1 อามู อามาด เฌาพรา อู กาดัง บอ เลห ดี มืง ฆีลัะฆา ฮาว ดี มืง ปอเคม. อัน บอ กาลาง ดี เฆ ดูอี อีซาเรลัะ ต็อห, “โอว แฮะ ดึห เลห เบ แคง มืง แอฆึบ, ปี วี ตึย เบ ฮาว ดี มืง แปะ แฮะ ดัว โอว กาดีก ซัดฌา ดี ฆูณ ดัง เบ. โอว มืร แฮะ ต็อห, ‘โอว ตู ปยาต แวน เบ บอ แปะ แฮะ ลาย กาแซณ โอว ดอ เหมา. 2 เบ มืร ตู ปึอน ลาย กาแซณ คอ อู โมยว ดี ดูอี เฆ นี. เบ โลว ปยาต แวน กาโช็ง หลู เฆ ดี เฌา ปี กรึบ เฆ.’ มาแล, เบ ยี ตู โบง โดบ ปี กาลาง อูน โอว ตี. เหมา อึณ ปาย ปี โบง เบ ปาย ตี? 3 ดอ ตี นี โอว ดี วี ต็อห ดี เบ, ‘คา นี ฮาว โอว อาว ฮู โฮว เตา เฆ ดี อาต เบ. เฆ ดี แยต เบ, แตห เบ โบง กาลึบ, แตห อึณ ปี ดีค็อง อี ซัด เบรต เบ. เฌา ปี กรึบ เฆ มืร ดี บอ ปี ยอต เฆ คืม ดี เบ.’”

4 อามู อามาด เฌาพรา แฮะ ฮอต กาลาง ดี เฆ ปาย ตี แคะ กอย เฆ ดูอี อีซาเรลัะ บอ กาโพรม ดี ยาม ดัด อู เฌณ. 5 โดง ตี, เฆ บอ แตห อึณ จืร ปอเคม. เฆ บอ หลู ปี ดี หลู ดี เฌาพรา.

6 ดอ อัน ตี อาโยวซูอา บอ เบลห แตห เฆ ดูอี อีซาเรลัะ เวณ. เฆ บอ เวณ โดง กอย กาดาย คาฆูน เฆ วี เหมา วี อัน, แตห เฆ บึง โดง ตี. 7 ดอ มูห โจว บาน อาโยวซูอา ตี, เฆ ดูอี อีซาเรลัะ แฮะ โดบ ซีคยา เฌาพรา. วาย แฮะ ฮอต ยัม อัน มืร, ดอ ซี อีม เฆ ดา ตาง อี แฮะ ยึร อี หมึอม อาม กาเซา แปะ แฮะ โบง เฌาพรา ดี ดูอี อีซาเรลัะ, เฆ ซี โดบ ซีคยา เฌาพรา.

8 วาย อัน ตี อาโยวซูอา อี มูห ฆอน อานูน ตึอน บอ ยัม. อัน บอ มูห แดเจณ เฌาพรา. ดอ ยัม อัน, อาซาก อัน แฮะ ปึอน อู มาย็อห ดี ฆึร ซีนัม. 9 เฆ บอ ฮาว ดีบ โดว โบ็ง อัน แคง กาดาย อี มูห คาฆูน อัน อี กอย ดี โดง จืร ทีมานาเฮรีด กาแต นอน อาเอพารีม อี กอย นา กัว นอน กาอาด.

10 โจว ดูอี บาน ตี, เฆ แฮะ ฮอต ยัม โตต. เฆ อี วี ฆึอด ตัห กามาย, เฆ อาว ฮู วี นับ เฌาพรา. เฆ อาว ฮู นับ แปะ แฮะ โบง เฌาพรา อาดา ดูอี อีซาเรลัะ.

11 ดอ อัน ตี เฆ ดูอี อีซาเรลัะ บอ วี โบง อี ตู หมึอม ปี ตู อึง เฌาพรา. เฆ บอ วี กรึบ เฌา บาลัะ. 12 เฆ แวน เฌาพรา ปี กรึบ ฆูณ ดัง เฆ อี มูห เฌาพรา อี แฮะ คยอด เลห เฆ แคง มืง แอฆึบ ตึอน. เฆ บอ วี กรึบ เฌา ปอ กาดัง อี มูห เฌา ปี กรึบ ดูอี เฮา อี กอย รึม โดบ เฆ ตี. เฆ วี โฆม ฆึบ กรึบ เฌา เฆ ตี, โบง แตห เฌาพรา รู กาเซา ดี เฆ. 13 เฆ อาว ฮู วี กรึบ เฌาพรา, เฆ บอ วี กรึบ เฌา บาลัะ บอ นาง กานัม เอซาทารีด. 14 ปาย ตี เฌาพรา บอ รู กาเซา ดี เฆ ดูอี อีซาเรลัะ. อัน บอ แตห ดูอี ฮาย ดูอี มืก ตัห พาด ดึห ฮาว โกรวกราม เฆ. เฌาพรา บอ แตห รันซู อึบ เฆ, แกวะ แตห เฆ ซี ปึอน กาแคณ ดี รันซู เฆ. 15 เซ เฆ เลห กาโฆห ดี อี เฮา, เฌาพรา แตห เฆ ชึม ดอน เฌณ, แตห อึณ บอ โดบ แปะ แฮะ ดึอม ดืง อูน เฌาพรา. ปาย ตี เฆ กอ คัม ดูก กาเซา.

16 ดอ อัน ตี เฌาพรา วี แตห อึณ มึห ดา ตาง อี ซูงพยาด ดารา ดี เฆ. แตห เฆ จอย, แตห เฆ ดูอี อีซาเรลัะ ปึอน ดี ลอด ดี ดูอี ฮาย ดูอี มืก อี พาด ดึห โกรวกราม เฆ. 17 ปี บอ แฮะ ปาย ตี มืร, เฆ ตู โทม โฆรห เฆ ดา ตาง อี ซูงพยาด ดารา ตี. เฆ วี กรึบ เฌา ปอ กาดัง. โจว ฆูณ ดัง เฆ ปี บอ แฮะ โบง โดบ ดารา เฌาพรา มืร, โจว เฆ ดูอี ดอ อัน ตี เฆ ยี แวน เฌาพรา ครัน ครัน, ตู โบง แปะ แฮะ โบง ฆูณ ดัง เฆ บอ ตู โทม ดารา เฌาพรา. 18 ดอ เหมา อาว ต็อห, เซ เฌาพรา ฮี แตห อึณ มึห ดา ตาง อี ซูงพยาด ดารา ดี เฆ, เฌาพรา บอ กอย รึม โดบ ดา ตาง เฆ ตี บอ คยอด เฆ, แตห เฆ ลอด ดี รันซู เฆ, แตห อึณ กอ โนะ โจว ดา ตาง เฆ ตี. โคว, เฌาพรา บอ วี กาเว เฆ โกบ แฮะ คัม เฆ ปี คาหนาบ อี เฮา. 19 มาแล, วาย แฮะ ยัม เฆ ดา ตาง อี ซูงพยาด ดารา ตี มืร, เฆ ดูอี กืน ปี วี โบง ปี บรีม, บอ วี ฮาย หลึอม โจว ดา ดา เฆ ตี. เฆ บอ วี กรึบ เฌา ปอ กาดัง บอ ตู แวน อี ตู บอด ตู หมึอม ปี ดึอม โบง เฆ.

20 โกบ อึณ ปาย ตี เฌาพรา บอ รู กาเซา ดี เฆ ดูอี อีซาเรลัะ. อัน ต็อห, “ดูอี เฆ นี แฮะ ปยาต แวน กาดีก ซัดฌา แปะ แฮะ โบง โอว บอ ฆูณ ดัง เฆ. เฆ มืร ตู โทม โฆรห โอว. 21 โอว มืร อาว ฮู โฮว เตา ดูอี อี ซี ฆืด แคง มืง เบ นี วาย แฮะ ยัม อาโยวซูอา. 22 โอว ดี แตห ดูอี อาโมยว เฆ ตี กาซูห เฆ ดูอี อีซาเรลัะ โบง หมาบ, แตห โอว นับ โยว เฆ ดี โบง ตู โบง โดบ ปี กาลาง โอว, โยว เฆ ดี โบง ปี แปะ แฮะ ดึอม โบง ฆูณ ดัง เฆ ดอ มึอน.” 23 ปาย ตี เฌาพรา บอ แตห ดูอี อาโมยว เฮา เฆ ตี กอย แคง มืง ตี. อัน เฌา มืร ตู โฮว เตา เฆ อู เฌณ. อัน ตู อาบ เฆ ดี อาโยวซูอา ดอ ซี กอย อัน.