1 เฌาพรา วี ม็องการา ดัว ดี เฆ ดูอี อีซาเรลัะ, แตห เฆ กอย ฆัด เฆียด, แกวะ แตห อึณ มึห รันซู เฆ อี แฮะ ดึอม กอย โรบ เฆ ดอน บลาก. ดอ อัน ตี อาโยวซูอา มืร แฮะ กัด กาเซา. 2 อัน บอ แดะ ตัห เฆ อี มูห ดา ตาง, เฆ อี อึบ อี แยต เฆ, เฆ ดา ตาง อี ซูงพยาด ดารา บอ เฆ ดา ตาง อี อึบ มืง. อัน บอ กาลาง ดี เฆ ต็อห, 3 “โอว แฮะ กัด กาเซา. ดอ กอย โอว โดบ เบ, เบ มืร แฮะ ฮอต ยึร ดอน โมยว แปะ แฮะ โบง เฌาพรา ปี กรึบ เบ ดี ดูอี อีซาเรลัะ, แตห อึณ บอ แบน อาฆยึร ดี เบ. อัน เฌา มืร แฮะ จอย ดา ซึก เบ กาโฆห. 4 โอว มืร แฮะ ดึห กาดาย ดูอี อี ซี ฆีด ซี กอย บอ กาดาย ดูอี แปะ แฮะ แป แฮะ ออง เย, แตห โอว กาย็อห ดัว ดี เบ, แตห อึณ แบน คาฆูน เบ. อึณ บอ จูห ดี อึม แบลง ยอดาน อี กอย บลาก นา เลห ซีแง, กอ วี ฌัม ดี อึม นัมมูกซารา อี กอย บลาก นา เฆต ซีแง. 5 เฌาพรา ปี กรึบ เบ ดี บอ ซูต เตา รันซู เบ, แตห เฆ เตา ฮาว ดี อาต เบ. เฆ ดี บอ เตา, แกวะ แตห เบ ซี ยึร เฆ. เบ ดี บอ ปึอน ดี อึบ กาดาย เฆ. เฌาพรา ปี กรึบ เบ แฮะ ดึอม กาลาง อูน ปาย ตี ดี เบ. 6 โกบ อึณ ปาย ตี แตห เบ ซาดีก ซีคยา ดี โบง โดบ แคะ ปี แดม อูน แคง บับ ดารา แปะ แฮะ แดม อูน อาโมวแซ. แกวะ แตห เบ วัห ดารา ตี คอ อี แจก. 7 เบ มืร ตู ปึอน ลาย กาฆึก ดี ดูอี เฮา อี ซี กอย กาแต เบ. เบ ตู ปึอน ฆาว เฌา ปี กรึบ เฆ. เบ ตู ปึอน แดะ เฆ ดอ ดืง กาแซณ เบ บอ ตู ปึอน โฆม ฆึบ ดี อาต เฌา ปี กรึบ เฆ ตี. 8 แตห เบ มึห น็อห กาดึก กาด็อะ ดี เฌาพรา ปี กรึบ เบ, แตห อึณ ปี แปะ แฮะ ดึอม โบง เบ อาต นี กอ ฌัม อาตึร นี.

9 เฌาพรา แฮะ ฮอต โฮว เตา ดูอี อี มึห โปลม ตาง บอ แฮณ กืน, แตห เฆ เลห ฮาว ดี อาต เบ. กอ ฌัม อาตึร นี, อาว มึห อี ปึอน คัม เบ ดอ เหมา. 10 ดูอี เบ อู วี ดี บอ แป รันซู อู แหรณ วี. โคว, เฌาพรา ปี กรึบ เบ แฮะ กอย รึม โดบ เบ. อัน เฌา จอย เบ กาโฆห, แตห อึณ บอ โดบ โฆรห ปี ดึอม กาแซณ อัน ดี เบ. 11 โกบ อึณ ปาย ตี แตห เบ ซาดีก ซีคยา ซีคยา, แตห เบ ร็อก เฌาพรา ปี กรึบ เบ.

12 เซ เบ ยี แวน เฌาพรา, วี แบน ฆึก ดูอี เฮา อี ซี ฆีด ซี กอย กาแต เบ ตี, เซ เบ วี คัด ดึห เฆ, วี ลึบ ลึบ เลห เลห กาแต เฆ, เซ เฆ มืร ลึบ ลึบ เลห เลห กาแต เบ, 13 เบ โลว นับ ซีคยา, นา อาต นี ฮาว เฌาพรา อี มูห เฌาพรา ปี กรึบ เบ, อัน อาว ฮู โฮว เตา ดูอี เฆ ตี กาแต เบ. อาว วัน มี แคะ ตี. อึณ ดี แบน อาเพ ดี เบ อี ปี อี ดีณ ยอต เฆ คืม บอ ฆึห กาเดา. อึณ ดี ปี บอ อึณเพียะ อี มัห กาตูะ เบ, แตห อึณ เซา กาเซา. เซ อาว ปาย ตี อึณ ดี บอ ปี กาอัห อี แฮะ ลึบ แคง งาย เบ. อาโมยว ตี, อึณ ดี บอ โบว แบน ดี เบ, แกวะ แตห อึณ ซี มึห เบ คอ อู วี แคง มืง บอด, มืง หมึอม แปะ แฮะ ดัว เฌาพรา ปี กรึบ เบ ดี เบ.

14 ดอ ตี นี, โอว แหนน อาว ฮู กอย เหลณ. เบ ยี แฮะ นับ ซีคยา แคง น็อห เบ ลอง แปะ แฮะ กาแซณ เฌาพรา นา บอด นา หมึอม ปี ดี ม็องการา ดัว อัน ดี เบ, อึณ ตู โยม ตู ฆาด คอ อู โมยว. อึณ ยี ซี เฌะฌูง โตต ดอน โมยว. 15 ปาย ตี อัน เฌา แฮะ ต็อห ดี ดัว นา บอด นา หมึอม ดี เบ บอกาเฆลียด. ปาย ตี อัน เฌา มืร ปี ดี วี ดัว อาเพ อาเร ดี เบ แตห เบ คัม แคะ ปี ดัม อัน ซาดีก ดี เบ, แตห เบ กอ ชึม โตต, แกวะ แตห เบ ปึอน ดี กอย แคง กาดาย มืง บอด แปะ แฮะ ดัว อัน เฌา ดี เบ นี. 16 เซ เบ ตู โบง โดบ ปี กาแซณ เฌาพรา ปี กรึบ เบ ดี เบ, เซ เบ วี ฮาว กรึบ เฌา ปอ กาดัง, อัน เฌา ดี บอ รู กาเซา ดี เบ บอ ดัม หมาบ ดี เบ, โบง แตห เบ ลึร ชึม ครัน ครัน. แกวะ แตห เบ ซี ฆีด คอ อู วี แคง มืง บอด, มืง หมึอม แปะ แฮะ อาบ เฌาพรา ปี กรึบ เบ ดี เบ.”