1 เฌาพรา อูน ดูอี อาโมยว เฮา มัง โมยว, แตห เฆ ฆีด, แตห เฆ กอย. อัน แตห เฆ แบน อี ดี เทว ดี ยอด เฆ ดูอี อีซาเรลัะ อี หณัม ดึอม กาโฆห ดอ ปึอน เฆ มืง กานัณ. 2 อัน เฌา โบง ปาย ตี แตห อึณ มาโนว เฆ ดูอี อีซาเรลัะ ดอน โจว ดอน บาน, แตห เฆ อี หณัม ดึอม กาโฆห นับ ปี ดี ปาย ดี กาโฆห. 3 เฆ ดูอี อี ซี ฆีด แคง มืง ตี บอ มูห คูนดีคัม ดูอี พีลีที พัน กาดัง บอ ดูอี อาโมยว กานัณ, อาโมยว ซีโดน บอ อาโมยว ฮีวีด. เฆ กอย ดี กาแต นอน เลบานูน จูห ดี บาลัะเฮราโมน กอ วี ฌัม ดี บาง อึณเตณ อี ฮาว ดี มืง เลโบวฮามาด. 4 ดูอี เฆ ตี, เฆ ดี กาซูห ดูอี อีซาเรลัะ, แตห อึณ ลึห ซีคยา โยว เฆ โบง โดบ ตู โบง โดบ ดารา เฌาพรา แปะ แฮะ ดึอม กาลาง อูน อาโมวแซ ดี ฆูณ ดัง เฆ.

5 ปาย ตี เฆ ดูอี อีซาเรลัะ บอ กอย รึม โดบ ดูอี อาโมยว กานัณ, อาโมยว เฮทีด, อาโมวรีด, ดูอี เพเรซีด, ดูอี อาโมยว ฮีวีด บอ ดูอี อาโมยว เยบูซีด. 6 เฆ บอ ดึห ฆอน อีบึณ ดูอี อาโมยว เฮา ตี, แตห อึณ แบน อีบึณ เฆ, ปี วี ดึห ฆอน ดีบยา เฆ วี อาบ แตห ฆอน อีมาย ดูอี อาโมยว เฮา ตี วี ดึห. เฆ บอ กรึบ เฌา ปี กรึบ ดูอี เฮา ตี.

7 เฆ ดูอี อีซาเรลัะ แฮะ ปีว เฌาพรา ปี กรึบ เฆ. เฆ วี โบง อี ตู หมึอม, อี ตู ล็อะ น็อห เฌาพรา. เฆ วี กรึบ อารึบ เฌา บาลัะ บอ เฆ อารึบ นาง กานัม เอซูรา. 8 โกบ อึณ ปาย ตี เฌาพรา บอ รู กาเซา ดี เฆ ดูอี อีซาเรลัะ. อัน เฌา บอ แตห คูนดีคัม อากูซันรีมีลีม อี อึบ มืง อารามนาราฮัม กาโฆห แป เฆ. คูนดีคัม ตี บอ อึบ เฆ อาดา ดา ซีนัม. 9 ดอ อัน ตี เฆ ดูอี อีซาเรลัะ บอ วี ซาคึร แดะ เฌาพรา. เฌาพรา บอ จัร ดูอี อู วี, ฮาว จอย เฆ, แตห อัน คยอด เฆ. ดูอี วี ตี มูห อาออซันเยลา. อัน มูห ฆอน อาเคนาด อี มูห วา อาฆาลีบ ตึอน. 10 น็อห พึอม เฌาพรา บอ กอย รึม โดบ อัน, แตห อัน แบน ดา ตาง อี ซูงพยาด ดารา ดี เฆ ดูอี อีซาเรลัะ. อัน บอ แรน ดา ซึก อัน. เฌาพรา บอ แตห อัน ออง แป คูนดีคัม อาคูซัน รีมีลีม อี อึบ มืง อารามนาฮาราจีม ตึอน. 11 ปาย ตี มืง บอ มืง บอ วี เยน ดาคึย อาดา พวน ฆึร ซีนัม. แฮะ ฮอต ปาย ตี อาออซันเยลา อี มูห ฆอน อาเคนาด บอ ยัม.

12 วาย อัน ตี, เฆ ดูอี อีซาเรลัะ ปี วี โบง อี ตู หมึอม อี ตู ล็อะ น็อห เฌาพรา ปอ อึณ ปัว. ปาย ตี เฌาพรา บอ แตห ปวน ดี คูนดีคัม อาเอกาลอน อี อึบ มืง โมวอาบ, แตห อัน อึบ เฆ ดูอี อีซาเรลัะ. 13 คูนดีคัม ตี บอ ลาย โพรม รึม ดี ดูอี อัมโมน บอ ดูอี อามาเลก, แตห เฆ กาโฆห แป ดูอี อีซาเรลัะ. เฆ บอ ปึอน มืง อี จืร มืง เฮ จึก. 14 เฆ ดูอี อีซาเรลัะ บอ กาดูห ดี แบน หมาย คูนดีคัม อาเอกาลอน ตี อาดา ฆึร ดี ดา ซีนัม.

15 ปาย ตี เฆ ดูอี อีซาเรลัะ วี ยาม แดะ เฌาพรา. เฌาพรา บอ จัร ดูอี อู วี แตห อัน ฮาว คยอด เฆ, แตห เฆ ลอด. ดูอี วี ตี, อัน จืร อาเอฮูด. อัน มูห ดูอี จัร แด ฆัะ. อัน บอ มูห ฆอน อาฆีรา อี มูห ครึร อาเบนยาม. เฆ ดูอี อีซาเรลัะ บอ ดัว อัน โฆ็ง ลักซอง ฮาว โดง กอย คูนดีคัม อาเอกาลอน อี อึบ มืง โมวอาบ ตึอน. 16 อาเอฮูด มืร จัร อี โบง อาตึม อี มึห บลา อา บลาก บอ โต็ง อู กานีห. อัน บอ ปัก ดึก ดี ณอย อัน บลาก อาอัห, วี เครียง แคง ครึง ตา อัน. 17 ปาย ตี อัน บอ ดึห ดี โฆ็ง ลักซอง เฆ, ฮาว อาบ ดี คูนดีคัม อาเอกาลอน ตึอน อี มูห ดูอี ฆลัณ กาเซา. 18 อัน แฮะ ฮอต อาบ ดัว ลักซอง ตี ดี คูนดีคัม อาเอกาลอน, อัน บอ วี จัร เฆ อี กาฆอด ตัห ลักซอง ตี, แตห เฆ เวณ. 19 อี มูห อัน, อัน บอ วี ยีต โดง มึห มาว ปี ดอก เฆ อารึบ ราง อี กอย ดี มืง ฆีลัะฆา ตึอน. อัน วี ฮาว โดง กอย คูนดีคัม อาเอกาลอน ต็อห, “อึย แม คูนดีคัม ตาง, โอว มึห ปี ซี ปรา ดี กาลาง ดี แม อาดา อู โมยว.” คูนดีคัม มืร วี กาลาง ดี เฆ แดเจณ อัน ต็อห, “แตห อึณ เยน. แตห มี ยาย อา วี กอย ดี นี.” อัน แฮะ ฮอต ต็อห ปาย ตี เฆ มืร เลห ฮาว อู เฌณ.

20 ดอ อัน ตี คูนดีคัม อาเอกาลอน กอย แคง โฮว อัน คร็อง แดง. อาเอฮูด มืร ฮาว โดง กอย อัน บอ กาลาง ดี อัน ต็อห, “โอว แฮะ ตัห กาลาง อามีง เฌาพรา ดี แม.” แฮะ ฮอต, คูนดีคัม ตึอน บอ ยีต อู เฌณ. 21 อาเอฮูด บอ ตา แด อัน บลาก อาฆัะ, วี ทอด อาตึม ดี ณอย อัน บลาก อาอัห, วี ซัด บึม คูนดีคัม ตี.

22 อาตึม อัน ตี, อึณ บอ ลึบ ฮาว บอ ฆล็อง อัน, แกวะ แตห อึณ ซี ลึห. เบรียง อัน แฮะ ฮอต วี ซีบลึก โตต. อัน มืร ตู ทอด เลห อาตึม ตี. แฮะ กาหลัน ฌัม นา กาตูะ อัน, อึณ บอ ฮ็อะ ปาย ตี. 23 แฮะ ฮอต, อาเอฮูด วี กาบีด โตต มาโลห แคง โฮง ตี, วี คัด เซา อัน. วี เลห ดี ฆรัห โฮว ตึอน. 24 อัน แฮะ ฮอต เลห ฮาว, เฆ แดเจณ คูนดีคัม วี ยึร มาโลห แฮะ กาบีด โตต. แฮะ คัด บอ คัดเซา. เฆ ทาง, คูนดีคัม ซี เอียง แคง โฮง อี เยน ดาคึย. 25 เฆ วี บัร ดี ยอด กอ เหลณ กาเซา. เฆ ตู ซี ยัะ วึห มาโลห. ปาย ตี อึณ บอ แฆะ ดี น็อห เฆ. แฮะ ฮอต เฆ บอ ดึห ลัะคัดเซา, วึห มาโลห. เฆ วี ยึร คูนดีคัม แฮะ ฮอต เกห, แฮะ ฮอต ยัม แคง โฮว ตี.

26 ดอ ซีงยา ลาย บัร เฆ ตี, อาเอฮูด มืร เลห ฮาว กาโลห โดง กอย มาว ปี ดอก เฆ อารึบ ราง ตึอน. อัน บอ เลห ฮาว ฌัม ดี โดง จืร จีราบ. 27 อัน บอ ตัห ฌัม ดี นอน อาเอพารีม บอ บูด เวา นึง แป, แตห อึณ แดะ กาฌูะ เฆ ดูอี อีซาเรลัะ อี มูห ดา ซึก อัน. อัน บอ วี แยต เฆ เลห โลง ดี นอน ตี.

28 อัน วี ต็อห ดี เฆ, “แตห เบ ตัห โดบ โอว. เฌาพรา แฮะ แตห เบ ออง รันซู เบ อี มูห ดูอี อาโมยว โมวอาบ ตึอน.” ปาย ตี เฆ บอ โลง โดบ อาเอฮูด บอ ฮาว อึบ บาง กาโลห อึม แบลง ยอดาน โดง กาโลห เฆ ดูอี โมวอาบ. เฆ มืร ตู แตห อาเซ กาโลห. 29 ซีแง ตี, เฆ บอ ง็อห ยัม ดูอี โมวอาบ อี มึห โปลม มึห แฮณ อาดา อู หมึณ วี. เฆ มืร ตู แตห เฆ ลอด คอ อู วี. 30 ปาย ตี เฆ ดูอี อีซาเรลัะ บอ แป บอ อึบ เฆ ดูอี โมวอาบ ซีแง ตี. วาย อัน ตี มืง บอ มืง บอ เยน ดาคึย กอ โนะ ดา ฆึร ซีนัม.

31 วาย อัน ตี อาซามกา อี มูห ฆอน อานาด บอ วี แบน ดา ตาง อี ซูงพยาด ดารา ดี เฆ. อัน บอ ง็อห ยัม ดูอี พีลีที เดา มาย็อห วี. อัน บอ ตา อึณเพียะ บัต ปี ซัด เฆ มามัก, ง็อห ยัม ดูอี เฆ ตี, แตห อึณ คยอด เฆ ดูอี อีซาเรลัะ.