1 วาย ยัม อาเอฮูด ตึอน, เฆ ดูอี อีซาเรลัะ วี โบง อี ตู หมึอม อี ตู ล็อะ น็อห เฌาพรา ปอ อึณ ปัว. 2 ปาย ตี เฌาพรา บอ แตห เฆ ชึม ดี คูนดีคัม อายาพีน อี มูห ดูอี อาโมยว กานัณ อี อึบ มืง ฮาจอ. ดา โบว อี อึบ ดา ซึก คูนดีคัม อายาพีน ตี, อึณ บอ มูห อาซีซาลัะ อี กอย ดี มืง ฮารอซีกฮาฆอยีม. 3 คูนดีคัม อายาพีน ตึอน, อัน บอ มึห ลักเลา ฮีน ดีม มาย็อห หลาง. อัน บอ อึบ บอ คาหนาบ กาเซา เฆ ดูอี อีซาเรลัะ อาดา อา ฆึร ซีนัม. ดอ อัน ตี เฆ ดูอี อีซาเรลัะ บอ วี ซาคึร แดะ แตห เฌาพรา จอย เฆ.

4 ดอ อัน ตี นาง เดโบวรา อี มูห อีบึณ อาปีตูด อี แบน อีบึณ อี บยาน โฆรห เฌาพรา บอ แบน อี ซูงพยาด ดารา ดี เฆ ดูอี อีซาเรลัะ. 5 นาง เดโบวรา ตี แฮะ ดึอม กอย ครึม เฮ จึก อี จืร เฮ จึก เดโบวรา อี กอย ดี กาแต มืง รามา ฆาย มืง เบดาเอน อี กอย ดี กาแต นอน อาเอพารีม ตึอน. เฆ ดูอี อีซาเรลัะ วี โฮะ โดง กอย อัน, แตห อัน ซูงพยาด อามู เฆ. 6 อาดา อู ซีแง, อัน บอ แดะ อาบารัก อี มูห ฆอน อาพีโนม อี กอย ดี มืง เกเดซัะ แคง กาดาย เฆ ดูอี ครึร อานาบทาลี. อัน บอ กาลาง ดี อาบารัก ต็อห, “เฌาพรา อี มูห เฌาพรา ปี กรึบ เฆ ดูอี อีซาเรลัะ, อัน กาลาง ดี แม ต็อห, ‘แตห แม แดะ ดูอี อานาบทาลี บอ ดูอี อาเฌบูโลน อาดา อู หมึณ วี, แตห เบ โฮะ ดี นอน ทาบอรา. 7 โอว ดี แตห ดา โบว ตาง อาซีซาลัะ อี อึบ ดา ซึก คูนดีคัม อายาพีน ตึอน ตัห กาโฆห ดี แม โคบ อึม แบลง กีโซน ตึอน. อัน ดี บอ ป็อะ อึณปร็อง ลักเลา ฮีน. บอ ดา ซึก อัน บอกาเฆลียด ดี ตัห โดบ อัน. โอว ยี แตห แม ออง, แม แป อัน.’”

8 ปาย ตี อาบารัก วี ต็อห, “เซ แม บอ ฮาว รึม โดบ โอว, โอว ดี ฮาว. เซ แม ยี ตู ฮาว, โอว มืร ตู ฮาว.”

9 นาง เดโบวรา ตึอน วี ต็อห, “อึร, แฮะ มูห. บอ โอว ดี ฮาว รึม โดบ แม. มาแล, อี ดี กาโฆห ออง ตี, อาว แบน ซาเร แม. โคว, เฌาพรา ดี แตห ดา โบว ตาง อาซีซาลัะ ตี ชึม ดี อีบึณ.” ปาย ตี นาง เดโบวรา บอ ฮาว รึม โดบ อาบารัก ฌัม ดี มืง เกเดซัะ ตึอน. 10 อาบารัก บอ แดะ ดูอี อาเฌบูโลน บอ ดูอี อานาบทาลี ฮาว โดบ อัน ดี มืง เกเดซัะ ตึอน. อึณ บอ มึห ดูอี อู หมึณ วี อี ฮาว รึม โดบ อัน.

11 ดอ อัน ตี อึณ มูห อาเฮเบน อี มูห ดูอี อาโมยว เคนีด. อากีนี มูห หลูกหลาน อาเฮบา อี มูห บึร อาโมวแซ ตึอน. อัน แฮะ เลห โดง กอย อาโมยว อัน บอ ซัม ทึบ บีก อัน โคบ เฮ ตาง ดี โดง จืร จานานีม อี กอย กาตัด มืง เกเดซัะ ตึอน.

12 ดอ วี ยึร อาซีซาลัะ ลอง อาบารัก อี มูห ฆอน อาพีโนม แฮะ โฮะ ดี นอน ทาบอรา ตึอน, 13 อัน บอ แดะ แคะ กอย ดา ซึก อัน อี ป็อะ ลักเลา ฮีน อาดา ดีม มาย็อห หลาง, บอ เฆ ดา ซึก อัน บอกาเฆลียด, แตห เฆ เลห ดี มืง ฮารอซีกฮาฆอยีม, วี ฮาว ดี แบลง อึม กีโซน.

14 ดอ อัน ตี นาง เดโบวรา บอ วี กาลาง ดี อาบารัก ต็อห, “แตห แม ฮาว, เฌาพรา อี ดี แยต ฮาว แม. เฌาพรา ดี แตห แม แป แม ออง ดา ซึก อาซีซาลัะ อาตึร นี.” ปาย ตี อาบารัก บอ แยต โลง ดา ซึก อาดา อู หมึณ วี ตึอน, แตห เฆ โลง ดี นอน ทาบอรา. 15 ดอ ลาย กาโฆห อาบารัก ดี ดา ซึก อาซีซาลัะ ตึอน, เฌาพรา บอ แตห อาซีซาลัะ บอ ดา ซึก อัน อี ป็อะ อึณปร็อง ลักเลา ฮีน บอ ดูอี อัน บอกาเฆลียด ชึม โตต. อาซีซาลัะ บอ แดน เลห ดี ลักเลา ปี ป็อะ อัน, วี กาแบลบ เตา. 16 อาบารัก บอ คูงครัห โดบ เฆ ดา ซึก อัน อี ป็อะ ลักเลา ฮีน, กอ ฌัม ดี มืง ฮารอซีกฮาฆอยีม. อัน บอ ดึห มาปัวะ ลาง เฆ บลา เลียห อัน, ง็อห ยัม โตต ดูอี เฆ ตี. อู วี มืร อาว ฮู มึห.

17 อาซีซาลัะ บอ กาแบลบ เตา ฮาว ลึบ แคง ทึบ นาง เยลา อี มูห อีบึณ อาเฮเบน อี มูห ดูอี อาโมยว อากีนี. อัน ฮาว ดี ตี โคว, คูนดีคัม อายาพีน อี อึบ มืง ฮาจอ ตึอน แฮะ ดึอม แบน ฆึก อี กาล็อะ ดี ดูอี อาโฮวบา ตี.

18 นาง เยลา บอ ฮาว บัร ดี รวห อาซีซาลัะ บอ แดะ อัน ต็อห, “ตัห, แตห แม ตัห ลึบ แคง ทึบ นี, อาว โลว โยว มาเซ.” อาซีซาลัะ บอ ลึบ แคง ทึบ ตี. นาง เยลา บอ ดึห ฮึบ ปลึก ดี อัน.

19 อัน ปี วี ต็อห, “โอว หมาณ ดี เดียง อึม คอ อี แจก, โอว แฮะ ซี เดียง กาเซา อึม.” นาง เยลา บอ ดึห กาเปา อึม ปู, วึห แตห อัน เดียง. แฮะ ฮอต, อัน บอ วี ดึห ฮึบ ปลึก ดี อัน.

20 อัน ปี วี ต็อห ดี นาง เยลา, “แตห แม จ็อง โคบ บาง มาโลห นี, เซ อี บอ ตัห ดีหมอด ต็อห, ‘อึณ มึห ดูอี อี กอย ดี นี?’ แตห แม ต็อห, ‘อาว มึห อาเซ กอย ดี นี.’”

21 อาซีซาลัะ ตึอน มืร แฮะ นูน กาเซา. อัน บอ ปึอน ดี อีด ปีว อู เฌณ. ปาย ตี นาง เยลา บอ ดึห หล็อก ทึบ บอ มีแด, วี แกร ดี ฮาว โดง กอย อาซีซาลัะ, วี ดอก ดี ดัง โหยะ อัน, แตห อึณ กอ กาหลัน ดึก ดี กาดาย.

22 วาย ตี อาบารัก บอ วี ตัห เหรต อาซีซาลัะ. นาง เยลา บอ วี เลห รวห อาบารัก บอ กาลาง ดี อัน ต็อห, “แตห แม ตัห ลึบ ดี นี, โอว ดี แหน ดี แม วี ปี เหรต แม ตี.” อัน มืร โดบ ฮาว นาง เยลา ตึอน, อัน บอ วี ยึร อาซีซาลัะ แฮะ ฮอต ยัม. กาบลัะ ดอก ทึบ ตึอน มืร, แฮะ ดอก ดี ดัง โหยะ อัน.

23 ซีแง ตี, เฌาพรา แฮะ แตห เฆ ดูอี อีซาเรลัะ ออง ดา ซึก คูนดีคัม อายาพีน อี อึบ ดูอี อาโมยว กานัณ.

24 แฮณ เฆ ดูอี อีซาเรลัะ แกร ดี กืน, แตห กอ ฌัม อาคราว ดี กาโฆห แป เฆ คูนดีคัม ดูอี กานัณ อี มูห อายาพีน ตึอน.