คาน 9
ฆอน อากีดีโอน วี อี จืร อาบีเมน ตึอน บอ วี ฮาว ดี มืง เซเคม โดง กอย บีนอง มา อัน. อัน บอ กาลาง ดี เฆ บอ เฆ ครึร มา อัน บอกาเฆลียด ต็อห, 2 “แตห เบ วี กาลาง ดี ดูอี แคง มืง เซเคม ดอน อี, ‘เบ ดี ต็อห ปาย เหมา, เบ ซี แตห ฆอน อากีดีโอน บู ฆึร วี อึบ มืง เบ นี? เซ อาว ปาย ตี เบ ซี แตห มี ฆอน อีมาย อัน อู วี อึบ? อา เหมา แหนน ดี หมึอม? มาแล, เบ แกวะ ปีว บอ โอว แฮะ มูห ดูอี อาโมยว เบ.’”
3 บึร อัน เฆ ตึอน แฮะ วี กาลาง โฆรห ตี, แตห ดูอี แคง มืง เซเคม บอ มืง นับ. เฆ บอกาเฆลียด บอ แบน น็อห ซี โดบ อาบีเมน โกบ มูห อัน บีนอง เฆ. 4 ดูอี เฆ ตี บอ ดึห รึอน แคง โฌง เฌา บาลัะเบเรด อาดา บู ฆึร เซเคน อี ปี พวน ฆึร ดี อา กยาบ, ดัว ดี อัน. อัน บอ ดึห รึอน ตี, วี ฌาง ดา ซึก, แตห เฆ โดบ อัน. 5 อัน บอ วี ฮาว ดี กาง ฆูณ อัน อี กอย แคง มืง ออพารัะ ตึอน. อัน บอ วี ง็อห ยัม เฆ บีนอง อัน บู ฆึร วี อี มูห ฆอน อาเยรูบบาลัะ, แตห เฆ ยัม แดง มาว อู โบ็ง. อึณ บอ ฆีด มี อาโยวทาม อี มูห ฆอน เตียะ อาเยรูบบาลัะ. อัน แฮะ ลอด ยัม โกบ แฮะ เครียง อัน โดว อัน. 6 ดอ อัน ตี เฆ ดูอี แคง มืง เซเคม บอ ดูอี แคง โดง จืร มีลอ, เฆ บอกาเฆลียด แฮะ ตัห กาฌูะ โดง มึห เฮ เทเรบ โคบ ร็อง อี กอย แคง มืง เซเคม ตึอน. เฆ แฮะ ต็อห ดี โจะ อาบีเมน แบน คูนดีคัม.
7 อาโยวทาม บอ ยึร ลอง อัน ตี, อัน มืร วี โฮะ แดง นอน ฆีราเจม, วี ดัด ตาง ตาง ต็อห, “อึย เบ ดูอี แคง มืง เซเคม, แตห เบ โทม โฆรห โอว. ปัน ตี เฌาพรา มืร ดี โทม โฆรห เบ. 8 ดอ มึอน อึณ มึห อาดา อู เฌณ ดอ แฮะ ตัห กาฌูะ เฮ แคง แปร, แตห เฆ ร็อห เฮ อี ดี แบน คูนดีคัม อี อึบ เฆ. เฆ บอ กาลาง ดี เฮ นามัน ต็อห, ‘หมาณ แตห แม แบน คูนดีคัม อี อึบ เย.’
9 เฮ นามัน ตี วี ต็อห, ‘โอว ตู คัม ดี แวน นามัน โอว อี แตห ซาเร ดี ดูอี บอ ดี เฌา แบน กาดัง แบน กาดัง. โอว ตู คัม ดี อึบ เบ อาโมยว เฮ.’
10 แฮะ ฮอต ปาย ตี แคะ กอย เฆ เฮ ปี วี กาลาง ดี เฮ ดีปู ต็อห, ‘หมาณ แม แบน คูนดีคัม เย.’
11 มาแล, เฮ ดีปู วี ต็อห ดี เฆ, ‘โอว ตู คัม ดี แวน เบล โอว อี งาม อี ซีแงห. โอว ตู คัม ดี อึบ เบ อาโมยว เฮ.’
12 ปาย ตี แคะ กอย เฆ เฮ ปี วี กาลาง ดี เฮ มางูน ต็อห, ‘หมาณ, แตห แม แบน คูนดีคัม เย.’
13 มาแล, เฮ มางูน ปี วี ต็อห ดี เฆ, ‘โอว ตู คัม ดี แวน อึม มางูน โอว นี, อี โบง แตห อึณ แบน น็อห ดาคึย ดี เฌา แบน กาดัง แบน กาดัง บอ ดี เฆ ดูอี. โอว ตู คัม ดี อึบ เบ อาโมยว เฮ.’
14 ดี กาแดะ นี, แคะ กอย เฮ บอกาเฆลียด วี ต็อห ดี เฮ มาอาต, ‘แตห แม แบน คูนดีคัม เย.’
15 เฮ มาอาต ตี วี ต็อห ดี เฆ, ‘เซ เบ ซี แตห โอว แบน คูนดีคัม เบ, แตห เบ ตัห ครูด ครึม ยาบ โอว นี. เซ อาว ปาย ตี, แตห เงา เลห ดี รา มาอาต โอว นี, วี กาซึม เฮ อารีด อี กอย ดี นอน เลบานูน.’
16 ดอ ตี นี เบ แฮะ โจะ แฮะ ดาง อาบีเมน แบน คูนดีคัม. แตห เบ เฌณฌา โยว เบ มึห น็อห ซืร น็อห หมาน ดี โบง ปาย ตี. แตห เบ เฌณฌา โยว เบ แฮะ โรวเซ ดี อาเยรูบบาลัะ บอ ดี บีนอง วอแว อัน, โยว เบ แฮะ วี เวียะ ฆูง เฆฌู แปะ แฮะ โบง อัน อี คึกคัม กาเซา ตึอน. 17 แตห เบ โหลห ลอง ฆูณ โอว แฮะ คัม ดี กาโฆห ดี ดา ซึก ดาง เบ. อัน บอ คัม ดี จูน อาซาก อัน, แตห อัน ปึอน ดี คยอด เลห เบ ดี ดูอี มีดีอาน. 18 อาตึร นี, เบ ยี แฮะ วี โบง กาบัห ดี บีนอง วอแว ฆูณ โอว. เบ แฮะ วี ง็อห ยัม ฆอน อีมาย อัน บู ฆึร วี แดง มาว อู โบ็ง. แฮะ ฮอต, เบ แฮะ วี ดาง อาบีเมน อี มูห ฆอน หมาย, แตห อัน วี แบน คูนดีคัม อี อึบ ดูอี แคง มืง เซเคม. เบ แฮะ โบง ปาย ตี โกบ มูห อัน บีนอง วอแว เบ. 19 เซ เบ โบง ปาย ตี ดอ มึห เบ น็อห ซืร น็อห หมาน บอ โบง ซืร ซืร หมาน หมาน ดี อาเยรูบบาลัะ บอ ดี เฆ บีนอง วอแว อัน, แตห เบ โบยว ดาคึย ดี โดบ อาบีเมน. อาบีเมน มืร, แตห อัน โบยว ดาคึย ดี กอย รึม โดบ เบ. 20 มาแล, เซ อาว ปาย ตี, แตห เงา เลห ดี อาบีเมน, แตห อึณ กาซึม โตต ดูอี แคง มืง เซเคม บอ ดูอี แคง มืง มีลอ. แตห เงา ปี วี เลห ดี ดูอี แคง มืง เซเคม บอ ดี ดูอี มืง มีลอ ปี วี กาซึม อาบีเมน.”
21 แฮะ ฮอต กาลาง ปาย ตี อาโยวทาม บอ วี โยว อาบีเมน ตี อี มูห อีกัด อัน. อัน บอ วี เตา ฮาว ดี มืง บีรา. อัน บอ กอย ดี ตี.
22 อาบีเมน บอ อึบ ดูอี อีซาเรลัะ อาดา โอย ซีนัม. 23 วาย อัน ตี เฌาพรา บอ จัร กานัม ฮาย โบง แตห อาบีเมน เฆ ดูอี แคง มืง เซเคม ลาย กาลูต. โคว, เฆ ดูอี แคง มืง เซเคม แฮะ กาบัห ดี อาบีเมน. 24 เฌาพรา แฮะ โบง ปาย ตี แตห อึณ วี เวียะ หมาบ ปี โบง อาบีเมน บอ เฆ ดูอี แคง มืง เซเคม ดอ ง็อห ยัม เฆ ฆอน อาเยรูบบาลัะ บู ฆึร วี ตึอน. 25 ดูอี แคง มืง เซเคม ตึอน บอ ฮาว บัร อึณเตณ แดง นอน ดอน นอน แตห เฆ โฌน บอ ดึห โกรวกราม เฆ ดูอี อี ว็อะ โดบ อึณเตณ ตี. อี เฮา บอ วี กาลาง ลอง อัน ตี ดี อาบีเมน.
26 ดอ อัน ตี อึณ มูห อากาลา อี มูห ฆอน อาเอเบด. บอ อัน บอ เฆ บีนอง วอแว อัน แฮะ ตัห กอย แคง มืง เซเคม ตึอน. เฆ ดูอี แคง มืง เซเคม ตี มืร โรวเซ อัน บอ หณึม น็อห อัน. 27 เฆ บอ ฮาว แคง มาน เบล มางูน เฆ บอ เบต เบล มางูน บอ แณต แตห อึณ แบน อึม มางูน. แฮะ ฮอต, เฆ บอ ลึบ แคง โฌง เฌาพรา เฆ, แตห เฆ โบง บลอย. เฆ บอ เดียง บอ โฮม โบยว โบยว เกยา เกยา บอ ดืง บอ เอห อาบีเมน. 28 อากาลา อี มูห ฆอน อาเอเบด ตึอน วี ต็อห, “อาบีเมน ตี มูห อาเซ? โกบ มาเซ เอ ดูอี แคง มืง เซเคม นี โลว โฆม อัน? อัน มูห ฆอน อาเยรูบบาลัะ. อาเฌบูลา บอ มูห แดเจณ อัน. แตห เอ วี คัม ปี อึบ ดีแบ ฆูณ ดัง เอ ดี เอ. อึณ มูห อาฮาโมว. อัน มูห ฆูณ ดัง อาโมยว เอ อี แฮะ หมาน อาคาคัร. 29 เซ ดูอี แคง มืง นี บอกาเฆลียด โพรม รึม โดบ โอว, โอว ดี บอ แป บอ ออง อาบีเมน ตี. โอว ดี บอ ต็อห ดี อัน, ‘แดะ ตัห ดา ซึก แม บอกาเฆลียด.’”
30 ปาย ตี อาเฌบูลา อี มูห ดา กาณา อี อึบ มืง ตึอน บอ ยึร โฆรห ปี กาลาง อากาลา ตี, อัน บอ รู กาเซา. 31 อัน บอ วี จัร ดาลาม อัน ฮาว โดง กอย อาบีเมน แกวะ แตห อี นับ. อัน แตห เฆ กาลาง ดี อาบีเมน ต็อห, “อากาลา อี มูห ฆอน อาเอเบด บอ เฆ บีนอง วอแว อัน, เฆ แฮะ ตัห กอย ดี มืง เซเคม. เฆ แฮะ กาซูห แตห ดูอี แคง มืง วี กาบัห ดี แม. 32 โคว, แคง หมึร นี กาแต ซึอม, บอ แม บอ เฆ ดูอี อี โดบ แม, แตห เบ กาโทะ เลห เครียง เบ แคง โดง นา. 33 ฮี ฌัม ซีณวัห เจว อาต เลห ซีแง, ดอ ตัห กาโฆห อากาลา บอ เฆ ดูอี อัน ดี แม ตี, แตห แม กาโฆห ดีงัณ ดอ อัน ตี อู เฌณ บอ โบง แคะ กาอาบ โบง.”
34 ปาย ตี อาบีเมน บอ เฆ ดูอี อัน บอกาเฆลียด บอ กาโทะ แคง หมึร ตี. เฆ บอ กาย็อห แบน พวน พึง, บัร ดี กาโฆห ดี ดูอี แคง มืง เซเคม ตี. 35 ดอ แฮะ เลห จ็อง อากาลา ดี บาง มาโลห มืง, อาบีเมน เฆ ดูอี อัน เฆ บอ เลห โดง เครียง เฆ อู เฌณ.
36 อากาลา บอ ยึร ดูอี เฆ ตี, อัน บอ กาลาง ดี อาเฌบูลา ต็อห, “ยอด, ดูอี กืน กาเซา แฮะ ตัห โลง ดี นอน ดอย.” อาเฌบูลา วี ต็อห ดี อัน, “ปี ยึร แม อี แหนน อารึบ ดูอี ตี, อึณ มูห กามึก นอน ดอย.”
37 อากาลา ปี วี กาลาง ปอ อู เฌณ ต็อห, “แตห แม ยอด, ดูอี แฮะ ตัห โลง ดี นอน. มัง อี แฮะ ตัห โดบ อึณเตณ อี มึห เฮ เทเรบ โดง กอย เฆ ดูอี อี แมน เบดาง.”
38 ปาย ตี อาเฌบูลา วี ต็อห ดี อัน, “แม แฮะ ดึอม ลูกตาย อาบีเมน. น็อห ปีคึก แม ตี, อึณ วี กอย ดี เหมา ดอ ตี นี? แม แฮะ ต็อห, ‘อาบีเมน มูห อาเซ, แตห เอ กอ โลว โฆม อัน.’ ดูอี ปี ลูกตาย ปี แซะ แม ตี, แม โลว ฮาว กาโฆห ดี เฆ ดอ ตี นี.”
39 อากาลา มืร แยต ฮาว เฆ ดูอี แคง มืง เซเคม ตึอน, แตห เฆ ฮาว กาโฆห ดี อาบีเมน เฆ ตี. 40 อากาลา บอ วี เตา อัน. อาบีเมน บอ คูงครัห โดบ อัน. ดูอี มืร แฮะ กืน อี แฮะ ปาะ แฮะ เกห ยัม กอ วี ฌัม ดี บาง มาโลห มืง ตึอน. 41 อาบีเมน บอ วี กอย ดี มืง อารูมา ตึอน. อาเฌบูลา บอ โฮว เลห อากาลา เฆ บีนอง วอแว อัน แคง มืง เซเคม ตึอน.
42 บอ ฌัม ปา แคหณา ดูอี แคง มืง เซเคม ตึอน ดี เลห ฮาว ดี มาน เฆ บอ ดี โดง นา เฆ. อี เฮา บอ แตห อาบีเมน นับ ลอง อัน ตี. 43 ปาย ตี อัน บอ กาย็อห ดูอี อัน แบน โอย พึง, แตห เฆ ฮาว บัร ดี มาน เฆ บอ ดี โดง นา ตี. ดอ เลห ตัห ดูอี เฆ ตึอน, อัน มืร ฮาว กาโฆห ดี เฆ อู เฌณ. 44 อาบีเมน เฆ ดูอี อัน อาดา อู พึง วี กาแบลบ ฮาว บัร ดี บาง มาโลห มืง. ดูอี อัน อาดา อา พึง ตึอน บอ วี กาโฆห ง็อห ยัม โตต ดูอี อี กอย แคง มาน บอ แคง โดง นา เฆ. 45 อาบีเมน บอ กาโฆห ดี ดูอี แคง มืง ตี ดอง วัน. อัน บอ ปึอน มืง ตี บอ ง็อห ยัม ดูอี เฆ ตี. อัน บอ ปยาต แวน แรง มืง, แตห อึณ โจห ลึร. แฮะ ฮอต, อัน บอ วี ดึห แซะ ฮูห ดอน นา ดอน โปละ แคง มืง ตี.
46 เฆ ดูอี อี บัร กาโช็ง จา ตึอน กอ ยึร ลอง อัน ตี, เฆ บอ เตา ฮาว, เครียง แคง โฌง เฌา เบรีด ตึอน. 47 อี เฮา อู วี บอ กาลาง ดี อาบีเมน ลอง เฆ อี แฮะ ตัห กาฌูะ บัร ดี โฌง ตึอน. 48 ดอ อัน ตี บอ อัน บอ ดูอี อัน บอ วี โฮะ ดี นอน ซาลาโมน. อัน บอ ดึห มึย, แดบ รา เฮ มัง กาล็อะ, วี ฆอด ฮาว รา เฮ ตี. อัน บอ กาลาง ดี เฆ ดูอี อี โดบ อัน, แตห เฆ ดอน อี โบง โดบ ปี โบง อัน. แตห เฆ โบง ครัน ครัน, แฮ แฮ. 49 ปาย ตี ดูอี อัน ดอน อี บอ แดบ ดี โฆ็ง รา เฮ โดบ อัน. แฮะ ฮอต, เฆ บอ ดึห รา เฮ เฆ ตี, เบลห อูน ดี แรง โดง เครียง เฆ. เฆ บอ วี ดึห เงา, โดะ แตห ดูอี อี กอย โดง ตี บอ ยัม กาซึม โตต. เฆ ดูอี อี แฮะ กอย โดง ตี บอ อีบึณ บอ อีมาย, เฆ กอย มอก อู แหรณ วี.
50 วาย อัน ตี อาบีเมน บอ วี ฮาว ดี มืง เซบีด. เฆ บอ ฮาว โรบ บอ รึบ มืง ตี. 51 แคง มืง ตี, อึณ บอ มึห โฮว จา อี มัน ซีคยา. ดูอี แคง มืง ตี บอ มืง, เฆ บอ ฮาว กอย โตต แคง โฮว จา ตี. เฆ วี กาบีด คัดเซา นา แคง. แฮะ ฮอต, เฆ วี โฮะ กอย แดง กาตูะ โฮว ตี. 52 อาบีเมน บอ ตัห กาโฆห ดี ตี. อัน บอ วี ฮาว ดี บาง มาโลห โฮว จา ตี บอ ดึห เงา, ต็อห ดี โดะ กาซึม โตต. 53 อีบึณ อู วี บอ ดึห มาว ปี กรีด เฆ คามูน. อัน วึณ โลง, แตห อึณ บอ ดึร ฆีณ อาบีเมน, แตห กาอาง ฆีณ อัน กอ กาลาต.
54 อัน มืร วี ปีครัน อัน ดี แดะ ดีแบ อัน อี โดบ อัน ต็อห, “แตห แม ทอด มาปัวะ ลาง แม ตี ง็อห ยัม โอว. โอว ตู ซี แตห อี ปึอน ต็อห, ‘อีบึณ แฮะ ง็อห ยัม อัน.’” โคว, แดเจณ อัน บอ ง็อห ยัม อัน. 55 เฆ ดูอี อีซาเรลัะ บอ ยึร ลอง อาบีเมน แฮะ ยัม, เฆ ดอน อี บอ วี เวณ ดี กาง เฆ ราง อาเซ ราง อัน.