1 วาย อัน ตี อาโยวซูอา วี แดะ ตัห ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน. อัน วี กาลาง ดี เฆ ต็อห, 2 “เบ แฮะ โบง โตต ดอน โมยว แปะ แฮะ กาลาง อาโมวแซ อี มูห แดเจณ เฌาพรา ตึอน. เบ มืร แฮะ โทม โฆรห ดอน โมยว แปะ แฮะ กาลาง โอว. 3 แฮะ เหลณ กาเซา กอ ฌัม อาตึร นี เบ มืร ตู แวน บีนอง เบ. เบ มืร แฮะ โบง โดบ แคะ ปี ต็อห เฌาพรา ปี กรึบ เบ แตห เบ โบง. 4 ดอ ตี นี เฌาพรา อี มูห เฌาพรา ปี กรึบ เบ แตห ครึร บีนอง เบ ปึอน ดี กอย หนีม, กอย ดาคึย, แตห อึณ โดบ ปี ดึอม ดัว อัน กาดีก ซัดฌา. โกบ อึณ ปาย ตี แตห เบ วี เวณ ดี กาง เบ, แตห เบ วี ฮาว ดี มืง อี กอย บลาก นา เลห ซีแง อึม แบลง ยอดาน, อี มูห โดง แปะ แฮะ อาบ อาโมวแซ อี มูห แดเจณ เฌาพรา ดี เบ. 5 แตห เบ ซาดีก บอ คัด น็อห ดี โบง โดบ ดารา บอ โทม ปี กาลาง อูน อาโมวแซ อี มูห แดเจณ เฌาพรา. แตห บอ น็อห บอ พึอม เบ ร็อก เฌาพรา อี มูห เฌาพรา ปี กรึบ เบ. แตห เบ โบง ปี อึง อัน เฌา บอ โดบ ดารา อัน, กาดึก กาด็อะ ดี อัน บอ โบง ฆาน อัน เฌา.”

6 อาโยวซูอา แฮะ ฮอต กาลาง ปาย ตี อัน ม็องการา ดัว ดี เฆ บอ เบลห แตห เฆ เวณ. เฆ มืร เลห ดี ตี, วี วีว ดี ทึบ เฆ. 7 อาโมวแซ แฮะ ดึอม ดัว อูน มืง บาซัน ดี เฆ ครึร อามานาเซ อาดา อู กาแต. เฆ อี ซี ฆีด แคง ครึร อามานาเซ อาดา ปอ กาแต, อาโมวแซ แฮะ แตห เฆ กอย รึม โดบ บีนอง เฆ บลาก นา เฆต ซีแง อึม แบลง ยอดาน. อาต เวณ เฆ ดี มืง บาซัน, อาโยวซูอา วี ม็องการา ดัว ดี เฆ. 8 อัน ต็อห, “แตห เบ ดึห โกรวกราม เบ อี แฮะ กืน กาเซา บอ โดว ซัดดาวา เบ บอ รึอน เฆ ครีว เบ, ดึห บอ บ็อง เดณ เฆ ฮีน บอ ครึง ตา เบ อี แฮะ กืน กาเซา. แตห เบ วี เวณ โดง กอย เบ, แตห เบ ดึห โกรวกราม แปะ แฮะ พาด ตัห เบ ดี รันซู เบ, วี กาซาง ดัว ดี บีนอง วอแว เบ.”

9 แฮะ ฮอต ปาย ตี เฆ ดูอี ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน, เฆ บอ เวณ โดง กอย คาฆูน เฆ. เฆ บอ ลาย กาฆ็อห ดี เฆ ดูอี อีซาเรลัะ ดอ กอย เฆ ดี มืง ซีโลว แคง กาดาย มืง กานัณ ตึอน. เฆ บอ วี เวณ โดง กอย เรา เฆ บอ มืง เฆ แคง มืง ฆีเลอาด อี มูห กาดาย แปะ แฮะ จัร เฌาพรา ดี อาโมวแซ, แตห อัน ดัว ดี เฆ.

10 เฆ บอ ฮาว ฌัม โดง จืร ฆีลีโอด อี กอย โคบ อึม แบลง ยอดาน อี ซี มูห กาดาย แคง มืง กานัณ ตึอน. ดอ อัน ตี เฆ ดูอี ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน เฆ บอ โบง กาโช็ง หลู ตาง อู โบ็ง โคบ อึม แบลง ยอดาน ตี. 11 เฆ ดูอี อีซาเรลัะ บอ วี ยึร ลอง เฆ ดูอี ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน แฮะ โบง กาโช็ง หลู อี กอย แคง มืง กานัณ ดี มืง ฆีลีโอด แคง กาดาย เฆ ดูอี อีซาเรลัะ โคบ อึม แบลง ยอดาน ตึอน. 12 เฆ แฮะ ฮอต ยึร ปาย ตี แคะ กอย เฆ ดูอี กืน บอ ตัห กาฌูะ ดี มืง ซีโลว, แตห เฆ ปึอน ดี แรน ซึก, ต็อห ดี ฮาว กาโฆห ดี บีนอง เฆ.

13 ปาย ตี เฆ ดูอี อีซาเรลัะ บอ จัร ดา อี หลู ดี เฌาพรา อี จืร อาพีเนฮาด อี มูห ฆอน อาเลอาซา ตึอน, แตห อัน ฮาว ดี มืง ฆีเลอาด ดี โดง กอย เฆ ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน. 14 เฆ ดา ตาง ฆึร วี อี มูห อาดา อู ครึร อู วี, เฆ มืร ฮาว โดบ อาพีเนฮาด อี มูห ดา อี หลู ดี เฌาพรา ตึอน.

15 เฆ แฮะ ฮอต ฮาว ฌัม ดี มืง ฆีเลอาด ดี โดง กอย เฆ ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน, เฆ วี ต็อห, 16 “เฆ ดูอี กืน อี มูห ดูอี ปี อึบ เฌาพรา บอกาเฆลียด เฆ ดีหมอด ต็อห, เหมา อึณ ปาย ปี โบง กาบัห เบ ดี เฌาพรา ปี กรึบ ดูอี อีซาเรลัะ ปาย นี? เบ แฮะ โบง กาโช็ง หลู อาดา เบ บอ ปีรู ดี เฌาพรา. เบ แฮะ ฮอต แวน เฌาพรา. 17 แตห เบ วี โหลห หมาบ แปะ แฮะ โบง เอ ดี นอน เบอูรา ดอ แฮะ แตห เฌาพรา ดูอี เอ คัม ดูก ตาง อี มูห เซา รอฆา. แปะ แฮะ คัม เอ ตี, เบ ทาง อึณ หณัม โฆรว? กอ ฌัม อาตึร นี, เอ หณัม โบง แตห เอ ซีงา, แตห เฌาพรา ฆ็อห แวน โตต หมาบ เอ ตี. 18 อาตึร นี, เบ แฮะ ต็อห ดี วัห เฌาพรา บอ อาว ฮู โดบ อัน เฌา. เซ เบ โบง กาบัห ดี เฌาพรา ปาย ตี แคหณา เฌาพรา ดี รู กาเซา ดี ดูอี อีซาเรลัะ ดอน อี. 19 เซ กาดาย แคง มืง เบ ตี แฮะ กาดาต, เซ อาว กาอาบ กรึบ เบ เฌาพรา ดี ตี, แตห เบ วี ตัห ดี กาดาย ปี อึบ เฌาพรา อี แฮะ ฮอต มึห ทึบ บีก บอด. แตห บอ เบ บอ เย กรึบ เฌาพรา มี โดง ตี. อาว โลว โบง กาโช็ง หลู ปอ อู โบ็ง อาดา เบ แดง กาโช็ง หลู ดี เฌาพรา ปี กรึบ เอ บอกาเฆลียด. อาว โลว โบง กาบัห ดี เฌาพรา บอ โบง กาบัห ดี เย. 20 แตห เบ วี โหลห ลอง แปะ แฮะ โบง ลูต อาคาน อี มูห ฆอน อาเฌนรา อี แฮะ กาดูห ดี คัม กาซัม ดืง. เฌาพรา แฮะ ปีรู กาเซา ดี ดูอี กืน ดี ดูอี อีซาเรลัะ บอกาเฆลียด. อาว มูห อาคาน ยัม อัน อู วี โกบ หมาบ ปี โบง ลูต อัน ตี.”

21 ปาย ตี เฆ ดูอี ครึร อารูเบน, ครึร อาฆัด บอ ครึร อามานาเซ อาดา อู กาแต ตึอน, เฆ บอ วี กาโพรม ดี กาลาง ดี เฆ ดา ตาง อี อึบ ครึร เฆ อี กอย บลาก นา เฆต ซีแง ตึอน ต็อห, 22 “เฌาพรา อี อึบ โตต ดอน โมยว มูห เฌาพรา อี กอย มี อู กาดัง. เฌาพรา อี อึบ โตต ดอน โมยว อัน แฮะ นับ ลอง อัน ตี. แตห เบ ดูอี อีซาเรลัะ มืร นับ, เซ เย แฮะ กาบัห ดี เฌาพรา บอ ตู มึห น็อห ซืร น็อห หมาน ดี อัน เฌา, แกวะ แตห เย ลอด คัม หมาบ เย อาตึร นี. มาแล, เฌาพรา แฮะ นับ, บอ เย ซี แตห เฆ ดูอี อีซาเรลัะ นับ, 23 เย ตู โบง กาโช็ง หลู อาดา เย, โกบ ซี กาบัห เย ดี เฌาพรา. เย มืร ดู ซี หลู ปี ดี หลู อี โดะ ดี เงา, ปี หลู ดีฆาว บอ ปี หลู อี กอย กาฌูะ โฮม รึม ดี กาโช็ง หลู ตี. เซ เย มึก น็อห ปาย ตี แตห เฌาพรา ดัม หมาบ ดี เย.

24 เย ตู มึห ดี คราม ปาย ตี. เย โยว นา อาต นี ฮาว หลูกหลาน เบ ดี บอ ต็อห ดี หลูกหลาน เย, ‘เฌาพรา ปี กรึบ เย ดูอี อีซาเรลัะ, อาว มูห เฌาพรา ปี กรึบ เบ. 25 เฌาพรา แฮะ ฮอต แตห อึม แบลง ยอดาน กาคัน ดี กาแต เอ. เบ อี มูห ดูอี อารูเบน บอ ดูอี อาฆัด, เบ อาว ฮู กาอาบ กรึบ เฌาพรา ปี กรึบ เย.’ เย โยว หลูกหลาน เบ ตู แตห หลูกหลาน เย กรึบ เฌาพรา.

26 โกบ อึณ ปาย ตี เย ต็อห, ‘เย โบง กาโช็ง หลู.’ อาว มูห เย ดี หลู ปี ดี หลู อี โดะ ดี เงา, บอ ปี ดี หลู อาโมยว เฮา. 27 เย โบง กาโช็ง หลู นี, แตห อึณ แบน ซักเซ ดี กาแต เบ ฆาย เย บอ ดี กาแต หลูกหลาน เบ ฆาย หลูกหลาน เย. แตห อึณ บยัะ, เย ดี กรึบ เฌาพรา นา อาต ทึบ บีก บอด บอ หลู ปี ดี หลู อี โดะ ดี เงา, ปี ดี หลู แบน โมยว แบน โมยว บอ ปี ดี หลู อี กอย กาฌูะ โฮม รึม. บอ นา อาต นี ฮาว, แกวะ แตห หลูกหลาน เบ มึห ดี ต็อห ดี หลูกหลาน เย ลอง ตู ลาย บาะ เย ดี เฌาพรา ปี กรึบ เบ.

28 เย กาพา ต็อห, เซ ฮี โบว แบน ปาย ตี ดี เย บอ ดี หลูกหลาน เย, เย บอ เฆ ดี บอ มึห ดี ต็อห, ‘ยอด, ดา เอ เฆ ฆูณ เอ แฮะ โบง กาโช็ง หลู อี ปี กาโช็ง หลู ดี เฌาพรา ตึอน. อาว มูห อี ปึอน หลู ปี ดี หลู อี โดะ ดี เงา บอ ปี ดี หลู อาโมยว เฮา. อึณ ยี บยัะ ดี ดูอี เบ ฆาย ดูอี เย ลอง กรึบ เอ เฌาพรา อู กาดัง.’

29 เย นี เย ดืน ตู โบง อี กาบัห ดี เฌาพรา. เย ดืน ตู วัห เฌาพรา บอ ซัม กาโช็ง หลู แตห เย โดะ ปี ดี หลู นา แดง บอ ปี ดี หลู ดีฆาว บอ ปี ดี หลู อาโมยว เฮา. เย ดืน ตู โบง ปาย ตี ดอ เหมา.”

30 ดา อี หลู ดี เฌาพรา อี จืร อาพีเนฮาด บอ เฆ ดา ตาง ดูอี อีซาเรลัะ ฆึร วี, ดอ ยึร เฆ โฆรห ปี กาลาง ครึร อารูเบน, ครึร อาฆัด บอ ครึร อามานาเซ อาดา อู กาแต ดี เฆ, อึณ บอ ล็อะ กาเซา น็อห เฆ. 31 อาพีเนฮาด อี มูห ฆอน อาเลอาซา ตึอน, อัน วี กาลาง ดี เฆ ต็อห, “อาตึร นี เย แฮะ นับ, เฌาพรา แฮะ กอย รึม โดบ เอ. เบ ตู ปีรู ตู โบง กาบัห ดี เฌาพรา. ดอ ตี นี เบ แฮะ แตห เอ ดูอี อีซาเรลัะ บอกาเฆลียด ลอด แคง ดูก ปี ดี ดัม เฌาพรา หมาบ ดี เอ.”

32 แฮะ ฮอต ปาย ตี ดา อี หลู ดี เฌาพรา อาพีเนฮาด อี มูห ฆอน อาเลอาซา บอ เฆ ดา ตาง ตึอน, เฆ บอ เลห ตัะ มืง ฆีเลอาด, วี เวณ ดี มืง กานัณ โดง กอย เฆ ดูอี อีซาเรลัะ. เฆ บอ กาลาง ลอง แปะ แฮะ ลาย กาลาง เฆ ดี บีนอง เฆ, แตห เฆ ดูอี อีซาเรลัะ โทม. 33 อึณ บอ ล็อะ น็อห เฆ ดูอี อีซาเรลัะ. เฆ บอ อืบ มยูก เฌาพรา. วาย อัน ตี ลอง ดี แรน เฆ ซึก, ฮาว ปยาต มืง โดง กอย เฆ ดูอี อารูเบน บอ ดูอี อาฆัด ตึอน, เฆ มืร อาว ฮู วี กาลาง มาเซ.

34 เฆ ดูอี ครึร อารูเบน บอ ครึร อาฆัด, เฆ วี ต็อห, “กาโช็ง หลู นี, แตห อึณ บยัะ ดี เอ บอ ดี เฌาพรา ปี กรึบ เอ ลอง ตู กรึบ เอ เฌา ปี กรึบ อี เฮา.” แฮะ ฮอต ปาย ตี เฆ บอ แตห กาโช็ง ตี จืร, “โดง บยัะ.”