1 วาย อัน ตี เฆ ดูอี อีซาเรลัะ ปี วี โบง หมาบ อี ตู ล็อะ น็อห เฌาพรา ปอ อึณ ปัว. โคว, อัน เฌา บอ แตห เฆ ดูอี มีดีอาน อึบ เฆ อาดา บู ซีนัม. 2 เฆ ดูอี มีดีอาน บอ มึห โปลม ตาง กาเซา บอ คาหนาบ กาเซา เฆ ดูอี อีซาเรลัะ. โคว, เฆ ดูอี อีซาเรลัะ บอ กาดูห ดี เตา ฮาว กอย แคง กาเดา มาว บอ กาเดา มาว. เฆ บอ โบง โดง ดี ปึอน เครียง ซีคยา, แกวะ แตห อึณ หงึย ลึบ. 3 ดอน เฌณ ดอ ฮับ เฆ ดูอี อีซาเรลัะ ครึง ซีมา, เฆ ดูอี มีดีอาน บอ ดูอี อามาเลก บอ ดูอี อี กอย บลาก นา เลห ซีแง, เฆ ตัห กาโฆห ดี เฆ. 4 ดูอี เฆ ตี บอ ตัห คยัะ แคง มาน เฆ ดูอี อีซาเรลัะ บอ ปยาต โตต ปี ซัม ปี ปีด เฆ, แตห อึณ กอ ฌัม ดี มืง ฆาซา. ดูอี เฆ ตี บอ พาด ดึห มาบู, มามัก บอ มาลา เฆ บอกาเฆลียด, แกวะ แตห เฆ ซี มึห โดว ซัด คอ อู โมยว. 5 ดูอี เฆ ตี บอ ดึห ตัห โดว ซัดดาวา เฆ บอ ทึบ บีก เฆ อี กืน กาเซา กอ ปี มาอาโฌ็ง แบน พึง แบน พึง. เฆ บอ กืน กาเซา กอ ฮู นับ ดี ตีห แคะ กืน เฆ, บอ มังปร็อง กาฮาต เฆ. เฆ บอ ลึบ ตัห บอ พาด บอ ปยาต โตต มาน มืง อีซาเรลัะ. 6 เฆ ดูอี มีดีอาน แฮะ โบง แตห เฆ ดูอี อีซาเรลัะ โจห เตียม กาเซา, แตห เฆ วี ดัด แดะ เฌาพรา, แตห อัน จอย เฆ.

7 ดอ วี ซาคึร แดะ เฆ ดูอี อีซาเรลัะ ดี เฌาพรา, หมาณ แตห อัน จอย เฆ โกบ ดูอี มีดีอาน เฆ ตี, 8 เฌาพรา บอ จัร ดูอี อี บยาน โฆรห เฌาพรา อู วี ตัห โดง กอย เฆ, แตห อัน ฮาว กาลาง โฆรห ดี เฆ ต็อห, “เฌาพรา ปี กรึบ เบ ดูอี อีซาเรลัะ แฮะ ต็อห, ‘โอว แฮะ ทูด เลห เบ แคง มืง แอฆึบ, โดง แฮะ แบน เบ หมาย อี เฮา. 9 โอว แฮะ ทูด เลห เบ ดี ดูอี แคง มืง แอฆึบ บอ ดี เฆ ดูอี บอกาเฆลียด อี แฮะ คาหนาบ เบ. โอว แฮะ โฮว เตา เฆ ดี อาต เบ, วี ดึห มืง เฆ, ดัว ดี เบ. 10 โอว แฮะ ฮอต ต็อห ดี เบ, โอว มูห เฌาพรา ปี กรึบ เบ, แกวะ แตห เบ กรึบ เฌา ปี กรึบ เฆ ดูอี อาโมวรีด ดอ กอย เบ แคง มืง เฆ นี. มาแล, เบ ตู โทม โฆรห โอว.’”

11 ปาย ตี อามู อามาด เฌาพรา บอ ตัห ดี โดง จืร ออพารัะ บอ ตูต กอย ครึม เฮ เทเรบ อี มูห โกรว อาโยวอาด อี มูห ดูอี อาบีเอจา ตึอน. ฆอน อีมาย อัน อี จืร อากีดีโอน ยี มัห โหงว. อัน บอ เครียง อัน แคง กาเดา โดง กรีด เฆ เบล มางูน, แกวะ แตห ดูอี มีดีอาน ยึร อัน. 12 อามู อามาด เฌาพรา บอ ตัห โดง กอย อัน บอ กาลาง ดี อัน ต็อห, “อึย แม อี มูห ดา ซึก อี กยัะ, อี มึห โปลม กืน, เฌาพรา แฮะ กอย รึม โดบ แม.”

13 อากีดีโอน วี ต็อห, “อึย แม เฌา, เซ เฌาพรา กอย รึม โดบ โอว อาคาคัร, เหมา อึณ ปาย อึณ ปี โบว แบน ปาย นี ดี เย? เฆ ฆูณ ดัง เย แฮะ ดึอม แค อี หมึอม อาม แบน โมยว แบน โมยว ดี เย. ลอง อัน ตี, อึณ กอย ดี เหมา? เฆ มืร แฮะ ต็อห, ‘เฌาพรา แฮะ แยต เลห เย แคง มืง แอฆึบ ตึอน.’ ดอ ตี นี อัน เฌา ยี แฮะ วี แวน เย, วี อาบ เย ดี ดูอี มีดีอาน.”

14 เฌาพรา วี มางัห ยอด อัน, วี ต็อห ดี อัน, “โอว แฮะ จัร แม, แตห แม จัร โปลม แม, คยอด เลห เฆ ดูอี อีซาเรลัะ.”

15 อากีดีโอน วี ต็อห, “อึย แม เฌา, เหมา โอว ดี ปาย ดี คยอด ดูอี อีซาเรลัะ? อึณกรึห เย, เย มูห อึณกรึห อี ดีแตด กาเซา, ตู มึห โปลม เฆ แฮณ กาแต เฆ ครึร อามานาเซ. โอว บอ มูห วี อี ตู คึกคัม มาเซ แคง อึณโฮม เย.”

16 เฌาพรา ปี วี ต็อห ดี อัน, “โอว ดี กอย รึม โดบ แม. แม ดี บอ ปึอน ดี กาโฆห ดี เฆ ดูอี มีดีอาน บอกาเฆลียด บอ แป เฆ.”

17 อากีดีโอน วี ต็อห, “เซ อึณ บอ มูห ปี อึง แม เฌา, แตห แม เฌา บยัะ ลักซานา ลอง อึณ มูห แม เฌาพรา อี กาลาง ดี โอว. 18 แตห แม เฌา กอย ดี นี, แตห อึณ กอ ฌัม ปัน ดี ฮอต โอว หลู ปี ดี หลู โอว ดี แม.” อัน เฌา วี ต็อห ดี อัน, “โอว ดี กอย แตห อึณ กอ ฌัม ปัน ดี วี ตัห แม.”

19 อากีดีโอน มืร วี ฮาว ลึบ แคง กาง อัน, วี ดึห ยัง ฆอน มาแป อู โดว ก็อง. อัน วี ดึห บอ กาแปะ เคาคยูง อาดา บู แบล, วี โบง คามูน ดีแคลบ อี ตู ฮับ ซีนัม บรัห. อัน บอ ดึห ยัง ฆอน มาแป ปี ก็อง อัน ตี, ฮับ แคง ซีโบลห. อึม ยัง ตี, อัน วี ฮับ แคง กาโละ ฮาว หลู ดี อัน เฌา ครึม เฮ เทเรบ ตึอน.

20 อามู อามาด เฌาพรา ตี วี ต็อห ดี อัน, “ดึห ยัง มาแป เฆ คามูน ดีแคลบ อี ตู มึห ซีนัม บรัห ตี, ดาง แดง มาว ตี, วี ดึห อึม ยัง ปี ก็อง แม ตี, วี ฮูห นา แดง.” อากีดีโอน บอ โบง ปาย ตี. 21 ดอ อัน ตี อามู อามาด เฌาพรา บอ ตา กาแดะ อึณกรวน ปี โฆ็ง อัน บอ ดึร ยัง ฆาย คามูน ตี. ปาย ตี เงา บอ กูห แดง มาว ตี. อึณ บอ กาซึม ยัง ตี อู เฌณ. วาย ตี, อามู อามาด เฌาพรา บอ หราย ดี ตี. 22 ปาย ตี อากีดีโอน แฮะ ฮอต นับ, แฮะ มูห อามู อามาด เฌาพรา อี แฮะ กาลาง โฆรห ดี อัน. อัน บอ วี โยว กาเซา. อัน วี ต็อห, “อึย แม เฌาพรา อี อึบ โตต ดอน โมยว, โอว แฮะ ยึร อามู อามาด เฌาพรา ลาย โดว นา ดี โอว.”

23 เฌาพรา ยี ต็อห ดี อัน, “แตห แม มึห น็อห ดาคึย. อาว โลว โยว. แม ตู โลว ยัม.”

24 แฮะ ฮอต ปาย ตี อากีดีโอน วี โบง กาโช็ง หลู ดี เฌาพรา ดี ตี. อัน บอ แตห อึณ จืร, เฌาพรา แตห น็อห ดาคึย. กาโช็ง ตี, อึณ บอ กอย ดี โดง จืร ออพารัะ โดง กอย เฆ ดูอี อาโมยว อาบีเอจา กอ ฌัม ดอ ตี นี.

25 หมึร ตี, เฌาพรา วี กาลาง ดี อากีดีโอน ต็อห, “ฆูณ แม มึห ฆอน มัก อาโล็ง ปอ อู โดว. อาซาก อัน แฮะ โนะ บู ซีนัม. แตห แม ดึห โดว ตี บอ ปยาต แวน กาโช็ง เฌา บาลัะ ปี โบง อูน ฆูณ แม. ปยาต แวน บอ อารึบ นาง กานัม เอซูรา อี กอย โคบ กาโช็ง เฌา บาลัะ ตี. 26 แตห แม วี โบง กาโช็ง หลู อี ซีคยา อาดา เฌาพรา ปี กรึบ แม, แตห อึณ กอย แดง โดง จา ตี. แฮะ ฮอต, แตห แม วี ดึห มัก อาโล็ง ฆูณ แม โดว ตึอน, หลู แตห อึณ แบน ปี ดี หลู อี โดะ แคง เงา. แตห แม วี ดึห เฮ อารึบ นาง กานัม เอซูรา แปะ แฮะ ปยาต แวน แม ตึอน, แตห อึณ แบน เฮ โดะ อาดา ปี ดี หลู ตี.”

27 ปาย ตี อากีดีโอน วี จัร เฆ แดเจณ อัน ฆึร วี, แตห เฆ โบง แคะ ปี กาลาง เฌาพรา ดี อัน. โกบ โยว อัน ดูอี แคง อึณโฮม ฆูณ อัน บอ ดูอี แคง มืง เฆ ตึอน, อัน ตู ยัะ โบง กาแต ซีแง. อัน วี แตห เฆ โบง แคง หมึร.

28 บอ ฌัม ปา แคหณา ซีณวัห เจว, เฆ ดูอี แคง มืง ตึอน บอ วี ยีต ยึร, กาโช็ง เฌา บาลัะ แฮะ ฮอต กาปยาต. ร็อง อารึบ นาง กานัม เอซูรา แฮะ ฮอต ฆัร เกห. แดง ตี, บอ มัก อาโล็ง โดว ฮาอา แฮะ ฮอต โดะ แคง เงา, แฮะ หลู แดง กาโช็ง หลู กามาย.

29 เฆ วี ลาย ดีหมอด กานัร เฆ ต็อห, “อาเซ แฮะ โบง ปาย นี?” เฆ บอ ลาย ดีหมอด วีว, ดีหมอด เวณ. เฆ บอ นับ อึณ มูห อากีดีโอน อี มูห ฆอน อาโยวอาด, อัน แฮะ โบง.

30 เฆ วี กาลาง ดี อาโยวอาด ต็อห, “แดะ ตัห ฆอน แม ตี ดี นี. อัน โลว ยัม. อัน แฮะ ปยาต กาโช็ง เฌา บาลัะ บอ ร็อง อารึบ นาง กานัม เอซูรา อี กอย โคบ กาโช็ง ตี.”

31 มาแล, อาโยวอาด วี ต็อห ดี เฆ อี แฮะ กอย โรบ อัน ตี, “อึณ มูห เบ อี ดี กาแคณ ดาง เฌา บาลัะ? เบ อี ดี คยอด อัน? อาเซ กอย บลาก เฌา บาลัะ ตี, อัน โลว ยัม เจว หณา นี. เซ เฌา บาลัะ บอ มูห เฌาพรา, อัน ดี บอ นับ ดี แคร โดว อัน เซ อี ปยาต กาโช็ง อัน ตี.” 32 ซีแง ตี, เฆ วี แตห อากีดีโอน ตึอน วี จืร “อาเยรูบบาลัะ.” ซีเพา ลอง อัน ตี, อึณ บอ เลห, “วี อี กาแคณ ดี เฌา บาลัะ.” อัน บอ ต็อห, “แตห เฌา บาลัะ ตี วี ฆ็อง แร โดว บรีม อัน โกบ มึห อี ปยาต กาโช็ง อัน.”

33 ดอ อัน ตี เฆ ดูอี อาโมยว มีดีอาน, ดูอี แคง มืง อามาเลก บอ ดูอี อี กอย บลาก นา เลห ซีแง, เฆ แฮะ แรน ซึก เฆ กาโลห อึม แบลง ยอดาน, วี ตัห คยัะ โดบ ดีลัยะ เยจาเรลัะ. 34 น็อห พึอม เฌาพรา บอ ตัห ปลึก อากีดีโอน, อัน บอ บูด เวา นึง แป, แดะ เฆ ดูอี อาโมยว อาบีเอจา ตัห โดบ อัน. 35 อัน บอ จัร ดาลาม อัน ฮาว แคง มืง อามานาเซ ดอน โปละ, แดะ แตห เฆ ตัห โดบ อัน. อัน บอ จัร ดาลาม อัน ฮาว บอ แคง มืง โดง กอย ดูอี อาเซน, ดูอี อาเฌบูโลน บอ ดูอี อานาบทาลี, แตห เฆ ตัห โดบ อัน.

36 ดอ อัน ตี อากีดีโอน วี กาลาง ดี เฌาพรา ต็อห, “เซ แฮะ หมาน, แม เฌา ดี จัร โอว, แตห โอว ฮาว ทูด เลห เฆ ดูอี อีซาเรลัะ, 37 โอว ดี ดึห ฮึก มาบู, เบลห ดี โอ็ง กางน็อห. เซ ฮี ฌัม ซีณวัห, เซ อึม ดีงาน บอ โจห มี แดง ฮึก มาบู ตี, อี มูห ดี กาดาย โคบ อัน ตี ยี กาฮ็อห เฮณ, โอว แฮะ นับ, แม เฌา แฮะ จัร โอว, แตห โอว ฮาว ทูด เลห ดูอี อีซาเรลัะ.” อัน แฮะ ฮอต ต็อห ปาย ตี อึณ บอ แบน ปาย ตี อาคาคัร. 38 อึณ บอ ฌัม ปา แคหณา ซีณวัห, อากีดีโอน บอ ฮาว เนียะ ฮึก มาบู ตึอน, อึณ วี เลห อึม ดีงาน แคง ฮึก มาบู ตี, กอ โนะ อู ซีลัยะ.

39 ปาย ตี อากีดีโอน ปี วี กาลาง ดี เฌาพรา ปอ อู เฌณ ต็อห, “โอว หมาณ, แกวะ แตห แม เฌา รู ดี โอว. แตห แม ควาง โอว, แตห โอว หมาณ ปอ อู เฌณ ดี แม เฌา. คา นี, แตห ฮึก มาบู นี กอย เฮณ กาฮ็อห, วี แตห มี กาดาย อัม ณัะ.” 40 หมึร ตี, เฌาพรา บอ โบง ปาย ตี. บอ ฌัม ปา แคหณา ฮึก มาบู แฮะ เฮณ กาฮ็อห. อึม ดีงาน แฮะ โจห มี ดี กาดาย, แตห อึณ อัม ณัะ.