1 ซีณวัห เจว อากีดีโอน อี แฮะ วี จืร อาเยรูบบาลัะ บอ เฆ ดูอี อัน บอกาเฆลียด, เฆ แฮะ ตัห คยัะ โคบ โตห อึม ฮารอด. เฆ ดา ซึก มีดีอาน แฮะ กอย นา กัว เฆ ดี นอน มอเร. 2 เฌาพรา วี กาลาง ดี อากีดีโอน ต็อห, “ดูอี อี กอย โดง กอย แม นี, เฆ แฮะ กืน กาเซา. โอว ตู ปึอน แตห เฆ ออง ดูอี มีดีอาน เฆ นี. โอว โยว เฆ ดูอี อีซาเรลัะ ดี วี ปีพูง เฆ, วี ทาง, แฮะ มูห โกบ กยัะ เฆ, เฆ แฮะ ออง.

3 แตห แม วี กาลาง ดี เฆ ดูอี กืน ตี ต็อห, ‘เบ อี มึห น็อห โยว, อี ซีมา กาจัว, แตห เบ วี เวณ. แตห เบ เลห ดี นอน ฆีเลอาด นี.’” ปาย ตี ดูอี อาดา อา หมึณ ดี อา แหรณ วี บอ วี เวณ. อึณ บอ ฆีด อาดา อู หมึณ วี.

4 ปาย ตี เฌาพรา ปี วี ต็อห ดี อากีดีโอน, “ดูอี ซี แนะ กืน. โอว ดี กาย็อห เฆ ดี แม. เซ โอว ฮี ต็อห, ‘วี นี โลว ฮาว โดบ แม,’ อัน โลว ฮาว. เซ โอว ยี ต็อห, ‘วี นี ตู โลว ฮาว โดบ แม,’ อัน ตู โลว ฮาว.”

5 ปาย ตี อากีดีโอน วี แดะ โลง ดูอี เฆ ตึอน ดี บาง อึม. เฌาพรา วี ต็อห ดี อัน, “แตห แม กาย็อห เลห ดูอี เฆ อี ตัห เดียง อึม อี เลียะ ปี มาโซว, อูน แบน อู พึง. เฆ อี ตัห ครึบเครา, เดียง แตห เฆ แบน ปอ อู พึง.” 6 เฆ อี เลียะ เดียง, เฆ กอย โอย มาย็อห วี. แดง ตี เฆ ครึบเครา เดียง ดอน อี.

7 เฌาพรา วี ต็อห ดี อากีดีโอน, “โอว ดี ดึห เฆ อาดา โอย มาย็อห วี อี เลียะ ตี, แตห เฆ คยอด แม, แตห แม ออง, แตห แม แป ดูอี มีดีอาน เฆ ตี. เฆ อี เฮา, แม วี จัร แตห เฆ ดอน อี เวณ โดง กอย เฆ.” 8 ปาย ตี อากีดีโอน บอ จัร เฆ ดูอี อีซาเรลัะ วี เวณ ดี ทึบ เฆ. อึณ บอ ฆีด มี เฆ โอย มาย็อห วี อี แฮะ ดึห โฆ็ง ปี ดี โฮม บอ โฆ็ง เวา นึง แป แปะ แฮะ โฆ็ง บีนอง เฆ. ดา ซึก เฆ ดูอี มีดีอาน มืร แฮะ กอย ชึง ครึม โดบ ดีลัยะ.

9 แคง หมึร ตี, เฌาพรา วี ต็อห ดี อากีดีโอน, “ยีต, กาโฆห ดี ดา ซึก เฆ ตี. โอว ดี แตห แม ออง, แม แป เฆ. 10 เซ แม ตู ยัะ กาโฆห ดี เฆ, แตห แม แดะ แดเจณ แม อี จืร อาพูรา โดบ แม, โลง โดง กอย ดา ซึก เฆ ตี. 11 แม ดี บอ ยึร โฆรห ปี ลาย กามวน เฆ. อึณ ดี บอ แตห แม แบน น็อห ยัะ กาโฆห ดี เฆ.” ปาย ตี อากีดีโอน ฆาย แดเจณ อัน อาพูรา บอ ตัห ฌัม ดี กาโตะ ดับ รันซู เฆ ตี. 12 ดูอี มีดีอาน, ดูอี อามาเลก บอ ดูอี อี กอย บลาก นา เลห ซีแง, เฆ แฮะ ตัห คยัะ โดบ ดีลัยะ ตี. เฆ แฮะ กืน กาเซา กอ แหนน มา อาโฌ็ง. มังปร็อง กาฮาต เฆ มืร แฮะ กืน กาเซา, กอ ปี กาฮาต ดี อึม นัมมูกซารา อี ฮู นับ ดี ตีห.

13 อากีดีโอน บอ ตัห ฌัม โดง กอย เฆ, อัน บอ ยึร ดูอี อู วี, อัน วี แค ปี อึณบาว อัน ดี ฆึก อัน. อัน ต็อห, “โอว แฮะ อึณบาว, อึณ มึห คามูน อู ดีกลวน กาหลอย ตัห แคง ดับ เอ, อึณ บอ ณัต ทึบ อาดา อู กาตูะ. ทึบ ตี บอ ดีฆรับ บอ เกห แดง กาดาย.”

14 ฆึก อัน อี โทม ปี แค อัน ตึอน วี ต็อห ดี อัน, “อาตี แหนน ดี บยัะ ลอง มาปัวะ ลาง ดูอี อีซาเรลัะ อี จืร อากีดีโอน, อี มูห ฆอน อาโยวอาด ตึอน. แดง ตี, อาว มึห ซีเพา ปอ อู โมยว. เฌาพรา แฮะ แตห อัน ออง ดูอี มีดีอาน บอ ดูอี อาโมยว เฮา อี กอย แคง ดับ นี บอกาเฆลียด.”

15 อากีดีโอน แฮะ ฮอต ยึร ลอง ปี อึณบาว ดูอี วี ตี บอ ปี ปาย เฆ ดี กาลาง ซีเพา อัน, อัน บอ วี ครึบเครา อืบ เฌาพรา. อัน บอ วี เวณ โดง กอย เฆ ดูอี อีซาเรลัะ, วี กาลาง ดี เฆ ต็อห, “ยีต, เฌาพรา แฮะ แตห เบ ออง ดูอี มีดีอาน.” 16 อากีดีโอน บอ กาย็อห ดูอี โอย มาย็อห วี ตึอน, แตห อึณ แบน โอย พึง. อัน ดัว เฆ โฆ็ง เวา นึง แป ดอน อี, โฆ็ง บอ กาโละ อี มึห เงา ราง นา แคง.

17 อัน วี ดัม โฆรห ดี เฆ ต็อห, “เซ เอ ฮี ฌัม ดี โคบ กาโตะ ดับ เฆ, แตห เบ ยอด โอว, ณึง ปี โบง โอว. 18 เซ โอว บอ เฆ ดูอี พึง อี โดบ โอว บูด เวา นึง แป, แตห บอ เบ อี กอย โรบ ดับ เฆ กาโพรม ดี บูด ดอน อี บอ ดัด ต็อห, ‘อาดา เฌาพรา บอ อาดา อากีดีโอน.’”

19 อากีดีโอน เฆ ดูอี อัน อู มาย็อห วี อี กอย รึม โดบ อัน, เฆ บอ ตัห ฌัม โคบ ดับ รันซู เฆ, แฮะ มูห วาย กาแต ซึอม. อาว เหลณ เฆ ดูอี อี บัร ดับ แฮะ ฮอต ลาย กาปลูะ. ดอ อัน ตี เฆ บอ บูด เวา นึง แป เฆ, บอ มัห กาลาต บอ กาโละ ปี โฆ็ง เฆ ตึอน. 20 เฆ ดูอี บอ อา พึง ตึอน มืร โบง ปาย ตี. แด เฆ บลาก อาฆัะ บอ โฆ็ง เงา ราง, บลาก อาอัห วี โฆ็ง เวา นึง แป ปี ดี บูด เฆ บอ กาโพรม ดี ดัด ต็อห, “มาปัวะ ลาง เย อาดา เฌาพรา บอ อาดา อากีดีโอน.” 21 แฮะ ฮอต, เฆ วี จ็อง โดง กอย เฆ ตี ดอน อี ราง อาเซ ราง อัน. เฆ มืร แฮะ โรบ ดับ เฆ ตี. ดอ อัน ตี, เฆ ดูอี มีดีอาน บอกาเฆลียด บอ กาโพรม ดี ดัด เตา.

22 เฆ ดูอี โอย มาย็อห วี อี กอย โดบ อากีดีโอน, เฆ บอ บูด เวา เฆ. ดอ อัน ตี เฌาพรา บอ โบง แตห เฆ ดา ซึก รันซู เฆ ตึอน วี ลาย กาโฆห ลาย กาง็อห กานัร เฆ. เฆ บอ เตา ฮาว โดบ อึณเตณ อี ฮาว ดี มืง เบดซีดา, กอ วี ฮาว ฌัม ดี มืง เจราราด บอ ดี มืง อาเบลัะมาฮาลัะ อี กอย กาตัด มืง ดาบาด. 23 เฆ ดูอี แคง ครึร อานาบทาลี, ครึร อาเซน บอ ครึร อามานาเซ, เฆ บอกาเฆลียด แฮะ ตัห กาฌูะ บอ คูงครัห โดบ ดูอี มีดีอาน เฆ ตี. 24 อากีดีโอน วี จัร เฆ ดาลาม อัน ฮาว ดี นอน อาเอพารีม, แตห เฆ แดะ ดูอี ตี ต็อห, “แตห เบ เลห โลง, กาโฆห ดี ดูอี มีดีอาน, แตห เบ อึบ บาง อึม แบลง ยอดาน อาต ตัห เฆ. แตห เบ อึบ แบลง ตี, แตห กอ ฌัม ดี มืง เบดบารา, แกวะ แตห เฆ ดูอี มีดีอาน ปึอน ดี กาโลห.” ปาย ตี เฆ ดูอี อาเอพารีม บอ ตัห กาฌูะ, บัร ดี บาง กาโลห ดอน โปละ โดบ แบลง อึม ยอดาน. กอ ฌัม ดี มืง เบดบารา.

25 เฆ บอ เหมต ดา ตาง ดูอี มีดีอาน อา วี อี จืร อาออราพัะ บอ อาฌาเรบ. เฆ บอ ดึห อาออราพัะ ฮาว ง็อห ยัม อัน โดง กอย มาว อาออราพัะ. อาฌาเรบ เฆ บอ ฮาว ง็อห ยัม อัน ดี โดง กรีด อาฌาเรบ เบล มางูน. เฆ ปี วี คูงครัห โดบ เฆ ดูอี มีดีอาน. เฆ บอ วี ดึห ตัห ฆีณ อาออราพัะ ฆาย อาฌาเรบ โดง กอย อากีดีโอน โคบ แบลง ยอดาน ตึอน.