. 10 เฆ วี ฮาว กาโฆห ดี ดูอี กานัณ อี กอย ดี มืง เฮโบรว อี จืร บอ มืง กีรียาดอาบา. เฆ บอ กาโฆห บอ ปยาต เฆ ดูอี อาเซมเซ, อาฮีมาน บอ อาตาลาม.

11 แฮะ ฮอต, เฆ ปี วี เลห ดี ตี, ปี วี ต็อห ดี ฮาว กาโฆห ดี มืง ตาง เดบีรา อี แฮะ ดึอม จืร กีรียาดซอพา. 12 ดอ อัน ตี อาฆาลีบ วี ต็อห, “โอว ดี ดึห ฆอน ดีบยา โอว อี จืร นาง เอซอ, อาบ ดัว ดี วี อี กาโฆห ปึอน มืง กีรียาดซอพา.” 13 อึณ ยี มูห อาออซันเยลา อี มูห ฆอน อาเคนาด อี มูห วา อาฆาลีบ ตึอน. อัน บอ กาโฆห ปึอน มืง ตาง ตี. อาฆาลีบ บอ อาบ ฆอน ดีบยา อัน อี จืร นาง เอซอ ตึอน ดี อัน.

14 อู ซีแง อาออซันเยลา บอ กาซูห อีบึณ อัน, แตห อัน หมาณ กาดาย ดี ฆูณ อัน. อีบึณ อัน ตี บอ ฮาว อู เฌณ. ดอ เลห อัน แดง กาตูะ มาลา อัน, อาฆาลีบ บอ ดีหมอด อัน ต็อห, “มาเซ ปี ซี ปึอน แม?”

15 อัน วี ต็อห, “โอว หมาณ, แตห แม ดัว คอซอง คอ อู โมยว ดี โอว. กาดาย แปะ แฮะ ดัว แม ฆูณ ดี โอว ตึอน อี กอย นา เตต, อึณ มูห โดง กาฮ็อห กาเซา. โอว หมาณ, แตห แม ดัว บอ โดง มึห อึม โตห ดี โอว.” ปาย ตี อาฆาลีบ บอ ดัว กาดาย ดี อัน อี มึห อึม โตห, อี กอย บลาก นา เตต บอ นา กัว.

16 เฆ หลูกหลาน อากีนี อี มูห บึร อาโมวแซ ตึอน, เฆ บอ เลห ดี มืง เยรีโคว อี จืร บอ มืง เฮ จึก, วี ฮาว รึม โดบ เฆ ดูอี อายูดา, ฮาว ดี กาดาย มืง ยูดา บลาก นา เตต บอ กาตัด มืง อาราด. เฆ บอ กอย รึม โดบ เฆ ดูอี อี กอย แคง แปร กาฮ็อห ตี.

17 วาย อัน ตี เฆ ดูอี อายูดา ปี วี ฮาว รึม โดบ เฆ ดูอี อาซีเมโอน อี มูห บีนอง วอแว เฆ. เฆ บอ กาโฆห บอ แป ดูอี กานัณ อี กอย ดี มืง เจพาด. เฆ บอ ปยาต แวน โตต มืง เฆ ตี. มืง ตี เฆ บอ ต็อห แตห อึณ จืร มืง ฮอมัะ. 18 เฆ ดูอี อายูดา บอ กาโฆห ปึอน มืง ฆาซา, มืง อาซาเคโลน บอ กาดาย อี กอย เรต มืง เฆ ตี.

19 เฌาพรา บอ กอย รึม โดบ เฆ ดูอี อายูดา. เฆ ปึอน มืง อี กอย กาแต นอน บอกาเฆลียด. มาแล, เฆ ยี ตู โฮว เตา ดูอี อี กอย แคง ฆลัง เฆ ตึอน, แตห เฆ เลห โตต. โคว, ดูอี เฆ ตี มึห ลักเลา ฮีน. 20 ปาย ตี เฆ บอ อาบ มืง เฮโบรว ตึอน ดี อาฆาลีบ, แตห อึณ โดบ ปี ดึอม กาลาง อูน อาโมวแซ. อาฆาลีบ บอ โฮว เตา เฆ ฆอน อานาก โอย วี. 21 เฆ ดูอี อาเบนยาม ยี ตู แป ดี โฮว เตา ดูอี เยบูซีด อี กอย แคง มืง เยรูซาแลม. เฆ ดูอี เยบูซีด บอ กอย รึม โดบ ดูอี อาเบนยาม กอ ฌัม ดอ ตี นี.

22 วาย อัน ตี เฆ ดูอี ครึร อาโยว วี ฮาว กาโฆห ดี มืง เบดาเอน. เฌาพรา มืร จอย เฆ. 23 เฆ บอ จัร ดูอี ฮาว คยอง ดี ยอด แคง มืง เบดาเอน ตี. มืง ตี, อาต นี อึณ จืร มืง ลูซา. 24 ดอ ฮาว คยอง ดูอี เฆ ตึอน, เฆ บอ กาตูณ ดูอี อู วี เลห ตัห แคง มืง ตี. เฆ บอ ต็อห ดี อัน, “แตห แม กาลาง แหน อึณเตณ ดี ปึอน ลึบ เย แคง มืง นี. เย ดี แตห แม ฆยามซา.” 25 ดูอี วี ตี แฮะ ฮอต กาลาง แหน อึณเตณ ดี ลึบ มืง ตี ดี เฆ, ดูอี ครึร อาโยว บอ กาโฆห บอ ง็อห ยัม โตต ดูอี แคง มืง ตี บอ มืง. เฆ บอ อูน มี ดูอี วี ตึอน บอ ดูอี แคง อึณโฮม อัน, แตห เฆ ลอด. 26 ดูอี วี ตึอน บอ ฮาว ดี กาดาย โดง กอย เฆ ดูอี เฮทีด. ดี ตี เฆ บอ แด มืง บอ แตห มืง ตี จืร มืง ลูซา. จืร ตี เฆ บอ ต็อห กอ ฌัม ดอ ตี นี.

27 เฆ ดูอี ครึร อามานาเซ ยี ตู โฮว เตา เฆ ดูอี อี กอย แคง มืง เบดแซอัน, มืง ทานัก, มืง ดอรา, มืง อีปาลัม, มืง มีกีตอ บอ เรา อี กอย เรต มืง เฆ ตี. เฆ ดูอี อาโมยว กานัณ ตู โฆม ตู โยม เฆ บอ กอย ฮาว ปาย ตี. 28 เฆ ดูอี อีซาเรลัะ ยี แกร ดี มึห แฮณ. ดอ อัน ตี เฆ บอ กาหนาบ ดูอี, แตห เฆ แบน หมาย ปี ซูต ปี จัร เฆ. เฆ ยี ตู โฮว เตา ดูอี เฆ ตี โดง กอย เฆ. 29 เฆ ดูอี ครึร อาเอพารีม มืร ตู โฮว เตา ดูอี กานัณ เลห โดง กอย เฆ แคง มืง เกจา. ดูอี เฆ ตี บอ กอย ฮาว โดบ ดูอี อีซาเรลัะ ปาย ตี. 30 เฆ ดูอี ครึร อาเฌบูโลน มืร ตู โฮว เลห เตา ดูอี แคง มืง กีตารูน บอ แคง มืง นาฮาโลวลา. โคว อัน ตี ดูอี อาโมยว กานัณ บอ กอย ฮาว โดบ เฆ ดูอี อีซาเรลัะ บอ คัม ดี แบน หมาย ปี ซูต ปี จัร เฆ. 31 ดูอี ครึร อาเซน มืร ตู โฮว เตา ดูอี อี กอย แคง มืง อาโคว, มืง ซีโดน, มืง อาลับ, มืง อาคาจีบ, มืง เฮลาบา, มืง อาแพก บอ แคง มืง เรโฮบ, แตห เฆ เลห โดง กอย เฆ. 32 โกบ อึณ ปาย ตี บอ เฆ ดูอี ครึร อาเซน กอย รึม โดบ ดูอี อาโมยว กานัณ, ตู โฮว แตห เฆ เตา. 33 เฆ ดูอี ครึร อานาบทาลี มืร ตู โฮว เตา ดูอี แคง มืง เบดซานาด, แตห เฆ เลห เตา. เฆ ดูอี อานาบทาลี บอ กอย รึม โดบ ดูอี อาโมยว กานัณ ตี, ยี คาหนาบ เฆ, จัร เฆ แบน หมาย เฆ. 34 เฆ ดูอี อาโมวรีด บอ กาโฆห ดี ดูอี ครึร อาดาน บอ แตห เฆ กอย ดี นอน, ตู แตห เฆ กอย อี ครึม ดี โดง ฆลัง. 35 ดูอี อาโมวรีด เฆ ตี ดืน ตู เตา. เฆ ต็อห ดี กอย ดี มืง อาจาลูน, มืง ซาบาบีม บอ ดี นอน เฮรีด. มาแล, เฆ ดูอี อาเอพารีม บอ ดูอี ครึร อามานาเซ แกร ดี มึห แฮณ. ปัน ตี เฆ บอ คาหนาบ ดูอี เฮา เฆ ตี, จัร เฆ โบง ฆาน จัน. 36 กาอูน กาดาย มืง ดูอี อาโมวรีด, อึณ บอ จูห ดี นา กัว มืง ซีลัะ บอ กาโลห โฮะ ดี อึณเตณ กาแต นอน อาการีมบีง.^a