1 อาโยวซูอา วี แตห เฆ ดูอี อีซาเรลัะ ตัห กาฌูะ ดี มืง เซเคม. อัน มืร แดะ เฆ อี มูห ดา ตาง อี อึบ อี แยต เฆ บอ ดา ตาง อี ซูงพยาด ดารา บอ ดา ตาง อี อึบ มืง บอ แคะ กอย เฆ ดูอี อีซาเรลัะ บอกาเฆลียด, แตห เฆ ตัห กอย ดี อาต เฌาพรา.

2 อาโยวซูอา บอ กาลาง ดี เฆ ต็อห, “เฌาพรา อี มูห เฌาพรา ปี กรึบ ดูอี อีซาเรลัะ อัน ต็อห, ‘ดอ มึอน ดอ กอย ฆูณ ดัง เบ นา ดอย แบลง อูพาราด, เฆ แฮะ กรึบ เฌา ปอ กาดัง. ฆูณ ดัง เบ ตี บอ มูห อาเทรา อี มูห ฆูณ อาบราฮัม ฆาย อานาโฮว. 3 ดอ อัน ตี โอว แฮะ แดะ อาบราฮัม อี มูห ฆูณ ดัง เบ ดอ กอย อัน นา ดอย อึม แบลง อูพาราด, ปี วี แยต ฮาว อัน ดี มืง กานัณ ดอน โปละ. โอว มืร แฮะ แตห หลูกหลาน อัน แบร กืน, แตห อัน มึห ฆอน อี จืร อาแซก. 4 อาแซก ตี ปี วี มึห ฆอน อี จืร อาโกบ ฆาย อาโซว. อาโซว ตี, โอว บอ แตห อัน กอย ดี นอน เซอี.^a อี มูห อาโกบ เฆ หลูกหลาน อาโกบ, เฆ แฮะ โลง ดี มืง แอฆึบ.

5 วาย อัน ตี โอว ปี วี จัร อาโมวแซ ฆาย อาโรน, แตห ฆาย จอย ฆูณ เบ. โอว บอ โบง บอ ดูก ตาง กาเซา แคง มืง แอฆึบ, แตห อึณ ปึอน ดี คยอด เลห ฆูณ เบ. 6 โอว แฮะ ฮอต ดึห เลห เบ แคง มืง แอฆึบ ตี, แตห เฆ ตัห ฌัม ดี อึม ดีโหนง เรณ. เฆ ดูอี แอฆึบ ตี วี ป็อะ ลักเลา บอ อึณปร็อง, วี คูงครัห โดบ ดี ปัน เฆ. 7 เฆ ฆูณ เบ บอ ซาคึร แดะ โอว, แตห โอว จอย เฆ. โอว มืร โบง แตห อึณ อับ ว็อง ดี กาแต เบ ฆาย ดูอี แอฆึบ เฆ ตี. โอว บอ แตห อึม นัมมูกซารา ซีลอย ซีลอย, แตห อึณ ปูน ยัม โตต เฆ ดูอี แอฆึบ. ลอง แปะ แฮะ โบง โอว แคง มืง แอฆึบ ตี, เบ แฮะ ฮอต ยึร. วาย อัน ตี, เบ มืร แฮะ กาดูห ดี กอย แคง แปร กาฮ็อห แบน ซีนัม แบน ซีนัม.

8 ดอ อัน ตี โอว วี ตึย เบ ฮาว ดี มืง อาโมวรีด อี กอย บลาก นา เลห ซีแง อึม แบลง ยอดาน. ดูอี เฆ ตี ปี บอ แฮะ กาโฆห ดี เบ มืร, โอว ยี แฮะ แตห เบ แป เฆ, แตห เบ ปึอน กาดาย เฆ. โอว มืร แฮะ ณอน เตา เฆ ดี อาต เบ. 9 ดอ อัน ตี คูนดีคัม อาบาลาก อี กอย แคง มืง โมวอาบ อี มูห ฆอน อาจีพอ, อัน วี กาโฆห ดี เบ. อัน บอ จัร อี เฮา ฮาว แดะ อาบาลาอัม อี มูห ฆอน อาปอซอ, แตห อัน ตัห ดืง เบ. 10 มาแล, โอว ยี ตู โทม โฆรห อาบาลาอัม. ปาย ตี อัน บอ วี ม็องการา ดัว ดี เบ, แตห เบ ลอด ดี อาบาลาก.

11 วาย อัน ตี เบ บอ วี กาโลห อึม แบลง ยอดาน, วี ฮาว ฌัม ดี มืง เยรีโคว. ดูอี แคง มืง เยรีโคว มืร กาโฆห ดี เบ. ดูอี เฮา อี กาโฆห ดี เบ, อึณ บอ มูห ดูอี อาโมยว อาโมวรีด, ดูอี อาโมยว เพเรซีด, ดูอี อาโมยว กานัณ, ดูอี อาโมยว เฮทีด, ดูอี อาโมยว ฆีฆาซีด, ดูอี อาโมยว ฮีวีด บอ ดูอี อาโมยว เยบูซีด. ดอ กาโฆห เฆ ดี เบ ตี, โอว ยี วี แตห เบ แป เฆ บอกาเฆลียด. 12 โอว บอ จัร มากาอาณ แยต ดี อาต เบ, แตห อึณ โฮว เตา คูนดีคัม ดูอี อาโมวรีด อา กาดัง, แตห เฆ เตา ดี อาต เบ. เบ ยี ตู โลว กาโฆห ตา มาปัวะ ลาง เฆ อัะ เบ. 13 โอว วี ดึห กาดาย ปี ตู กาดูห เบ ดี โดห ยัห มาเซ, บอ มาน มืง ปี ตู กาดูห เบ ดี แด. โอว วี อาบ โตต แตห เบ ปึอน ดี กอย. ดอ ตี นี เบ มืร แฮะ ปึอน ดี โฮม เบล มางูน เฆ เบล เฮ นามัน ปี ตู กาดูห เบ ดี ซัม.’” เฌาพรา แตห อาโยวซูอา กาลาง ปาย ตี.

14 อาโยวซูอา ปี วี กาลาง ปอ อึณ ปัว ต็อห, “ดอ ตี นี, แตห เบ มึห น็อห หมาน เซเซ, แตห เบ โรวเซ เฌาพรา บอ โบง ฆาน อัน เฌา. แตห เบ แวน เฌา ปี ดึอม กรึบ ฆูณ ดัง เบ ดอ กอย เฆ นา ดอย อึม แบลง ตาง, บอ แคง มืง แอฆึบ ตึอน. แตห เบ วี กรึบ มี เฌาพรา. 15 เซ เบ ยี ตู มึห น็อห ซี กรึบ เฌาพรา, แตห เบ ร็อห อาตึร นี, เบ ดี กรึบ เฌาพรา กาดัง เหมา. เบ ดี กรึบ เฌา ปี ดึอม กรึบ ฆูณ ดัง เบ อี กอย แคง มืง นา ดอย อึม แบลง ตาง ตึอน? เซ อาว ปาย ตี มืร, เบ ดี กรึบ เฌา ปี กรึบ ดูอี อาโมวรีด อี กอย แคง มืง โดง กอย เบ นี? อี มูห โอว บอ ดูอี แคง อึณโฮม โอว, เย ยี ดี กรึบ มี เฌาพรา อู กาดัง นี.”

16 เฆ ดูอี กืน วี ต็อห, “เย ตู แวน เฌาพรา ดอ เหมา. เย มืร ตู วี ฮาว กรึบ เฌา ปี กรึบ อี เฮา. 17 เฌาพรา อี มูห เฌาพรา ปี กรึบ เย, อัน แฮะ ทูด เลห เย บอ ฆูณ เย แคง มืง แอฆึบ อี มูห โดง แฮะ แบน เย หมาย อี เฮา. อัน เฌา แฮะ วี โบง อี หมึอม อาม กาเซา แตห เย ยึร. อัน บอ ฆ็อง แร เย, แตห เย กอ ปวน โตต มืง โดง แฮะ ตัห เย. 18 ดอ ลึบ ตัห เย แคง มืง นี มืร, เฌาพรา แฮะ โฮว เตา ดูอี อาโมวรีด อี กอย ดี นี. โกบ อึณ ปาย ตี เย ดี กรึบ มี เฌาพรา. โคว, อัน เฌา มูห เฌาพรา ปี กรึบ เย.”

19 มาแล, อาโยวซูอา วี ต็อห ดี เฆ, “เบ ตู ปึอน ดี กรึบ เฌาพรา. เฌาพรา ตี, อัน มูห เฌาพรา อี ซีงา บอด. เซ เบ กาบัห ดี เฌาพรา, อัน เฌา ตู คัม. อัน มืร ตู ฆ็อห แวน หมาบ เบ. 20 เซ เบ แวน อัน เฌา วี กรึบ เฌา ปอ กาดัง, เฌาพรา มืร ดี แวน เบ, ตู ยอด แมน เบ. อัน เฌา ปี บอ แฮะ ดึอม เฆฌู เบ มืร, อัน ดี วี ปยาต แวน เบ.”

21 แฮะ ฮอต เฆ ดูอี กืน ปี วี ต็อห ดี อาโยวซูอา, “อาว มูห ปาย ตี เย ดี กรึบ มี อัน เฌา อี มูห เฌาพรา ปี กรึบ เย.”

22 อาโยวซูอา ปี วี ต็อห ดี เฆ, “เบ แฮะ วี แบน ซักเซ ลอง แฮะ ร็อห เบ ดี กรึบ มี เฌาพรา ปี กรึบ เอ.” เฆ มืร วี ต็อห, “แฮะ หมาน, เย แฮะ แบน ซักเซ. เย แฮะ ร็อห ดี กรึบ มี เฌาพรา อู กาดัง ตี.”

23 อาโยวซูอา มืร วี เบลห อามีง ต็อห, “เซ อึณ ปาย ตี แตห เบ แวน เฌา ปี กรึบ อี เฮา อี ซี กอย กาแต เบ นี. แตห น็อห เบ วี โฆม ฆึบ กรึบ มี เฌาพรา ปี กรึบ ดูอี อีซาเรลัะ.”

24 ดอ อัน ตี เฆ ดูอี กืน วี กาโพรม ดี กาลาง ดี อาโยวซูอา ต็อห, “เย ดี กรึบ มี เฌาพรา ปี กรึบ เย. เย ดี บอ โทม โฆรห อัน เฌา ตี.”

25 ซีแง ตี ดอ กอย เฆ ดี มืง เซเคม ตึอน, อาโยวซูอา บอ แตห ดูอี กืน ดัว กาดีก ซัดฌา ดี เฌาพรา. 26 อาโยวซูอา บอ แดม อูน โฆรห เฆ ตี แคง บับ ดารา เฌาพรา. อัน บอ ดึห มาว ตาง, เบลห กาจ็อง ครึม เฮ เทเรบ อี กอย กาตัด โดง ซีงา บอด โดง กรึบ เฆ เฌาพรา.

27 อัน วี กาลาง ดี เฆ ดูอี กืน ต็อห, “มาว ตาง นี แฮะ แบน ซักเซ ลอง แปะ แฮะ โบง เอ อาตึร นี. อัน แฮะ ฮอต ยึร โฆรห ปี กาลาง เฌาพรา ดอน โมยว. ปาย ตี อัน ดี บอ แตห เบ โหลห หมาบ เบ, เซ เบ โบง กาบัห ดี เฌาพรา ปี กรึบ เบ ตี.”

28 แฮะ ฮอต, อาโยวซูอา บอ แตห ดูอี กืน เวณ โดง กอย เฆ อี มูห คาฆูน เฆ ราง อาเซ ราง อัน.

29 วาย อัน ตี อาโยวซูอา อี มูห ฆอน อานูน ตึอน บอ ยัม. อัน มูห แดเจณ เฌาพรา. ดอ ยัม อัน อาซาก อัน แฮะ ปึอน อู มาย็อห ดี ฆึร ซีนัม. 30 เฆ บอ ฮาว ดีบ โดว โบ็ง อัน แคง กาดาย อี มูห คาฆูน อัน อี กอย แคง มืง ทีมานาเซรา ดี นอน อาเอพารีม บลาก นา กัว นอน กาอาด.

31 ดอ มูห โจว บาน อาโยวซูอา, เฆ ดูอี อีซาเรลัะ โดบ ซีคยา เฌาพรา. วาย อัน ตี มืร, เฆ บอ โดบ ซีคยา เฌาพรา ดอ มูห โจว บาน เฆ ดา ตาง อี อึบ อี แยต เฆ, อี แฮะ ยึร โตต แปะ แฮะ โบง เฌาพรา ดี เฆ ดูอี อีซาเรลัะ.

32 กาอาง อาโยว ตึอน ปี ดึห ตัห เฆ ดูอี อีซาเรลัะ แคง มืง แอฆึบ, เฆ บอ ดีบ แคง มืง เซเคม. อึณ มูห กาดาย ปี จึห อาโกบ ตึอน ดี ฆอน อาฮาโมว อี มูห ฆูณ อาเซเคม. ดอ อัน ตี อัน แฮะ ดัว รึอน อู มาย็อห โบ็ง. กาดาย ตี แฮะ แบน คาฆูน เฆ ดูอี ครึร อาโยว.

33 อาเลอาซา อี มูห ฆอน อาโรน ตึอน มืร แฮะ ฮอต ยัม. เฆ บอ ดีบ โดว โบ็ง อัน แคง มืง ฆีบียา อี กอย แดง นอน อาเอพารีม. อึณ มูห กาดาย แปะ แฮะ กาซาง ดัว เฆ ดี ฆอน อีมาย อาโรน อี จืร อาพีเนฮาด.