อาเยพาดา มูห ดา ซึก อี ยัะ กาโฆห. อัน บอ กอย แคง มืง ฆีเลอาด. อัน บอ มูห ฆอน ยา มาลัม. ฆูณ อัน มูห อาฆีเลอาด. 2 อีบึณ อาฆีเลอาด ปี วี มึห ฆอน อีมาย แบน วี แบน วี. ดอ วี ดี ตาง ฆอน อีมาย อัน เฆ ตี, เฆ บอ วี โฮว เตา อาเยพาดา ตึอน. เฆ ต็อห ดี อัน, “แม ตู กาอาบ ปึอน คาฆูน แคง อึณโฮม เย นี. โคว, มา แม อาว มูห มา เย.” 3 ปาย ตี อาเยพาดา บอ เตา โดง กอย อีกัด อัน เฆ ตี, วี ฮาว กอย ดี มืง ตอพัะ. อาว เหลณ โดง กอย อัน ตี อึณ บอ มึห เฆ ดูอี กืน อี ตู มึห ดีโคว. เฆ แฮะ ตัห กาฌูะ โดง กอย อัน ตี, แบน ดีแบ อัน.

4 วาย อัน ตี อาว บอ เหลณ เฆ ดูอี อัมโมน บอ ตัห กาโฆห ดี ดูอี อีซาเรลัะ. 5 แฮะ ฮอต ปาย ตี เฆ ดา ตาง อี อึบ อี แยต เฆ ดูอี แคง มืง ฆีเลอาด ตึอน, เฆ บอ วี ฮาว แดะ อาเยพาดา. 6 เฆ บอ กาลาง ดี อัน ต็อห, “ตัห, แตห แม วี แบน อี แยต เย กาโฆห ดี ดูอี อัมโมน เฆ ตึอน.”

7 มาแล, อาเยพาดา วี ต็อห ดี เฆ, “เบ แฮะ ฌ็อง โอว, เบ กอ โฮว เลห โอว ตัะ กาง ฆูณ โอว. ดอ ตี นี เบ แฮะ ฌัม ดูก, เหมา อึณ ปาย ปี วี ตัห แดะ เบ ดี โอว?”

8 ดูอี เฆ ตึอน วี กาลาง ดี อัน บอ ดองบาน อัน ต็อห, “เย แฮะ วี ตัห แดะ แม ดอ ตี นี. โคว, เย ซี แตห แม ฮาว รึม โดบ เย, กาโฆห ดี ดูอี อัมโมน เฆ ตี. แฮะ ฮอต เย ดี แตห แม แบน อี อึบ อี แยต เย ดูอี มืง ฆีเลอาด บอกาเฆลียด.”

9 อาเยพาดา ปี วี ต็อห ดี เฆ, “เซ เบ วี แดะ โอว เวณ กาโฆห ดี ดูอี อัมโมน เฆ ตี, เซ เฌาพรา ดี แตห โอว แป เฆ, โอว ดี ปึอน ดี แบน ดา อี อึบ อี แยต เบ อาคัร หมาน?”

10 เฆ วี ต็อห, “อึร, เย แฮะ ฮอต โพรม, แตห บอ เฌาพรา โทม ลอง อัน ตี. เย ดี โบง อาคาคัร ดอน โมยว ปี ต็อห แม.” 11 ปาย ตี อาเยพาดา บอ ฮาว โดบ เฆ ดา ตาง แคง มืง ฆีเลอาด ตึอน. แคะ กอย ดูอี บอกาเฆลียด บอ กาโพรม ดี โจะ ดี ดาง แตห อัน แบน ฆีณ ซึก เฆ. อาเยพาดา บอ วี กาลาง โฆรห แปะ แฮะ กาลาง อัน ดี เฆ, แตห เฌาพรา โทม. ดอ อัน ตี อัน กอย แคง มืง มีฌาพา ตึอน.

12 ดอ อัน ตี อาเยพาดา วี จัร ดาลาม อัน ฮาว โดง กอย คูนดีคัม ดูอี อัมโมน บอ กาลาง ดี อัน ต็อห, “แม มึห ดี ลูต น็อห มาเซ แตห แม กอ ลึบ ตัห กาโฆห ดี เย?”

13 คูนดีคัม ดูอี อัมโมน วี กาลาง ดี เฆ ดาลาม อาเยพาดา ต็อห, “ดอ เลห เฆ ดูอี อีซาเรลัะ แคง มืง แอฆึบ ตึอน, เฆ แฮะ ดึห กาดาย โอว, อึณ บอ จูห ดี แบลง อึม อารานูน กอ วี ฌัม ดี แบลง อึม ยาโบก บอ ดี แบลง อึม ยอดาน. ดอ ตี นี แตห แม วี ดัว วีว ดาคึย ดาคึย กาดาย ตี.”

14 อาเยพาดา ปี วี จัร ดาลาม อัน ฮาว กาลาง ปอ อึณ ปัว ต็อห, 15 “อาเยพาดา ต็อห ดี แม, อาว มูห ดูอี อีซาเรลัะ อี ดึห กาดาย ดูอี โมวอาบ ฆาย กาดาย ดูอี อัมโมน.

16 ลอง อัน ตี อึณ ปาย นี. ดอ เลห เฆ ดูอี อีซาเรลัะ แคง มืง แอฆึบ, เฆ บอ กาโลห ฮาว แคง แปร กาฮ็อห. แฮะ ฮอต, เฆ บอ วี ฌัม ดี บาง อึม ดีโหนง เรณ ดี โดง จืร ซาเดด. 17 ดอ อัน ตี เฆ ยี วี จัร ดาลาม เฆ ฮาว โดง กอย คูนดีคัม มืง เอโดม, หมาณ แตห เฆ ปึอน ดี กาโลห ฮาว แคง กาดาย อัน. มาแล, คูนดีคัม ตี, อัน ยี ตู ควาง เฆ ฮาว. เฆ ปี วี ฮาว หมาณ ดี คูนดีคัม มืง โมวอาบ, คูนดีคัม ตี มืร, ตู ควาง เฆ ฮาว. โกบ อึณ ปาย ตี เฆ ดูอี อีซาเรลัะ บอ กาดูห ดี กอย ดี โดง จืร ซาเดด.

18 เฆ วี ฮาว แคง แปร กาฮ็อห วี กาดูห ดี แลบ ฮาว โคบ มืง เอโดม ฆาย มืง โมวอาบ, กอ วี ฮาว ฌัม นา เลห ซีแง มืง โมวอาบ นา ดอย อึม แบลง อารานูน. เฆ บอ คยัะ ดี ตี. เฆ ยี ตู ปึอน ดี กาโลห อึม ตี, ตู ปึอน ดี ลึบ แคง มืง โมวอาบ. โคว, แบลง ตี แฮะ มูห กาอูน กาดาย ดูอี มืง โมวอาบ.

19 วาย อัน ตี เฆ ดูอี อีซาเรลัะ ปี วี จัร ดาลาม เฆ ฮาว โดง กอย คูนดีคัม อาซีโฮน อี มูห ดูอี อาโมวรีด อี อึบ มืง เฮซาโพน, แตห เฆ หมาณ ดี กาโลห ฮาว กาแต มืง เฆ ตี, วี ฌัม แคง มืง เฆ. 20 มาแล, คูนดีคัม อาซีโฮน ยี ตู ควาง แตห เฆ ฮาว. แดง ตี, อัน บอ วี แดะ กาฌูะ ดา ซึก อัน, วี ตัห คยัะ ดี มืง ยาฮาด, วี กาโฆห ดี เฆ ดูอี อีซาเรลัะ.

21 เฌาพรา ปี กรึบ เฆ ดูอี อีซาเรลัะ ยี วี แตห เฆ ดูอี อีซาเรลัะ แป คูนดีคัม อาซีโฮน เฆ ดา ซึก อัน. ปาย ตี เฆ ดูอี อีซาเรลัะ บอ ปึอน กาดาย ดูอี อาโมวรีด อี กอย แคง มืง เฆ ตี.

22 กาดาย ดูอี อาโมวรีด ปี ปึอน เฆ ตี, อึณ บอ จูห ดี อึม แบลง อารานูน กอ วี โฮะ ฌัม ดี อึม แบลง ยาโบก. อึณ บอ บา บอ แปร กาฮ็อห, วี โลง ฌัม ดี อึม แบลง ยอดาน. 23 ลอง อัน ตี, อึณ บอ มูห เฌาพรา อี มูห เฌาพรา ปี กรึบ เฆ ดูอี อีซาเรลัะ, อัน แฮะ โฮว เตา ดูอี อาโมวรีด อาดา ดูอี ปี อึบ อัน อี มูห ดูอี อีซาเรลัะ. โคว, แม ตู ปึอน ดึห วีว กาดาย มืง ตี. 24 เซ อึณ มูห แม, แม ดี บอ ดึห แคะ ปี ดัว เฌา เคมูซา ดี แม. เย มืร โบง ปาย ตี เย อึบ มี แคะ ปี อาบ ดัว เฌาพรา ปี กรึบ เย ดี เย. 25 แม ทาง แม แฮะ กยัะ แฮะ หมึอม หลึอม คูนดีคัม อาบาลาก อี มูห ฆอน อาจีพอ อี อึบ ดูอี โมวอาบ ตึอน? อัน แฮะ ดึอม ลาย ตัะ ลาย กาแคณ ดี ดูอี อีซาเรลัะ, แฮะ ดึอม กาโฆห ดี เฆ. 26 อาดา โอย มาย็อห ซีนัม ดูอี อีซาเรลัะ แฮะ ปึอน ดี อึบ มืง เฮซาโพน, มืง อารอ บอ เรา เฆ อี กอย กาตัด มืง เฆ ตี บอ มืง ตาง อี กอย ดี บาง อึม แบลง อารานูน ตึอน. ดอ อัน ตี, เหมา อึณ ปาย ปี ตู ดึห วีว แม มืง เฆ ตี? 27 ปาย ตี อาว มูห โอว อี ลูต, แม อี เหรต ดี กาลูต ดี โอว บอ ซี กาโฆห ดี โอว. เฌาพรา อี ดี ซูงพยาด ลอง อัน ตี. อาตึร นี แตห เฌาพรา ซูงพยาด อามู ตี ดี กาแต ดูอี อีซาเรลัะ ฆาย ดูอี อัมโมน.”

28 คูนดีคัม ดูอี อัมโมน ตึอน, อัน ยี ตู โทม โฆรห ปี กาลาง อาเยพาดา ดี อัน.

29 ดอ อัน ตี น็อห พึอม เฌาพรา บอ ตัห อึบ อาเยพาดา. อัน บอ กาโลห ฮาว ดี มืง ฆีเลอาด ฆาย มืง อามานาเซ, วี ฮาว กาปลูห ดี มืง มีฌาพา อี กอย แคง กาดาย มืง ฆีเลอาด ตึอน. อัน บอ แรน ดา ซึก อัน, วี โฮะ โดง กอย ดูอี อัมโมน. 30 อาเยพาดา บอ กาแซณ ดัว กาดีก ซัดฌา ดี เฌาพรา ต็อห, “เซ แม เฌา แตห เย ออง ดูอี อัมโมน เฆ นี, 31 เซ เย ฮี วี เลห โดง กาโฆห เย ดี ดูอี อัมโมน ตี, วี เวณ ดี กาง เย, วี อี เลห แคง กาง, ตัห รวห เย ดี อาต อี เฮา, โอว ดี ดัว ดี แม เฌา, แตห อัน แบน ปี ดี หลู อี โดะ ดี เงา.”

32 แฮะ ฮอต ปาย ตี อาเยพาดา บอ กาโลห อึม แตห อัน ปึอน ดี กาโฆห ดี ดูอี อัมโมน. เฌาพรา บอ แตห อัน แป เฆ. 33 อัน บอ กาโฆห จูห ดี มืง อารอ กอ วี ฮาว ฌัม ดี มืง มีเนด. อัน บอ ปยาต มืง อา ฆึร มืง, กอ วี ฮาว ฌัม บอ ดี มืง อาบีลาเครามีม. ปาย ตี เฆ ดูอี อัมโมน บอ ชึม ดี เฆ ดูอี อีซาเรลัะ.

34 ดอ วี ตัห ฌัม อาเยพาดา ดี กาง อัน แคง มืง มีฌาพา ตึอน, ฆอน ดีบยา อัน แฮะ กัร ฆรึง บอ ฆา ฮาว บัร ดี รวห อัน. 35 อัน ยี มึห มี ฆอน อีบึณ อู วี ตี. อัน บอ ยึร ฆอน อัน ตี, อัน บอ กายาต ครึง ตา อัน ต็อห, “อาลึร ฆอน อึย, แม แฮะ โบง แตห น็อห โอว กาปยาต ลึร โตต, แตห อึณ เซา กาเซา ดี น็อห โอว. โอว แฮะ ฮอต ดัว กาดีก ซัดฌา ดี เฌาพรา, อาว ฮู ปึอน วี กาวีว โฆรห ตี.”

36 ฆอน ดีบยา อัน ตึอน วี ต็อห, “เซ แม ฆูณ แฮะ ดัว กาดีก ซัดฌา ดี เฌาพรา, แตห แม โบง โดบ กาดีก ซัดฌา แปะ แฮะ ดัว แม ตี. โคว, เฌาพรา แฮะ ฮอต ดัม หมาบ ดี รันซู แม อี มูห ดูอี อัมโมน ตึอน.” 37 อัน วี ต็อห, “อึย ฆูณ, โอว หมาณ อาดา อู โมยว ดี แม. โอว หมาณ, แตห โอว ปึอน ดี กอย อาดา อา มาเฆียน, แตห โอว ปึอน ดี วีน ดีแล โดบ เฆ ฆึก โอว, แตห โอว ปึอน ดี วีน ดีแล แดง นอน, แตห โอว ปึอน ดี กลึร ดี เหงา โกบ โลว ยัม โอว ดอ ซี มูห โอว ดีบยา แฌด.”

38 อาเยพาดา มืร แตห ฆอน ดีบยา อัน ตี วีน ดีแล อาดา อา มาเฆียน. ฆอน ดีบยา อัน มืร โฮะ แล แดง นอน โย็ง บอ เฆ ฆึก อัน. เฆ บอ ฮาว กลึร ฮาว เหงา โกบ โลว ยัม อัน ดอ ซี มูห อัน ดีบยา แฌด, ตู ดัน มึห ฆอน. 39 ดอ แฮะ โนะ อาดา อา มาเฆียน, อัน บอ วี ตัห โดง กอย ฆูณ อัน. ฆูณ อัน มืร โบง โดบ แคะ ปี ดัว อัน กาดีก ซัดฌา ดี เฌาพรา. ฆอน อัน ตี บอ กาดูห ดี ยัม ดอ ซี มูห อัน ดีบยา แฌด. วาย อัน ตี อึณ บอ วี แบน ทูงฆยาม ดี เฆ ดูอี อีซาเรลัะ.

40 ดอน ซีนัม ฆอน ดีบยา เฆ เลห ฮาว วีน ดีแล อาดา พวน ซีแง, แตห เฆ ปึอน ดี ฮาว บยัะ ลอง น็อห กลึร น็อห เหงา เฆ, แตห เฆ โหลห ฆอน ดีบยา อาเยพาดา อี มูห ดูอี อาโมยว ฆีเลอาด ตึอน.