วาย แฮะ ยัม อาบีเมน, อาโทวลา อี มูห ฆอน อาพูวา บอ หลาน อาตอตอ บอ วี ตัห คยอด เฆ ดูอี อีซาเรลัะ. อัน มูห ดูอี แคง ครึร อาอีซาคา อี กอย แคง มืง ซามีรา ดี นอน อาเอพารีม. 2 อัน บอ แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา อา ฆึร ดี โอย ซีนัม. ดอ ยัม อัน, เฆ บอ ดีบ โดว โบ็ง อัน แคง มืง ซามีรา.

3 วาย แฮะ ยัม อาโทวลา ตี, อายาอีรา อี ตัห มืง ฆีเลอาด วี ตัห แบน ดา ตาง อี ซูงพยาด ดารา ดี เฆ ดูอี อีซาเรลัะ อาดา อา ฆึร ดี อา ซีนัม. 4 อัน มึห ฆอน อีมาย โอย ฆึร วี. เฆ บอ ป็อะ มาลา โอย ฆึร โดว. เฆ บอ อึบ มืง โอย ฆึร มืง อี กอย แคง กาดาย มืง ฆีเลอาด ตึอน. มืง ปี อึบ เฆ ตี บอ จืร มืง ฮาโวดยาอีรา กอ ฌัม ดอ ตี นี. 5 อายาอีรา ตี บอ ยัม, เฆ บอ ดีบ โดว โบ็ง อัน แคง มืง กามูน.

6 เฆ ดูอี อีซาเรลัะ ปี วี โบง หมาบ อี ตู ล็อะ น็อห เฌาพรา. เฆ วี กรึบ เฌา บาลัะ บอ นาง กานัม เอซาทารีด. อาว วัน มี แคะ ตี. เฆ วี กรึบ บอ เฌา ปี กรึบ ดูอี แคง มืง อาราม, ดูอี แคง มืง ซีโดน, มืง โมวอาบ, มืง อัมโมน บอ เฌา ปี กรึบ ดูอี พีลีที. เฆ วี แวน เฌาพรา ปี กรึบ เฆ, ตู วี บึง อัน เฌา. 7 ปาย ตี เฌาพรา บอ รู กาเซา ดี เฆ ดูอี อีซาเรลัะ. อัน แตห ดูอี พีลีที บอ ดูอี อัมโมน ตัห กาโฆห ดี เฆ. 8 ซีนัม ตี ดูอี เฆ ตี บอ ปยาต เฆ ดูอี อีซาเรลัะ อู เฌณ. เฆ บอ คาหนาบ ดูอี อีซาเรลัะ อี กอย บลาก นา เลห ซีแง อึม แบลง ยอดาน แคง กาดาย มืง ฆีเลอาด อี มูห โดง กอย เฆ ดูอี อาโมวรีด. 9 เฆ ดูอี อัมโมน บอ กาโลห อึม แบลง ยอดาน, ตัห กาโฆห ดี ดูอี อายูดา บอ ดี ดูอี ครึร อาเบนยาม บอ ครึร อาเอพารีม. ปาย ตี เฆ ดูอี อีซาเรลัะ แฮะ คัม ดูก ตาง กาเซา. 10 ดอ อัน ตี เฆ ดูอี อีซาเรลัะ บอ วี ซาคึร แดะ เฌาพรา ต็อห, “เย แฮะ ฮอต โบง หมาบ อี กาบัห ดี แม เฌาพรา. เย แฮะ แวน แม เฌาพรา ปี กรึบ เย, แฮะ วี กรึบ เฌา บาลัะ.”

11 เฌาพรา วี ต็อห ดี เฆ, “ดอ มูห ดูอี แอฆึบ, ดูอี อาโมวรีด, ดูอี อัมโมน, 12 ดูอี พีลีที, ดูอี ซีโดน, ดูอี อาโมยว อามาเลก บอ ดูอี อาโมยว อามอนี, ดอ แฮะ คาหนาบ เฆ ดี เบ อาต นี, เบ มืร แฮะ ยาม แดะ โอว. ดอ อัน ตี โอว แฮะ คยอด เบ. 13 มาแล, เบ ยี วี แวน โอว, วี กรึบ เฌา แบน โมยว แบน โมยว ปี กรึบ เฆ อี เฮา. โกบ อึณ ปาย ตี โอว มืร อาว ฮู คยอด เบ. 14 แตห เบ ฮาว ยาม แดะ เฌา แปะ แฮะ ร็อห เบ ตี, แตห เฆ คยอด เบ ปัน ดี กาดูห เบ ดูก ตาง.”

15 ดูอี อีซาเรลัะ เฆ แนะ อี หมาณ ดี เฌาพรา, ตู จู. เฆ ต็อห, “เย แฮะ ฮอต กาลึบ ดี โบง หมาบ, แตห แม เฌา โบง ดี เย แคะ ปี อึง แม. มาแล, เย หมาณ, แตห แม คยอด แล เย คา นี.” 16 ปาย ตี เฆ บอ วี แวน เฌา ปี กรึบ อี เฮา ตึอน. เฆ บอ วี กรึบ มี เฌาพรา. อึณ บอ วี แบน น็อห กาเว ดี เฌาพรา, อาว ฮู คัม ดี ยอด ดูก ปี คัม เฆ ดูอี อีซาเรลัะ.

17 ดอ อัน ตี เฆ ดูอี อัมโมน แฮะ แรน ซึก, ตัห คยัะ ดี มืง ฆีเลอาด. เฆ ดูอี อีซาเรลัะ มืร แฮะ ตัห กาฌูะ ดี มืง มีฌาพา. 18 เฆ อี มูห ดา ตาง แคง ครึร ดูอี อีซาเรลัะ บอ แคะ กอย ดูอี แคง มืง ฆีเลอาด บอกาเฆลียด, เฆ บอ ตัห ลาย กามวน ซังคยาง. เฆ ต็อห, “วี เหมา อาว ต็อห, อาเซ กาโฆห ดี อาต อี เฮา ดี ดูอี อัมโมน เฆ ตี, ดูอี วี ตี ดี แบน ดา อี อึบ อี แยต ดูอี แคง มืง ฆีเลอาด บอกาเฆลียด.”