1 ซีแง ตี นาง เดโบวรา ฆาย อาบารัก อี มูห ฆอน อาพีโนม วี ปาก โหมว ต็อห,

2 “แตห เอ อืบ เฌาพรา. โคว, เฆ ดูอี อี แยต เฆ ดูอี อีซาเรลัะ แฮะ โพรม ดี กาโฆห ดี รันซู. เฆ บอกาเฆลียด แฮะ คัม ดี จอย แตห เฆ ออง.

3 อึย เบ คูนดีคัม, แตห เบ โทม. เบ ดา ตาง, แตห อึณ ลึห ดี เบ. โอว ดี ต็อห โหมว บอ อืบ เฌาพรา อี มูห เฌาพรา ปี กรึบ เฆ ดูอี อีซาเรลัะ.

4 อึย แม เฌาพรา, ดอ เลห ฮาว แม เฌา ดี นอน เซอี, ดอ แยต เลห แม เฌา ดา ซึก แม แคง กาดาย มืง เอโดม ตึอน, กาดาย แฮะ ดียูห ดีเยณ. ฆลาย มืร โจห แคง ฆางหราว บอ แคง อึณอูะ.

5 แคะ กอย นอน, เฆ บอ โยว ดียูห ดีเยณ ดี อาต เฌาพรา อี มูห เฌาพรา อี แฮะ ดึอม โลง ดี นอน ซีนาย. เฌาพรา ตี บอ มูห เฌาพรา ปี กรึบ เฆ ดูอี อีซาเรลัะ.

6 ดอ มูห โจว อาซามกา อี มูห ฆอน อานาด บอ ดอ มูห บาน นาง เยลา, อาว มึห อี ฮาว โดบ อึณเตณ ตาง. อึณเตณ ตาง แฮะ ง็อง. เฆ วี ฮาว โดบ อึณเตณ ดีแตด อี โฆะ แฆะ.

7 แคง เรา นา เรต มืง ดูอี มืร แฮะ เยน, แฮะ ง็อง โตต, แตห อึณ กอ วี ฌัม ดอ ตัห โอว อี มูห นาง เดโบวรา. อึณ ปี โอว แฮะ แบน มา เฆ ดูอี อีซาเรลัะ บอกาเฆลียด.

8 ดอ แฮะ ร็อห เฆ ดูอี อีซาเรลัะ ดี วี กรึบ เฌา กามาย, ดูอี เฮา บอ ตัห ลาย กาโฆห แคง มืง. ดอ อัน ตี เฆ ดูอี อีซาเรลัะ อาดา พวน หมึณ วี อาว มึห มัง ฆ็อง เฆ บลา เลียห คอ อู บลัะ.

9 น็อห โอว บอ อึง กาเซา ปี ปาย เฆ ดา โบว อี อึบ ดา ซึก ดูอี อีซาเรลัะ. บอ เฆ ดูอี กืน แฮะ คัม ดี จอย แตห เฆ ออง. โอว บอ อืบ เฌาพรา.

10 อึย เบ อี ป็อะ มาลา อี ลูย อี ตูต แดง กอบ, บอ เบ อี ฮาว โดบ อึณเตณ, แตห เบ วี กาลาง ลอง อัน ตี.

11 แตห เบ โทม ปี ซีนัน ซีนืง เฆ ดูอี กืน อี กอย โคบ อึม คึม. เฆ แฮะ ต็อห โหมว ลอง เฌาพรา แฮะ จอย เฆ ดูอี อีซาเรลัะ อี กอย แคง เรา เรต มืง, แตห เฆ แป เฆ ออง. ดอ อัน ตี เฆ ดูอี ปี อึบ เฌาพรา แฮะ วี โลง ดี บาง มาโลห มืง.

12 อึย นาง เดโบวรา, แตห แม ยีต, แตห แม แยต เย, แตห แม แยต เย ต็อห โหมว. อึย อาบารัก อี มูห ฆอน อาพีโนม, แตห แม ดึห ฮาว ดูอี แปะ แฮะ เหมต ตัห แม.

13 เฆ อี ซี ฆีด ซี กอย, เฆ บอ โลง โดง กอย เฆ ดา ตาง อี อึบ อี แยต เฆ ดูอี กืน. เฆ ดูอี ปี อึบ เฌาพรา บอ ตัห โดง กอย โอว บอ ตึย เฆ อี มึห โปลม มึห แฮณ บอ ปึอน กาโฆห.

14 ดูอี อี ดึอม กอย แคง กาดาย ดูอี อามาเลก, เฆ บอ เลห ดี นอน อาเอพารีม. ครึร อาเบนยาม บอ เฆ ดูอี อัน, เฆ บอ โดบ ดี ปัน. เฆ ดา โบว อี อึบ ดา ซึก, เฆ วี เลห แคง มืง อามาคีรา. เฆ ดา กาณา อี โฆ็ง เลียห, เฆ บอ เลห แคง ดูอี อาโมยว อาเฌบูโลน.

15 เฆ ดา กาณา อี อึบ ดูอี อาอีซาคา, เฆ บอ ตัห โดบ นาง เดโบวรา. เฆ ดูอี อาอีซาคา ตัห โดบ อาบารัก. เฆ บอ กาโพรม ดี กาโดบ โลง. เฆ ดูอี ครึร อารูเบน แบน พึง แบน พึง กอ เฌณฌา เหลณ, แตห เฆ ซูงพยาด น็อห เฆ.

16 เหมา อึณ ปาย ปี กอย หน็อะ เบ แคง กาปึม มาบู, บัร ดี โทม ฮัม เวา ปี บูด ดา อี เฮียง มาบู? แฮะ หมาน, ครึร อารูเบน แบน พึง แบน พึง เฆ ตู นับ ดี ซูงพยาด แคง น็อห เฆ โยว เฆ ดี ฮาว ตู ฮาว.

17 เฆ ดูอี อี กอย แดง นอน ฆีเลอาด, เฆ แฮะ กอย ดาคึย, กอย ฆัด เฆียด โดง กอย เฆ นา ดอย อึม แบลง ยอดาน. เฆ ครึร อาดาน มืร แฮะ กอย แคง รึร ซังโพว. เฆ ดูอี แคง ครึร อาเซน แฮะ กอย ดาคึย โคบ อึม นัมมูกซารา.

18 อึณ ยี มูห เฆ ดูอี อาเฌบูโลน บอ ดูอี อานาบทาลี แฮะ คัม ดี จูน อาซาก เฆ บอ แบน อี กาโฆห ดี ดา ซึก.

19 เฆ คูนดีคัม บอ ตัห ลาย กาโฆห อู เฌณ. คูนดีคัม มืง กานัณ บอ ตัห กาโฆห ดี มืง ทานัก อี กอย โคบ อึม มีกีตอ. มาแล, เฆ ตู พาด, ตู ดึห ฮาว รึอน มาเซ.

20 เฆ ซีมัณ แคง ฆางหราว บอ จอย ดา ซึก. เฆ บอ จอย กาโฆห ดี อาซีซาลัะ.

21 อึม แบลง กีโซน บอ อึณปูน บอ ฌูห ฮาว เฆ. อึม กีโซน อี แฮะ ดึอม มึห ซีณ ดอ มึอน แฮะ แป เฆ. ลอง อัน ตี อึณ แบน โปลม แบน แฮณ ดี น็อห พึอม โอว.

22 ดอ อัน ตี ปึอน ยึร ฮัม ฆีบ มังปร็อง อี กืน, อี ฮาว แฮ แฮ, มึห โปลม มึห แฮณ กืน.

23 เฆ อามู อามาด เฌาพรา บอ ต็อห, ‘แตห เบ ดืง ดูอี อี กอย โดง จืร แมรอดจาตา. ดืง กาเซา เฆ อี กอย ดี ตี. โคว, เฆ ตู ตัห จอย เฌาพรา. เฆ ตู ตัห จอย อัน เฌา ดอ กาโฆห อัน ดี เฆ อี มึห โปลม ตาง.’

24 นาง เยลา อี มูห อีบึณ อาเฮเบน อี มูห ดูอี อากีนี ตึอน แฮะ ปึอน ม็องการา บอด. อัน แฮะ ปึอน ม็องการา อี บอด หลึอม ม็องการา อีบึณ ดอน อี อี กอย แคง ทึบ เฆ.

25 อาซีซาลัะ บอ หมาณ ดี เดียง อึม. มาแล, นาง เยลา วี ดัว อัน เดียง อึม ปู. อัน บอ ดึห ซีลัยะ ปี ตา คูนดีคัม, วี ฮับ อึม ปู โปลม.

26 แด อัน อาดา อู บลาก วี ปา หล็อก ทึบ. แด อัน บลาก อาอัห วี ดึห มีแด โมยว ปี ตา เฆ ดูอี รัณ ฆาน จัน. อัน ดอก ดี ฆีณ อาซีซาลัะ, แตห อึณ กอ มาตูห. อัน วี บลูห ดัง อาโหยะ ดูอี วี ตี, แตห อึณ กอ กาหลูห.

27 อาซีซาลัะ บอ เกห โจห โคบ เปลา นาง ตี. อัน บอ วี โจห ยัม แดง กาดาย โคบ เปลา นาง ตี.

28 มา อาซีซาลัะ บอ บัร ดี ยอด โคบ กาเดา ปาแตง. อัน บอ กอย บาง กาเดา ตี ต็อห, ‘เหมา อึณ ปาย ลักเลา อึณปร็อง อัน ปี ซอ นาย ดี นาน ตัห? ปี ซอ นาย ดี ทืง กาเซา.’

29 เฆ นาง อี มูห แดเจณ อัน อี มึห อางยาน บอ กาลาง ดี อัน. อัน มืร วี กาลาง แคง น็อห อัน ต็อห,

30 ‘เฆ แฮะ ฮาว กาโฆห, แฮะ ฮอต กาตูณ โกรวกราม, วี ลาย กาซาง ดี เฆ. ดา ซึก อู วี, แฮะ ปึอน ดีบยา อู วี อา วี. อี มูห อาดา อาซีซาลัะ, อัน ดี บอ ปึอน ครึง ตา อี บอด อี คึกคัม, อี มึห ราง โบห กาเฌา. บอ บีก ลาย อี ฮอย ดี แมง, แตห วี อี แฮะ กาโฆห ออง มึห ซาเร. ฌึร ตี ดอน โมยว มูห โตต ปี พาด ปึอน เฆ.’

31 อึย แม เฌาพรา, แตห รันซู แม ยัม โตต บอกาเฆลียด. มาแล, อี มูห เฆ อี ร็อก แม เฌา, แตห เฆ ปี บลาง ซีแง อี บลาง โฮะ แคง เบลณ บอ มึห อาพูง ดังโคว ตาง.” แคะ ตี เฆ ต็อห โหมว.

วาย อัน ตี มาน มืง เฆ ดูอี อีซาเรลัะ บอ เยน ดาคึย อาดา พวน ฆึร ซีนัม.