ดอ อัน ตี เฆ ดูอี อาเอพารีม วี กาลาง ดี อากีดีโอน ต็อห, “เหมา อึณ ปาย ปี ตู แดะ แม ดี เย ฮาว กาโฆห ดี ดูอี มีดีอาน เฆ นี? เหมา อึณ ปาย ปี โบง แม ปาย ตี?” เฆ บอ พยาก กาเซา อัน.

2 อัน วี ต็อห ดี เฆ, “แปะ แฮะ ฮอต โอว โบง ตี, อาว ปึอน ลาย กาเฆา ดี แปะ แฮะ โบง เบ. เซ ดูอี อาเอพารีม แฆบ โดม เบล มางูน อี ซี ฆีด, อึณ หมึอม หลึอม ดูอี อาบีเอจา เบต ดึห ฮาว เบล มางูน ดี อาต. 3 เฌาพรา แฮะ อาบ อาออราพัะ ฆาย อาฌาเรบ อี มูห ดา ตาง ดูอี มีดีอาน ตึอน ดี เบ. ปี โบง โอว, อาว ปึอน ลาย กาเฆา ดี ปี โบง เบ.” อัน แฮะ ฮอต กาลาง ปาย ตี ดี เฆ, น็อห รู เฆ บอ หราย.

4 ดอ อัน ตี อากีดีโอน เฆ ดูอี อัน โอย มาย็อห วี ตึอน แฮะ ฮอต ตัห ฌัม ดี บาง อึม แบลง ยอดาน, เฆ บอ กาโลห ฮาว. เฆ ปี บอ แฮะ นูน กาเซา มืร, เฆ ยี แนะ โดบ ดี คูงครัห รันซู เฆ. 5 ดอ ตัห ฌัม เฆ ดี มืง ซูโคด, อัน บอ กาลาง ดี ดูอี แคง มืง ตี ต็อห, “แตห เบ ดัว คามูน เบ ดี ดูอี โอว คอ อี แจก. เฆ แฮะ นูน กาเซา. ดอ ตี นี, เย คูงครัห โดบ อาเฌพัะ ฆาย อาจาลามูน อี มูห คูนดีคัม ดูอี มีดีอาน.”

6 มาแล, ดา ตาง แคง มืง ซูโคด, เฆ วี ต็อห ดี อัน, “เหมา อึณปาย ปี โลว เย ดัว คามูน ดี ดา ซึก แม? แม หณัม ปึอน ดี เหมต อาเฌพัะ ฆาย อาจาลามูน.”

7 อากีดีโอน วี ต็อห ดี เฆ, “เซ เฌาพรา แฮะ อาบ อาเฌพัะ ฆาย อาจาลามูน ดี โอว, โอว ดี ดึห เฮ มาอาต แคง แปร กาฮ็อห บอ มาอาต แบน โมยว แบน โมยว มัห กาตู เบ, แตห อึณ กอ มาตูห.”

8 อากีดีโอน ปี วี ฮาว ดี มืง เปนูเอน, ปี วี หมาณ ปี ดี โฮม ดี เฆ ปาย ตึอน. ดูอี แคง มืง ตี มืร, ปี วี กาลาง ดี อัน ปี ปี ดึอม กาลาง ดูอี แคง มืง ซูโคด ตึอน. 9 ปาย ตี อัน วี ต็อห ดี เฆ, “เซ โอว แฮะ ฮอต แป เฆ ดูอี มีดีอาน, โอว ดี วี ตัห ปยาต แวน กาโช็ง จา เบ อี มูห โดง บัร ดา ซึก เบ นี.”

10 ดอ อัน ตี อาเฌพัะ ฆาย อาจาลามูน แฮะ กอย ดี โดง จืร กากอ. ฆาย กอย รึม โดบ ดา ซึก ฆาย อี มูห ดูอี อี กอย บลาก นา เลห ซีแง. เฆ บอกาเฆลียด แฮะ ฆีด อู หมึณ ดี พัน แหรณ วี. โคว, ดา ซึก เฆ อู แซน ดี อา หมึณ วี อี มึห ดี โฆ็ง มาปัวะ ลาง, เฆ แฮะ ฮอต ยัม. 11 อากีดีโอน วี แยต ดา ซึก อัน, ฮาว โดบ อึณเตณ เฆ อี กอย แคง ทึบ บลาก นา เลห ซีแง มืง นอบัะ ฆาย มืง ยอเพฮา. อัน มืร กาโฆห ดี เฆ ดอ ตู ทาง, ตู นัมโหลห เฆ. 12 คูนดีคัม ดูอี มีดีอาน อา กาดัง อี จืร อาเฌพัะ ฆาย อาจาลามูน ตึอน ปี บอ แฮะ เตา มืร, อัน ยี แนะ คูงครัห โดบ ฆาย. อัน บอ ปึอน ดี เหมต ฆาย. แฮะ ฮอต, อัน บอ ง็อห แวน ดา ซึก เฆ บอ ปยาต แวน ดับ เฆ.

13 อากีดีโอน อี มูห ฆอน อาโยวอาด วี ตัห โดง กาโฆห เฆ อี กอย โดบ อึณเตณ ดี นอน เฮรีด. 14 ดอ อัน ตี, อัน วี เหมต ฆอน กาโณม แคง มืง ซูโคด ตึอน อู วี บอ ดีหมอด แฌด ฆอน วี ตี. ฆอน วี ตี บอ แดม แคะ กอย จืร เฆ ดา ตาง อี อึบ อี แยต เฆ ดูอี แคง มืง ซูโคด อาดา บู ฆึร ดี บู วี, ดัว ดี อัน. 15 ปาย ตี อัน บอ วี ฮาว โดง กอย เฆ ดา ตาง แคง มืง ซูโคด ตึอน. อัน วี ต็อห ดี เฆ, “เบ วี โหลห ลอง แฮะ แวน เบ ดี โอว ดอ ตู จอย เบ ดี โอว ตึอน. เบ มืร แฮะ แนนัะ โอว ต็อห, เบ ตู ดัว ปี ดี โฮม ดี ดา ซึก โอว ดอ แฮะ นูน กาเซา เฆ. โคว, โอว หณัม ปึอน ดี เหมต อาเฌพัะ ฆาย อาจาลามูน. ดอ ตี นี แตห เบ ยอด, ฆาย แฮะ กอย โดบ โอว.” 16 ปาย ตี อัน บอ มาโนว เฆ ดูอี แคง มืง ซูโคด. อัน ดึห เฮ มาอาต ตาง แคง แปร กาฮ็อห บอ เฮ มาอาต ปอ โมยว มัห เฆ ดา ตาง อี อึบ อี แยต ดูอี แคง มืง ซูโคด ตึอน. 17 อัน บอ ปยาต แวน บอ โฮว จา อี กอย แคง มืง เปนูเอน บอ ง็อห แวน บอ ดูอี แคง มืง เฆ ตี.

18 อากีดีโอน วี ดีหมอด อาเฌพัะ ฆาย อาจาลามูน ต็อห, “ดูอี ปี ง็อห ยัม บาย ดี มืง ทาบอรา ตึอน, เฆ มูห ดูอี ปาย เหมา?” ฆาย วี ต็อห ดี อัน, “ดูอี เฆ ตี, เฆ ปี แม. ปี ปาย อารึบ เฆ, เฆ แหนน ดี มูห ฆอน คูนดีคัม ดอน อี.”

19 อากีดีโอน วี ต็อห ดี ฆาย, “ดูอี เฆ ตี, เฆ มูห วา โอว. เฆ บอ มูห ฆอน มา โอว. เฌาพรา แฮะ นับ, เซ บาย ตู ง็อห ยัม เฆ, โอว มืร ตู ง็อห ยัม บาย.” 20 ปาย ตี อัน บอ วี กาลาง ดี อาเยซา อี มูห ฆอน ฆีณ อัน ต็อห, “ยีต ง็อห ยัม ดูอี ฆาย นี.” ฆอน อัน ยี ตู ทอด เลห มาปัวะ ลาง อัน. โคว, อัน ซี ดีแตด บอ โยว.

21 ดอ อัน ตี อาเฌพัะ ฆาย อาจาลามูน วี ต็อห ดี อัน, “แตห แม ยีต ง็อห ยัม ยาย ราง แม. แม แฮะ มูห ดูอี ตาง บอ แฮะ มึห โปลม เฆ แฮณ กืน.” ปาย ตี อัน บอ ยีต, ง็อห ยัม ฆาย อู เฌณ. อัน บอ ดึห บอ ราง ซีมัณ ครีว ปี ฮอย ฆาย ดี แมง มังปร็อง กาฮาต ฆาย.

22 วาย ตี, เฆ ดูอี อีซาเรลัะ วี ต็อห ดี อากีดีโอน, “แม แฮะ คยอด เลห เย ดี ดูอี มีดีอาน, แตห แม บอ ฆอน แม บอ หลาน แม แบน ดา ตาง อี อึบ เย.”

23 อากีดีโอน วี ต็อห, “อาว มูห โอว ดี อึบ เบ. ฆอน โอว มืร ตู อึบ เบ, เฌาพรา อี ดี อึบ เบ.” 24 อัน ปี วี ต็อห ดี เฆ, “โอว ซี หมาณ มี อู โมยว ดี เบ. โอว หมาณ, แตห เบ ดอน อี ดึห ตัห บีโหยะ ครีว แปะ แฮะ พาด ตัห เบ ดี อี เฮา อี แฮะ ยัม, แตห เบ ตัห ดัว ดี โอว.” โคว, รันซู เฆ ตี, เฆ มูห ดูอี อาโมยว อาซามาน อี อึง ดี ตา บีโหยะ ครีว.

25 เฆ มืร วี กาโพรม ดี ต็อห ดี อัน, “อึร, เย แฮะ โคย แฮะ ฌอนโฌม ดี ดัว ดี แม.” เฆ บอ ดึห ฮึบ ดัะ ดี ตี. เฆ บอ บูต บีโหยะ ปี ดึห ตัห เฆ ดี รันซู เฆ ตึอน, เบลห แดง ฮึบ ตี. 26 บีโหยะ ปี หมาณ อัน ดี เฆ ตี, เฆ บอ ซัะ. อึณ จัน อู แหรณ ดี บู มาย็อห เซเคน. อึณ ปี มอก ฆึร ดี อา ซัะ. แดง ตี, เฆ แฮะ ปึอน บอ ราง ซีมัณ ครีว, มากาแวะ, บอ บีก เรณ แฆ ปี ตา เฆ คูนดีคัม ดูอี มีดีอาน. เฆ แฮะ ปึอน บอ วัน แมง มังปร็อง กาฮาต. 27 อากีดีโอน วี ดึห ครีว เฆ ตี, วี โบง อารึบ ซีโตว เอโพด, อูน ดี มืง ออพารัะ อี มูห โดง กอย บรีม อัน. เฆ ดูอี อีซาเรลัะ บอ แวน เฌาพรา, วี ฮาว กรึบ ซีโตว อี ปี อารึบ ราง ตี. อาตี, อึณ บอ แบน ปี ยอต เฆ คืม ดี อากีดีโอน บอ ดี ดูอี แคง อึณโฮม อัน.

28 ปาย ตี เฆ ดูอี มีดีอาน บอ ชึม ดี เฆ ดูอี อีซาเรลัะ. เฆ มืร อาว ฮู ปึอน ดี ปีคึก เฆ ดอ เหมา. มืง บอ มืง บอ เยน ดาคึย ดอ มูห โจว อากีดีโอน, อาดา พวน ฆึร ซีนัม.

29 อากีดีโอน อี จืร บอ อาเยรูบบาลัะ, อี มูห ฆอน อาโยวอาด บอ วี วีว ดี มืง บรีม อัน, วี กอย ดี ตี. 30 อัน มึห ฆอน อีมาย บู ฆึร วี โกบ อีบึณ อัน มืร แฮะ กืน กาเซา. 31 อีบึณ เตียะ อัน อี กอย ดี มืง เซเคม, อัน บอ มึห ฆอน อีมาย อู วี. อัน บอ แตห จืร อาบีเมน. 32 อากีดีโอน อี มูห ฆอน อาโยวอาด ตี, อัน มืร แฮะ กัด กาเซา, อัน บอ ยัม. เฆ บอ ฮาว ดีบ โดว โบ็ง อัน แคง บาเรว อาโยวอาด อี มูห ฆูณ อัน อี กอย ดี มืง ออพารัะ อี มูห โดง กอย เฆ ดูอี อาบีเอจา ตึอน.

33 วาย แฮะ ฮอต ยัม อากีดีโอน, เฆ ดูอี อีซาเรลัะ วี แวน เฌาพรา. เฆ วี กรึบ เฌา บาลัะ, วี อืบ มยูก บาลัะเบเรด, ต็อห อึณ มูห เฌาพรา ปี กรึบ เฆ. 34 เฆ มืร อาว ฮู นัมโหลห เฌาพรา อี มูห เฌาพรา ปี กรึบ เฆ, อี แฮะ คยอด เฆ, แตห เฆ ลอด ดี รันซู เฆ อี แฮะ ดึอม กอย โรบ เฆ. 35 แดง ตี เฆ มืร ตู วี โบง เวียะ เฆฌู ดี หลูกหลาน อาเยรูบบาลัะ อี มูห อากีดีโอน โกบ อี หมึอม ดอน โมยว แปะ แฮะ โบง อัน ดี ดูอี อีซาเรลัะ.